ប្រភពព័ត៌មានអ៊ីរ៉ង់បញ្ជាក់ថា ការពិភាក្សារវាងសហរដ្ឋអាមេរិក និងអ៊ីរ៉ង់កំពុងបន្តដោយមានការគាំទ្រពីប្រទេសប៉ាគីស្ថាន ហើយការមិនចុះសម្រុងគ្នាមួយចំនួនត្រូវបានរួមតូច។ ទោះជាយ៉ាងណាក៏ដោយ កិច្ចព្រមព្រៀងចុងក្រោយនៅតែមិនទាន់បានសម្រេច។ បញ្ហានៃការបង្កើនសារធាតុអ៊ុយរ៉ាញ៉ូមរបស់អ៊ីរ៉ង់ និងការគ្រប់គ្រងរបស់ទីក្រុងតេអេរ៉ង់លើច្រកសមុទ្រហ័រមូស គឺជាចំណុចជាប់គាំងដ៏ធំបំផុតរវាងភាគីទាំងពីរ។
ព័ត៌មាននេះត្រូវបានចេញផ្សាយដោយប្រព័ន្ធផ្សព្វផ្សាយអ៊ីរ៉ង់បន្ទាប់ពីប្រភពព័ត៌មានក្នុងតំបន់ជាច្រើនបានរាយការណ៍ថា សហរដ្ឋអាមេរិក និងអ៊ីរ៉ង់បានឈានដល់កិច្ចព្រមព្រៀងមួយដើម្បីបញ្ចប់អរិភាព និងបើកច្រកសមុទ្រហ័រមូសឡើងវិញ ទោះបីជាមិនមានព័ត៌មានលម្អិតក៏ដោយ។
បច្ចុប្បន្ននេះ ប៉ាគីស្ថាន ដែលជាអ្នកសម្របសម្រួលរវាងអ៊ីរ៉ង់ និងសហរដ្ឋអាមេរិក កំពុងពន្លឿនកិច្ចខិតខំប្រឹងប្រែងរបស់ខ្លួនដើម្បីបង្រួមភាពខុសគ្នារវាងប្រទេសទាំងពីរ ដោយឈានទៅរកកិច្ចព្រមព្រៀងមួយបន្តិចម្តងៗ។ រដ្ឋមន្ត្រីក្រសួងមហាផ្ទៃប៉ាគីស្ថាន លោក ម៉ូស៊ីន ណាកវី កំពុងនៅទីក្រុងតេអេរ៉ង់ ដើម្បីពិភាក្សាអំពីបញ្ហាពាក់ព័ន្ធជាមួយមន្ត្រីអ៊ីរ៉ង់។ នេះជាដំណើរទស្សនកិច្ចលើកទីបីរបស់លោកទៅកាន់អ៊ីរ៉ង់ក្នុងរយៈពេលជាងមួយខែ ដើម្បីលើកកម្ពស់ការចរចាសន្តិភាព៕
