ວັນທີ 20 ເມສາ, ບັນດາຜູ້ແທນເຂົ້າຮ່ວມກອງປະຊຸມຄັ້ງປະຖົມມະລຶກ, ສະພາແຫ່ງຊາດ ຫວຽດນາມ ຊຸດທີ XVI, ປຶກສາຫາລືຮ່າງມະຕິຂອງສະພາແຫ່ງຊາດກ່ຽວກັບການພັດທະນາວັດທະນະທຳ ຫວຽດນາມ. ນີ້ແມ່ນຄວາມມານະພະຍາຍາມທີ່ສະແດງໃຫ້ເຫັນວ່າ ຫວຽດນາມ ພວມປັບປຸງລະບອບລະບຽບການໃຫ້ສົມບູນແບບເທື່ອລະກ້າວ, ສ້າງບາດກ້າວບຸກທະລຸ, ສ້າງກຳລັງໜູນໃໝ່ໃຫ້ແກ່ການພັດທະນາວັດທະນະທຳເພື່ອເສີມຂະຫຍາຍກຳລັງແຮງພາຍໃນ, ສ້າງກຳລັງໜູນສຳຄັນໃຫ້ແກ່ການພັດທະນາຢ່າງວ່ອງໄວ, ຍືນຍົງໃນໄລຍະໃໝ່.
ປັບປຸງລະບອບລະບຽບການກ່ຽວກັບວັດທະນະທຳໃຫ້ສົມບູນແບບ ໄດ້ຮັບຖືວ່າ ແມ່ນໜຶ່ງໃນບັນດາຂອດບຸກທະລຸຍຸດທະສາດ, ສວມບົດບາດເປີດທາງໃຫ້ແກ່ການພັດທະນາຢ່າງວ່ອງໄວ ແລະ ຍືນຍົງ.
ລະບອບລະບຽບການແມ່ນໄມ້ງັດທີ່ແກ່ນສານ, ປົດລັອກຊັບພະຍາກອນ
ໄລຍະຜ່ານມາ, ຫວຽດນາມ ໄດ້ປະກາດໃຊ້ຫຼາຍລະບອບລະບຽບການກ່ຽວກັບວັດທະນະທຳ, ປະກອບສ່ວນຍົກສູງປະສິດທິຜົນໃນການຄຸ້ມຄອງລັດ, ຍົກສູງລະດັບຊົມໃຊ້ວັດທະນະທຳໃຫ້ແກ່ປະຊາຊົນ ແລະ ປະກອບສ່ວນເຂົ້າໃນການເຕີບໂຕເສດຖະກິດ. ພິເສດ, ວັນທີ 7 ມັງກອນ ປີ 2026, ກົມການເມືອງໄດ້ປະກາດໃຊ້ມະຕິສະບັບເລກທີ 80 – NQ/TW ກ່ຽວກັບການພັດທະນາວັດທະນະທຳ ຫວຽດນາມ. ນີ້ແມ່ນມະຕິທີ່ສ້າງຂີດໝາຍແກ່ບາດລ້ຽວຈິນຕະນາການຍຸດທະສາດ, ມີຄວາມໝາຍສຳຄັນເປັນພິເສດ; ພ້ອມທັງວາງອອກຄຳຮຽກຮ້ອງຕ້ອງການປະກາດໃຊ້ມະຕິຂອງສະພາແຫ່ງຊາດກ່ຽວກັບການພັດທະນາວັດທະນະທຳ ຫວຽດນາມ. ທ່ານ ຮສຈ, ປອ. ບຸ່ຍຮວ່າຍເຊີນ, ກຳມະການສະເພາະກິດກຳມະທິການວັດທະນະທຳ ແລະ ສັງຄົມຂອງ ສະພາແຫ່ງຊາດ, ສະມາຊິກສະພາແຫ່ງຊາດຊຸດທີ XVI, ຖືວ່າ:
“ຕ້ອງມີລະບອບລະບຽບການທີ່ມີຄວາມເຂັ້ມແຂງຢ່າງພຽງພໍ, ກົນໄກທີ່ມີອຳນວຍຄວາມສະດວກຢ່າງພຽງພໍເພື່ອປົດລັອກຊັບພະຍາກອນເພື່ອພັດທະນາວັດທະນະທຳ ທີ່ພວມຖືກຄ້າງໄວ້. ຕ້ອງຖືວັດທະນະທຳແມ່ນພື້ນຖານຂອງສັງຄົມຢ່າງແທ້ຈິງ, ແມ່ນຊັບພະຍາກອນພາຍໃນ, ກຳລັງໜູນພັດທະນາ, ແມ່ນກຳລັງແຮງອ່ອນຂອງຊາດ. ກ້າລົງທຶນເຂົ້າວັດທະນະທຳຄືດັ່ງຂົງເຂດທີ່ມີກຳລັງບົ່ມຊ້ອນພັດທະນາໄລຍະຍາວ. ເມື່ອໃດວັດທະນະທຳໄດ້ວາງຢູ່ໃນລະບົບນິເວດພັດທະນາເປີດທີ່ມີການເຂົ້າຮ່ວມຂອງຫຼາຍຈຳກຳ ເວລານັ້ນ ວັດທະນະທຳຈຶ່ງມີກຳລັງກ້າວກະໂດດຂັ້ນຢ່າງແທ້ຈິງໄດ້”.
ຈາກທີ່ຕັ້ງທີ່ໄດ້ຮັບຄວາມເອົາໃຈໃສ່, ວັດທະນະທຳໄດ້ຫັນໄປສູ່ທີ່ຕັ້ງໄດ້ຮັບການຮັບປະກັນດ້ວຍລະບອບລະບຽບການ. ຮ່າງມະຕິຂອງສະພາແຫ່ງຊາດວ່າດ້ວຍການພັດທະນາວັດທະນະທຳ ຫວຽດນາມ ໄດ້ສຸມໃສ່ຫັນບັນດາທັດສະນະ, ເປົ້າໝາຍ, ໜ້າທີ່ ແລະ ມາດຕະການເປັນລະບອບລະບຽບການຢ່າງຄົບຖ້ວນ. ລັດ ສວມບົດບາດນຳໜ້າພາທາງ ແຕ່ສັງຄົມ ແລະ ພາກສ່ວນເອກະຊົນຕ້ອງກາຍເປັນກຳລັງໜູນສຳຄັນໃຫ້ແກ່ການພັດທະນາວັດທະນະທຳ. ຊັບພະຍາກອນໃຫ້ແກ່ການພັດທະນາວັດທະນະທຳໄດ້ຕັ້ງຢູ່ໃຈກາງ, ດ້ວຍຄຳຮຽກຮ້ອງຕ້ອງການຮັບປະກັນລາຍຈ່າຍງົບປະມານແຫ່ງລັດທັງໝົດຢ່າງໜ້ອຍສຸດແມ່ນ 2%, ພ້ອມທັງສົ່ງເສີມລະດົມຊັບພະຍາກອນສັງຄົມຢ່າງແຮງ. ມີຫຼາຍກົນໄກ, ນະໂຍບາຍ ເພື່ອແນໃສ່ດຶງດູດການລົງທຶນເຂົ້າຂົງເຂດວັດທະນະທຳກໍ່ໄດ້ຮັບການສະເໜີແນະ. ທ່ານ ຮສຈ.ປອ ບຸ່ຍຮວ່າຍເຊີນ, ກຳມະການສະເພາະກິດກຳມາທິການວັດທະນະທຳ ແລະ ສັງຄົມຂອງສະພາແຫ່ງຊາດ, ສະມາຊິກສະພາແຫ່ງຊາດ ຫວຽດນາມ ຊຸດທີ XVI, ຖືວ່າ:
“ວັດທະນະທຳຕ້ອງໄດ້ຕັ້ງຢູ່ໃຈກາງຂອງຈິນຕະນາການພັດທະນາ, ຫາກບໍ່ໄດ້ຢືນຢູ່ນອກ ຫຼື ໄປຕາມຫຼັງບັນດາຂໍ້ຕົກລົງວາງແຜນຜັງ ຫຼື ຈັດແບ່ງຊັບພະຍາກອນໄດ້. ຕ້ອງມີສັນຍານຢ່າງຈະແຈ້ງ, ເຊັ່ນ: ມີນະໂຍບາຍພິເສດກ່ຽວກັບພາສີ, ຄ່າທຳນຽມ, ທີ່ດິນ, ພື້ນຖານໂຄງລ່າງ, ເຕັກໂນໂລຢີ, ຕ້ອງມີກົນໄກຮັບຮອງການອຸປະຖຳໃຫ້ແກ່ວັດທະນະທຳຄືກັນກັບການປະກອບສ່ວນແກ່ການພັດທະນາ. ຄືແນວນັ້ນ, ພວກເຮົາຈະມີຜະລິດຕະພັນວັດທະນະທຳ, ພື້ນທີ່ປະດິດຄິດສ້າງໃໝ່ຕື່ມອີກ, ເຄື່ອງໝາຍວັດທະນະທຳ ຫວຽດນາມ ຈຶ່ງມີກຳລັງແກ້ງແຍ້ງຢ່າງພຽງພໍໃນພາກພື້ນ ແລະ ສາກົນ”.
ພັດທະນາວັດທະນະທຳໃຫ້ທຽບທັນກັບການເມືອງ ແລະ ເສດຖະກິດ
ຫວຽດນາມ ແມ່ນປະເທດທີ່ມີກຳລັງບົ່ມຊ້ອນພັດທະນາວັດທະນະທຳ, ພິເສດແມ່ນມີຫຼາຍຮ່ອງຮອຍວັດທະນະທຳ, ທັດສະນີຍະພາບທີ່ລືຊື່. ທ່ານ ສຈ, ປອ. ຫງວຽນວັນກຽມ, ຮອງປະທານສະພາມໍລະດົກວັດທະນະທຳແຫ່ງຊາດ, ໃຫ້ຮູ້ວ່າ:
“ຮອດປີ 2030, ຫວຽດນາມ ສູ້ຊົນມີ 5 ມໍລະດົກວັດທະນະທຳລະດັບໂລກຕື່ມອີກ, ຮອດປີ 2045 ສູ້ຊົນມີ 8 – 10 ມໍລະດົກວັດທະນະທຳໂລກທີ່ໄດ້ຮັບການຮັບຮອງຈາກອົງການ UNESCO, ນອນໃນກຸ່ມ 30 ປະເທດໃນໂລກທີ່ມີດັດຊະນີກຳລັງແຮງອ່ອນດ້ານວັດທະນະທຳ. ພວກເຮົາມີກົນໄກ, ນະໂຍບາຍເພື່ອແຜ່ກະຈາຍບັນດາຄຸນຄ່າວັດທະນະທຳ ຫວຽດນາມ ອອກສູ່ຕ່າງປະເທດ ກໍຄືຮັບເອົາບັນດາຜົນງານ ແລະ ບົດຮຽນປະສົບການອັນລ້ຳຄ່າ, ພູມປັນຍາທີ່ດີໃນການພັດທະນາວັດທະນະທຳໂລກແບບມີການຄັດເລືອກ ເພື່ອໜູນຊ່ວຍ, ສົ່ງເສີມການພັດທະນາວັດທະນະທຳ ຫວຽດນາມ”.
ຖານະບົດບາດໃໝ່ຂອງວັດທະນະທຳໃນຍຸດທະສາດພັດທະນາປະເທດຊາດນັບມື້ນັບໄດ້ຮັບການຢັ້ງຢືນ ແລະ ສະແດງໃຫ້ເຫັນຢ່າງຈະແຈ້ງ. ຈາກບ່ອນທີ່ກຳນົດວ່າ ແມ່ນເປົ້າໝາຍ, ແມ່ນກຳລັງໜູນພັດທະນາ, ປັດຈຸບັນນີ້ ວັດທະນະທຳຢັ້ງຢືນໄດ້ບົດບາດນຳພາໃນການພັດທະນາແລ້ວ. ທ່ານ ຮສຈ. ປອ. ດິງກົງຕວັນ, ຮອງຜູ້ອຳນວຍການມະຫາວິທະຍາໄລວັດທະນະທຳ ຮ່າໂນ້ຍ, ເນັ້ນໜັກວ່າ:
“ຢາກພັດທະນາຢ່າງວ່ອງໄວ ແລະ ຍືນຍົງໃນສັງກາດໃໝ່ ຈຳເປັນຕ້ອງພັດທະນາວັດທະນະທຳໃຫ້ທຽບທັນກັບການເມືອງ, ເສດຖະກິດ ແລະ ສັງຄົມ. ຕ້ອງກໍ່ສ້າງຊາວ ຫວຽດນາມ ຢ່າງຮອບດ້ານ. ນຳວັດທະນະທຳກາຍເປັນກຳລັງແຮງພາຍໃນ, ກຳລັງໜູນປະດິດຄິດສ້າງ, ພື້ນຖານອັນໝັ້ນແກ່ນໃຫ້ແກ່ການພັດທະນາປະເທດຊາດໃຫ້ຈະເລີນຮຸ່ງເຮືອງໃນສັງກາດໃໝ່ຢ່າງແທ້ຈິງ”.
ເລື່ອງສ້າງມະຕິຂອງສະພາແຫ່ງຊາດກ່ຽວກັບການພັດທະນາວັດທະນະທຳ ຫວຽດນາມ ໄດ້ຮັບຄວາມຫວັງວ່າ ຈະສ້າງບາດກ້າວຫັນປ່ຽນທີ່ສຳຄັນໃນການປັບປຸງລະບອບລະບຽບການໃຫ້ສົມບູນແບບ, ລະດົມທຸກຊັບພະຍາກອນ ແລະ ຊຸກຍູ້ການພັດທະນາວັດທະນະທຳຢ່າງຮອບດ້ານ, ຍືນຍົງ. ໃນສັງກາດໃໝ່ຂອງຊາດ, ວັດທະນະທຳແມ່ນກຳລັງໜູນພັດທະນາຢ່າງວ່ອງໄວ, ຍືນຍົງຂອງປະເທດ./.
