ໃນຊຸມປີຜ່ານມາ, ຈຸດອຸດຕັນໃຫຍ່ສຸດຂອງ ຫວຽດນາມ ບໍ່ນອນຢູ່ເລື່ອງຂາດແຫຼ່ງທຶນ, ຂາດແຮງງານ ຫຼື ໂອກາດ, ຫາກມັນນອນຢູ່ແບບວິທີການຈັດແບ່ງ ແລະ ນຳໃຊ້ບັນດາແຫຼ່ງກຳລັງນັ້ນ. ເມື່ອແຫຼ່ງກຳລັງບໍ່ໄດ້ຮັບການນຳພາດ້ວຍລະບົບລະບອບລະບຽບການຢ່າງມີປະສິດທິຜົນນັ້ນ, ມັນອາດຈະຖືກກະຈາຍ ແລະ ນຳໃຊ້ໂດຍບໍ່ມີປະສິດທິຜົນຢ່າງງ່າຍດາຍ. ດັ່ງນັ້ນ, ເລື່ອງ ຫວຽດນາມ ວາງຈຸດສຸມໃສ່ການປັບປຸງລະບອບລະບຽບໃຫ້ສົມບູນແບບ, ນັບແຕ່ການປັບປຸງກົດໝາຍ, ຫຼຸດຜ່ອນເງື່ອນໄຂດຳເນີນທຸລະກິດຕະຫຼອດຮອດການຍົກສູງປະສິດທິພາບການປະຕິບັດນັ້ນ ແມ່ນເພື່ອແນໃສ່ແກ້ໄຂຈຸດອຸດຕັນພື້ນຖານທີ່ສຸດຂອງການເຕີບໂຕ.
ປະຕິຮູບຢ່າງຄົບຊຸດ, ຮອບດ້ານ, ມີລັກສະນະເປັນລະບົບ
ມີສິ່ງໜຶ່ງທີ່ໜ້າສົນໃຈໃນໄລຍະປັດຈຸບັນ ແມ່ນຈິນຕະນາການປະຕິຮູບໄດ້ຫັນຈາກການເຂົ້າເເຖິງແບບກະແຈກກະຈາຍໄປສູ່ການເຂົ້າເຖິງຢ່າງມີລະບົບ. ການປະກາດໃຊ້ຫຼາຍມະຕິໃຫຍ່ຂອງກົດມການເມືອງຢ່າງລຽນຕິດ, ປົກຄຸມບັນດາເສົາຄ້ຳຄື: ເສດຖະກິດເອກະຊົນ, ວິທະຍາສາດ - ເຕັກໂນໂລຢີ, ການເຊື່ອມໂຍງເຂົ້າກັບສາກົນ, ພະລັງງານ, ສາທາລະນະສຸກ ແລະ ການສຶກສາ, ໄດ້ຊີ້ໃຫ້ເຫັນຄວາມມານະພະຍາຍາມສ້າງເປັນ “ລະບົບນິເວດລະບອບລະບຽບການ” ແທນໃຫ້ບັນດານະໂຍບາຍຍ່ອຍ ແນໃສ່ຊຸກຍູ້ການເຕີບໂຕ, ສ້າງຄວາມຜູກພັນລະຫວ່າງບັນດາຂະແໜງການ ແລະ ເປົ້າໝາຍຍາວນານ. ທ່ານ ຮສຈ. ປອ. ຫງວຽນຮົ່ງຫາຍ, ຄູສອນມະຫາວິທະຍາໄລ VinUni (University of VinUni) ຖືວ່າ:
“ຂ້າພະເຈົ້າຖືວ່າ ຈຸດບຸກທະລຸລວມຂອງມະຕິສະບັບຕ່າງໆນີ້ແມ່ນມີລັກສະນະກະທຳ ຫາກບໍ່ພຽງແຕ່ເປັນຄຳຂວັນເທົ່ານັ້ນ. ການກະທຳນັ້ນ ແມ່ນປ່ຽນແປງໃໝ່ກ່ຽວກັບສະຕິຄວາມຮັບຮູ້ ແລະ ແບບວິທີການເຄື່ອນໄຫວ ແລະ ຂຸດຄົ້ນໃຫ້ແທດເໝາະກັບລະດັບການພັດທະນາຂອງປະເທດຊາດ, ພ້ອມທັງເສີມຂະຫຍາຍເພື່ອນຳປະເທດບືນຕົວຂຶ້ນ ແລະ ພັດທະນາຂຶ້ນສູ່ລະດັບສູງກວ່າ. ດັ່ງນັ້ນ, ໃນມະຕິສະບັບຕ່າງໆ, ນອກຈາກບັນຫາທິດສະດີທີ່ສະແດງແງ່ມູມຈິນຕະນາການ ແລະ ວິໄສທັດແລ້ວ, ພວກເຮົາຍັງເຫັນມີບັນດາຄຳຊີ້ນຳການເຄື່ອນໄຫວທີ່ລະອຽດທີ່ສຸດ”.
ຈຸດທີ່ໜ້າສົນໃຈແມ່ນ ສະພາແຫ່ງຊາດ ແລະ ລັດຖະບານ ໄດ້ຫັນບັນດາມະຕິໃຫຍ່ເປັນກົດໝາຍ, ມະຕິ, ໂຄງການດຳເນີນງານມີຂັ້ນຕອນ ແລະ ດັດຊະນີຈະແຈ້ງຢ່າງວ່ອງໄວ, ໃນນັ້ນ ວາງໜ້າທີ່ຄວາມຮັບຜິດຊອບລະອຽດໃຫ້ແກ່ແຕ່ລະກະຊວງ, ຂະແໜງການ, ທ້ອງຖິ່ນ. ມີຫຼາຍມາດຕະການໄດ້ຮັບການຜັນຂະຫຍາຍຕາມທິດເຂົ້າເຖິງໂດຍກົງບັນດາ “ຈຸດອຸດຕັນ” ທີ່ມີມາແຕ່ດົນນານ, ຄື: ສຳຫຼວດກວດຄືນລະບົບກົດໝາຍໂດຍສັງເຂບ, ຍົກເລີກບັນດາຂໍ້ກຳນົດທີ່ຊ້ຳຊ້ອນກັນ, ຫຼຸດຜ່ອນບັນດາລະບຽບການບໍລິຫານ, ຫຼຸດຜ່ອນຄ່າໃຊ້ຈ່າຍ ແລະ ຊຸກຍູ້ການຫັນຂັ້ນຕອນເປັນດີຈີຕອນທັງໝົດ. ໃນກອງປະຊຸມທຳອິດ ພາຍຫຼັງຄະນະລັດຖະບານ ອາຍຸການ 2026 – 2031 ໄດ້ຮັບການບູລະນະນັ້ນ, ທ່ານ ເລມິງຮຶງ ນາຍົກລັດຖະມົນຕີ ຫວຽດນາມ ໄດ້ເນັ້ນໜັກເຖິງຄຳຮຽກຮ້ອງຕ້ອງການວ່າ:
“ໜຶ່ງໃນບັນດາຈຸດທີ່ສຳຄັນທີ່ສຸດກ່ຽວກັບການປັບປຸງລະບອບລະບຽບການໃຫ້ສົມບູນແບບໃນປີນີ້, ນັ້ນແມ່ນ ຕີລາຄາຄືນບັນດາກົນໄກນະໂຍບາຍທີ່ມີຈຸດເປັນເອກະລັກສະເພາະ. ສິ່ງໃດທີ່ຖືກ ແລະ ພຶດຕິກຳຕົວຈິງໄດ້ພິສູດວ່າຖືກຕ້ອງແລ້ວ ໃຫ້ໝູນໃຊ້ເປັນເອກະພາບໃນທົ່ວປະເທດ. ໄປຄຽງຄູ່ກັບລະບອບລະບຽບການແມ່ນການປະຕິຮູບການບໍລິຫານ, ເງື່ອນໄຂດຳເນີນທຸລະກິດ ແລະ ຍົກສູງກຳລັງຄວາມສາມາດ ແລະ ຄຸນນະພາບການປະຕິບັດບັນດາຂໍ້ກຳນົດ.”
ລະບອບລະບຽບການບໍ່ແມ່ນເຄື່ອງມືເພື່ອຄວບຄຸມແລ້ວ, ຫາກຍັງກາຍເປັນພື້ນຖານກະຕຸ້ນການເຕີບໂຕ, ຫັນຈາກການ “ຄຸ້ມຄອງ” ໄປສູ່ການ “ສ້າງສາພັດທະນາ”.
ລະບອບລະບຽບການ - ກຳລັງໜູນໂດຍກົງຂອງການເຕີບໂຕ
ພຶດຕິກຳຕົວຈິງຂອງການພັດທະນາໄດ້ຊີ້ໃຫ້ເຫັນວ່າ ລະບອບລະບຽບການບໍ່ສາມາດສ້າງເປັນຊັບສິນໂດຍກົງຕາມຄວາມໝາຍດ້ານວັດຖຸໄດ້, ແຕ່ພັດສົ່ງຜົນກະທົບໂດຍກົງເຖິງການເຄື່ອນໄຫວຂອງບັນດາເຈົ້າກຳເສດຖະກິດ, ຈາກວິສາຫະກິດຕະຫຼອດຮອດປະຊາຊົນ. ເມື່ອລະບອບລະບຽບການຈະແຈ້ງ, ເປັນປົກກະຕິ ແລະ ມີຄວາມສາມາດຄາດຄະເນ, ມັນເຮັດໃຫ້ຫຼຸດຜ່ອນຄວາມສ່ຽງ, ສົ່ງເສີມການລົງທຶນ, ຊຸກຍູ້ນະວັດຕະກຳ ແລະ ຍົກສູງສະມັດຕະພາບ.
ການປະຕິຮູບລະບອບລະບຽບການຂອງ ຫວຽດນາມ ໃນປັດຈຸບັນ ບໍ່ສາມາດຕັດແຍກອອກຈາກບັນດາເປົ້າໝາຍໄລຍະຍາວໄດ້. ແທນທີ່ແລ່ນຕາມລະດັບການເຕີບໂຕຢ່າງດຽວ, ບັນດາກຳນົດທິດໃຫຍ່ ໄດ້ສະຫຼັບທັບຊ້ອນກັບຄຳຮຽກຮ້ອງພັດທະນາເສດຖະກິດສີຂຽວ, ຫັນເປັນດີຈີຕອນ ແລະ ນະວັດຕະກຳ. ການເຕີບໂຕຕ້ອງອີງໃສ່ການຂຸດຄົ້ນທຸກແຫຼ່ງກຳລັງຂອງທົ່ວສັງຄົມຢ່າງມີປະສິດທິຜົນ, ຄືດັ່ງທ່ານ ໂຕເລິມ ເລຂາທິການໃຫຍ່, ປະທານປະເທດ ຫວຽດນາມ ໄດ້ເນັ້ນໜັກວ່າ:
“ການເຕີບໂຕຢ່າງແທ້ຈິງ ຕ້ອງສ້າງຕັ້ງທັງສອງສົ້ນນັບແຕ່ເທິງລົງລຸ່ມ ແລະ ແຕ່ລຸ່ມຂຶ້ນເຖິງ, ໃນແຕ່ລະຕ່ອງໂສ້ຂອງພື້ນຖານເສດຖະກິດ. ເມື່ອກຳລັງພາຍໃນໄດ້ຮັບການປຸກລຸກ, ໄດ້ເຊື່ອມຕໍ່ກັບແຫຼ່ງກຳລັງແຫ່ງລັດ, ດ້ວຍພື້ນຖານໂຄງລ່າງ, ດ້ວຍຕະຫຼາດ, ເຕັກໂນໂລຢີ, ດ້ວຍແຜນຜັງພັດທະນານັ້ນ, ພື້ນຖານເສດຖະກິດຈະມີພື້ນຖານອັນໝັ້ນແກ່ນໃຫ້ແກ່ນເຕີບໂຕແບບຍືນຍົງ. ແຕ່ລະກົນໄກ, ນະໂຍບາຍ, ແຕ່ລະໂຄງການພື້ນຖານໂຄງລ່າງ, ແຕ່ລະກະແສທຶນ ລ້ວນແຕ່ຕ້ອງມຸ່ງໄປເຖິງເລື່ອງປຸກລຸກກຳລັງຄວາມສາມາດ ແລະ ຄວາມຄາດຫວັງພັດທະນາ, ຫັນໂອກາດທີ່ມີກຳລັງບົ່ມຊ້ອນກາຍເປັນການເຕີບໂຕຕົວຈິງ ແລະ ຫັນຄວາມເຊື່ອໝັ້ນກາຍເປັນກຳລັງໜູນພັດທະນາຍາວນານໃຫ້ແກ່ປະເທດຊາດ”.
ການປະຕິຮູບ ແລະ ປັບປຸງລະບອບລະບຽບການໃຫ້ສົມບູນແບບຢູ່ ຫວຽດນາມ ພວມມີການປ່ຽນແປງຈິນຕະນາການ ນັບແຕ່ການປະຕິຮູບແຕ່ລະພາກສ່ວນໄປສູ່ການປະຕິຮູບລະບົບ, ດ້ວຍສາມຄຸນລັກສະນະພົ້ນເດັ່ນ: ໄວກວ່າ, ເລິກເຊິ່ງ ແລະ ມີຍຸດທະສາດກວ່າ. ລະບອບລະບຽບການແມ່ນກຳລັງໜູນໂດຍກົງຂອງການເຕີບໂຕ. ເລື່ອງ ຫວຽດນາມ ຍູ້ແຮງການປັບປຸງລະບອບລະບຽບການໃຫ້ສົມບູບແບບ ໄດ້ຊີ້ໃຫ້ເຫັນການເຄື່ອນຍ້າຍທີ່ມີລັກສະນະຍຸດທະສາດ. ນີ້ແມ່ນພື້ນຖານສຳຄັນເພື່ອງມຸ່ງໄປເຖິງເປົ້າໝາຍເຕີບໂຕທີ່ສູງກວ່າ, ແຕ່ພ້ອມດຽວກັນນັ້ນ ກໍຍືນຍົງກວ່າ ໃນສັງກາດພັດທະນາໃໝ່./.
