នេះគឺជាការតម្រូវរបស់អគ្គលេខាបក្ស ប្រធានរដ្ឋវៀតណាមលោក តូ ឡឹម នៅក្នុងជំនួបធ្វើការជាមួយគណៈកម្មាធិការអចិន្ត្រៃយ៍នៃគណៈកម្មាធិការបក្សទីក្រុងដុងណៃ (Dong Nai) អំពីការអនុវត្តសេចក្តីសម្រេចចិត្តនៃមហាសន្និបាតបក្សលើកទី១៤ ស្ថានភាពអភិវឌ្ឍន៍សេដ្ឋកិច្ចសង្គម និងភារកិច្ចសំខាន់ៗមួយចំនួនរបស់មូលដ្ឋានក្នុងរយៈពេលខាងមុខ។ ជំនួបធ្វើការបានធ្វើឡើងនៅរសៀលថ្ងៃទី១៨ ខែឧសភា នៅទីក្រុងដុងណៃ។
លោកអគ្គលេខាបក្ស ប្រធានរដ្ឋ បានស្នើថា ក្នុងរយៈពេលខាងមុខ ទីក្រុងដុងណៃត្រូវផ្តោតលើការអនុវត្តភារកិច្ចសំខាន់ៗចំនួន ៧ ឲ្យបានល្អ រួមទាំងការអនុវត្តប្រកបដោយប្រសិទ្ធភាពនូវសេចក្តីសម្រេចចិត្តនៃមហាសន្និបាតលើកទី១៤ របស់បក្សកុម្មុយនិស្តវៀតណាម សេចក្តីសម្រេចចិត្តយុទ្ធសាស្ត្ររបស់គណៈកម្មាធិការមជ្ឈិម និងសេចក្តីសម្រេចចិត្តនៃមហាសន្និបាតបក្សភាគទីក្រុងលើកទី១។ លោកអគ្គលេខាបក្ស ប្រធានរដ្ឋបានស្នើឲ្យទីក្រុងដុងណៃ ដាក់អាកាសយានដ្ឋានអន្តរជាតិ ឡុងថាញ់ គឺជាស្នូលសម្រាប់ការរៀបចំរចនាសម្ព័ន្ធឡើងវិញនូវលំហអភិវឌ្ឍន៍របស់ទីក្រុង។ ចាប់ពី ឡុងថាញ់ ត្រូវតែបង្កើតប្រព័ន្ធអេកូឡូស៊ីទីក្រុងអាកាសយានដ្ឋាន សេវាកម្មអាកាសចរណ៍ ពាណិជ្ជកម្ម ហិរញ្ញវត្ថុ សន្និសីទ ការតាំងពិព័រណ៍ ការអប់រំ ការថែទាំសុខភាព ទេសចរណ៍ និងសេវាកម្មដែលមានគុណភាពខ្ពស់ផ្សេងទៀត។ អគ្គលេខាបក្ស ប្រធានរដ្ឋ លោក តូ ឡឹម បានសង្កត់ធ្ងន់ថា៖
«ទីក្រុងដុងណៃត្រូវតែខិតខំក្លាយជាទីក្រុងទំនើប ស៊ីវិល័យ សប្បុរស និងគួរឲ្យចង់រស់នៅ។ កំណើនសេដ្ឋកិច្ចត្រូវតែភ្ជាប់ទៅនឹងវឌ្ឍនភាពសង្គម សុខុមាលភាព បរិស្ថាន និងអត្តសញ្ញាណវប្បធម៌។ ដោយសារលក្ខណៈជាមជ្ឈមណ្ឌលឧស្សាហកម្មដ៏ធំ ដែលមានកម្មករនិងពលករចំណាកស្រុកយ៉ាងច្រើន ទីក្រុងត្រូវចាត់ទុកលំនៅដ្ឋានសង្គម លំនៅដ្ឋានកម្មករ សាលារៀន មន្ទីរពេទ្យ ស្ថាប័នវប្បធម៌ កន្លែងសាធារណៈ និងជីវភាពរស់នៅរបស់កម្មករជាមូលដ្ឋានដ៏សំខាន់សម្រាប់ការអភិវឌ្ឍប្រកបដោយចីរភាព។ ក្នុងពេលជាមួយគ្នានោះ ត្រូវតែថែទាំកាន់តែប្រសើរឡើងចំពោះតំបន់ឆ្ងាយដាច់ស្រយាល តំបន់ជនជាតិភាគតិច និងតំបន់ព្រំដែនផងដែរ»៕
