ວິກິດການຢູ່ຊ່ອງແຄບທະເລ Hormuz ລະເບີດຂຶ້ນແຕ່ຕົ້ນປີ 2026 ນັ້ນ ພວມກາຍເປັນໜຶ່ງໃນບັນດາເຫດການກະທົບກະເທືອນດ້ານພູມີສາດການເມືອງຢ່າງໃຫຍ່ຫຼວງທີ່ສຸດຕໍ່ລະບົບພະລັງງານທົ່ວໂລກ ນັບແຕ່ຊຸມປີ 1970 ມາຮອດປັດຈຸບັນ. ຕາມອົງການພະລັງງານສາກົນ (IEA) ແລ້ວ, ບໍ່ວ່າວິກິດການຈະສິ້ນສຸດຄືແນວໃດກໍຕາມ, ແຜນທີ່ພະລັງງານໂລກ ກໍພວມໄດ້ຮັບການແຕ້ມຄືນໃໝ່ຢ່າງສິ້ນເຊີງ.
ວິກິດການບັນດາ “ຈຸດອຸດຕັນ”
ບັນດາການກະທຳໃນການປະທະກັນລະຫວ່າງ ອາເມລິກາ ແລະ ອີຣານ ທີ່ເຄັ່ງຕຶງຂຶ້ນຄືນໃໝ່ໃນຊຸມວັນມໍ່ໆມານີ້ ອີກຄັ້ງໜຶ່ງໄດ້ເຮັດໃຫ້ຊ່ອງແຄບທະເລຍຸດທະສາດ Hormuz, ບ່ອນທີ່ຂົນສົ່ງ ນ້ຳມັນດິບ ແລະ ອາຍແກັດເຫຼວ (LNG) ຂອງໂລກ ປະມານ 20% ຖືກອຸດຕັນຢ່າງສິ້ນເຊີງ, ຍູ້ໃຫ້ລາຄານ້ຳມັນໃນໂລກເພີ່ມຂຶ້ນສູງຄືນອີກ, ເຊິ່ງຕົກຢູ່ປະມານ 85 USD ຕໍ່ຖັງ (ນ້ຳມັນ Brent ທະເລເໜືອ) ໃນກາງອາທິດນີ້. ສະພາວະຈົນຕາແຈປິ່ນອ້ອມຊ່ອງແຄບທະເລ Hormuz ໃນປັດຈຸບັນ ບໍ່ພຽງແຕ່ແມ່ນເລື່ອງລາວລະຫວ່າງ ອາເມລິກາ ແລະ ອີຣານ ເທົ່ານັ້ນ. ບັນດາຄວາມມານະພະຍາຍາມສ້າງຕັ້ງກົນໄກຕິດຕາມກວດກາ ແລະ ບໍລິຫານຊ່ອງແຄບທະເລ Hormuz ໃນຍາວນານ ໂດຍບໍ່ຕ້ອງມີການເຂົ້າຮ່ວມຂອງ ອີຣານ, ລະອຽດແມ່ນລະຫວ່າງ ໂອມານ ກັບ ອາເມລິກາ ແລະ ບາງປະເທດໃນພາກພື້ນ, ກໍບໍ່ນຳມາເຊິ່ງໝາກຜົນໃດໆ. ທ່ານ Aaron David Miller ນັກຊ່ຽວຊານ, ນັກຄົ້ນຄວ້າອາວຸໂສໃນກອງທຶນ Carnegie ເພື່ອຄວາມເປັນສັນຕິພາບສາກົນ, ຕີລາຄາວ່າ:
“ເບິ່ງຄືວ່າ ຊາວ ໂອມານ ເຊື່ອໝັ້ນວ່າ ເຂົາເຈົ້າບັນລຸໄດ້ມາດຕະການໃດໜຶ່ງແລ້ວ, ຕາມສິ່ງທີ່ເອີ້ນວ່າ ເສັ້ນທາງທາງທິດໃຕ້, ໂດຍພື້ນຖານແມ່ນລຽບຕາມຝັ່ງທະເລ ໂອມານ, ຈະຕາງໜ້າໃຫ້ແກ່ການໄປມາຢ່າງເສລີ ແລະ ບໍ່ຖືກກີດຂວາງ, ແຕ່ຄຳຕອບຂອງ ອີຣານ ສຳລັບສິ່ງດັ່ງກ່າວ ແມ່ນບັນດາສິ່ງທີ່ພວກເຮົາໄດ້ເຫັນໃນການບຸກໂຈມຕີເລັ່ງໃສ່ກ່ຳປັ່ນການຄ້າ. ອີກຄັ້ງໜຶ່ງ, ຂ້າພະເຈົ້າຄິດວ່າ ຖ້າເຊື່ອໝັ້ນວ່າ ຊາວ ອີຣານ ຈະຍົກເລີກໄມ້ງັດໃໝ່ ໝາຍຄວາມວ່າ ຊ່ອງແຄບທະເລ Hormuz ຢ່າງງ່າຍດາຍ, ໄວວາ ຫຼື ສະໝັກໃຈນັ້ນ, ຂ້າພະເຈົ້າຄິດວ່າ ແມ່ນການຄິດໄລ່ທີ່ຜິດພາດຢ່າງຮ້າຍແຮງທີ່ສຸດ”.
ບັນດາຄວາມວິຕັກກັງວົນກ່ຽວກັບວິກິດການດ້ານພະລັງງານໃນປັດຈຸບັນ ພວມນັບມື້ນັບເພີ່ມຂຶ້ນສູງກວ່າ ເມື່ອຊ່ອງແຄບທະເລຍຸດທະສາດອື່ນຄື Bab el-Mandeb ຢູ່ທະເລແດງງພວມມີສັນຍານຖືກດຶງເຂົ້າການປະທະກັນ. ໃນຊຸມວັນຜ່ານມາ, ກຳລັງ Houthi ຢູ່ ເຢແມນ, ພັນທະມິດຂອງງອີຣານ, ໄດ້ຍົກອອກຄຳກ່າວເຕືອນຢ່າງຕໍ່ເນື່ອງວ່າ ຈະ “ປິດປະຕູ” ຊ່ອງແຄບທະເລ Bab el-Mandeb ຖ້າ ອາເມລິກາ ເພີ່ມທະວີບັ້ນບຸກໂຈມຕີເຂົ້າພື້ນຖານໂຄງລ່າງພະລັງງານ ແລະ ພົນລະເຮືອນຂອງ ອີຣານ, ສິ່ງທີ່ໄດ້ດຳເນີນໃນວັນທີ 16 ກໍລະກົດ ເມື່ອ ອາເມລິກາ ບຸກໂຈມຕີສະຖານີລົດໄຟ ແລະ ຂົວແຫ່ງຕ່າງໆຢູ່ພາກໃຕ້ ອີຣານ. ຖ້າແຜນການນີ້ເກີດຂຶ້ນ, ນັ້ນຈະແມ່ນວິນາດຕະກຳສຳລັບແຫຼ່ງສະໜອງພະລັງງານໂລກ. ທ່ານ Petras Katinas ນັກຊ່ຽວຊານ, ນັກຄົ້ນຄວ້າສັງກັດ ສະຖາບັນການບໍລິການເອກະພາບ ລາຊະອານາຈັກ, ອັງກິດ ໃຫ້ຂໍ້ສັງເກດວ່າ:
“ເສັ້ນທາງທະເລແດງ ໄດ້ກາຍເປັນເສັ້ນທາງທີ່ມີຄວາມສຳຄັນຂຶ້ນຫຼາຍພໍສົມຄວນ, ເພາະວ່າ ມັນບໍ່ພຽງແຕ່ແມ່ນແລວຄ່ຽນຖ່າຍທຳມະດາລະຫວ່າງ ເອີຣົບ ກັບ ອາຊີ ຄືເມື່ອກ່ອນອີກແລ້ວ. ນີ້ກໍແມ່ນໜຶ່ງໃນບັນດາມາດຕະການປ່ຽນແທນໃຫ້ແກ່ຊ່ອງແຄບທະເລ Hormuz”.
ແຕ້ມແຜນທີ່ພະລັງງານຄືນໃໝ່
ສະພາບການຕົວຈິງຈາກການປະທະກັນຢູ່ຕາເວັນອອກກາງ, ບ່ອນທີ່ບັນດາການຜັນແປປິ່ນອ້ອມຊ່ອງແຄບທະເລ Hormuz ອາດຈະເຮັດໃຫ້ກະແສພະລັງງານທົ່ວໂລກຖືກຢຸດສະງັກ, ພວມຊຸກຍູ້ບັນດາປະເທດໃນໂລກ ກຳນົດຄືນບັນດາຍຸດທະສາດກ່ຽວກັບຄວາມໝັ້ນຄົງດ້ານພະລັງງານໃນຍາວນານ. ມີການປ່ຽນແປງຫຼາຍຢ່າງທີ່ມີລັກສະນະບາດລ້ຽວພວມດຳເນີນ, ທຳອິດແມ່ນການປ່ຽນແປງຈິນຕະນາການ, ຈາກ “ປະຢັດຄ່າໃຊ້ຈ່າຍຢ່າງສຸດຂີດ” ໄປສູ່ “ການສ້າງຄວາມໄວ້ເນື້ອເຊື່ອໃຈ”.
ການປ່ຽນແປງໃຫຍ່ອື່ນອີກ ນັ້ນແມ່ນບັນດາປະເທດເຂດອ່າວ ເພີ່ມລະດັບຄວາມໄວໃນການສ້າງບັນດາເສັ້ນທາງຫຼີກລ່ຽງ ເພື່ອຫຼຸດຜ່ອນການເອືອຍອີງໃສ່ຊ່ອງແຄບທະເລ Hormuz. ທ່ານ Naveen Das, ນັກຊ່ຽວຊານ, ນັກວິເຄາະອາວຸໂສກ່ຽວກັບນ້ຳມັນດິບ ຢູ່ Kpler, ບໍລິສັດແຖວໜ້າໂລກກ່ຽວກັບຂໍ້ມູນເອກະສານ, ການວິເຄາະ ແລະ ຂໍ້ມູນການຕະຫຼາດຕາມການເວລາຕົວຈິງໃນບັນດາຂົງເຂດສິນຄ້າ, ພະລັງງານ, ໄຟຟ້າ ແລະ ການຂົນສົ່ງທາງທະເລ, ໃຫ້ຮູ້ວ່າ:
“ອາດຈະເວົ້າເຖິງບາງເສັ້ນທາງສຳຄັນ. ທຳອິດແມ່ນທໍ່ສົ່ງ ຕາເວັນອອກ - ຕາເວັນຕົກຂອງ ອາຣັບບີ ຊະອຸດິ; ໂດຍພື້ນຖານແລ້ວ, ທໍ່ສົ່ງນີ້ຂົນສົ່ງນ້ຳມັນຈາກອ່າວເປີເຊຍ ໄປຍັງທະເລ ແດງ ແລະ ຍັງມີກຳລັງບົ່ມຊ້ອນເພື່ອຂົນສົ່ງໄດ້ 5 ລ້ານຖັງຕື່ມອີກ. ມີອີກທໍ່ສົ່ງໜຶ່ງຕັ້ງຢູ່ UAE ກໍມີກຳລັງແຮງຂົນສົ່ງໄດ້ປະມານ 2 ລ້ານຖັງ. ເຖິງຢ່າງໃດກໍຕາມ, ບໍ່ແມ່ນປະລິມານນ້ຳມັນທັງໝົດ ລ້ວນແຕ່ຫັນທິດທາງການຂົນສົ່ງໄດ້; ຕາມການຄິດໄລ່ທິດສະດີແລ້ວ, ມີພຽງແຕ່ປະມານ 45% ປະລິມານທັງໝົດ ຈະສາມາດປ່ຽນທິດຂົນສົ່ງໄດ້. ອີກອັນໜຶ່ງ, ຍັງມີທໍ່ສົ່ງນ້ຳມັນຈາກເຂດຊາວ Kurd ຢູ່ ອີຣັກ ໄປ ຕວັກກີ, ສົ່ງນ້ຳມັນອອກສູ່ພາກພື້ນ ເມດີເຕຣາເນຍ”.
ໂດຍລວມແລ້ວ, ບັນດາປະເທດນຳເຂົ້າພວມຊອກຫາວິທີເຂົ້າເຖິງຢ່າງເລິກເຊິ່ງກັບບັນດາແຫຼ່ງສະໜອງນ້ຳມັນທີ່ ບໍ່ຖືກຜົນກະທົບຈາກ Hormuz ຕື່ມອີກ. ບັນດາບໍລິສັດຜະລິດນ້ຳມັນຢູ່ ອາເມລິກາ, ທະເລເໜືອ, ອາຟະລິກາຕາເວັນຕົກ (ຄື ອັງໂກລາ, ນີເຊຣີ) ແລະ ອາເມລິກາ ລາຕິນ ພວມເຫັນປະຈັກຕາກະແສທຶນ ແລະ ບັນດາສັນຍາໄລຍະຍາວ ພວມຫຼັ່ງໄຫຼມາຢ່າງວ່ອງໄວແບບບໍ່ເຄີຍມີມາກ່ອນ ແນໃສ່ຊົດເຊີຍໃຫ້ແກ່ປະລິມານນ້ຳມັນທີ່ຖືກ “ກັກຕຸນ” ຢູ່ເຂດອ່າວ./.
