ມະຕິເລກທີ 10 ກ່ຽວກັບການພັດທະນາເສດຖະກິດທີ່ມີເງິນລົງທຶນໂດຍກົງຈາກຕ່າງປະເທດ ວາງເປົ້າໝາຍຮອດປີ 2030, 75% ທຶນລົງທຶນໂດຍກົງຈາກຕ່າງປະເທດ (FDI) ແມ່ນມາຈາກບັນດາພື້ນຖານເສດຖະກິດພັດທະນາ, ມີເຕັກໂນໂລຢີສູງ. ມາດຖານສາກົນກ່ຽວກັບເຂດອຸດສາຫະກຳລຸ້ນໃໝ່ໄດ້ຮັບຖືວ່າແມ່ນ ປຶ້ມໜັງສືຜ່ານແດນ ເພື່ອດຶງດູດແຫຼ່ງທຶນລົງທຶນ FDI ທີ່ມີຄຸນນະພາບ. ສິ່ງນີ້ຮຽກຮ້ອງໃຫ້ ຫວຽດນາມ ຕ້ອງສ້າງບັນດາເຂດອຸດສາຫະກຳລຸ້ນໃໝ່ໂດຍໄວ ຖ້າຢາກສືບຕໍ່ດຶງດູດແຫຼ່ງທຶນລົງທຶນນີ້.
ຫັນເຂດອຸດສາຫະກຳເປັນສີຂຽວ: ໄມ້ງັດ ດຶງດູດແຫຼ່ງທຶນ FDI ຄຸນນະພາບສູງ
ໃນສະພາບການໂລກຫັນປ່ຽນໄປຍັງການພັດທະນາສີຂຽວຢ່າງແຮງນັ້ນ ອຸດສາຫະກຳສີຂຽວບໍ່ພຽງແຕ່ແມ່ນທ່າອ່ຽງເທົ່ານັ້ນ ຫາກຍັງແມ່ນຄວາມຮຽກຮ້ອງຕ້ອງການແບບບັງຄັບ ເພື່ອໃຫ້ ຫວຽດນາມ ຮັກສາການເຕີບໂຕສີຂຽວ ແລະ ຕອບສະໜອງບັນດາມາດຕະຖານການພັດທະນາແບບຍືນຍົງທົ່ວໂລກ. ລັດຖະບານ ໄດ້ປະຕິບັດວຽກງານຫັນເປັນສີຂຽວເປັນລະອຽດດ້ວຍດຳລັດ 35/2022/NĐ-CP ວ່າດ້ວຍການຄຸ້ມຄອງເຂດອຸດສາຫະກຳ ແລະ ຈົດໝາຍລັດຖະການເລກທີ 05/2025/TT-BKHĐT ແນະນຳຮູບແບບເຂດອຸດສາຫະກຳຊີວະພາບ. ນີ້ແມ່ນກອບນິຕິກຳ, ພື້ນຖານສຳຄັນເພື່ອໃຫ້ບັນດາທ້ອງຖິ່ນ ແລະ ວິສາຫະກິດ ປະຕິບັດການຫັນປ່ຽນຈາກຮູບແບບເຂດອຸດສາຫະກຳແບບເກົ່າໄປຍັງແບບຍືນຍົງ.
ຕົວຈິງສະແດງໃຫ້ເຫັນວ່າ ປັດຈຸບັນ, ບັນດານັກລົງທຶນໃຫຍ່ໃນໂລກ ບໍ່ພຽງແຕ່ຊອກຫາພື້ນຖານໂຄງລ່າງທີ່ມີຢູ່ແລ້ວ ຫາກຍັງເຂົາເຈົ້າຮຽກຮ້ອງຕ້ອງມີລະບົບນິເວດ “ສິນຄ້າສີຂຽວ”, ບ່ອນບັນດາໂຮງຈັກໂຮງງານຕ້ອງບັນລຸມາດຖານອັດສະລິຍະ ແລະ ຍືນຍົງນັບແຕ່ຂັ້ນຕອນການຜະລິດ. ທ່ານ ປອ ນາງ ຫງວຽນເຈິມແອັງ, ຜູ້ຄຸ້ມຄອງ ແຫ່ງຊາດ ເຂດອຸດສາຫະກຳຊີວະພາບທົ່ວໂລກ ໃຫ້ຮູ້ວ່າ:
ມະຕິເລກທີ 10-NQ/TW ຂອງກົມການເມືອງ ຫາກໍ່ປະກາດໄດ້ວາງອອກມາດຖານຢ່າງຂ້ຽວຂາດແມ່ນຮອດປີ 2030, 10% ບັນດາເຂດອຸດສາຫະກຳຂອງ ຫວຽດນາມ ຈະກາຍເປັນເຂດອຸດສາຫະກຳຊີວະພາບ. ນີ້ແມ່ນມະຕິທີ່ຖືກຕ້ອງ, ຄືເຂັມຊີ້ທິດໃຫ້ແກ່ບັນດາເຂດອຸດສາຫະກຳພັດທະນາ ແລະ ຫັນປ່ຽນເປັນອຸດສາຫະກຳຊີວະພາບ ແລະ ໃນທ່ວງທ່ານັ້ນ ການດຶງດູດ FDI ກໍ່ຈະເພີ່ມຂຶ້ນຕາມໄດ້ດີທີ່ສຸດ.
ປັດຈຸບັນ, ຫວຽດນາມ ມີເຂດອຸດສາຫະກຳເກືອບ 500 ແຫ່ງ ແລະ ກຸ່ມອຸດສາຫະກຳກວ່າ 1.000 ກຸ່ມ. ເຖິງຢ່າງໃດກໍຕາມ, ຫາກໍ່ມີເຂດອຸດສາຫະກຳດຳເນີນການຫັນປ່ຽນຕາມຮູບແບບຊີວະພາບ ປະມານ 1 – 2%. ໃນຂະນະນັ້ນ, ຈຳນວນໂຄງການສີຂຽວໃນບັນດາເຂດອຸດສາຫະກຳ ມີໝາກຜົນທີ່ຕັ້ງໜ້າກວ່າ. ໃນປີ 2025, ຫວຽດນາມ ມີ 300 ໂຄງການສີຂຽວໃນເຂດອຸດສາຫະກຳ, 6 ເດືອນຕົ້ນປີ 2026 ໄດ້ເພີ່ມຂຶ້ນປະມານ 800 ໂຄງການ.
ເລີ່ມເປີດເຄື່ອນໄຫວພື້ນຖານໂຄງລ່າງສີຂຽວ: ສັນຍານຢ່າງແຮງຈາກບັນດາທ້ອງຖິ່ນ
ການພັດທະນາເຂດອຸດສາຫະກຳລຸ້ນໃໝ່ບົນພື້ນຖານສີຂຽວ, ດີຈີຕອນແມ່ນທິດກ້າວເດີນທີ່ຕ້ອງເປັນໄປເພື່ອຍົກສູງຄວາມສາມາດແກ້ງແຍ້ງຂອງ ຫວຽດນາມ. ຫວ່າງແລ້ວນີ້, ທ່ານ ໂຮ່ກວັກຢຸງ ຮອງນາຍົກລັດຖະມົນຕີ ຫວຽດນາມ ຫາກໍ່ລົງນາມຂໍ້ຕົກລົງເລກທີ 1061/QĐ-TTg ກ່ຽວກັບການເປີດກວ້າງ ແລະ ປະກາດໃຊ້ຂໍ້ກຳນົດການເຄື່ອນໄຫວຂອງເຂດເຕັກໂນໂລຊີສູງ ນະຄອນໂຮ່ຈີມິນ (13/6/2026). ສິ່ງທີ່ເປັນໜ້າສົນໃຈ, ສຳລັບເຂດເປີດກວ້າງ, ເປົ້າໝາຍທີ່ວາງອອກແມ່ນມຸ່ງໄປເຖິງການສົມດຸ່ນກາກບອນກ່ອນປີ 2050, ເໝາະສົມກັບຄຳໝັ້ນສັນຍາພັດທະນາສີຂຽວ ແລະ ຍືນຍົງຂອງ ຫວຽດນາມ.
ໃນຂະນະນັ້ນ, ໂດຍແມ່ນໜຶ່ງໃນບັນດາສູນອຸດສາຫະກຳໃຫຍ່ຂອງທົ່ວປະເທດ, ນະຄອນດົ່ງນາຍ ກໍ່ພວມວາງເປົ້າໝາຍຮອດປີ 2030 ມີຢ່າງໜ້ອຍສຸດ 2 ເຂດອຸດສາຫະກຳໄດ້ຮັບກາຢັ້ງຢືນແມ່ນເຂດອຸດສາຫະກຳຊີວະພາບ, ຢ່າງໜ້ອຍສຸດ 10% ວິສາຫະກິດໃນບັນດາເຂດອຸດສາຫະກຳ ໝູນໃຊ້ບັນດມາດຕະການນຳໃຊ້ຊັບພະຍາກອນທຳມະຊາດຢ່າງມີປະສິດທິຜົນ ແລະ ການຜະລິດທີ່ສະອາດກວ່າ. ທ່ານ ຟ້າມວຽດເຟືອງ, ຮອງຫົວໜ້າຄະນະ, ຜູ້ຮັບຜິດຊອບ ຄະນະຄຸ້ມຄອງບັນດາເຂດອຸດສາຫະກຳ, ເຂດເສດຖະກິດ ນະຄອນດົ່ງນາຍ ໃຫ້ຮູ່ວ່າ:
ນະຄອນດົ່ງນາຍ ໃຫ້ບູລິມະສິດການພັດທະນາສີຂຽວ, ພັດທະນາແບບຍືນຍົງ, ພິເສດແມ່ນຫັນປ່ຽນບັນດາເຂດອຸດສາຫະກຳມີຢູ່ແລ້ວ ກໍ່ຄືລົງທຶນບັນດາເຂດອຸດສາຫະກຳໃໝ່ຕາມຮູບແບບເຂດອຸດສາຫະກຳຊີວະພາບ, ເຂດອຸດສາຫະກຳສີຂຽວ, ເຂດອຸດສາຫະກຳເຕັກໂນໂລຢີສູງ. ນີ້ບໍ່ພຽງແຕ່ແມ່ນທ່າອ່ຽງທີີ່ຕ້ອງເປັນໄປຂອງວິວັດການພັດທະນາເທົ່ານັ້ນ ຫາກຍັງແມ່ນຄວາມຮຽກຮ້ອງຕ້ອງການທີ່ຈຳເປັນໃນສະພາບການບັນດາຕະຫຼາດໃຫຍ່ໃນໂລກນັບມື້ນັບຮັດກຸມບັນດາມາດຖານດ້ານສິ່ງແວດລ້ອມ, ຫຼຸດຜ່ອນການປ່ອຍອາຍກາກບອນລົງ ແລະ ປະຕິບັດ ESG ຕໍ່ກັບສິນຄ້ານຳເຂົ້າ ກໍ່ຄືລະບົບສະໜອງທົ່ວໂລກ.
ເລື່ອງ ຫວຽດນາມ ຊຸກຍູ້ຮູບແບບອຸດສາຫະກຳຊີວະພາບ ບໍ່ພຽງແຕ່ຊ່ວຍຫັນເປົ້າໝາຍຂອງມະຕິເລກທີ 10-NQ/TW ໃຫ້ປະກົດຜົນເປັນຈິງ, ກາຍເປັນຈຸດນັດພົບທີ່ປອດໄພໃຫ້ແກ່ບັນດາກຸ່ມບໍລິສັດນາໆຊາດ ແລະ ບັນດານັກລົງທຶນສາກົນ ເທົ່ານັ້ນ, ຫາກຍັງແມ່ນຄຳໝັ້ນສັນຍາຂອງປະເທດໃນການພັດທະນາແບບຍືນຍົງທົ່ວໂລກອີກດ້ວຍ.
