នាយករដ្ឋមន្ត្រី លោក Rishi Sunak បានប្រកាសកញ្ចប់គាំទ្រដ៏ធំមួយសម្រាប់អ៊ុយក្រែន។ កញ្ចប់នេះរួមមានការធានាបន្ថែមចំនួន ៣ ពាន់លានដុល្លារ ដើម្បីផ្តល់កម្ចីរបស់ធនាគារពិភពលោកដល់អ៊ុយក្រែនក្នុងរយៈពេល ៣ ឆ្នាំខាងមុខ និងជំនួយទ្វេភាគី ២៤០ លានផោន (៣០៦ លានដុល្លារ) រួមទាំងផែនការពង្រីកប្រតិបត្តិការវិនិយោគអន្តរជាតិរបស់អង់គ្លេសនៅអ៊ុយក្រែន។
ប្រធានធនាគារពិភពលោក លោក Ajay Banga បានសង្កត់ធ្ងន់ថា ការធានានឹងអនុញ្ញាតឱ្យស្ថាប័នហិរញ្ញវត្ថុនេះ បន្តជួយប្រជាជនអ៊ុយក្រែនក្នុងការកសាងជីវភាពរស់នៅឡើងវិញ ក្រោយជម្លោះ។
តាមគម្រោង នៅក្នុងសន្និសីទ អង្គការសហប្រជាជាតិក៏នឹងបង្កើតកញ្ចប់ជំនួយថ្មីសម្រាប់អ៊ុយក្រែនផងដែរ។ ចំណែកខ្លួនវិញ រដ្ឋមន្ត្រីការបរទេសអាមេរិក លោក Antony Blinken បានឲ្យដឹងថា លោកនឹងណែនាំកញ្ចប់ជំនួយថ្មីសម្រាប់អ៊ុយក្រែននៅថ្ងៃ២១ ខែមិថុនានេះ ដើម្បីបញ្ជាក់ឡើងវិញ នូវការប្តេជ្ញាចិត្តរបស់វ៉ាស៊ីនតោនចំពោះការគាំទ្រ ទីក្រុងគៀវ។
យោងតាមមន្ត្រីអ៊ុយក្រែន ប្រទេសនេះកំពុងត្រូវការទឹកប្រាក់ចំនួន ៤០ ពាន់លានដុល្លារសម្រាប់ដំណាក់កាលដំបូងនៃផែនការបៃតងរបស់ខ្លួន ក្នុងការស្ថាបនាសេដ្ឋកិច្ច រួមទាំងការអភិវឌ្ឍឧស្សាហកម្មដែកថែបគ្មានកាបូនផងដែរ៕
