បន្ទាប់ពីដំណើរការចំណុចប្រទាក់គេហទំព័រថ្មីរយៈពេលជិតមួយខែ ចាប់តាំងពីថ្ងៃទី ១ ខែមេសា ឆ្នាំ ២០២៦មក យើងខ្ញុំបានទទួលមតិយោបល់ជាវិជ្ជមានពីមិត្តអ្នកស្តាប់ជាច្រើន។ ក្នុងនោះ មិត្តអ្នកស្តាប់ ស៊ូ សម្បត្តិ ពីរាជធានីភ្នំពេញ កម្ពុជា បានសរសេរថា៖ «ខ្ញុំចូលចិត្តគេហទំព័រថ្មីនេះខ្លាំងណាស់។ រូបភាព និងខ្លឹមសារមានភាពទាក់ទាញជាង និងមានពណ៌រស់រវើកជាង។ ទោះជាយ៉ាងណាក៏ដោយ ដោយសារតែគុណភាពបង្ហាញខ្ពស់ រូបភាពមួយចំនួនមើលទៅមិនច្បាស់ឡើយ»។ ស្រដៀងគ្នានេះដែរ មិត្តអ្នកស្តាប់ Vicentiu Gheorghe មកពីប្រទេសរ៉ូម៉ានី មិត្ត Fabrys មកពីប្រទេសអ៊ីតាលី និង Juan Diez មកពីប្រទេសអេស្ប៉ាញ សុទ្ធតែបានវាយតម្លៃថា គេហទំព័រថ្មីនេះ មានភាពទំនើប ស្រស់ស្អាត និងងាយស្រួលប្រើប្រាស់ជាងមុខ។
យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះមិត្តអ្នកស្តាប់ទាំងអស់។ ការវាយតម្លៃរបស់អ្នក ក៏ដូចជាមតិយោបល់របស់អ្នក ទាក់ទងនឹងបទពិសោធន៍អ្នកប្រើប្រាស់ គឺជាមូលដ្ឋានដ៏សំខាន់សម្រាប់យើងខ្ញុំក្នុងការកែលម្អបន្ថែមទៀត។ សង្ឃឹមថា នឹងបន្តទទូលបានការគាំទ្រ និងការរួមដំណើររបស់មិត្តអ្នកស្តាប់ទាំងអស់។
ក្នុងសប្តាហ៍កន្លងមកនេះ យើងខ្ញុំបន្តទទួលបានសំណួរពីមិត្តអ្នកស្តាប់អំពីវប្បធម៌ ប្រទេសជាតិ និងប្រជាជនវៀតណាម។ ក្នុងនោះ មិត្តអ្នកស្តាប់ ឡាយ ដារិទ្ធ មកពីកម្ពុជា បានសួរថា៖ «នាពេលថ្មីៗនេះ នៅលើបណ្តាញសង្គម ខ្ញុំបានឃើញយុវជនវៀតណាមជាច្រើនចែករំលែករូបថតផ្កាមួយប្រភេទដែលមានពណ៌លឿងនិងស ដែលមើលទៅស្រស់ស្អាតខ្លាំងណាស់។ ដែលហៅថា 'ផ្កា ប៊ុន'។ សម្រស់នៃផ្កានេះពិតជាគួរឱ្យចាប់អារម្មណ៍ និងប្លែកពីគេ។ ខ្ញុំសង្ឃឹមថាកម្មវិធីអាចពន្យល់បន្ថែមអំពីពេលវេលាដែលផ្កាប៊ុនរីកស្គុះស្គាយ និងអត្ថន័យពិសេសរបស់វា»។
មិត្តអ្នកស្តាប់ ឡាយ ដារិទ្ធ និងប្រិយមិត្តជាទីមេត្រី! ផ្កាដែលអ្នកបានលើកឡើងគឺផ្កាប៊ុន ជាធម្មតារីកស្គុះស្គាយនៅខែមេសា នៅពេលផ្លាស់ប្តូរពីនិទាឃរដូវទៅរដូវក្តៅ។ លក្ខណៈពិសេសបំផុតនៃប្រភេទផ្កានេះគឺសមត្ថភាពផ្លាស់ប្តូរពណ៌។ នៅពេលដែលទើបរីក ផ្កាមានពណ៌សសុទ្ធ បន្ទាប់មកបានប្រែទៅជាពណ៌លឿងភ្លឺជាបណ្ដើរ។ គួរឲ្យកត់សម្គាល់ថា ដើមផ្កាប៊ុនភាគច្រើនដែលអ្នកបានឃើញតាមអ៊ីនធឺណិតគឺជាដើមឈើបុរាណដែលមានអាយុកាលរាប់រយឆ្នាំ។ ក្នុងនោះ ល្បីល្បាញបំផុតគឺដើមផ្កាប៊ុន នៅក្នុងវិថី Dinh Thon (សង្កាត់ Tu Liem) ដែលមានអាយុកាលជាង ៣០០ ឆ្នាំ។
ប្រសិនបើអ្នកមានឱកាសទៅទស្សនាទីក្រុងហាណូយនាប៉ុន្មានថ្ងៃនេះ ក្រៅពីវិថី Dinh Thon អ្នកក៏អាចថតរូបផ្កានេះ នៅវិថី Chua Boc ឬនៅវត្ត Ha Tri (Ha Dong)។ ដើមផ្កាបុរាណទាំងនេះ មិនត្រឹមតែជាកន្លែងថតរូបដ៏ស្រស់ស្អាតប៉ុណ្ណោះទេ ប៉ុន្តែក៏ត្រូវបានអ្នកស្រុកចាត់ទុកថាជានិមិត្តរូបនៃភាពសុខសាន្តនិងភាពធន់ផងដែរ។ សង្ឃឹមថា អ្នកនឹងមានឱកាសគយគន់ និងថតរូបដ៏ស្រស់ស្អាតនៅក្រោមម្លប់ផ្កាដ៏ពិសេសនេះ!
ជាបន្តកម្មវិធី យើងខ្ញុំសូមចែករំលែកជាមួយមិត្តអ្នកស្តាប់អំពីគោលដៅទេសចរណ៍ខាងព្រលឹងដ៏ពិសេសមួយនៅក្នុងអតីតរាជធានី Hue គឺវត្ត Vien Giac។ មិនត្រឹមតែជាវត្តបុរាណដែលមានអាយុកាលជាង ៣០០ ឆ្នាំប៉ុណ្ណោះទេ វត្ត Vien Giac ក៏ទាក់ទាញចំណាប់អារម្មណ៍របស់ភ្ញៀវទេសចរណ៍ ជាមួយនឹងស្ថាបត្យកម្មដ៏វិសេសវិសាល នៅចំកណ្តាកអតីតរាជធានី។
ចំណុចពិសេសនៃវត្ត Vien Giac គឺជាប្រព័ន្ធច្រករបៀងរាងជារង្វង់ដ៏ពិសេស ដែលកម្រមាននៅក្នុងរចនាសម្ព័ន្ធព្រះពុទ្ធសាសនាប្រពៃណី។ ទោះបីជាវាទើបតែបានជួសជុលឡើងវិញក៏ដោយ វត្តនេះនៅតែរក្សាបាននូវលក្ខណៈបុរមបុរាណជាមួយនឹងដំបូលបក់ក្បឿងប្រពៃណី។
វត្តបុរាណនេះ ផ្សារភ្ជាប់នឹងដំណើរការបួសរៀនរបស់ព្រះសង្ឃ Lieu Quan ជាអ្នកបង្កើតនិកាយ Lieu Quan របស់វៀតណាម នៅដើមសតវត្សទី ១៨។ សព្វថ្ងៃនេះ វត្ត Vien Giac បានក្លាយជាគោលដៅសម្រាប់អ្នកដែលស្វែងរកភាពសុខសាន្ត ឬចង់ស្វែងយល់ពីសម្រស់ស្ថាបត្យកម្មដ៏វិសេសវិសាល។
មិត្តអ្នកស្តាប់ជាទីមេត្រី! រាល់សំបុត្រ មតិ ឬសំណួររបស់អស់លោកអ្នក សូមផ្ញើមកកាន់អាស័យដ្ឋាន៖ កម្មវិធីផ្សាយជាភាសាខ្មែរ វិទ្យុសម្លេងវៀតណាម លេខ ៤៥ វិថី Ba Trieu សង្កាត់ Cua Nam រដ្ឋធានីហាណូយ ឬ Email៖ vov5campuchia@gmail.com។ លោកអ្នកនាងអាចទាក់ទងជាមួយយើងខ្ញុំតាមរយៈគេហទំព័រ https://vovworld.vn។ នាទីប្រអប់ សំបុត្រមិត្តអ្នកស្ដាប់សូមបញ្ចប់នៅត្រឹមនេះ។ សូមជួបអស់លោក អ្នកនាងនាសប្ដាហ៍ខាងមុខ។ សូមជំរាបលា៕
