ໂດຍຈະຈັດຂຶ້ນຢູ່ນະຄອນຫຼວງ ປາຣີ, ປະເທດ ຝລັ່ງ ໃນວັນທີ 09-10 ກັນຍາ ແລະ ມີການເຂົ້າຮ່ວມປະມຸກລັດຫຼາຍທ່ານ ແລະ ບັນດາອົງການຈັດຕັ້ງສາກົນ, ກອງປະຊຸມສຸດຍອດ ອະວະກາດສາກົນ (ISS) ແມ່ນໂອກາດເພື່ອໃຫ້ໂລກສ້າງອະນາຄົດ ດ້ວຍກົດລະບຽບຢ່າງຈະແຈ້ງ ແລະ ມີຄວາມຍຸດຕິທຳກວ່າໃນການຄົ້ນຫາ ແລະ ຂຸດຄົ້ນທ່າແຮງບົ່ມຊ້ອນອັນໃຫຍ່ຫຼວງ ຂອງອາວະກາດ.
ຄວາມຮັບຮູ້ໃໝ່ກ່ຽວກັບອາວະກາດ
ໃນໄລຍະເກືອບ 7 ທົດສະວັດ, ການມີໜ້າຂອງມະນຸດຢູ່ຊັ້ນອາກາດຫຸ້ມໜ່ວຍໂລກເຄີຍແມ່ນກາງຫາວ ທີ່ສະຫງວນໃຫ້ແກ່ການຄົ້ນຄວ້າວິທະຍາສາດລະດັບລັດ, ເຊິ່ງໄດ້ຮັບການປະສານງານດ້ວຍບັນດາສົນທິສັນຍາທີ່ມີລັກສະນະອຸດົມຄະຕິສູງ, ເປັນຕົ້ນແມ່ນ ລະຫວ່າງ ອາເມລິກາ ແລະ ສະຫະພາບ ໂຊວຽດ (ໃນເມື່ອກ່ອນ). ໃນປະຈຸບັນ, ສິ່ງດັ່ງກ່າວໄດ້ມີການປ່ຽນແປງໂດຍພື້ນຖານ. ພ້ອມກັບການພດທະນາບຸກທະລຸຂອງວິທະຍາສາດ, ເຕັກໂນໂລຊີ ແລະ ອະວະກາດ, ວົງໂຄຈອນໂລກລະດັບຕ່ຳ (LEO) ໄດ້ຫັນປ່ຽນເປັນກະດູກສັນຫຼັງດ້ານເສດຖະກິດ ທີ່ສຳຄັນ ແລະ ເປັນພື້ນທີ່ເປີດກວ້າງການຄ້າທົ່ວໂລກ. ຕົວຢ່າງກ່ຽວກັບການຫັນປ່ຽນນີ້ແມ່ນບັນດາກຸ່ມດາວທຽມ (ພາກລັດ ແລະ ເອກະຊົນ) ນັບມື້ນັບເພີ່ມຂຶ້ນຫຼາຍຢູ່ LEO.
ເຖິງຢ່າງໃດກໍ່ຕາມ, ການປ່ຽນແປງນີ້ໄດ້ພາໃຫ້ປະຊາຄົມສາກົນຕ້ອງປະເຊີນໜ້າກັບສິ່ງທີ່ສັບສົນ, ບັນດາສິ່ງທ້າທາຍເຊິ່ງເຄືອຂ່າຍດາວທຽມນີ້ໄດ້ກໍ່ຂຶ້ນ, ກ່ອນອື່ນໝົດແມ່ນດ້ານວິທະຍາສາດ. Olivier Hainaut, ນັກດາລາສາດຂອງອົງການຄົ້ນຄວ້າດາລາສາດ ເອີລົບ (ESO), ໃຫ້ຮູ້ວ່າ:
"ປະຈຸບັນ, ພວມມີບັນດາໂຄງການສົ່ງ ເກືອບ 2 ລ້ານດາວທຽມເຂົ້າສູ່ວົງໂຄຈອນ.ປະຈຸບັນ, ມີພຽງແຕ່ມີ 15.000 ດາວທຽມ ເທົ່ານັ້ນ, ສະນັ້ນເລື່ອງເພີ່ມຈຳນວນແຕ່ 15.000 ຂຶ້ນເປັນ 1 ຫຼື 2 ລ້ານດາວທຽມ ແມ່ນການເພີ່ມຂຶ້ນໃຫຍ່ຫຼວງທີສຸດ. ແຕ່ລະດາວທຽມນັ້ນ, ເມື່ອໄປຜ່ານການມຸມເບິ່ງຂອງກ້ອງດູດາວ ຈະປະຮອຍແສງສະຫວ່າງໄວ້. ຖ້າພຽງແຕ່ເປັນຮອຍດຽວ ນັ້ນພຽງແຕ່ເປັນບັນຫາເລັກນ້ອຍເທົ່ານັ້ນ, ແຕ່ຖ້າມີຫຼາຍຮອຍຄືແນວນັ້ນ, ມັນຈະປົກປິດຮູບພາບ ຈັກກະວານສ່ວນໜຶ່ງທີ່ພວກເຮົາສັງເກດໄດ້."
ສິ່ງທ້າທາຍທີ່ໃຫຍ່ກວ່າສຳລັບມະນຸດແມ່ນດ້ານ ເສດຖະກິດ, ຄວາມໝັ້ນຄົງ ແລະ ນິຕິກຳ. ດ້ວຍດາວທຽມນັບພັນເຄື່ອງທີ່ພວມເຄື່ອນໄຫວອ້ອມວົງໂຄຈອນ, ຄວາມສ່ຽງຈະເກີດອຸບັດເຫດຕຳກັນຈະເພີ່ມຂຶ້ນແຮງ. ມີບັນຫາຕໍ່ໄປແມ່ນ ເລື່ອງບັນດາປະເທດສ້າງວິໄສທັດການຄຸ້ມຄອງອາວະກາດແຕກຕ່າງກັນ, ຊ້ຳບໍ່ໜຳແມ່ນກົງກັນຂ້າມ.
ຊອກຫາກົດລະບຽບລວມ
ໃນປີ 1967, ສົນທິສັນຍາວ່າດ້ວຍອະວະກາດໄດ້ສ້າງຕັ້ງຂຶ້ນ, ສ້າງພື້ນຖານນິຕິກຳທຳອິດເພື່ອແກ້ໄຂບັນດາບັນຫາທີ່ກ່ຽວຂ້ອງເຖິງກຸ່ມດາວທຽມ ຂະໜາດໃຫຍ່ ຫຼື ການຂຸດຄົ້ນຊັບພະຍາກອນນອກໜ່ວຍໂລກ. ເຖິງຢ່າງໃດກໍ່ຕາມ, ຕົວຈິງໃນປະຈຸບັນຮຽກຮ້ອງຕ້ອງອັບເດັດສົນທິສັນຍາສະບັບນີ້ ຢ່າງຄົບຖ້ວນ, ຊ້ຳບໍ່ໜຳແມ່ນຕ້ອງສ້າງສົນທິສັນຍາສະບັບໃໝ່, ໃນສະພາບການທີ່ບັນດາປະເທດມະຫາອຳນາດພວມສ້າງກຸ່ມການທູດແກ່ງແຍ້ງແທນທີ່ຈະມຸ່ງໄປເຖິງສົນທິສັນຍາລວມ. ລະອຽດແມ່ນ, ສົນທິສັນຍາ Artemis ຂອງ ອາເມລິກາ ແລະ ນັບສິບປະເທດອື່ນໆພວມຂັດແຍ້ງກັນດ້ວຍໂຄງການສະຖານີຄົ້ນຄວ້າ ດວງຈັນສາກົນ (ILRS) ໂດຍຈີນ ແລະ ລັດເຊຍ ນຳພາ... ສຸດທ້າຍ, ລະຫວ່າງບັນດາປະເທດຍັງສົງໃສຕໍ່ ລັກສະນະການນຳໃຊ້ 2 ຢ່າງ ຂອງເຕັກໂນໂລຊີ ອະວະກາດ, ເມື່ອບັນດາເຕັກໂນໂລຊີເຫຼົ່ານີ້ບໍ່ພຽງແຕ່ຮັບໃຊ້ດ້ານວິທະຍາສາດ ຫຼື ການຄ້າເທົ່ານັ້ນ ຫາກຍັງສາມາດກາຍເປັນ ອາວຸດ, ນາບຂູ່ຕໍ່ຄວາມໝັ້ນຄົງ ຂອງຫຼາຍປະເທດ.
ທັງໝົດໝົດນັ້ນໄດ້ພາໃຫ້ເພີ່ມຄວາມຄາດຫວັງຕໍ່ກອງປະຊຸມສຸດຍອດ ອະວະກາດ ສາກົນ ທີ່ຈັດຂຶ້ນຢູ່ ປາຣີ ໃນອາທິດນີ້. ທ່ານ António Guterres, ເລຂາທິການໃຫຍ່ສະຫະປະຊາຊາດ ຊີ້ແຈ້ງວ່າ:
"ບັນດາບາດກ້າວກະໂດດຂັ້ນໃນຂົງເຂດອະວະກາດມີຄວາມໝາຍດຽວກັບເລື່ອງບັນດາເຫດການທີ່ພວມຈັດຳເນີນຢູ່ທີ່ນັ້ນລ້ວນແຕ່ສົ່ງຜົນກະທົບຕໍ່ພວກເຮົາ. ບັນດາຊັບພະຍາກອນ ແລະ ເຕັກໂນໂລຊີອະວະກາດພວມສວມບົດບາດນັບມື້ໜັບສຳຄັນໃນວຽກງານຈັບຈຸດທີ່ຕັ້ງ,ສະໜອງບໍລິການອິນເຕີເນັດ ແລະ ການຕິດຕາມບັນດາທ່າອ່ຽງຕ່າງໆໃນໂລກ - ນັບແຕ່ພະລັງງານ ແລະ ດິນຟ້າອາກາດ ຈົນເຖິງຊີວະນາໆພັນ ພ້ອມກັບພາລະບົດບາດທີ່ຈຳເປັນອື່ນໆອີກ. ເກືອບ 40% ບັນດາເປົ້າໝາຍພັດທະນາແບບຍືນຍົງ (SDGs) ຂຶ້ນກັບໂຄງການດຳເນີນງານປີ 2030 ແມ່ນອີງໃສ່ຂໍ້ມູນຈາກອວະກາດ".
ສຳລັບປະຊາຄົມສາກົນ, ຄຳຖາມໃນປັດຈຸບັນບໍ່ແມ່ນວ່າ ອະວະກາດ ສາມາດຂຸດຄົ້ນໄດ້ ຫຼື ບໍ່, ຫາກແມ່ນກົດລະບຽບລວມໃຫ້ແກ່ການຂຸດຄົ້ນມັນຄືແນວໃດ. ດັ່ງນັ້ນ, ຖ້າປະຊາຄົມສາກົນປະລາໄຊໃນການປະສົມກົມກຽວລະຫວ່າງຮຽກຮ້ອງກ່ຽວກັບຄວາມໝັ້ນຄົງແຫ່ງຊາດ ກັບຄວາມຍືນຍົງຂອງສິ່ງແວດລ້ອມ, ພື້ນທີ່ທີ່ໝັ້ນໝາຍເຊື່ອມຕໍ່ ແລະ ຊຸກຍູ້ອະລິຍະທຳຂອງມະນຸດນີ້ ອາດຈະຕົກເຂົ້າສູ່ສະພາບບໍ່ມີທາງອອກ ແລະ ຖືກຄອບງຳຍ້ອນການປະທະກັນດ້ານພູມສາດ ການເມືອງ.
