អ.ស.ប អំពាវនាវឲ្យការរៃអង្គាសទឹកប្រាក់ចំនួន ៣៣ លានដុល្លារអាមេរិក ដើម្បីការពារជនភៀសខ្លួន

ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បានឲ្យដឹងថា ស្ថាប័ននេះកំពុងធ្វើការរៃអង្គាសទឹកប្រាក់ចំនួន ៣៣ លានដុល្លារអាមេរិកជាដំបូង “ដើម្បីបង្កើនសកម្មភាពត្រៀមរៀបចំ បង្ការនិងទប់ ទល់ដោយសំដៅដោះស្រាយតម្រូវការសុខភាពសាធារណៈភ្លាមៗសម្រាប់ជនភៀសខ្លួនដោយសារការឆ្លងរាលដាលនៃជំងឺ Covid-19 "។

រហូតមកដល់ពេលនេះ ទោះបីមិនទាន់មានរបាយការណ៍ណាមួយអំពីការឆ្លងរាលដាលនៃជំងឺ Covid-19 ក្នុងចំណោម សហគមន៍ជនភៀសខ្លួន និងជនស្នើសុំភៀសខ្លួនក៏ដោយ ប៉ុន្តែ UNHCR បានឲ្យដឹថាស្ថាប័ននេះ កំពុងរៀបចំផែនការទុកបម្រុង ដើម្បីទប់ទល់នឹងបញ្ហាក្នុងករណីជំងឺរាតត្បាត Covid-19 ចាប់ផ្តើមឆ្លងរាលដាលក្នុងចំណោមជនភៀសខ្លួនផងដែរ៕