ព្រឹត្តិការណ៍នេះ ត្រូវបានរៀបចំឡើងដោយគណៈកម្មាធិការប្រជាជនទីក្រុងហាណូយ ដោយមានការចូលរួមពីថ្នាក់ដឹកនាំបក្ស រដ្ឋ និងរដ្ឋសភា រួមជាមួយប្រតិភូជាង ១០០០ នាក់ រួមទាំងតំណាងមកពីសាជីវកម្មនិងសហគ្រាសទាំងក្នុងស្រុកនិងអន្តរជាតិ។
ថ្លែងនៅក្នុងសន្និសីទ លោកប្រធានរដ្ឋសភា ត្រិន ថាញ់មិន បានលើកច្បាស់ថា យោងតាមច្បាប់រដ្ឋធានីដែលចូលជាធរមានចាប់ពីថ្ងៃទី ១ ខែកក្កដា ឆ្នាំ ២០២៦ ទីក្រុងហាណូយត្រូវបានផ្តល់យន្តការពិសេសជាច្រើន ទាក់ទងនឹងវិមជ្ឈការ ការ ការគ្រប់គ្រង់ ការកៀងគរធនធាន ការវិនិយោគលើហេដ្ឋារចនាសម្ព័ន្ធ ការអភិវឌ្ឍទីក្រុង វិទ្យាសាស្ត្រនិងបច្ចេកវិទ្យា និងការទាក់ទាញការវិនិយោគ។ល។ ទាំងនេះ គឺជាឱកាសប្រវត្តិសាស្ត្រសម្រាប់រដ្ឋធានីដើម្បីបអភិវឌ្ឍន៍យ៉ាងខ្លាំងក្លា និងអនុវត្តផែនការមេរដ្ឋធានីហាណូយ ជាមួយនឹងចក្ខុវិស័យ ១០០ ឆ្នាំ ប្រកបដោយជោគជ័យ។
«ដើម្បីសម្រេចបាននូវចក្ខុវិស័យអភិវឌ្ឍន៍ដែលបានកំណត់ ទីក្រុងហាណូយត្រូវយល់ច្បាស់ថា ផែនការនេះមានតម្លៃពិតប្រាកដ នៅពេលដែលត្រូវបានអនុវត្តប្រកបដោយប្រសិទ្ធភាព។ ទីក្រុងហាណូយត្រូវប្រែក្លាយទិសដៅនៃផែនការមេ ទៅជាកម្មវិធី គម្រោង និងការងារជាក់ស្តែងជាបន្ទាន់; យកប្រសិទ្ធភាពនៃការអនុវត្ត និងការកែលម្អជីវភាពរស់នៅ របស់ប្រជាជនជារង្វាស់នៃសមត្ថភាពអភិបាលកិច្ច»។
លោកប្រធានរដ្ឋសភាបានស្នើឱ្យទីក្រុងហាណូយ ផ្តល់អាទិភាពលើការទាក់ទាញការវិនិយោគក្នុងវិស័យដែលមានតម្លៃបន្ថែមខ្ពស់ រួមទាំងហេដ្ឋារចនាសម្ព័ន្ធដឹកជញ្ជូនជាយុទ្ធសាស្ត្រ; បច្ចេកវិទ្យាខ្ពស់ ស៊ីមីកុងដុកទ័រ បញ្ញាសិប្បនិម្មិត និងមជ្ឈមណ្ឌលទិន្នន័យ; មណ្ឌលឧស្សាហកម្មជំនាន់ថ្មី; ឡូជីស្ទិកឆ្លាតវៃ; ថាមពលស្អាត; សេដ្ឋកិច្ចវិលជុំ; ឧស្សាហកម្មវប្បធម៌; ទេសចរណ៍; សុខាភិបាល និងការអប់រំគុណភាពខ្ពស់៕
យោងតាមផែនការមេរដ្ឋធានីហាណូយ ចក្ខុវិស័យ ១០០ ឆ្នាំ ដំណាក់កាល ២០២៦-២០៣៥ ទីក្រុងបានកំណត់គោលដៅកំណើនជាមធ្យមនៃ GRDP ជាង ១១% ក្នុងមួយឆ្នាំ ដោយមានទំហំ GRDP ឈានដល់ ២០០ ពាន់លានដុល្លារអាមេរិកនៅឆ្នាំ ២០៣៥ និងប្រហែល ៦៤០ ពាន់លានដុល្លារអាមេរិកនៅឆ្នាំ ២០៤៥។ ទីក្រុងហាណូយក៏ផ្តោតលើការអភិវឌ្ឍការតភ្ជាប់តំបន់តាមគំរូ "ស្នូល-ផ្កាយរណប"; កសាងប្រព័ន្ធផ្លូវដែកក្នុងទីក្រុងដែលមានប្រវែងសរុប ១.១៥៣ គីឡូម៉ែត្រ; បង្កើតស្ថាប័នពិសេសនៅប៉ូលកំណើន ដូចជា៖ តំបន់ពាណិជ្ជកម្មសេរីដែលភ្ជាប់ជាមួយទីក្រុងអាកាសយានដ្ឋានភាគខាងជើង និងតំបន់វិទ្យាសាស្ត្របច្ចេកវិទ្យាហ័រឡាក់; មហាវិថីទេសភាពទន្លេក្រហម - និមិត្តរូបថ្មីនៃការអភិវឌ្ឍរដ្ឋធានី; រួមជាមួយនឹងការតំរង់ទិសផែនការមេសម្រាប់អាកាសយានដ្ឋានទី២ -តំបន់ទីក្រុងខាងត្បូង និងដំណោះស្រាយសម្រាប់ការរៀបចចំទីក្រុងឆ្លាតវៃ - បៃតង - ប្រកបដោយចីរភាព ឆ្ពោះទៅរកគោលដៅនៃការបំភាយឧស្ម័នសុទ្ធស្មើរនឹង «សូន្យ»។
ការរៀបចំសន្និសីទពន្លឿនការវិនិយោគឆ្នាំ ២០២៦ និងប្រកាសផែនការមេរដ្ឋ ធានីហាណូយ ចក្ខុវិស័យ ១០០ ឆ្នាំក្នុងពេលដំណាលគ្នា គឺជាព្រឹត្តិការណ៍មួយដែលតភ្ជាប់អតីតកាល បច្ចុប្បន្នកាល និងអនាគតរបស់រដ្ឋធានី; ផ្ញើសារដ៏រឹងមាំមួយដែលបញ្ជាក់ពីការប្តេជ្ញាចិត្តរបស់ទីក្រុងហាណូយក្នុងការបន្តកំណែទម្រង់ស្ថាប័ន កែលម្អបរិយាកាសវិនិយោគ និងអាជីវកម្ម លើកកម្ពស់ការអភិវឌ្ឍហេដ្ឋារចនាសម្ព័ន្ធយុទ្ធសាស្ត្រ វិទ្យាសាស្ត្រ និងបច្ចេកវិទ្យា នវានុវត្តន៍ ការផ្លាស់ប្តូរឌីជីថល កំណើនបៃតង និងការធ្វើសមាហរណកម្មអន្តរជាតិយ៉ាងស៊ីជម្រៅ៕
