នៅថ្ងៃទី ២២ ខែមិថុនា ប្រធានក្រុមប្រឹក្សាអឺរ៉ុប លោក Antonio Costa បានប្រកាសថា អឺរ៉ុបត្រូវការបណ្តាញទំនាក់ទំនងដោយផ្ទាល់ជាមួយរុស្ស៊ី ដូច្នេះនៅពេលវេលាដែលសមស្របសម្រាប់ការចរចា អឺរ៉ុបអាចបញ្ជូនសាររបស់ខ្លួនដោយផ្ទាល់។
សមរភូមិការទូត
សេចក្តីប្រកាសនាថ្ងៃទី ២២ ខែមិថុនា ក្នុងអំឡុងពេលកិច្ចប្រជុំកំពូល EU-Moldova គឺជាសេចក្តីប្រកាសលើកទីបីក្នុងរយៈពេលមួយខែកន្លងទៅ ដោយប្រធានក្រុមប្រឹក្សាអឺរ៉ុប ស្តីពីភាពចាំបាច់សម្រាប់ EU ក្នុងការបង្កើតកាណាលការទូតដោយផ្ទាល់ជាមួយរុស្ស៊ី។ នាពេលថ្មីៗនេះ ការិយាល័យក្រុមប្រឹក្សាអឺរ៉ុបមានទំនាក់ទំនងកម្រិតការទូតរយៈពេលខ្លីជាមួយវិមានក្រឹមឡាំង ដើម្បីបើកកាណាលទំនាក់ទំនង ហើយនៅថ្ងៃទី ១៩ ខែមិថុនា ហើយនៅក្នុងកិច្ចប្រជុំកំពូលនៅទីក្រុងព្រុចសែល លោក Antonio Costa បានការពារយ៉ាងខ្លាំងនូវការសម្រេចចិត្តនេះ ទោះបីជាមានការរិះគន់ពីផ្ទៃក្នុងមួយចំនួនក៏ដោយ។ យោងតាមប្រធានក្រុមប្រឹក្សាអឺរ៉ុប ភាពជាប់គាំងអូសបន្លាយនៅក្នុងជម្លោះរុស្ស៊ី-អ៊ុយក្រែន បានបង្ខំឱ្យអឺរ៉ុបត្រូវតែផ្លាស់ប្តូរវិធីសាស្ត្រអភិក្រម ដោយមិនអាចពឹងផ្អែកតែលើការដាក់សម្ពាធតាមរយៈទណ្ឌកម្ម និងការបង្កើនការគាំទ្រដល់អ៊ុយក្រែនប៉ុណ្ណោះទេ ប៉ុន្តែថែមទាំងត្រូវបើកសមរភូមិការទូតទៀតផង ជាពិសេសនៅពេលដែលអឺរ៉ុបតែងតែជាភាគីដែលត្រូវគេផាត់ចេញពីការចរចា ដែលកាលពីមុន ធ្លាប់ប្រព្រឹត្តទៅរវាងរុស្ស៊ី អ៊ុយក្រែន និងសហរដ្ឋអាមេរិកតែប៉ុណ្ណោះ។
«អ្វីដែលខ្ញុំកំពុងធ្វើ គឺបើកចេញកាណាលការទូតមួយ ពីព្រោះនៅពេលដែលយើងចង់ពិភាក្សាជាមួយរុស្ស៊ី យើងគួរតែស្តាប់ពួកគេដោយផ្ទាល់ ហើយនៅពេលដែលយើងមានសារណាមួយចង់ផ្ញើទៅ យើងគួរតែផ្ញើទៅកាន់ពួកគេដោយផ្ទាល់ដែរ»។
ដោយគាំទ្រដល់ទស្សនៈនេះ ថ្នាក់ដឹកនាំសហភាពអឺរ៉ុប(EU) ជាច្រើនរូប ក៏បានចាត់ទុកថា ទោះបីជាអឺរ៉ុបមិនមែនជាភាគីសម្របសម្រួលក៏ដោយ ប៉ុន្តែជាភាគីគាំទ្រអ៊ុយក្រែនដែរ ហើយប្លុកនេះត្រូវតែមានវត្តមាននៅលើតុចរចា ដើម្បីការពារផលប្រយោជន៍សន្តិសុខ សេដ្ឋកិច្ច និងភូមិសាស្ត្រនយោបាយរបស់ខ្លួន។ លោក Emmanuel Macron ប្រធានាធិបតីបារាំង បានសង្កត់ធ្ងន់ថា៖ «នៅពេលដែលការចរចាប្រព្រឹត្តទៅ ភាគីអឺរ៉ុបត្រូវតែមានវត្តមាន។ ពីព្រោះ ផលប្រយោជន៍របស់អឺរ៉ុបកំពុងរងការគំរាមកំហែង ជាផលប្រយោជន៍ដែលទាក់ទងមួយផ្នែកទៅនឹងអ្វីដែលកំពុងកើតឡើងនៅក្នុងប្រទេសអ៊ុយក្រែន តាមរយៈជំនួយដែលយើងបានផ្តល់ឱ្យ តាមរយៈបញ្ហានៃការពង្រីកសមាជិកភាពដែលអឺរ៉ុបយកចិត្តទុកដាក់ និងតាមរយៈការគាំទ្រផ្នែកហិរញ្ញវត្ថុនិងប្រាក់កម្ចីដែលយើងអាចផ្តល់ជូនក្រោមបទប្បញ្ញត្តិហិរញ្ញវត្ថុនាបច្ចុប្បន្ន។ ដូច្នេះហើយ សហភាពអឺរ៉ុបត្រូវតែមានតំណាង ហើយប្រធានក្រុមប្រឹក្សាអឺរ៉ុប លោក Antonio Costa ក្នុងការទទួលខុសត្រូវដែលបានកំណត់ នឹងមានកៅអីមួយនៅតុចរចា»។
ទោះបីជាមានប្រតិកម្មប្រុងប្រយ័ត្នពីប្រទេសសមាជិក ភាគច្រើនជាប្រទេសនៅអឺរ៉ុបខាងកើត និងតំបន់សមុទ្របាល់ទិកក៏ដោយ កាយវិការទាំងនេះដោយសហភាពអឺរ៉ុបកំពុងទទួលបានការគាំទ្រពីអ៊ុយក្រែនផងដែរ។ ប្រធានាធិបតីអ៊ុយក្រែន លោក Volodymyr Zelensky នាពេលថ្មីៗនេះបានដាស់តឿនអឺរ៉ុបឱ្យដើរតួនាទីសកម្មជាង ក្នុងបរិបទដែលកិច្ចចរចាត្រីភាគី អាមេរិក-រុស្ស៊ី-អ៊ុយក្រែន កំពុងរងភាពជាប់គាំង បន្ទាប់ពីជុំចរចានៅទីក្រុងហ្សឺណែវ (ស្វីស) កាលពីខែកុម្ភៈ។
តើអឺរ៉ុប ត្រូវធ្វើការសន្ទនាយ៉ាងដូចម្តេច?
បញ្ហាសម្រាប់ EU នាពេលបច្ចុប្បន្ននេះ មិនមែនថា តើត្រូវមានការសន្ទនាដោយផ្ទាល់ជាមួយរុស្ស៊ីដែរឬអត់ ប៉ុន្តែគឺត្រូវធ្វើការសន្ទនាយ៉ាងដូចម្តេច? យោងតាមអ្នកសង្កេតការណ៍ គុណសម្បត្តិមួយសម្រាប់អឺរ៉ុបនៅពេលនេះគឺ ជម្លោះនៅមជ្ឈិមបូព៌ាបានបន្ថយកម្តៅជាបណ្តោះអាសន្ន បន្ទាប់ពីសហរដ្ឋអាមេរិក និងអ៊ីរ៉ង់បានចុះហត្ថលេខាលើកិច្ចព្រមព្រៀងមួយ ដូច្នេះរដ្ឋបាលរបស់លោកប្រធានាធិបតី ដូណាល់ ត្រាំ អាចផ្តោតការយកចិត្តទុកដាក់បន្ថែមទៀតលើជម្លោះរុស្ស៊ី-អ៊ុយក្រែន។ នេះត្រូវបានបញ្ជាក់បន្ទាប់ពីកិច្ចប្រជុំកំពូលនៃក្រុម G7 នាសប្តាហ៍កន្លងទៅនៅទីក្រុង Evian (បារាំង) ជាកន្លែងដែលលោក ដូណាល ត្រាំ បានធ្វើការអត្ថាធិប្បាយជាច្រើនអំពីរុស្ស៊ី និងអ៊ុយក្រែន។ ទោះជាយ៉ាងណាក៏ដោយ កាយវិការដ៏តឹងរ៉ឹងជាបន្តបន្ទាប់ប្រឆាំងនឹងរុស្ស៊ី អាចធ្វើឱ្យទីក្រុងម៉ូស្គូមិនផ្តល់អាទិភាព លើការសន្ទនានៅពេលនេះ។ អ្នកនាំពាក្យវិមានក្រឹមឡាំងលោក Dmitry Peskov នៅថ្ងៃទី ១៩ ខែមិថុនា បានបញ្ជាក់ថា៖ «អឺរ៉ុបគួរតែសង្កេតមើលដោយប្រុងប្រយ័ត្ននូវស្ថានភាពជាក់ស្តែង រួមទាំងជម្លោះនៅអ៊ុយក្រែន។ ប្រសិនកងកម្លាំងនានាបានយល់ពីភាពចាំបាច់ក្នុងការបន្តការសន្ទនាជាមួយរុស្ស៊ី - មិនមែនដើម្បីផ្សព្វផ្សាយ ឬចេញឱសានវាទនោះទេ ប៉ុន្តែដើម្បីចាប់ផ្តើមការសន្ទនាជាមួយនឹងការទំនាក់ទំនងពីភាគីទាំងពីរ - ប្រសិនបើកងកម្លាំងបែបនេះមានវត្តមាននៅទីនោះ(នៅអឺរ៉ុប) ពិតណាស់ លោកប្រធានាធិបតីពូទីន និងភាគីរុស្ស៊ីនឹងត្រៀមខ្លួនជាស្រេចដើម្បីពិចារណាលើរឿងនេះ»។
មជ្ឈដ្ឋានអ្នកសង្កេតការណ៍ក៏បានកត់សម្គាល់ថា ទន្ទឹមនឹងការព្រួយបារម្ភចំពោះបញ្ហានៅអ៊ុយក្រែន អាជ្ញាធរអាមេរិកនៅតែបន្តការរិះគន់ចំពោះអឺរ៉ុបតាមរយៈសេចក្តីប្រកាសដាក់ពង្រាយកងកម្លាំងអាមេរិកឡើងវិញនៅលើទ្វីបនេះ។ ទាំងនេះគឺជាការវិវឌ្ឍដែលអឺរ៉ុបត្រូវតែដោះស្រាយដោយឈ្លាសវៃ ជំនួសឱ្យការមានសុទិដ្ឋិនិយមថា សហរដ្ឋអាមេរិកបានវិលត្រឡប់មកគាំទ្រអ៊ុយក្រែន (និងអឺរ៉ុប) ដូចពីមុន៕
