ບົດກ່າວປາໄສຂອງ ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ໃນກອງປະຊຸມເຊື່ອມຊຶມມະຕິສະບັບເລກທີ 06 – NQ/TW (ໃນວັນທີ 19 ພຶດສະພາ 2026 ຂອງກົມການເມືອງ), ວັນທີ 11 ມິຖຸນາ ຢູ່ ຮ່າໂນ້ຍ ໄດ້ສະແດງໃຫ້ເຫັນບັນດາກຳນົດທິດທີ່ລະອຽດທີ່ສຸດກ່ຽວກັບການຜັນຂະຫຍາຍແນວທາງການຕ່າງປະເທດ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກກອມມູນິດ ຫວຽດນາມ ໃນໄລຍະຈະມາເຖິງ. ບົດກ່າວປາໄສຂອງທ່ານ ໂຕເລິມ ໄດ້ຊີ້ໃຫ້ເຫັນວິໄສທັດໃໝ່ກ່ຽວກັບການຕ່າງປະເທດ ຫວຽດນາມ ໃນສັງກາດໃໝ່.
ໂດຍເສີມຂະຫຍາຍເນື້ອໃນຈິດໃນຂອງມະຕິສະບັບເລກທີ 59 – NQ/TW ປີ 2025 ວ່າດ້ວຍການເຊື່ອມໂຍງເຂົ້າກັບສາກົນ, ມະຕິສະບັບເລກທີ 06 – NQ/TW ແມ່ນບາດກ້າວພັດທະນາລະອຽດກ່ຽວກັບຈິນຕະນາການການຕ່າງປະເທດຂອງ ຫວຽດນາມ, ວາງອອກເປົ້າໝາຍພັດທະນາການຕ່າງປະເທດໃນໄລຍະໃໝ່ໃຫ້ສົມກັບຂອບຂະໜາດປະຫວັດສາດ, ວັດທະນະທຳ ແລະ ທີ່ຕັ້ງບົດບາດຂອງປະເທດຊາດ.
ບັນດາກຳນົດທິດໃຫຍ່ຂອງວຽກງານການຕ່າງປະເທດ
ຕາມທ່ານ ປອ ຫງວຽນຮົ່ງຫາຍ, ຜູ້ຊ່ວຍວຽກ ສາດສະດາຈານ ມະຫາວິທະຍາໄລ VinUniversity ແລ້ວ, ໃນບົດກ່າວປາໄສຂອງ ທ່ານເລຂາທິການໃຫຍ່, ປະທານປະເທດ ໂຕເລິມ ໄດ້ຍົກໃຫ້ເຫັນ 5 ການກຳນົດທິດໃຫຍ່ຂອງວຽກງານການຕ່າງປະເທດ ແລະ ການທູດຂອງ ຫວຽດນາມ ແລະ 4 ບັນຫາໃຫຍ່ໃນການຈັດຕັ້ງປະຕິບັດ. ບົດກ່າວປາໄສເໝືອນດັ່ງເສັ້ນແດງກຳນົດທິດໃຫ້ແກ່ການເຄື່ອນໄຫວວຽກງານການຕ່າງປະເທດຂອງ ຫວຽດນາມ ໃນເປົ້າໝາຍພັດທະນາຍຸດທະສາດສັງລວມຂອງປະເທດຊາດນັບແຕ່ນີ້ຮອດປີ 2045. ທ່ານກ່າວວ່າ:
“ຂ້າພະເຈົ້າສະຫຼຸບເປັນ 16 ຄຳ: ທີໜຶ່ງແມ່ນ ເປັນເຈົ້າຍຸດທະສາດ, ທີສອງແມ່ນ ພັດທະນາຢ່າງເຂັ້ມແຂງດ້ວຍຕົນເອງ, ທີສາມແມ່ນ ຍົກສູງທີ່ຕັ້ງບົດບາດ ແລະ ທີສີ່ແມ່ນ ຄວາມຮັບຜິດຊອບປະກອບສ່ວນ. ຈຸດໃໝ່ຢູ່ນີ້ແມ່ນຍົກສູງທີ່ຕັ້ງບົດບາດຂອງ ຫວຽດນາມ. ສິ່ງດັ່ງກ່າວສະແດງໃຫ້ເຫັນຈິດໃຈອັນໃໝ່, ຄວາມເຊື່ອໝັ້ນໃໝ່ຂອງ ຫວຽດນາມ ພາຍຫຼັງ 4 ທົດສະວັດແຫ່ງການປ່ຽນແປງໃໝ່ ແລະ ພັດທະນາ. ພວກຂ້າພະເຈົ້າພ້ອມແລ້ວທີ່ຈະສະແດງໃຫ້ເຫັນ ແລະ ຍົກສູງທີ່ຕັ້ງບົດບາດຂອງ ຫວຽດນາມ ໃນເວທີສາກົນ”.
ໜຶ່ງໃນບັນດາເນື້ອໃນໃຫຍ່ທີ່ສຸດທີ່ການນຳພັກ ແລະ ລັດ ຫວຽດນາມ ໄດ້ເນັ້ນໜັກໃນບົດກ່າວປາໄສຂອງຕົນ ນັ້ນແມ່ນການຕ່າງປະເທດໄດ້ຮັບການກຳນົດວ່າແມ່ນໜ້າທີ່ “ຈຸດສຸມ, ເປັນປະຈຳ”, ທຽບເທົ່າກັບການປ້ອງກັນຊາດ, ປ້ອງກັນຄວາມສະຫງົບ. ຕາມ ທ່ານ ປອ. ຫງວຽນຮົ່ງຫາຍ, ຜູ້ຊ່ວຍວຽກ ສາດສະດາຈານ ມະຫາວິທະຍາໄລ VinUniversity ແລ້ວ, ເລື່ອງຍົກລະດັບນີ້ ໄດ້ສະແດງໃຫ້ເຫັນມູມມອງ ແລະ ວິໄສທັດຍຸດທະສາດຂອງການນຳພັກ, ລັດ. ຖ້າເບິ່ງໃນກົດເກນພັດທະນາ ເວົ້າລວມ, ການປ້ອງກັນຊາດ - ປ້ອງກັນຄວາມສະຫງົບ ກໍເຮັດວຽກງານການຕ່າງປະເທດ ແລະ ເຮັດວຽກງານການຕ່າງປະເທດ ກໍເພື່ອຮັບໃຊ້ການປ້ອງກັນຊາດ, ປ້ອງກັນຄວາມສະຫງົບ. ໂດຍລວມແລ້ວ, ທ່ານ ປອ. ຫງວຽນຮົ່ງຫາຍ ຖືວ່າ:
“ບັນດາການວິເຄາະ ແລະ ກຳນົດທິດຊີ້ນຳຂອງ ທ່ານເລຂາທິການໃຫຍ່, ປະທານປະເທດ ໂຕເລິມ ໃນບົດກ່າວປາໄສ ບໍ່ພຽງແຕ່ມີລັກສະນະຮອບດ້ານເທົ່ານັ້ນ ຫາກຍັງແມ່ນແນວຄິດ ແລະ ວິໄສທັດຍຸດທະສາດສຳລັບວຽກງານ ແລະ ໜ້າທີ່ການຕ່າງປະເທດ ແລະ ການທູດ ໃນສັງກາດໃໝ່ອີກດ້ວຍ. ເນື້ອໃນແກ່ນສານ ແລະ ລຸລ່ວງມີລັກສະນະຊີ້ນຳຍຸດທະສາດ ທີ່ຂ້າພະເຈົ້າປະທັບໃຈທີ່ສຸດ ແມ່ນຈິດໃຈເປັນເຈົ້າຍຸດທະສາດ ແລະ ສ້າງຄວາມເຂັ້ມແຂງຂອງປະເທດຊາດໃນສະພາບການໃໝ່, ໄລຍະໃໝ່ດ້ວຍຕົນເອງ. ແຕ່ການເປັນເຈົ້າຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ບໍ່ໝາຍຄວາມວ່າ ພວກເຮົາຈະແຍກຕົວອອກຈາກໂລກ ແລະ ປະຊາຄົມສາກົນ, ແຕ່ກົງກັນຂ້າມ, ພວກເຮົາຍິ່ງມີຄວາມຜູກພັນ ແລະ ການເຊື່ອມໂຍງເຂົ້າກັບສາກົນ, ພວກເຮົາແມ່ນສ່ວນໜຶ່ງ ແລະ ແມ່ນສະມາຊິກທີ່ມີຄວາມຮັບຜິດຊອບ”.
ການແກ້ງແຍ້ງແມ່ນປັດໄຈທີ່ຈຳເປັນ
ໃນບົດກ່າວປາໄສ, ທ່ານເລຂາທິການໃຫຍ່, ປະທານປະເທດ ໂຕເລິມ ໄດ້ຊີ້ໃຫ້ເຫັນ ບັນຫາແກ້ງແຍ້ງແມ່ນປັດໄຈຈຳເປັນ. ເລື່ອງຮັບຮູ້ຈະແຈ້ງລັກສະນະແກ້ງແຍ້ງນີ້ ຊ່ວຍໃຫ້ພວກເຮົາສາມາດເຮັດແຈ້ງໄດ້ກ່ຽວກັບແນວທາງ, ແບບວິທີປະຕິບັດແນວທາງການຕ່າງປະເທດຂອງ ຫວຽດນາມ. ທ່ານ ປອ. ຫງວຽນຮົ່ງຫາຍ ເນັ້ນໜັກຕື່ມອີກວ່າ:
“ເພື່ອປົກປັກຮັກສາອະທິປະໄຕແຫ່ງຊາດ ແລະ ພັດທະນາ, ປົກປັກຮັກສາພື້ນທີ່ຄົງຕົວຂອງປະເທດຊາດ, ດ້ວຍຖານະເປັນພາກສ່ວນທີ່ບໍ່ອາດຕັກແຍກອອກຈາກໂລກໄດ້ນັ້ນ, ພວກເຮົາຕ້ອງເປັນເຈົ້າການກະທຳ, ເຊິ່ງກ່ອນອື່ນໝົດແມ່ນເປັນເຈົ້າການເຂົ້າຮ່ວມວິວັດທະນາການສ້າງສາ ແລະ ສ້າງກຳນົດກົດລະບຽບ; ເປັນເຈົ້າການເຂົ້າຮ່ວມການສ້າງກົນໄກເພື່ອຮັບປະກັນໃຫ້ບັນດາກົດໝາຍນັ້ນ ໄດ້ຮັບການປະຕິບັດຢ່າງມີປະສິດທິຜົນ, ຮັບປະກັນຜົນປະໂຫຍດແຫ່ງຊາດ. ເພາະສະນັ້ນ, ໂດຍລວມແລ້ວ, ຂ້າພະເຈົ້າຖືວ່າ ນີ້ແມ່ນແບບວິທີເຂົ້າເຖິງທີ່ຖືກຕ້ອງ, ແມ່ນບາດກ້າວເດີນທີ່ຖືກຕ້ອງ ແລະ ຈາກການຫັນປ່ຽນກ່ຽວກັບຈິນຕະນາການນີ້ເພື່ອຜັນຂະຫຍາຍປະຕິບັດ ຈະປະກອບສ່ວນເຂົ້າໃນການຫັນບັນດາເປົ້າໝາຍຂອງປະເທດຊາດທີ່ວາງອອກໃນກອງປະຊຸມໃຫຍ່ຄັ້ງທີ XIV ຂອງພັກ ໃຫ້ປະກົດຜົນເປັນຈິງໄດ້”.
ບົດກ່າວປາໄສຂອງ ທ່ານເລຂາທິການໃຫຍ່, ປະທານປະເທດ ໂຕເລິມ ໄດ້ຊີ້ໃຫ້ເຫັນວິໄສທັດໃໝ່ໜຶ່ງກ່ຽວກັບການຕ່າງປະເທດ ຫວຽດນາມ ໃນສັງກາດໃໝ່: ການຕ່າງປະເທດບໍ່ພຽງແຕ່ແມ່ນແບບວິທີປົກປັກຮັກສາຜົນປະໂຫຍດແຫ່ງຊາດເທົ່ານັ້ນ, ຫາກຍັງແມ່ນກຳລັງນຳໜ້າໃນການສ້າງສະພາບແວດລ້ອມສັນຕິພາບ, ເປີດອອກພື້ນທີ່ພັດທະນາ, ຍົກສູງທີ່ຕັ້ງຂອງປະເທດຊາດ ແລະ ປະກອບສ່ວນກຳນົດກົດລະບຽບລວມຂອງໂລກອີກດ້ວຍ./.
