(ພາບ: quochoi.vn)
ວັນທີ 17 ຕຸລາ, ກອງປະຊຸມສະໄໝສາມັນເທື່ອທີສອງ ສະພາແຫ່ງຊາດ ຫວຽດນາມ ຊຸດທີ 16, ໄດ້ໄຂຂຶ້ນຢູ່ຫໍສະພາແຫ່ງຊາດ, ນະຄອນຫຼວງ ຮ່າໂນ້ຍ. ກ່ອນຈັດກອງປະຊຸມ, ຜູ້ມີສິດເລືອກຕັ້ງໄດ້ຕັ້ງຄວາມຄາດຫວັງຫຼາຍຢ່າງຕໍ່ບັນດານະໂຍບາຍຊີ້ຂາດເຊິ່ງສະພາແຫ່ງຊາດຈະພິຈາລະນາ, ໂດຍສະເພາະແມ່ນບັນດາບັນຫາຕິດພັນກັບຊີວິດການເປັນຢູ່ ແລະ ການພັດທະນາຂອງປະເທດຊາດ. ຈາກນັ້ນ, ຄວາມຮຽກຮ້ອງທີ່ໄດ້ວາງອອກບໍ່ພຽງແຕ່ເພື່ອຍົກສູງຄຸນນະພາບການສ້າງກົດໝາຍເທົ່ານັ້ນ, ຫາກຍັງຕ້ອງຮັບປະກັນວ່າບັນດານະໂຍບາຍຊີ້ຂາດນັ້ນຕ້ອງໄດ້ນຳເຂົ້າສູ່ຊີວີດ.
ຕາມວາລະດຳເນີນປະຊຸມ, ກອງປະຊຸມສະໄໝສາມັນເທື່ອທີສອງ, ສະພາແຫ່ງຊາດ ຫວຽດນາມ ຊຸດທີ 16 ຈະພິຈາລະນາ, ປະກອບຄຳເຫັນ ແລະ ຮັບຮອງກົດໝາຍ 43 ສະບັບ, ມະຕິ 2 ສະບັບ, ພ້ອມກັນນັ້ນຕົກລົງຫຼາຍເນື້ອໃນສຳຄັນກ່ຽວກັບກັບການພັດທະນາເສດຖະກິດ - ສັງຄົມ, ງົບປະມານແຫ່ງລັດ, ແລະ ການຕິດຕາມກວດກາ.
ປ່ຽນແປງໃໝ່ຈິນຕະນາການໃນການສ້າງກົດໝາຍ, ການແກ້ໄຂບັນຫາຈາກຕົວຈິງ
ທີ່ບັນດາການພົບປະກັບຜູ້ມີສິດເລືອກຕັ້ງກ່ອນຈັດກອງປະຊຸມ, ໄປພ້ອມກັບຂໍ້ສະເໜີແນະກ່ຽວກັບຊີວິດການເປັນຢູ່, ການຜະລິດ, ດຳເນີນທຸລະກິດແລ້ວ, ຜູ້ມີສິດເລືອກຕັ້ງກໍ່ໄດ້ຮັບຮູ້ເຖິງຄວາມພະຍາຍາມຂອງສະພາແຫ່ງຊາດ ໃນການຍູ້ແຮງຄວາມຄືບໜ້າໃນການສ້າງກົດໝາຍ. ທ່ານນາງ ຟ້າມທິເລີ້ຍ, ຜູ້ມີສິດເລືອກຕັ້ງຢູ່ຕາແສງ ໄຊ່ງອຍ, ນະຄອນ ໂຮ່ຈິມິນ, ຖືວ່າ:
“ກອງປະຊຸມວິສາມັນຄັ້ງທຳອິດ, ສະພາແຫ່ງຊາດໄດ້ຮັບຮອງເອົາກົດໝາຍ, ມະຕິຫຼາຍສະບັບ. ທີ່ກອງປະຊຸມ, ສະພາແຫ່ງຊາດຈະພິຈາລະນາ, ຮັບຮອງເອົາກົດໝາຍ ແລະ ມະຕິ 43 ສະບັບ. ສິ່ງນີ້ໄດ້ຮັບຖືວ່າ ການປະຕິບັດວຽກງານຂອງສະພາແຫ່ງຊາດແມ່ນໄວທີ່ສຸດ ເພື່ອຊ່ວຍໃຫ້ລັດຖະບານ ແລະ ບັນດາອົງການຂອງລັດມີລະບົບກົດໝາຍຢ່າງພຽງພໍ ຮັບປະກັນການເຄື່ອນໄຫວຂອງກົງຈັກ.”
ພ້ອມກັບລະດັບຄວາມຄືບໜ້າ, ຄຸນນະພາບ ແລະ ຄວາມສາມາດເສີມຂະຫຍາຍບັນດາຂໍ້ກຳນົດໃຫ້ປະສິດທິຜົນກໍ່ແມ່ນຄວາມຮຽກຮ້ອງທີ່ສຳຄັນ. ທ່ານ ໂຕເລີມ, ເລຂາທິການໃຫຍ່ຄະນະບໍລິຫານງານສູນກາງພັກກອມກອມນິດ ຫວຽດນາມ, ປະທານປະເທດ ຫວຽດນາມ, ຄະນະສະມາຊິກສະພາແຫ່ງຊາດນະຄອນ ຮ່າໂນ້ຍ, ໄດ້ເນັ້ນໜັກເຖິງການກຳນົດທິດການປ່ຽນແປງໃໝ່ຈິນຕະນາການໃນການສ້າງກົດໝາຍ, ຕິດພັນກັບການເຄື່ອນໄຫວນິຕິບັນຍັດກັບເປົ້າໝາຍພັດທະນາ.
“ຈິດໃຈລວມແມ່ນຕ້ອງສືບຕໍ່ສະແດງໃຫ້ເຫັນບັນດາບາດກ້າວຫັນປ່ຽນສຳຄັນດ້ານຈິນຕະນາການ. ກົດໝາຍບໍ່ພຽງແຕ່ເພື່ອຄຸ້ມຄອງເທົ່ານັ້ນ, ຫາກຍັງສ້າງສັນພັດທະນາ, ສ້າງເງື່ອນໄຂສະດວກໃຫ້ແກ່ການເຄື່ອນໄຫວຂອງປະຊາຊົນ, ວິສາຫະກິດ ແລະ ໃຫ້ທັງລະບົບອີກດ້ວຍ.”
ໜຶ່ງໃນບັນດາຂົງເຂດຜູ້ມີສິດເລືອກຕັ້ງສືບຕໍ່ມີຄວາມສົນໃຈທີ່ກອງປະຊຸມແມ່ນທີ່ດິນ, ດ້ວຍບັນດາບັນຫາທີ່ກ່ຽວຂ້ອງ, ຄື: ການກຳນົດລາຄາທີ່ດິນ, ການຊົດເຊີຍ, ການໜູນຊ່ວຍ ແລະ ຕັ້ງຖິ່ນຖານຄົງທີ່ຄືນໃໝ່... ເມື່ອແຈ້ງຂໍ້ມູນກ່ຽວກັບການກຳນົດທິດປັບປຸງກົດໝາຍ, ທ່ານນາຍົກລັດຖະມົນຕີ ເລມິງຮຶງ, ຄະນະສະມາຊິກສະພາແຫ່ງຊາດນະຄອນ ຫາຍຟ່ອງ, ໃຫ້ຮູ້ວ່າ:
“ໃນໄລຍະຈະມາເຖິງນີ້, ເມື່ອປັບປຸງກົດໝາຍວ່າດ້ວຍທີ່ດິນ, ພວກເຮົາຈະປັບປຸງກົດໝາຍວ່າດ້ວຍທີ່ດິນ, ກົດໝາຍວ່າດ້ວຍເຮືອນຢູ່, ກົດໝາຍວ່າດ້ວຍການດຳເນີນທຸລະກິດອະສັງຫາລິມະຊັບ, ກົດໝາຍວ່າດ້ວຍການລົງທຶນ, ກົດໝາຍວ່າດ້ວຍການລົງທຶນພາກລັດ ແລະ ກົດໝາຍວ່າດ້ວຍງົບປະມານຂອງລັດ ຢ່າງຄົບຊຸດ. ໝາຍຄວາມວ່າ ພວກເຮົາຈະແກ້ໄຂບັນດາບັນຫາໂດຍສັງລວມ, ໃນນັ້ນຈຸດສຸມແມ່ນກົດໝາຍວ່າດ້ວຍທີ່ດິນ.”
ເພື່ອໃຫ້ນະໂຍບາຍຊີ້ຂາດຕອບສະໜອງຄວາມຄາດຫວັງຂອງຜູ້ມີສິດເລືອກຕັ້ງ
ບໍ່ພຽງແຕ່ກ່ຽວຂ້ອງເຖິງບັນດາລະບອບລະບຽບການດ້ານກົດໝາຍ, ຜູ້ມີສິດເລືອກຕັ້ງຍັງຕັ້ງຄາດຫວັງໃນຫຼາຍເນື້ອໃນ, ກ່ຽວຂ້ອງເຖິງນະໂຍບາຍພັດທະນາເສດຖະກິດພາກເອກະຊົນ, ການປະຕິຮູບລະບຽບການບໍລິຫານ, ການຫັນເປັນດີຈີຕອນ ແລະ ອຳນາດການປົກຄອງສອງຂັ້ນ... ທ່ານນາງ ຮ່າທິງາ, ຮອງປະທານ, ເລຂາທິການໃຫຍ່ຄະນະກຳມະການສູນກາງແນວໂຮມປະເທດຊາດ ຫວຽດນາມ, ໃຫ້ຮູ້ວ່າ:
“ຜູ້ມີສິດເລືອກຕັ້ງ ແລະ ປະຊາຊົນປາດຖະນາຈະສືບຕໍ່ເອົາໃຈໃສ່ຍົກສູງພື້ນໂຄງລ່າງດ້ານເຕັກນິກ, ເຕັກໂນໂລຊີ, ຮັບປະກັນວ່າບັນດາລະບົບຂໍ້ມູນ, ໂດຍສະເພາະຂໍ້ມູນປະຊາກອນ, ທີ່ດິນໄດ້ເຊື່ອມຕໍ່ກັນ ແລະ ເປັນເອກະພາບ, ຄົບຊຸດ, ພ້ອມກັນນັ້ນກໍ່ຫວັງວ່າ ການປະຕິຮູບການບໍລິຫານ ແລະ ການຫັນເປັນດີຈີຕອນຈະໄດ້ຮັບການຜັນຂະຫຍາຍຢ່າງແທດຈິງ, ມີປະສິທິຜົນ, ສ້າງຄວາມສະດວກໃຫ້ແກ່ປະຊາຊົນ ແລະ ວິສາຫະກິດ.”
ປະສິດທິຜົນຂອງນະໂຍບາຍຍັງໄດ້ສະແດງໃຫ້ເຫັນຜ່ານຜົນການຈັດຕັ້ງປະຕິບັດ ແລະ ບັນດາຜົນປະໂຫຍດທີ່ປະຊາຊົນໄດ້ຮັບ. ທ່ານ ດວ່ານມິງຮວນ, ຜູ້ອຳນວຍການສະຖາບັນການເມືອງແຫ່ງຊາດ ໂຮ່ຈີມິນ, ຄະນະສະມາຊິກສະພາແຫ່ງຊາດແຂວງ ເງະອານ, ໄດ້ແບ່ງປັນວ່າ:
“ຜູ້ມີສິດເລືອກຕັ້ງບໍ່ພຽງແຕ່ເອົາໃຈໃສ່ເຖິງບັນດາບັນຫາກ່ຽວຂ້ອງຂອງຄອບຄົວ, ເຂດຊຸມຊົນເທົ່ານັ້ນ, ຫາກຍັງຕິດຕາມ ແລະ ປະກອບຫຼາຍຄຳເຫັນກ່ຽວກັບບັນຫາລວມຂອງແຂວງ, ປະເທດຊາດອີກດ້ວຍ. ຄວາມປາຖະໜາຂອງພໍ່ແມ່ປະຊາຊົນແມ່ນຈະແຈ້ງທີ່ສຸດ, ແຜນນະໂຍບາຍຕ້ອງຖືກຕ້ອງ, ນະໂຍບາຍຕ້ອງຕິດພັນກັບສະພາບການຕົວຈິງ.”
ກອງປະຊຸມສະໄໝສາມັນເທື່ອທີສອງ ສະພາແຫ່ງຊາດ ຫວຽດນາມ ຊຸດທີ 16 ຈະເລີ່ມຕົ້ນດ້ວຍໜ້າທີ່ສຳຄັນທີ່ມີຕໍ່ການພັດທະນາຂອງປະເທດຊາດ. ຜູ້ມີສິດເລືອກຕັ້ງໄດ້ຕັ້ງຄວາມຫວັງວ່າ ບັນຫາທີ່ປະຊາຊົນມີຄວາມສົນໃຈຈະຖືກສ່ອງແສງຢ່າງຄົບຖ້ວນໃນວິວັດການສ້າງ ແລະ ປະຕິບັດນະໂຍບາຍ, ຜ່ານນັ້ນ, ປະກອບສ່ວນແກ້ໄຂຄວາມຫຍຸ້ງຍາກ, ສ້າງກຳລັງໜູນໃຫ້ແກ່ການພັດທະນາ ແລະ ຮັບປະກັນວ່າ ປະຊາຊົນຈະໄດ້ຮັບຜົນປະໂຫຍດຈາກປະສິດທິຜົນຂອງບັນດານະໂຍບາຍເຫຼົ່ານີ້ຢ່າງແທ້ຈິງ.
