តំបន់កេរ្តិ៍ដំណែលប្រាសាទ Po Sah Inu គឺជាសំណង់ស្ថាបត្យកម្មគំរូរបស់ជនជាតិចាម ដែលស្ថិតនៅលើទួលភ្នំ Ba Nai សង្កាត់ Phu Thuy ខេត្តឡឹមដុង។ រូបថត៖ baolamdong.vn
តំបន់កេរ្តិ៍ដំណែលប្រាសាទ Po Sah Inu គឺជាសំណង់ស្ថាបត្យកម្មគំរូរបស់ជនជាតិចាម ដែលស្ថិតនៅលើទួលភ្នំ Ba Nai សង្កាត់ Phu Thuy ខេត្តឡឹមដុង។ រូបថត៖ baolamdong.vn

តាមរឿងព្រេងនិទានថា Po Sah Inu គឺជាឈ្មោះរបស់ព្រះនាងចាមមួយអង្គ ជាព្រះរាជបុត្រីរបស់ស្ដេច Para Chanh ដែលមានទាំងរូបស្រស់ស្អាតនិងទេពកោសល្យពិសេស។ ព្រះនាង Po Sah Inu បានបង្រៀនប្រជាជនពីរបរនេសាទ ធ្វើគ្រឿងស្មូន និងត្បាញក្រណាត់។ បន្ទាប់ពីព្រះនាងសោយទិវង្គត ប្រជាជនបានសាងសង់ទីសក្កាៈបូជា។

ប្រាសាទ Po Sah Inu ត្រូវបានសាងសង់ឡើងក្នុងចន្លោះពីចុងសតវត្សរ៍ទី៨ ដល់សតវត្សរ៍ទី១៥ ដែលបង្កប់នូវសញ្ញាសម្គាល់ដ៏ជ្រាលជ្រៅអំពីសម័យកាលដ៏រុងរឿងនៃអាណាចក្រចម្ប៉ាបុរាណ។ បច្ចុប្បន្ននេះ ក្នុងចង្គោមប្រាសាទ Po Sah Inu នៅសល់តែប្រាសាទ ៣ ប៉ុណ្ណោះ ក្នុងនោះប្រាសាទធំ (ប្រាសាទ A) គឺជាប្រាសាទធំបំផុត និងត្រូវបានរក្សានៅដដែល ដោយមានកម្ពស់ ១៦ ម៉ែត្រ។ ប្រាសាទធំមានបីជាន់ ច្រកចូលធំមួយបែរមុខទៅទិសខាងកើត ជាទិសដៅដែលព្រះអាទិទេពគង់នៅ យោងតាមរឿងព្រេងចាម្ប៉ា។ ប្រាសាទតូច (ប្រាសាទ B) មានកម្ពស់ ១២ ម៉ែត្រ និង ៣ជាន់ដូចប្រាសាទ A ប៉ុន្តែមានទំហំតូចជាង។ នៅខាងក្នុងប្រាសាទនេះមានទីសក្ការៈបូជាព្រះគោ Nandin។ នៅពីមុខប្រាសាទ B មានទីធ្លាបុណ្យដ៏ធំមួយ ដែលបច្ចុប្បន្នត្រូវបានប្រើសម្រាប់ដំឡើងវេទិកាក្នុងអំឡុងពេលពិធីបុណ្យ Kate។ ប្រាសាទតូចបំផុត (ប្រាសាទ C) ដោយសារតែមុខងារដើមគឺសម្រាប់គោរពបូជាព្រះអគ្គី ដូច្នេះមានតែមួយជាន់ និងកម្ពស់ ៥ ​​ម៉ែត្រប៉ុណ្ណោះ។ មកទស្សនាប្រាសាទ Po Sah Inu ជាលើកដំបូង អ្នកស្រី Chau Thi Cam Tu ភ្ញៀវទេសចរមកពីខេត្ត វិញឡុង បានចែករំលែកចំណាប់អារម្មណ៍ថា៖

"ខ្ញុំមានអារម្មណ៍ស្ងប់ស្ងាត់និងពិសិដ្ឋណាស់។ បរិយាកាស និងមនុស្សនៅទីនេះពិតជា រួសរាយរាក់ទាក់និងស្និទ្ធស្នាល។ អាជ្ញាធរមូលដ្ឋានបានបង្កើតតំបន់ទេសចរណ៍សម្រាប់ យើងទៅទស្សនានិងរីករាយ"។

ភ្ញៀវទេសចរជាច្រើនមកទស្សនាប្រាសាទ Po Sah Inư។ រូបថត៖ Doan Si/VOV-ទីក្រុងហូជីមិញ

នាពេលកន្លងមក រួមជាមួយនឹងការអភិរក្សបេតិកភណ្ឌ សកម្មភាពទទួលយកបទពិសោធន៍វប្បធម៌ត្រូវបានរៀបចំជាប្រចាំ ជាពិសេសក្នុងអំឡុងពេលពិធីបុណ្យទាន បុណ្យចូលឆ្នាំថ្មីប្រពៃណី និងរដូវក្តៅ រួមចំណែកបង្កើតកម្លាំងរស់ថ្មីដល់តំបន់កេរ្តិ៍ដំណែលប្រាសាទ Po Sah Inu។ មកដល់ទីនេះ ភ្ញៀវទេសចរអាចលង់ខ្លួននៅក្នុងក្បាច់របាំអប្សរារបស់ជនជាតិចាម។ របាំ និងបទចម្រៀង អមដោយសូរសំឡេងឧបករណ៍ភ្លេងប្រពៃណីរបស់ជនជាតិចាម ដូចជា៖ ស្គរហ្គីណាង ស្គរប៉ារ៉ាណុង និងត្រែសារ៉ាណៃ បានទាក់ទាញចិត្តអ្នកទស្សនា។

“ខ្ញុំឃើញថា របាំរបស់ស្ត្រីទាំងនោះពិតជាស្រស់ស្អាតម៉ែនទែន និងពោរពេញទៅដោយអត្តសញ្ញាណជនជាតិ។ តាមរយៈនេះ ខ្ញុំអាចទស្សនា និងស្វែងយល់បន្ថែមអំពីវប្បធម៌របស់បណ្ដាជនជាតិ”។

“ថ្ងៃនេះជាលើកទីមួយ ដែលខ្ញុំបានស្ដាប់តន្ត្រី និងបានទស្សនារបាំដ៏ប្លែកៗ និងទាក់ទាញភ្នែក នៅទីនេះ។ យើងមានឱកាសដើម្បីទស្សនានិងកោតសរសើរចំពោះសម្រស់នៃវប្បធម៌ជនជាតិចាម”។

នោះគឺជាចំណាប់អារម្មណ៍របស់អ្នកទេសចរពីរនាក់មកពីទីក្រុងហូជីមិញ នៅពេលទៅទស្សនាប្រាសាទ Po Sah Inu។

ភ្ញៀវទេសចររីករាយនឹងវប្បធម៌ចាមនៅកេរ្តិ៍ដំណែលប្រាសាទ Po Sah Inư។ រូបថត៖ baolamdong.vn
ភ្ញៀវទេសចររីករាយនឹងវប្បធម៌ចាមនៅកេរ្តិ៍ដំណែលប្រាសាទ Po Sah Inư។ រូបថត៖ baolamdong.vn

ក្រៅពីរីករាយនឹងការសម្តែងសិល្បៈ អ្នកទេសចរក៏អាចពិសោធន៍របរធ្វើគ្រឿងស្មូន និង ត្បាញក្រណាត់ចរបាប់ជាប្រពៃណីរបស់ជនជាតិចាមផងដែរ។ លោក Ba Sinh Ty សមាជិកនៃក្រុមសិល្បៈប្រជាប្រិយចាមនៅកេរ្តិ៍ដំណែល ប្រាសាទ Po Sah Inu បាននិយាយថា៖

"ក្រុមសិល្បៈប្រជាប្រិយចាមបានបម្រើការនៅទីនេះជាយូរមកហើយ។ ខ្ញុំសម្តែងសិល្បៈប្រជាប្រិយចាម ដូចជា៖ ច្រៀង រាំ និងប្រគុំឧបករណ៍ភ្លេងប្រពៃណីចាម ដែលអ្នកទេសចរពិតជារីករាយ និងចាប់អារម្មណ៍យ៉ាងខ្លាំង។ នៅពេលឡើងលើប្រាសាទ អ្នកទេសចរចូលចិត្តទស្សនាការសម្តែងសិល្បៈប្រជាប្រិយចាម"។

ប្រាសាទ Po Sah Inu គឺជាការសម្រិតសម្រាំងនូវបច្ចេកទេសស្ថាបត្យកម្ម និងសិល្បៈតុបតែងរបស់ជនជាតិចាមបុរាណ ដែលបង្កើតបានជាសម្រស់ដ៏ឱឡារិកនិងអាថ៌កំបាំង។ ជាមួយនឹងរចនាបថសិល្បៈដ៏វិសេសវិសាល ប្រាសាទ Po Sah Inu ត្រូវបាន ក្រសួងវប្បធម៌និងព័ត៌មាន (ឥឡូវជាក្រសួងវប្បធម៌ កីឡានិងទេសចរណ៍) ចាត់ថ្នាក់ជាកេរ្តិ៍ដំណែលស្ថាបត្យកម្ម សិល្បៈថ្នាក់ជាតិនៅឆ្នាំ១៩៩១៕