ໂດຍໄດ້ດຳເນີນແຕ່ວັນທີ 15 – 17 ມິຖຸນາ ຢູ່ນະຄອນ Evian – les – Bains, ທາງທິດຕາເວັນອອກປະເທດ ຝລັ່ງ, ກອງປະຊຸມສຸດຍອດ G7 ປີນີ້ ມີຫົວຂໍ້ “ແກ້ໄຂບັນດາບັນຫາທີ່ຂາດຄວາມດຸ່ນດ່ຽງໃນທົ່ວໂລກ”.
ປັດໄຈ Donald Trump
ກ່ອນເວລາໄຂກອງປະຊຸມສຸດຍອດ G7 ປີນີ້ ຢູ່ Evian, ວັນທີ 14 ມິຖຸນາ, ອາເມລິກາ ແລະ ອີຣານ ແຈ້ງໃຫ້ຊາບວ່າ ບັນລຸໄດ້ຂໍ້ຕົກລົງ ແນໃສ່ຢຸດຕິການປະທະກັນຢູ່ຕາເວັນອອກກາງ, ມຸ່ງໄປເຖິງການສ້າງພື້ນຖານສັນຕິພາບຍາວນານຢູ່ພາກພື້ນ. ສຳລັບບັນດາປະເທດສະມາຊິກ G7 ລວມມີ (ອາເມລິກາ, ອັງກິດ, ຝລັ່ງ, ເຢຍລະມັນ, ອີຕາລີ, ການາດາ, ຍີ່ປຸ່ນ) ນີ້ແມ່ນຂ່າວທີ່ຕັ້ງໜ້າ, ຍ້ອນການປະທະກັນຢູ່ຕາເວັນອອກກາງ, ລວມທັງບັນດາຄວາມມານະພະຍາຍາມຢຸດຕິບັນດາການເຄື່ອນໄຫວການທະຫານພວມເພີ່ມຂຶ້ນຢູ່ ລີບັງ ແລະ ການເປີດຊ່ອງແຄບທະເລ Hormuz ຄືນໃໝ່, ຄາດວ່າ ແມ່ນໜຶ່ງໃນບັນດາຫົວຂໍ້ປຶກສາຫາລືທີ່ສັບສົນທີ່ສຸດໃນກອງປະຊຸມສຸດຍອດ G7 ປີນີ້.
ຕາມທ່ານນາງ Sylvie Matelly, ນັກຊ່ຽວຊານກ່ຽວກັບການພົວພັນສາກົນ, ຜູ້ອຳນວຍການສະຖາບັນ Jacques Delors (ຝລັ່ງ), ຂໍ້ຕົກລົງທີ່ຫາກໍ່ບັນລຸ, ເຖິງວ່າຍັງບໍ່ທັນປະກາດເນືິ້ອໃນລະອຽດ ໄດ້ຫຼຸດຜ່ອນກຳລັງກົດດັນຫຼາຍຢ່າງໃຫ້ແກ່ບັນດາວາລະປຶກສາຫາລືຢູ່ Evian, ເພາະວ່າ ສ່ວນຫຼາຍບັນດາປະເທດສະມາຊິກທີ່ຍັງເຫຼືອໃນ G7 ລ້ວນແຕ່ມີຄວາມບໍ່ລົງລອຍກັນກັບອຳນາດການປົກຄອງ ອາເມລິກາ ຂອງທ່ານປະທານາທິບໍດີ ອາເມລິກາ Donald Trump ໃນວິທີການສຳຜັດກັບການປະທະກັນຢູ່ຕາເວັນອອກກາງ. ບັນດາປະເທດນີ້ (ຝລັ່ງ, ເຢຍລະມັນ, ອັງກິດ, ການາດາ, ອີຕາລີ, ຍີ່ປຸ່ນ) ບໍ່ພໍໃຈ ຍ້ອນວ່າ ເລື່ອງ ອາເມລິກາ (ແລະ ອິດສະຣາແອັນ) ບໍ່ປຶກສາຫາລືກັບບັນດາພັນທະມິດກ່ອນເວລາດຳເນີນການບຸກໂຈມຕີ ອີຣານ ໃນວັນທີ 28 ກຸມພາ ແລະ ປະຕິເສດເຂົ້າຮ່ວມການປະທະກັນໂດຍກົງ, ເຖິງວ່າທ່ານປະທານາທິບໍ ອາເມລິກາ Donald Trump ເຄີຍຮຽກຮ້ອງເປັນຫຼາຍເທື່ອ. ດັ່ງນັ້ນ, ເລື່ອງການປະທະກັນຢູ່ຕາເວັນອອກກາງ ມີຄວາມຄືບໜ້າບຸກທະລຸຊ່ວຍໃຫ້ການພົວພັນລະຫວ່າງ ອາເມລິກາ ກັບບັນດາສະມາຊິກທີ່ຍັງເຫຼືອໃນ G7 ຫຼຸດຜ່ອນຄວາມເຄັ່ງຕຶງຫຼາຍກວ່າ. ໄປຄຽງຄູ່ກັນນັ້ນ, ເລື່ອງບັນລຸໄດ້ຂໍ້ຕົກລົງກັບ ອີຣານ ອາດຈະໄດ້ຮັບຖືວ່າແມ່ນໄຊຊະນະທາງການທູດທີ່ສຳຄັນສຳລັບທ່ານປະທານາທິບໍດີ ອາເມລິກາ Donald Trump ເອງ ແລະ ສິ່ງດັ່ງກ່າວອາດຈະຊ່ວຍໃຫ້ທ່ານປະທານາທິບໍດີ ອາເມລິກາ ເດີນທາງໄປຍັງ Evian ດ້ວຍຈິດໃຈທີ່ສະຫວາດສະເຫວີຍກວ່າ, ຈາກນັ້ນ ກໍຊ່ວຍໃຫ້ການຄາດເດົາແນວຄິດຂອງທ່ານໄດ້ຢ່າງງ່າຍດາຍກວ່າ. ຕາມນັກຊ່ຽວຊານ Sylvie Matelly ແລ້ວ, ນີ້ແມ່ນປັດໄຈມີຄວາມສຳຄັນເປັນພິເສດ ຍ້ອນບົດຮຽນຈາກບັນດາກອງປະຊຸມ G7 ຂອງຊຸມປີກ່ອນ ຊີ້ໃຫ້ເຫັນ “ຄວາມຫຍຸ້ງຍາກໃນການຄາດເດົາແນວຄິດ” ຂອງທ່ານ Donald Trump ຍາມໃດກໍແມ່ນໜຶ່ງໃນບັນດາປັດໄຈທີ່ສົ່ງຜົນກະທົບຢ່າງໃຫຍ່ຫຼວງທີ່ສຸດຕໍ່ຜົນສຳເລັດຂອງກອງປະຊຸມ.
“ຄວາມຫຍຸ້ງຍາກໃນການຄາດເດົາແນວຄິດຂອງທ່ານປະທານາທິບໍດີ Donald Trump ແມ່ນສິ່ງທີ່ພວກເຮົາພວມຄ່ອຍໆທຳຄວາມລຶ້ງເຄີຍ, ແລະ ຂ້າພະເຈົ້າຄິດວ່າ ພວກເຮົາຕ້ອງມີການກະກຽມ. ຖ້າພວກເຮົາລຶ້ງເຄີຍກັບສິ່ງເຫຼົ່ານັ້ນ ກໍໝາຍຄວາມວ່າ ພວກເຮົາມີວິທີຄຸ້ມຄອງມັນ. ພວກເຮົາຮູ້ວິທີລະມັດລະວັງຕໍ່ການນຳໃຊ້ຄຳເວົ້າເພື່ອເຮັດໃຫ້ທ່ານ Trump ພໍໃຈ. ດັ່ງນັ້ນ, ພວກເຮົາຕ້ອງເຮັດແນວໃດເພື່ອຄຸ້ມຄອງສິ່ງເຫຼົ່ານັ້ນ ເມື່ອທ່ານ Trump ນັ່ງເຂົ້າໂຕະເຈລະຈາ? ສິ່ງນັ້ນ ຈະແມ່ນບັນຫາສຳລັບຊາວເອີຣົບ ຢ່າງແທ້ຈິງ, ແລະ ຂ້າພະເຈົ້າຄິດວ່າ ຊາວເອີຣົບ ເຮັດສິ່ງເຫຼົ່ານັ້ນໄດ້ດີພໍສົມຄວນໃນຊຸມເດືອນຜ່ານມາ”.
ຫຼຸດຜ່ອນການຂາດຄວາມດຸ່ນດ່ຽງໃນທົ່ວໂລກ
ໄປຄຽງຄູ່ກັບບຸລິມະສິດກ່ຽວກັບການປະສານສົມຄົບການພົວພັນກັບ ອາເມລິກາ, ປະເທດເຈົ້າພາບ ຝລັ່ງ ກໍປະກາດບາງເນື້ອໃນຈຸດສຸມໃຫ້ແກ່ກອງປະຊຸມສຸດຍອດ G7 ປີນີ້, ໂດຍປິ່ນອ້ອມສອງເສົາຄ້ຳຫຼັກ. ທີໜຶ່ງແມ່ນ ຫຼຸດຜ່ອນການຂາດຄວາມດຸ່ນດ່ຽງດ້ານເສດຖະກິດມະຫາພາກທົ່ວໂລກ, ເພີ່ມທະວີການປະສານສົມທົບລະຫວ່າງບັນດາພື້ນຖານເສດຖະກິດໃຫຍ່ເພື່ອຄຸ້ມຄອງລະດັບໜີ້ສິນສູງ, ໄພເງິນເຟີ້ ແລະ ການແຕກຫັກດ້ານການເງິນ. ຖັດມາແມ່ນພິຈາລະນາຄືນຂອບຂະໜາດການພັດທະນາທົ່ວໂລກ, ສ້າງບັນດາສາຍພົວພັນຄູ່ຮ່ວມມືທົ່ວໂລກຢ່າງມີຄວາມຍຸຕິທຳກວ່າ, ຕ່າງຝ່າຍຕ່າງມີຜົນປະໂຫຍດ ແລະ ປະຕິຮູບຄວາມສາມັກຄີສາກົນ ແລະ ລະບົບການເງິນ. ກ່ຽວກັບບັນດາຫົວຂໍ້ລະອຽດ, ກອງປະຊຸມສຸດຍອດ G7 ປີນີ້ ປຶກສາຫາລື 7 ຂົງເຂດ, ລວມມີ: ການເງິນ, ການພັດທະນາ, ການທູດ (ວິກິດການ), ການຄ້າ, ເຕັກນິກດີຈີຕອນ, ການເມືອງພາຍໃນ ແລະ ສິ່ງແວດລ້ອມ/ພະລັງງານ. ທ່ານ Cédric Dupont, ສຈ. ການພົວພັນສາກົນ ສັງກັດສະຖາບັນຄົ້ນຄວ້າຫຼັງມະຫາວິທະຍາໄລ Geneva, ໃຫ້ຂໍ້ສັງເກດວ່າ:
“ໂຄງການດຳເນີນງານປິດລັບຂອງ G7 ແມ່ນຊອກຫາວິທີເຄື່ອນໄຫວ ແລະ ການບໍລິຫານໂລກແນວໃດ ຖ້າບໍ່ມີ ຈີນ. ເຂົາເຈົ້າສົນໃຈເຖິງບັນດາບັນຫາຄວາມໝັ້ນຄົງຢູ່ບັນດາພາກພື້ນຄື ຕາເວັນອອກກາງ, horn of Africa (ເຂົາ ອາຟະລິກາ), ລັດເຊຍ ແລະ ຢູແກຼນ. ເຂົາເຈົ້າສົນໃຈເຖິງການຊ່ວງເສັງເຕັກໂນໂລຢີ, ປັນຍາປະດິດ, ແຮ່ທາດທີ່ຈຳເປັນ. ແລະ ເຂົາເຈົ້າກໍມີຄວາມສົນໃຈເຖິງບັນຫາສິ່ງແວດລ້ອມຫຼາຍພໍສົມຄວນ, ໝາຍຄວາມວ່າ ເຮັດແນວໃດເພື່ອຫັນຈາກພື້ນຖານເສດຖະກິດສີນ້ຳຕານໄປສູ່ພື້ນຖານເສດຖະກິດສີຂຽວ”.
ໂດຍສືບທອດບັນດາຄຳໝັ້ນສັນຍາຈາກກອງປະຊຸມສຸດຍອດ G7 ປີ 2025 ຢູ່ ການາດາ, ບັນດາຫົວຂໍ້ກ່ຽວກັບປັນຍາປະດິດ (AI) ກໍແມ່ນບຸລິມະສິດໃຫຍ່ຂອງກອງປະຊຸມ G7 ປີນີ້. ເຖິງຢ່າງໃດກໍຕາມ, ບັນດາວາລະປຶກສາຫາລືກ່ຽວກັບ AI ກໍອາດຈະກໍ່ຄວາມບໍ່ລົງລອຍກັນລະຫວ່າງ ອາເມລິກາ ແລະ ບັນດາປະເທດ G7 ອື່ນ, ໃນເວລາກ່ອນທີ່ຈະດຳເນີນກອງປະຊຸມປີນີ້, ວັນທີ 12 ມິຖຸນາ, ອຳນາດການປົກຄອງ ອາເມລິກາ ໄດ້ຊີ້ນຳໂຈະການໃຊ້ສິດເຂົ້າສອງລະບົບ AI (Fable 5 ແລະ Mythos) ທີ່ກ້າວໜ້າທີ່ສຸດຂອງ ບໍລິສັດເຕັກໂນໂລຢີ Anthropic ອາເມລິກາ ທີ່ຫາກໍ່ເປີດຕົວ ສຳລັບພົນລະເມືອງຕ່າງປະເທດ, ເຖິງວ່າພວມດຳລົງຊີວິດຢູ່ ອາເມລິກາ ຫຼື ປະເທດອື່ນ, ນັບທັງພະນັກງານຂອງບໍລິສັດ ຍ້ອນສາເຫດ “ຄວາມໝັ້ນຄົງແຫ່ງຊາດ”. ຂໍ້ຕົກລົງນີ້ຖືກຫຼາຍປະເທດພັນທະມິດ ຂອງ ອາເມລິກາ, ໂດຍສະເພາະແມ່ນບັນດາປະເທດ ເອີຣົບ ຄັດຄ້ານ, ຖືນີ້ແມ່ນການກະທຳພາໃກ້ເກີດການແຕກຫັກດ້ານເຕັກໂນໂລຢີ, ອາດຈະສ້າງຮົ້ວກີດຂວາງສຳລັບຄວາມມານະພະຍາຍາມຮ່ວມມືທົ່ວໂລກກ່ຽວກັບ AI./.
