ក្រុមប្រឹក្សាសន្តិសុខអង្គការសហប្រជាជាតិជួបប្រជុំអំពីស្ថានភាពកូរ៉េ

រូបភាពនៃការបាញ់បង្ហោះសាកល្បងកាំជ្រួចមីស៊ីលថ្មីបំផុតរបស់ស.ប.បកូរ៉េ។ (រូបថត៖ KCNA)

នៅថ្ងៃទី៣០ ខែកញ្ញា ក្រុមប្រឹក្សាសន្តិសុខអង្គការសហប្រជាជាតិ (អ.ស.ប) បាន ប្រារព្ធកិច្ចប្រជុំពិភាក្សាអំពីស្ថានភាពនៅឧបទ្វីបកូរ៉េបន្ទាប់ពីព្យុងយ៉ាងប្រកាសថា គេ បានបាញ់សាកល្បងកាំជ្រួចមីស៊ីលល្បឿនលឿនជាងសម្លេងប្រភេទថ្មី។ នេះជាកិច្ច ប្រជុំសម្ងាត់តាមសំណើររបស់អាមេរិក អង់គ្លេសនិងបារាំង។

ក្នុងបម្រែបម្រួលផ្សេងមួយទៀត នៅថ្ងៃទី៣០ កញ្ញា ទីភ្នាក់ងារសារព័ត៌មានរដ្ឋ របស់ស.ប.បកូរ៉េបានចុះផ្សាយថា លោកមេដឹកនាំ Kim Jong-un បានបដិសេធសំណើរ ធ្វើកិច្ចសន្ទនារបស់អាមេរិក។ កាសែត Rodong Sinmun ដែលជាទីភ្នាក់ងារបញ្ចេញមតិ នៃបក្សពលកម្មស.ប.បកូរ៉េ បានដកស្រង់ប្រសាសន៍របស់លោកមេដឹកនាំ Kim Jong-un នៅឯកិច្ចប្រជុំក្រុមប្រឹក្សាប្រជាជនកំពូល (SPA - ពោលគឺរដ្ឋសភា) ដែលសង្កត់ធ្ងន់ ថា រដ្ឋអំណាចរបស់លោកប្រធានាធិបតី Joe Biden មិនផ្លាស់ប្ដូរគោលនយោបាយតាំង ពីយូរមកហើយចំពោះព្យុងយ៉ាង ហើយសំណើរធ្វើកិច្ចសន្ទនាដោយគ្មានលក្ខខ័ណ្ឌរបស់ អាមេរិកគឺមិនមានលក្ខណៈជាក់ស្ដែងឡើយ។

ក្នុងការថ្លែងលើកនេះដែរ មេដឹកនាំរូបនេះក៏បានឲ្យដឹងបន្ថែមទៀតថា សំដៅ ជំរុញការកែលម្អទំនាក់ទំនងរវាងស.ប.បកូរ៉េជាមួយកូរ៉េខាងត្បូង ខ្សែទូរស័ព្ទបន្ទាន់ អន្តរកូរ៉េនឹងត្រូវបានបើកប្រតិបត្តិការឡើងវិញចាប់តាំងពីដើមខែតុលាខាងមុខនេះ៕