ວັນທີ 11 ກັນຍາ, ທ່ານ ເຈິ່ນແທັງເໝີ້ນ, ປະທານສະພາແຫ່ງຊາດ ຫວຽດນາມ ແລະ ພັນລະຍາ ໄດ້ສິ້ນສຸດການຢ້ຽມຢາມ ສ.ເກົາຫຼີ ແລະ ມົງໂກລີ ຢ່າງເປັນທາງການ (ແຕ່ວັນທີ 06 - 11 ກັນຍາ) ຕາມຄຳເຊີນຂອງ ທ່ານ Cho Jeong Sik, ປະທານສະພາແຫ່ງຊາດ ສ.ເກົາຫຼີ ແລະ ທ່ານ Sandag Byambatsogt, ປະທານສະພາແຫ່ງຊາດ ມົງໂກລີ. ໝາກຜົນການຢ້ຽມຢາມຄັ້ງນີ້ ສ້າງຂີດໝາຍສຳຄັນເຂົ້າໃນການທູດລັດຖະສະພາ, ປັບປຸງການພົວພັນ 2 ຝ່າຍ ລະຫວ່າງ ຫວຽດນາມ ແລະ 2 ປະເທດ ອາຊີຕາເວັນອອກສຽງເໜືອ ນີ້.
ການຢ້ຽມຢາມຄັ້ງນີ້ໄດ້ດຳເນີນໄປໃນສະພາບທີ່ ຫວຽດນາມ ພວມຕັ້ງໜ້າຜັນຂະຫຍາຍແນວທາງການຕ່າງປະເທດຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກກອມມູນິດຫວຽດນາມ ແລະ ມະຕິເລກທີ 06-NQ/TW ຂອງກົມການເມືອງ ກ່ຽວກັບການຜັນຂະຫຍາຍແນວທາງການຕ່າງປະເທດຂອງກອງປະຊຸມໃຫຍ່ຜູ້ແທນ ທົ່ວປະເທດຄັ້ງທີ XIV ຂອງພັກ, ການຢ້ຽມຢາມໄດ້ຫັນບັນດາຄຳໝັ້ນສັນຍາ ດ້ານການເມືອງຂັ້ນສູງກາຍເປັນປະສິດທິຜົນຂອງການຮ່ວມມືທີ່ແທ້ຈິງ, ຖືເອົາການປ່ຽນແປງໃໝ່ລະບອບ ລະບຽການນິຕິບັນຍັດ ແລະ ການຮ່ວມສຳພັນ ລະບົບມູນຄ່າເປັນ ກຳລັງໜູນຫຼັກແຫຼ່ງ.
ການທູດລັດຖະສະພາສົ່ງເສີມການຈັດຕັ້ງຜັນຂະຫຍາຍຂໍ້ຕົກລົງຮ່ວມມື
ໝາກຜົນພົ້ນເດັ່ນຂອງການຢ້ຽມຢາມຢ່າງເປັນທາງການຂອງ ທ່ານປະທານສະພາແຫ່ງຊາດ ເຈິ່ນແທັງເໝີ້ນ ສະແດງໃຫ້ເຫັນຢ່າງຈະແຈ້ງເຖິງບົດບາດຂອງການທູດ ລັດຖະສະພາໃນການຊຸກຍູ້ການຜັນຂະຫຍາຍບັນດາຂໍ້ຕົກລົງຂັ້ນສູງແບບໂດຍກົງ.
ຢູ່ ສ.ເກົາຫຼີ, ການຢ້ຽມຢາມ ເຊີອຸນ ຂອງປະທານສະພາແຫ່ງຊາດ ຫວຽດນາມ ພາຍຫຼັງ 5 ປີ, ແຫ່ງທີ່ທ່ານເປັນແຂກສາກົນຜູ້ທຳອິດຂອງທ່ານປະທານສະພາ ແຫ່ງຊາດ ສ.ເກົາຫຼີ ຄົນໃໝ່ Cho Jeong Sik, ໄດ້ຫັນຖະແຫຼງການຮ່ວມກ່ຽວກັບການພົວພັນຄູ່ຮ່ວມມືຍຸດທະສາດຮອບດ້ານ ລະຫວ່າງ ຫວຽດນາມ ແລະ ສ.ເກົາຫຼີ ໃຫ້ເປັນອັນລະອຽດ. ບົດບັນທຶກຄວາມເຂົ້າໃຈການຮ່ວມມື (MOU) ທີ່ໄດ້ລົງນາມໃນເດືອນ ພະຈິກ 2025 ໄດ້ຖືກໄດ້ນຳເຂົ້າປະຕິບັດຢ່າງແທດຈິງ. ຫວຽດນາມ ໃຫ້ຄຳໝັ້ນສັນຍາທີ່ຈະສ້າງສະພາບແວດລ້ອມດ້ານນິຕິກຳທີ່ໂປ່ງໃສ, ມີສະຖຽນລະພາບ, ພ້ອມແລ້ວທີ່ຈະຕ້ອນຮັບກະແສການລົງທຶນດ້ານເຕັກໂນໂລຢີສູງ.
ຢູ່ມົງໂກລີ, ການຢ້ຽມຢາມຂອງປະທານສະພາແຫ່ງຊາດຫວຽກນາມພາຍຫຼັງ 23 ປີແມ່ນມີລັກສະນະປະຫວັດສາດ. ເລື່ອງລົງນາມໃນບົດບັນທຶກຄວາມເຂົ້າໃຈການຮ່ວມມືລະຫວ່າງ 2 ສະພາແຫ່ງຊາດ ແລະ 2 ຫ້ອງວ່າການສະພາແຫ່ງຊາດ ໄດ້ຫັນຂອບເຂດຄູ່ຮ່ວມມືຮອບດ້ານທີ່ໄດ້ສ້າງຕັ້ງຂຶ້ນນັບແຕ່ປີ 2024 ເປັນລະບອບລະບຽບການຢ່າງວ່ອງໄວ.
ຜົນຂອງການຢ້ຽມຢາມແມ່ນຖືກກັບຄວາມຫວັງໂດຍ ທ່ານ ຫງວຽນມິນວູ, ຮອງລັດຖະມົນຕີຜູ້ປະຈຳການ ກະຊວງການຕ່າງປະເທດ ຫວຽດນາມ ກ່ອນນັ້ນ.
ການທູດລັດຖະສະພາຂັ້ນສູງ ບໍ່ພຽງແຕ່ສ້າງແລວນິຕິກຳທີ່ເອື້ອອຳນວຍຄວາມສະດວກໃຫ້ແກ່ການຮ່ວມມືເທົ່ານັ້ນ, ຫາກນີ້ຍັງເປັນຊ່ອງທາງເພື່ອກະຕຸກຊຸກຍູ້ການຜັນຂະຫຍາຍບັນດາຂໍ້ຕົກລົງຮ່ວມມື, ແບ່ງປັນບົດຮຽນການໃນການສ້າງກົດໝາຍ, ສ້າງລະບອບລະບຽບການໃຫ້ສົມບູນແບບ, ບົດຮຽນໃນການຄຸ້ມຄອງບໍລິຫານປະເທດຊາດ ແລະ ກໍ່ຊຸກຍູ້ບັນດາຄຳໝັ້ນສັນຍາດ້ານການເມືອງໃຫ້ກາຍເປັນປະສິດທິຜົນຂອງ ການຮ່ວມມືທີ່ແທ້ຈິງ ແລະ ເປັນປະໂຫຍດຕໍ່ປະຊາຊົນ ແລະ ວິສາຫະກິດອີກດ້ວຍ.
ປະກອບສ່ວນກຳນົດຄືນທີ່ຕັ້ງຂອງວິສາຫະກິດ ຫວຽດນາມ ໃນບັນດາໂຄງການ ວິທະຍາສາດ ແລະ ເຕັກໂນໂລຊີ
ຜົນສຳເລັດຂອງການຢ້ຽມຢາມ ສ.ເກົາຫຼີ ແລະ ມົງໂກລີ ຢ່າງເປັນທາງການ ຂອງທ່ານປະທານສະພາແຫ່ງຊາດ ເຈິ່ນແທັງເໝີ້ນ ຍັງສະແດງໃຫ້ເຫັນຢູ່ທີ່ເລື່ອງຍົກສູງປະສິດທິຜົນການຮ່ວມມືຂອງ ວິສາຫະກິດ ຫວຽດນາມ ເຂົ້າໃນລະບົບມູນຄ່າ ທົ່ວໂລກ.
ຢູ່ ສ.ເກົາຫຼີ, ການນຳສະພາແຫ່ງຊາດ ຫວຽດນາມ ໄດ້ຢືນຢັນການສົ່ງເສີມບັນດາກຸ່ມບໍລິສັດ ສ.ເກົາຫຼີ ເປີດກວ້າງການລົງທຶນຢູ່ ຫວຽດນາມ ໃນບັນດາຂົງເຂດ ພື້ນຖານໂຄງລ່າງ, ພະລັງງານສີຂຽວ, ສູນຂໍ້ມູນ; ຊຸກຍູ້ການສ້າງຕັ້ງ "ໂຄງການເຊື່ອມຕໍ່ ຜູ້ສະໜອງ ຫວຽດນາມ - ສ.ເກົາຫຼີ" ໂດຍໄວ ແນໃສ່ນຳວິສາຫະກິດ ຫວຽດນາມ ກ້າວເຂົ້າເລິກໃນຂັ້ນຕອນຜະລິດເຄື່ອງສຳຮອງ, ກົນຈັກຊັດເຈນ, ອຸປະກອນອັດຕະໂນມັດ... ພ້ອມກັນພັດທະນາ ແລະ R&D ເມື່ອຫັນປ່ຽນຈາກຮູບແບບ "ສ.ເກົາຫຼີ ລົງທຶນ - ຫວຽດນາມ ສະໜອງ" ໄປສູ່ການ ຄົ້ນຄວ້າ, ພັດທະນາ ແລະ ຫັນຜະລິດຕະພັນເປັນສິນຄ້າ...
ການພົບປະຂອງທ່ານປະທານສະພາແຫ່ງຊາດ ເຈິ່ນແທັງເໝີ້ນ ກັບເຄືອຂ່າຍ ນະວັດຕະກໍາ ແລະ ນັກຊ່ຽວຊານ ຫວຽດນາມ ຢູ່ ເຊີອຸນ ມີຄຸນຄ່າຍຸດທະສາດສຳຄັນ. ຕີລາຄາກ່ຽວກັບແງ່ຫວັງການຮ່ວມມືລະຫວ່າງ ຫວຽດນາມ ແລະ ສ.ເກົາຫຼີ, ທ່ານ Lee Hong-bae, ຫົວໜ້າສາຂາບໍລິສັດກົດໝາຍ Yulchon ປະຈຳ ຫວຽດນາມ, ກ່າວວ່າ:
ເລື່ອງ ຫວຽດນາມ ຍາມໃດກໍ່ຢຶດໝັ້ນ ແລະ ສະແດງຄວາມຕັດສິນໃຈຢ່າງແຮງໃນນະໂຍບາຍປະຕິຮູບ - ເປີດປະຕູ ກໍຄືການພັດທະນາເສດຖະກິດ ແມ່ນຄະແນນບວກອັນໃຫຍ່ຫຼວງ. ການກຳນົດທິດນະໂຍບາຍນີ້ໄດ້ສົ່ງສັນຍານທີ່ຊັດເຈນ ແລະ ຕັ້ງໜ້າໄປເຖິງປະຊາຄົມນັກລົງທຶນ. ພິເສດ, ຄວາມຈິງທີ່ແນ່ນອນແມ່ນ ຫວຽດນາມ ພວມຍູ້ແຮງການປະຕິຮູບລະບຽບການບໍລິຫານຢ່າງຕໍ່ເນື່ອງ ແລະ ປະຕິບັດບັນດາໂຄງການລົງທຶນກໍ່ສ້າງ ພື້ນຖານໂຄງລ່າງມີຂອບຂະໜາດໃຫຍ່ ແນໃສ່ສ້າງເງື່ອນໄຂທີ່ດີທີ່ສຸດໃຫ້ແກ່ການພັດທະນາຂອງວິສາຫະກິດ.
ໂດຍການເຊື່ອມຕໍ່ລະບອບລະບຽບການນິຕິບັນຍັດກັບຄວາມຕ້ອງການຮ່ວມມືຕົວຈິງ, ການຢ້ຽມຢາມ ບໍ່ພຽງແຕ່ປັບປຸງຄວາມໄວ້ເນື້ອເຊື່ອໃຈທາງດ້ານການເມືອງ ຢ່າງແຂງແຮງເທົ່ານັ້ນ, ຫາກຍັງເປີດຂົງເຂດພັດທະນາໃໝ່, ຮັບໃຊ້ພາລະກິດການພັດທະນາຢ່າງວ່ອງໄວ ແລະ ຍືນຍົງຂອງປະເທດຊາດອີກດ້ວຍ.
