ໃນຊຸມມື້ທີ່ຜ່ານມາ, ການປະທະກັນລະຫວ່າງ ລັດເຊຍ-ຢູແກຼນ ໄດ້ຮັບຮູ້ສັນຍານທີ່ຕັ້ງໜ້າຈຳນວນໜຶ່ງ ຂະນະທີ່ບັນດາຝ່າຍ ໄດ້ຮັບຮູ້ວ່າຈະເຊື່ອມຕໍ່ການເຈລະຈາສາມຝ່າຍ ອາເມລິກາ-ລັດເຊຍ-ຢູແກຼນ ໃນເດືອນພະຈິກ. ແຕ່ເຖິງແນວນັ້ນກໍ່ຕາມ, ເງື່ອນໄຂທີ່ ມົດສະກູ ແລະ ກີແອບ ຍົກອອກມາ ສະແດງໃຫ້ເຫັນວ່າ ເສັ້ນທາງພາໄປເຖິງການບັນລຸຂໍ້ຕົກລົງໄລຍະຍາວ ແນໃສ່ຢຸດຕິການປະທະກັນທີ່ແກ່ຍາວເປັນເວລາກວ່າ 4 ປີທີ່ຜ່ານມາ ຍັງມີສິ່ງທ້າທາຍຫຼາຍປະການຢູ່.
ວັນທີ 23 ຕຸລາ, ທ່ານ Volodymyr Zelensky, ປະທານາທິບໍດີ ຢູແກຼນ ໄດ້ຮັບຮູ້ວ່າ ບັນດານັກເຈລະຈາສັນຕິພາບມາຈາກ ຢູແກຼນ, ລັດເຊຍ ແລະ ອາເມລິກາ ໄດ້ເຫັນດີເປັນເອກະພາບຈັດການປະຊຸມຂັ້ນເຕັກນິກໃນເຄິ່ງຕົ້ນເດືອນພະຈິກຢູ່ Abu Dhabi-ສະຫະລັດ ອາຣັບ ເອມີເລດ-UAE. ຕໍ່ຈາກນັ້ນ, ວັນທີ 27 ຕຸລາ, ການນຳສອງປະເທດເອີລົບເໜືອຄື ນອກແວ ແລະ ແຟງລັງ ກໍ່ໄດ້ດຳເນີນການໂອ້ລົມທາງໂທລະສັບໂດຍກົງກັບທ່ານ Vladimir Putin ປະທານາທິບໍດີ ລັດເຊຍ.
ສັນຍານທີ່ຕັ້ງໜ້າ
ການໂອ້ລົມທາງໂທລະສັບລະຫວ່າງ ທ່ານ Jonas Gahr Stoere ປະທານາທິບໍດີ ນອກແວ ແລະ ທ່ານ Alexander Stubb ປະທານາທິບໍດີ ແຟງລັງ ກັບທ່ານ Vladimir Putin ປະທານາທິບໍດີ ລັດເຊຍ ໄດ້ດຳເນີນພາຍຫຼັງ 2, 3 ວັນຂອງການພົບປະສຳຄັນລະຫວ່າງຜູ້ຕາງໜ້າ ຢູແກຼນ ກັບບັນດາປະເທດສຳພັນທະມິດເມື່ອວັນທີ 20 ຕຸລາ ຢູ່ Oslo, ນອກແວ. ທ່ານ Alexander Stubb ປະທານາທິບໍດີ ແຟງລັງ ໃຫ້ຮູ້ວ່າ:
ການແລກປ່ຽນກັບທ່ານປະທານາທິບໍດີ ລັດເຊຍ Vladimir Putin ໄດ້ດຳເນີນໄປແບບເປັນມືອາຊີບ ແລະ ກົງໄປກົງມາ. ປະຈຸບັນ, ຂັ້ນຕອນໃຫ້ແກ່ການພົບປະລະຫວ່າງການນຳ ອາເມລິກາ, ຢູແກຼນ, ລັດເຊຍ ແລະ ບັນດາຝ່າຍ ເອີລົບ ຢູ່ Abu Dhabi ໃນຈຸດເວລາໃດໜຶ່ງໃນເດືອນພະຈິກ ໄດ້ເປີດອອກແລ້ວ. ທ່ານປະທານາທິບໍດີ ນອກແວ ແລະ ຂ້າພະເຈົ້າ ຖືວ່າ ສິ່ງສຳຄັນແມ່ນບັນດາປະເທດມີເສັ້ນຊາຍແດນຕິດກັບ ລັດເຊຍ ຄື ແຟງລັງ ແລະ ນອກແວ ຕ້ອງເຮັດແຈ້ງບັນດາບັນຫາທີ່ອາດສາມາດໄປເຖິງການເຂົ້າໃຈຜິດ.
ຕາມບັນດານັກສັງເກດການແລ້ວ, ບັນດາການຫັນປ່ຽນດ້ານການທູດທີ່ໜ້າສົນໃຈລະຫວ່າງ ຢູແກຼນ ແລະ ເອີລົບ ໄດ້ເລີ່ມມາຈາກຕົວຈິງແມ່ນ ການພົວພັນລະຫວ່າງ ລັດເຊຍ ແລະ ອາເມລິກາ, ສຳພັນທະມິດສຳຄັນທີ່ສຸດຂອງ ຢູແກຼນ (ແລະ ເອີລົບ) ໄດ້ປ່ຽນແປງຫຼາຍພໍສົມຄວນໃນ 2,3 ອາທິດທີ່ຜ່ານມາ, ເລີ່ມຈາກຂໍ້ຕົກລົງນ້ຳມັນ diesel ອາເມລິກາ-ລັດເຊຍ ເມື່ອວັນທີ 10 ຕຸລາທີ່ຜ່ານມາ, ຖັດມາແມ່ນເລື່ອງ ອາເມລິກາ ໄດ້ຍົກເວັ້ນການນຳໃຊ້ປະມວນກົດໝາຍ Lindsey Graham ວ່າດ້ວຍການລົງໂທດ ລັດເຊຍ ແລະ ສຸດທ້າຍແມ່ນເລື່ອງສາມປະເທດມະຫາອຳນາດ ອາເມລິກາ-ລັດເຊຍ-ຈີນ ໄດ້ຂຶ້ນແຜນຈັດກອງປະຊຸມສຸດຍອດໃນທ້າຍເດືອນພະຈິກ ຊື່ງແມ່ນກອງປະຊຸມອາດຈະສົ່ງຜົນກະທົບໃຫຍ່ຕໍ່ໂຄງປະກອບຄວາມໝັ້ນຄົງທົ່ວໂລກ, ໃນນັ້ນມີ ເອີລົບ. ທ່ານປະທານາທິບໍດີ ອາເມລິກາ Donald Trump ໄດ້ເນັ້ນໜັກວ່າ:
ຢູແກຼນ ຕ້ອງຢາກບັນລຸໄດ້ຂໍ້ຕົກລົງສະບັບໜຶ່ງ ຍ້ອນວ່າ ອາເມລິກາ ໄດ້ເບີກຈ່າຍບ້ວງເງິນກ້ອນໃຫຍ່ທີ່ສຸດ ແລະ ເອີລົບ ກໍ່ເຊັ່ນດຽວກັນ. ປະຈຸບັນ, ເອີລົບ ຮູ້ສຶອິດເມື່ອຍແລ້ວ, ຖ້າຫາກວ່າ ຢູແກຼນ ບໍ່ບັນລຸ້ໄດ້ຂໍ້ຕົກລົງ, ຕາມຂ້າພະເຈົ້າແລ້ວ, ໃນສຸດທ້າຍ, ສະພາບການຈະຊົ່ວຮ້າຍລົງອີກ.
ຄວາມປະເອີບໃຈຢ່າງລະມັດລະວັງ
ບໍ່ພຽງແຕ່ຢຸດຢູ່ແນວຮົບທາງການທູດເທົ່ານັ້ນ, ໃນສະໜາມຮົບ, ລັດເຊຍ ແລະ ຢູແກຼນ ກໍ່ພວມມີບັນດາການກະທຳອັນຕັ້ງໜ້າອີກດ້ວຍ. ແຕ່ວັນທີ 27 ຕຸລາ ຫາວັນທີ 1 ພະຈິກ, ສອງຝ່າຍໄດ້ຢຸດຍິງຢູ່ Olesky ທາງຕາເວັນອອກ ຢູແກຼນ ເພື່ອເປີດທາງໃຫ້ແກ່ບັນດາການເຄື່ອນໄຫວມະນຸດສະທຳ, ປີ່ນປົວພະຍາດ ແລະ ຍົກຍ້າຍສາມັນຊົນທີ່ຖືກຕິດຄ້າງຢູ່ເທດສະບານແຫ່ງນີ້. ເຖິງວ່າໄດ້ປະຕິເສດຄວາມອາດສາມາດຢຸດຕິບັນດາບັ້ນການທະຫານໂດຍທັນທີກໍ່ຕາມ ແຕ່ວັງ Kremlin ກໍ່ຖືວ່າ ຂໍ້ຕົກລົງ Olesky ຈະສາມາດເປັນແບບຢ່າງເພື່ອນຳໃຊ້ໃຫ້ບັນດາຄຳສັ່ງຢຸດຍິງພາຍໃນ ເພື່ອເຫດຜົນມະນຸດສະທຳຫຼັງຈາກນີ້. ທ່ານປະທານາທິບໍດີ ລັດເຊຍ Vladimir Putin ຍາມໃດກໍ່ໄດ້ເນັ້ນໜັກເຖິງເລື່ອງແກ້ໄຂການປະທະກັນໃຫ້ເຖິງກົກເຖິງປາຍ ແລະ ຮັບປະກັນໂຄງປະກອບຄວາມໝັ້ນຄົງອັນຍາວນານຢູ່ ເອີລົບ. ທ່ານກ່າວວ່າ:
ພວກຂ້າພະເຈົ້ໄດ້ເຫັນດີເປັນເອກະສັນວ່າທັງສອງຝ່າຍລ້ວນແຕ່ກຽມພ້ອມເຊື່ອມຕໍ່ການພົບປະສາມຝ່າຍ ອາເມລິກາ-ລັດເຊຍ-ຢູແກຼນ. ຈຸດປະສົງຂອງການເຈລະຈາຄັ້ງຕ່າງໆນີ້ແມ່ນການປຶກສາຫາລືກ່ຽວກັບບັນຫາຮັບປະກັນຄວາມໝັ້ນຄົງໃຫ້ແກ່ ຢູແກຼນ ແລະ ລັດເຊຍ ພາຍຫຼັງທີ່ບັນລຸໄດ້ບັນດາຂໍ້ຕົກລົງສັນຕິພາບ, ລະອຽດແມ່ນບັນດາຂໍ້ຕົກລົງໃນແບບທີ່ສົມບູນ ຫາກບໍ່ແມ່ນໝາກຜົນຂອງການຢຸດຕິການປະທະກັນໂດຍຊົ່ວຄາວໃນໄລຍະສັ້ນ. ພວກຂ້າພະເຈົ້າພ້ອມແລ້ວທີ່ຈະເຊື່ອມຕໍ່ບັນດາການພົບປະນີ້ ເພື່ອບັນລຸໄດ້ຄາດໝາຍດັ່ງກ່າວ.
ຄາດວ່າ, ບັນດາໜ່ວຍເຈລະຈາຂອງ ລັດເຊຍ,ຢູແກຼນ ແລະ ອາເມລິກາ ຈະພົບປະກັນຢູ່ Abu Dhabi ໃນເຄິ່ງຕົ້ນເດືອນພະຈິກ. ຖ້າການປຶກສາຫາລືຢູ່ຂັ້ນເຕັກນິກບັນລຸໄດ້ຄວາມຄືບໜ້າ, ບັນດາຝ່າຍອາດຈະກ້າວໄປສູ່ການພົບປະລະຫວ່າງການນຳບັນດາປະເທດ ເພື່ອແກ້ໄຂບັນດາບັນຫາສຳຄັນທີ່ຍັງຄົງຄ້າງ. ສັນຍານອັນຕັ້ງໜ້າອີກອັນໜຶ່ງແມ່ນຝ່າຍ ລັດເຊຍ ໄດ້ປະກາດຊົມເຊີຍເລື່ອງ ອີຢູ ອາດສາມາດສົ່ງທູດພິເສດເຂົ້າຮ່ວມການຊຸກຍູ້ບັນດາມາດຕະການສັນຕິພາບ./.
