ហេតុការណ៍នេះបានចាប់ផ្តើមបន្ទាប់ពីលទ្ធផលស្មើ ០-០ ដ៏គួរឱ្យភ្ញាក់ផ្អើលរបស់ក្រុម Cape Verde ទល់នឹងក្រុមអេស្ប៉ាញ នៅក្នុងការចូលរួមប្រកួត World Cup ជាលើកដំបូងរបស់ក្រុមនេះ។ បន្ទាប់ពីការប្រកួត អ្នកចាំទី Josimar Vozinha Dias បានចែករំលែកថា ម្តាយរបស់លោកមិនអាចមានវត្តមាននៅលើវេទិកាអ្នកទស្សនាបានទេ ដោយសារជួបការលំបាកក្នុងការសុំទិដ្ឋាការចូលសហរដ្ឋអាមេរិក។ រឿងរ៉ាវនេះបានរីករាលដាលយ៉ាងឆាប់រហ័សនៅលើបណ្តាញសង្គម និងទាក់ទាញចំណាប់អារម្មណ៍របស់អ្នកនយោបាយអាមេរិក។ ប្រមុខគណៈបក្សប្រជាធិបតេយ្យនៅសភាតំណាងរាស្ត្រ លោក Hakeem Jeffries បានចែករំលែកនៅលើបណ្តាញសង្គមថា លោកបានទាក់ទងនឹងរដ្ឋមន្ត្រីការបរទេស លោក Marco Rubio ហើយបានស្នើឱ្យក្រសួងការបរទេសសហរដ្ឋអាមេរិក ផ្តល់ការគាំទ្រដើម្បីនាំម្តាយរបស់អ្នកចាំទីនៃក្រុម Cape Verde ទៅកាន់សហរដ្ឋអាមេរិកមុនការប្រកួតបន្ទាប់របស់ក្រុមនេះ។
នៅក្នុងសេចក្តីប្រកាសមួយនាថ្ងៃទី១៧ ខែមិថុនា លោក Jeffries បានឱ្យដឹងថា ស្ថាប័នពាក់ព័ន្ធបានសម្របសម្រួលការដោះស្រាយឯកសារជាបន្ទាន់ លើកលែងថ្លៃសេវា និងគាំទ្រនីតិវិធីចាំបាច់ដើម្បីធានាថា លោកស្រីទទួលបានទិដ្ឋាការទាន់ពេលវេលា។ យោងតាមផែនការ ម្តាយរបស់អ្នកចាំទី Josimar Vozinha Dias នឹងធ្វើដំណើរទៅកាន់ទីក្រុង Miami ហើយជួបជុំជាមួយកូនប្រុសរបស់ខ្លួនមុនការប្រកួតរវាងក្រុម Cape Verde និងក្រុម Uruguay នៅចុងសប្តាហ៍នេះ៕
