ប្រវត្តិសាស្ត្រជាតិវៀតណាមបានចាប់ផ្តើមជាមួយនឹងយុគសម័យស្តេចហ៊ុង ជាមួយនឹងការរួមចំណែកដ៏ធំធេងរបស់បណ្តាស្តេចហ៊ុង ក្នុងការឈូសឆាយដីធ្លី ការអភិវឌ្ឍ និងបង្កើតឡើង រដ្ឋវ៉ាន់ឡាង។ ដើម្បីរំលឹកដល់គុណូបការៈដ៏ធំធេងនេះ អស់រយៈពេលរាប់ពាន់ឆ្នាំមកហើយ ប្រជាជនវៀតណាមបានគោរពបូជាបណ្តាស្តេចហ៊ុងជាបុព្វបុរសជាតិ។ ជំនឿគោរពបូជាស្តេចហ៊ុងគឺជាខ្សែពួរដ៏ពិសិដ្ឋដែលតភ្ជាប់អតីតកាលជាមួយបច្ចុប្បន្នកាល តភ្ជាប់បុគ្គលម្នាក់ជាមួយនឹងសហគមន៍។
សាមគ្គីភាពទាំងក្នុងនិងក្រៅប្រទេស
វៀតណាមមានកេរ្តិ៍ដំណែលជាង ១៤០០កន្លែង ដែលគោរពបូជាបណ្តាស្តេចហ៊ុង ឬពាក់ព័ន្ធនឹងសម័យបណ្តាស្តេចហ៊ុង ចាប់ពីទីក្រុងហាណូយ ហៃហ្វុង បាក់និញ ថាយង្វៀន ឡាងសឺន ង៉េអាន ឡាំដុង ខាញ់ហ័រ ដុងណៃ ទីក្រុងហូជីមិញ អានយ៉ាង កឹនធើ។ល។
ជារៀងរាល់ឆ្នាំ សកម្មភាពក្នុងឱកាសពីធីសែនខួបស្តេចហ៊ុង ត្រូវបានធ្វើឡើងនៅកន្លែងជាច្រើន ប៉ុន្តែចំណុចស្នូលគឺនៅខេត្ត ភូ ថ ជាកណ្លែងដែលមានកេរ្តិ៍ដំណែលប្រវត្តិសាស្ត្រជាតិពិសេសគឺវិហារហ៊ុង។ រូបភាពនៃមនុស្សរាប់ម៉ឺននាក់មកពីទូទាំងប្រទេស តម្រង់ជួរដើម្បីអុជធូបថ្វាយបង្គំបុព្វបុរសជាតិ គឺជាសក្ខីភាពដ៏រស់រវើកនៃសាមគ្គីភាពក្នុងសហគមន៍។ ស្មារតីនេះ បានជួយប្រជាជនវៀតណាមឱ្យយកឈ្នះលើសម័យកាលដ៏លំបាកបំផុត ដូចជាការដែលប្រទេសទាំងមូលបានរួមគ្នាក្នុងបុព្វហេតុបង្រួបបង្រួមប្រទេសជាតិ និងរក្សាឯករាជ្យ។ ឬក្នុងអំឡុងពេលមានជំងឺរាតត្បាតកូវីដ-១៩ (២០២០-២០២១) ប្រទេសទាំងមូលបានរួមគ្នាដើម្បីយកឈ្នះលើការលំបាក; ក្នុងគ្រោះមហន្តរាយធម្មជាតិ ទឹកជំនន់ និងការរអិលបាក់ដី ស្មារតីភាតរភាពបានពន្លឺចែងចាំងកាន់តែខ្លាំង។
ទិវាសែនខួបស្តេចហ៊ុង បានក្លាយជាពិធីបុណ្យរួមសម្រាប់ប្រជាជនទាំងក្នុងនិងក្រៅប្រទេស។ ចាប់ពីទីក្រុងហាណូយ ទីក្រុងហូជីមិញ ទីក្រុងដាណាំង រហូតដល់ទីក្រុងប៉ារីស ទីក្រុងប៊ែរឡាំង ញូវយ៉ក ទីក្រុងស៊ីដនី សុទ្ធតែរៀបចំពិធីអុជធូប ជាមួយនឹងសំឡេងអធិស្ឋាន៖ សុំឱ្យប្រទេសជាតិមានសុខសន្តិភាព ប្រជាជនមានសេចក្ដីសុខ និងសុំឱ្យប្រជាជាតិស្ថិតស្ថេរគង់វង្ស និងរីកចម្រើនជានិរន្តរ៍។ លោក Hoang Dinh Thang ប្រធានសហភាពជនវៀតណាមនៅអឺរ៉ុប បានចែករំលែកថា៖ «យើងជានិច្ចកាលយកចិត្តទុកថាក់លើការរៀបចំពិធីបុណ្យប្រពៃណី ជាពិសេសទិវាសែនខួបស្តេចហ៊ុង។ សកម្មភាពនេះ មានអត្ថន័យជាពិសេសសម្រាប់សហគមន៍ជនវៀតណាមនៅឯបរទេស ដើម្បីរំលឹកថា ប្រជាជនវៀតណាមមានដើមកំណើតតែមួយ តាមនោះ បង្ហាញពីសាមគ្គីភាព ការគាំទ្រគ្នាទៅវិញទៅមក និងលើកកម្ពស់ប្រពៃណីដ៏ល្អប្រសើររបស់ប្រជាជាតិ»។
សាមគ្គីភាពដើម្បីអភិវឌ្ឍប្រទេសជាតិ
ការលើកកម្ពស់តម្លៃនៃពិធីសែនខួបស្តេចហ៊ុង មិនគ្រាន់តែជាការរៀបចំពិធីការដ៏ឧឡារិកនោះទេ ប៉ុន្តែថែមទាំងការរក្សានិងពូនជ្រុំសេចក្តីស្នេហាជាតិសាមគ្គីភាព និងមោទនភាពជាតិ ចំពោះប្រជាជនវៀតណាមគ្រប់រូបផងដែរ។
សព្វថ្ងៃនេះ ប្រទេសជាតិកំពុងចូលដល់ដំណាក់កាលអភិវឌ្ឍន៍ថ្មី ជាមួយនឹងភារកិច្ចសម្រេចឲ្យបានគោលដៅរយៈពេល ១០០ ឆ្នាំ ក្រោមការដឹកនាំរបស់បក្សកុម្មុយនិស្តវៀតណាមនៅឆ្នាំ ២០៣០ និងខួប ១០០ ឆ្នាំទិវាបង្កើតសាធារណរដ្ឋសង្គមនិយមវៀតណាម នៅឆ្នាំ ២០៤៥។ សេចក្តីប្រាថ្នានៃ "ប្រជាជនមានវិបុលភាព ប្រទេសជាតិរឹងមាំ ប្រជាធិបតេយ្យ យុត្តិធម៌ និងស៊ីវិល័យ" ទាមទារឱ្យមានកម្លាំងផ្ទៃក្នុងថ្មី គំរូកំណើនថ្មី និងកម្លាំងចលករអភិវឌ្ឍថ្មី ដូចជា៖ ការផ្លាស់ប្តូរបៃតង ការផ្លាស់ប្តូរឌីជីថល វិទ្យាសាស្ត្រនិងបច្ចេកវិទ្យា នវានុវត្តន៍ និងសេដ្ឋកិច្ចវិលជុំ។ ទោះជាយ៉ាងណាក៏ដោយ មូលដ្ឋានគ្រឹះដើម្បីឈានទៅឆ្ងាយ និងសម្រេចបានជោគជ័យនៅតែជាសាមគ្គីភាព។ សាមគ្គីភាពដើម្បីលុបបំបាត់ឧបសគ្គខាងស្ថាប័ន; សាមគ្គីភាពដើម្បីដោះសោធនធានទាំងអស់; សាមគ្គីភាពដើម្បីចែករំលែកហានិភ័យនិងបង្កើនឱកាស; សាមគ្គីភាពដើម្បីធានាថា គ្មាននរណាម្នាក់ត្រូវបានទុកចោលនៅពីក្រោយឡើយ។ មហាសាមគ្គីភាពគឺជាកម្លាំងចលករផ្ទៃក្នុងដ៏សំខាន់បំផុត។
លើឆាកអន្តរជាតិ វៀតណាមដែលមានសាមគ្គីភាព ក៏ជាវៀតណាមដែលមានកិត្យានុភាពផងដែរ។ ស្មារតីនៃផែនមហាសាមគ្គីជនជាតិគឺជា "អត្តសញ្ញាណប័ណ្ណ" ដែលជួយវៀតណាមធ្វើសមាហរណកម្មដោយទំនុកចិត្ត។ លោក Bui Hoai Son សមាជិកគណៈកម្មាធិការវប្បធម៌ និងសង្គមនៃរដ្ឋសភា បានថ្លែងថា៖ «ជំនឿគោរពបូជាស្តេចហ៊ុង ជួយបង្កើតកម្លាំងនៃសាមគ្គីភាព និងស្មារតីស្នេហាជាតិ មិនត្រឹមតែក្នុងស្រុកប៉ុណ្ណោះទេ ប៉ុន្តែថែមទាំងនៅឯបរទេសទៀតផង។ ពិធីបុណ្យគោរពបូជាបុព្វបុរសជាតិត្រូវបានប្រារព្ធឡើងនៅក្នុងប្រទេសជាច្រើននៅជុំវិញពិភពលោក នាំជំនឿជាក់ និងស្មារតីរបស់ប្រជាជនវៀតណាមនៅទូទាំងពិភពលោក ឆ្ពោះទៅរកទឹកដីដូនតា និងពិធីបុណ្យវិហារស្តេចហ៊ុង។ ប្រការនេះ បានបង្កើតសាមគ្គីភាព ស្មារតីស្នេហាជាតិ និងបង្កើតកម្លាំងវៀតណាមយ៉ាងពិតប្រាកដ»។
ចាប់ពីឬសគល់ប្រវត្តិសាស្ត្ររហូតដល់ជីវភាពសម័យទំនើប ពិធីសែនខួបស្តេចហ៊ុងបានលើសពីពិធីបុណ្យធម្មតាមួយ ដើម្បីក្លាយជានិមិត្តរូបខាងស្មារតីរបស់ប្រជាជាតិវៀតណាម។ នេះមិនត្រឹមតែជាការរំលឹកដល់គុណូបការៈរបស់ស្តេចហ៊ុងក្នុងការបង្កើតប្រទេសជាតិប៉ុណ្ណោះទេ ប៉ុន្តែក៏ជាការបញ្ជាក់ពីប្រភពដើមនិងការទទួលខុសត្រូវចំពោះប្រទេសជាតិបច្ចុប្បន្នទៀតផង។
នៅក្នុងដំណើរនៃការអភិវឌ្ឍនិងធ្វើសមាហរណកម្ម តម្លៃទាំងនេះបង្កើតបានជាមូលដ្ឋានខាងស្មារតីដ៏រឹងមាំ ចិញ្ចឹមបីបាច់កម្លាំងនៃផែនមហាសាមគ្គីជាតិទាំងមូល ដើម្បីឱ្យវៀតណាមឈានទៅមុខយ៉ាងរឹងមាំ និងកសាងប្រទេសជាតិដ៏ស្ថិតស្ថេរជារៀងរហូត៕
