អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) នៅថ្ងៃទី ៣ ខែមិថុនាបានព្រមានថា ជម្លោះនៅមជ្ឈិមបូព៌ាកំពុងធ្វើឱ្យខូចខាត់ដល់យថាទស្សន៍កំណើនសេដ្ឋកិច្ចពិភពលោក ហើយអាចបង្កផលវិបាកធ្ងន់ធ្ងរជាង ប្រសិនបើភាគីទាំងពីរមិនឈានដល់បទឈប់បាញ់ប្រកបដោយប្រសិទ្ធភាពមុនឆ្នាំ ២០២៧។
ហានិភ័យអូសបន្លាយ
នៅក្នុងរបាយការណ៍យថាទស្សន៍សេដ្ឋកិច្ចរបស់ខ្លួន OECD បានព្យាករណ៍ថា កំណើនសេដ្ឋកិច្ចពិភពលោកនឹងធ្លាក់ចុះពី ៣,៤% ក្នុងឆ្នាំ ២០២៥ មកត្រឹម ២,៨% ក្នុងឆ្នាំ ២០២៦ មុនពេលងើបឡើងវិញមកត្រឹម ៣,១% ក្នុងឆ្នាំ ២០២៧ ក្រោមសេណារីយ៉ូជាមូលដ្ឋាន។ អង្គការនេះបានបញ្ជាក់ថា ការព្យាករណ៍គឺផ្អែកលើសេណារីយ៉ូសំខាន់ចំនួនពីរ៖ សេណារីយ៉ូនៃការរំខានរយៈពេលខ្លី ដែលក្នុងនោះ ផលប៉ះពាល់នៃជម្លោះត្រូវបានគ្រប់គ្រង ហើយតម្លៃថាមពលមានស្ថេរភាពជាបណ្ដើរៗចាប់ពីពាក់កណ្តាលឆ្នាំ ២០២៦; និងសេណារីយ៉ូនៃការរំខានរយៈពេលវែង ជាមួយនឹងផលវិបាកសេដ្ឋកិច្ចដ៏ធ្ងន់ធ្ងរ និងយូរអង្វែងជាង។
ក្នុងករណីដែលជម្លោះបន្តអូបន្លាយដល់ឆ្នាំ ២០២៧ កំណើនសេដ្ឋកិច្ចពិភពលោកអាចធ្លាក់ចុះបន្ថែមទៀត មកត្រឹម ២,១% ដែលទាបជាងមធ្យមភាគ ៣,៤% ក្នុងដំណាក់កាលឆ្នាំ ២០១៣-២០១៩ មុនពេលមានជំងឺរាតត្បាតកូវីដ-១៩។ OECD បានព្រមានថា អស្ថេរភាពកាន់តែយូរ ការចំណាយសេដ្ឋកិច្ច និងសង្គមកាន់តែខ្ពស់។ អង្គការនេះក៏បានកត់ សម្គាល់ថា តម្លៃថាមពល ជី និងផលិតផលទាក់ទងនឹងប្រេងឧស្ម័នរក្សានៅកម្រិតខ្ពស់ នឹងដាក់សម្ពាធយ៉ាងខ្លាំងទៅលើសេដ្ឋកិច្ចកំពុងអភិវឌ្ឍន៍។ សម្រាប់សេដ្ឋកិច្ចធំៗ កំណើនរបស់សហរដ្ឋអាមេរិកត្រូវបានព្យាករថា នឹងថយចុះមកត្រឹម ២% នៅឆ្នាំនេះ និង ១,៨% នៅឆ្នាំ ២០២៧។ នៅក្នុងតំបន់ចាយប្រាក់អឺរ៉ូ GDP របស់តំបន់ទាំងមូលត្រូវបានព្យាករណ៍មានកំណើន ០,៨% នៅឆ្នាំនេះ ធ្លាក់ចុះពីកម្រិត ១,៤% កាលពីឆ្នាំមុន ដោយសារតែការពឹងផ្អែកយ៉ាងខ្លាំងលើការនាំចូលថាមពល។ សេណារីដែលជម្លោះនៅមជ្ឈិមបូព៌ាអូសបន្លាយក៏មានផលប៉ះពាល់អាក្រក់ជាពិសេសសម្រាប់សេដ្ឋកិច្ចអាស៊ីផងដែរ។ លោក Stefano Scarpetta ប្រធានសេដ្ឋវិទូនៃ OECD បានវិភាគថា៖ “សេដ្ឋកិច្ចអាស៊ីនឹងរងផលប៉ះពាល់យ៉ាងធ្ងន់ធ្ងរ ជាពិសេសនៅក្នុងសេណារីយ៉ូនៃការរំខានរយៈពេលវែង។ ជាទូទៅ សេដ្ឋកិច្ចអាស៊ីពឹងផ្អែកយ៉ាងខ្លាំងលើផលិតផលថាមពលពីតំបន់ឈូងសមុទ្រពែរ្ស។ អាចមើលឃើញថា កំណើនសេដ្ឋកិច្ចកំពុងថយចុះគួរឱ្យកត់សម្គាល់។ នេះគឺជាភាពខុសគ្នាដ៏សំខាន់បើប្រៀបធៀបទៅនឹងសេណារីយ៉ូនៃការរំខានរយៈពេលខ្លី។”
មិនត្រឹមតែយថាទស្សន៍កំណើនកាន់តែយ៉ាប់យ៉ឺនប៉ុណ្ណោះទេ OECD ក៏សង្កត់ធ្ងន់លើ ហានិភ័យនៃអតិផរណាទៀតផង។ ជាក់ស្តែង OECD បានព្យាករណ៍ថា អតិផរណាសកលនឹងកើនឡើង ០,៤% នៅឆ្នាំនេះ និង ១,៣% នៅឆ្នាំ ២០២៧។
ការវិភាគថ្មីបំផុតរបស់ OECD បានបញ្ជាក់ពីការវាយតម្លៃនាពេលថ្មីៗនេះ របស់អង្គការអន្តរជាតិធំៗ ដូចជាមូលនិធិរូបិយវត្ថុអន្តរជាតិ (IMF) ធនាគារពិភពលោក (WB) និងអង្គការសហប្រជាជាតិ (UN) ដែលថា ជម្លោះនៅមជ្ឈិមបូព៌ាអូសបន្លាយ កំពុងរារាំងដល់យថាទស្សន៍កំណើនសកល។ នៅក្នុងកិច្ចប្រជុំនិទាឃរដូវរបស់ IMF និង WB នៅពាក់កណ្តាលខែមេសា IMF ក៏បានបន្ទាបការព្យាករណ៍កំណើនសេដ្ឋកិច្ចពិភពលោកមកត្រឹម ៣,១% នៅឆ្នាំនេះ ថយចុះ ០,២% បើប្រៀបធៀបទៅនឹងការព្យាករណ៍ក្នុងខែមករា។ នៅក្នុងសេណារីយ៉ូដ៏អាក្រក់បំផុតរបស់ IMF ដែលតម្លៃប្រេង និងឧស្ម័នធម្មជាតិនៅតែខ្ពស់រហូតដល់ឆ្នាំ ២០២៧ កំណើនសេដ្ឋកិច្ចពិភពលោកនៅឆ្នាំនេះនឹងសម្រេចបានត្រឹមតែ ២% ប៉ុណ្ណោះ មានន័យថា កំពុង "ខិតជិតដល់វិបត្តិសេដ្ឋកិច្ច"។
យុថ្កាបច្ចេកវិទ្យា
ទោះបីជាបានសង្កត់ធ្ងន់លើភាពមិនអាចទាយទុកជាមុនបាននៃជម្លោះនៅមជ្ឈិមបូព៌ា និងផលប៉ះពាល់រយៈពេលវែងលើយថាទស្សន៍សេដ្ឋកិច្ចពិភពលោក សូម្បីតែបន្ទាប់ពីជម្លោះបានបញ្ចប់ក៏ដោយ OECD ក៏ចាត់ទុកថា នៅតែមាន "យុថ្កា" ដែលអាចជួយសេដ្ឋកិច្ចពិភពលោកងើបឡើងវិញក្នុងពេលឆាប់ៗនេះ។ យុថ្កាមួយ គឺការវិនិយោគលើបច្ចេកវិទ្យា ជាពិសេសបញ្ញាសិប្បនិម្មិត។ យោងតាមប្រធានសេដ្ឋវិទូ Stefano Scarpetta ទោះបីជាមានការព្រួយបារម្ភអំពីហានិភ័យនៃ "ពពុះ AI" ក៏ដោយ នេះនៅតែជាវិស័យដ៏សំខាន់សម្រាប់កំណើន៖ "មិនមានសញ្ញាណាមួយដែលបង្ហាញថា សន្ទុះកំណើនកំពុងថយចុះនោះទេ។ ប្រសិនបើក្រឡែកមើលផែនការវិនិយោគរបស់ក្រុមហ៊ុន AI ធំៗ សម្រាប់ឆ្នាំ ២០២៦ និងឆ្នាំ ២០២៧ តួរលេខទាំងនេះត្រូវបានរំពឹងថា នឹងកើនឡើងជិតទ្វេដងបើប្រៀបធៀបនឹងឆ្នាំ ២០២៥។ ដូច្នេះហើយ ទាំងនេះគឺជាការវិនិយោគដ៏រឹងមាំ និងសំខាន់លើបញ្ញាសិប្បនិម្មិត។ មានភាពមិនប្រាកដប្រជាជាច្រើន ប៉ុន្តែសក្តានុពលចំណេញក៏ធំណាស់ដែរ"។
ដោយចែករំលែកការវាយតម្លៃមិនអវិជ្ជមានពេកនៃយថាទស្សន៍សេដ្ឋកិច្ចពិភពលោកនាពេលបច្ចុប្បន្ន លោក Shantanu Mukherjee នាយកអង្គភាពវិភាគសេដ្ឋកិច្ច និងគោលនយោបាយ នៃនាយកដ្ឋានសេដ្ឋកិច្ចសង្គមរបស់អង្គការសហប្រជាជាតិ(DESA) បានចាត់ទុកថា៖ «ទោះបីជាយថាទស្សន៍មានភាពអាប់អួរក៏ដោយ ក៏នៅតែមានវិស័យមួយចំនួនដែលកិច្ចសហប្រតិបត្តិការអន្តរជាតិអាចបង្កើតភាពខុសប្លែកគ្នា ដូចជា៖ ប្រទេសនានាកំពុងប្រឈមមុខនឹងកម្លាំងចលករថ្មី ដើម្បីបង្កើតភាពធន់ មិនថាតាមរយៈការវិនិយោគលើថាមពលកកើតឡើងវិញ និងការសន្សំសំចៃថាមពល ការធ្វើពិពិធកម្មសេដ្ឋកិច្ច ការអន្តរាគមន៍ចំគោលដៅតាមវិស័យ ឬការកែលម្អការកៀរគរនិងការប្រើប្រាស់ធនធានក៏ដោយ។ ទាំងអស់នេះសុទ្ធតែជាអាទិភាពរួម ដែលប្រព័ន្ធអន្តរជាតិ និងអង្គការសហប្រជាជាតិ (UN) អាចផ្តល់ការគាំទ្របាន»។
យោងតាមអ្នកជំនាញរបស់អង្គការសហប្រជាជាតិ អាទិភាពបន្ទាន់បំផុតសម្រាប់សេដ្ឋកិច្ចជាច្រើនដែលរងផលប៉ះពាល់ដោយជម្លោះអូសបន្លាយនៅមជ្ឈិមបូព៌ាគឺការដោះស្រាយអតិផរណា ជាបញ្ហាដែលមានផលប៉ះពាល់លឿនជាង និងដោយផ្ទាល់ជាង ហើយគ្រួសារជាច្រើន ជាពិសេសនៅក្នុងប្រទេសកំពុងអភិវឌ្ឍន៍ កំពុងរងផលប៉ះពាល់យ៉ាងធ្ងន់ធ្ងរដោយសារតែតម្លៃកើនឡើងខ្ពស់ និងខ្សែសង្វាក់ផ្គត់ផ្គង់ត្រូវបានរំខាន៕
