បច្ចុប្បន្ននេះ ខេត្តក្វាងនិញមាននីតិវិធីរដ្ឋបាលជាង ២.២៦០ ដែលក្នុងនោះ មាននីតិវិធីថ្នាក់ខេត្តចំនួនជាង ១.៧៧០ និងនីតិវិធីថ្នាក់ឃុំចំនួនជិត ២៩០ ដែលត្រូវបានអនុវត្តន៍តាមទម្រង់សេវាសាធារណៈតាមអ៊ីនធឺណិត។ នៅក្នុងសង្កាត់ Uong Bi ការផ្លាស់ប្តូរឌីជីថលត្រូវបានអនុវត្តដោយប្រមូលធនធានទាំងអស់ដើម្បីវិនិយោគ កែលម្អ និងសុក្រឹត្យហេដ្ឋារចនាសម្ព័ន្ធឌីជីថល។ លោក ដាវ ង៉ុកសឺន (Đào Ngọc Sơn)លេខាអចិន្ត្រៃយ៍រងនៃគណៈកម្មាធិការបក្សសង្កាត់ Uong Bi ខេត្តក្វាងនិញ ជឿជាក់ថា ការងារទាំងនេះត្រូវតែដើរទន្ទឹមគ្នាជាមួយនឹងការបណ្តុះបណ្តាលនិងលើកកម្ពស់គុណភាពកម្មាភិបាល ដើម្បីធានាប្រតិបត្តិការយ៉ាងរលូននៅក្នុងបរិយាកាសឌីជីថល៖ «កម្មវិធីឌីជីថល និងការផ្លាស់ប្តូរឌីជីថលបានផ្លាស់ប្តូរយ៉ាងខ្លាំងទៅជាផ្នត់គំនិតនៃអភិបាលកិច្ច។ ការងារទាំងអស់ត្រូវបានអនុវត្តយ៉ាងឆាប់រហ័ស ដោយផ្ទាល់ និងមានប្រសិទ្ធភាពជាងមុន។ យើងក៏ប្រើប្រាស់កម្មវិធីឌីជីថលដើម្បីចាប់យកព័ត៌មាន ក៏ដូចជាតាមដានលទ្ធផលនៃការអនុវត្ត រហូតដល់កម្រិតមូលដ្ឋាន។ តាមនោះ បម្រើការងារដឹកនាំនិងណែនាំកាន់តែជាក់ស្តែង ហ្មត់ចត់ និងរលូនជាងមុន»។
ដើម្បីឱ្យបច្ចេកវិទ្យាឌីជីថលឈានចូលទៅក្នុងជីវភាពប្រចាំថ្ងៃយ៉ាងឆាប់រហ័ស ចាំបាច់ត្រូវផ្សព្វផ្សាយគោលការណ៍នេះ ដើម្បីឱ្យពលរដ្ឋគ្រប់រូបក្លាយជា "ពលរដ្ឋឌីជីថល"។ លោក ង្វៀន ហ័ងក្វី (Nguyễn Hoàng Quý) លេខាគណៈកម្មាធិការបក្សសង្កាត់ Bai Chay បានឱ្យដឹងថា៖ «យើងបានកំណត់ថា ដើម្បីមានរដ្ឋបាលឌីជីថល យើងត្រូវតែមានពលរដ្ឋឌីជីថល។ ដូច្នេះហើយ Bai Chay បានខិតខំប្រឹងប្រែងយ៉ាងខ្លាំងក្នុងការអនុវត្តចលនាអក្ខរកម្មឌីជីថល។ រហូតមកដល់បច្ចុប្បន្ន ក្រុមលំនៅដ្ឋាន និងសង្កាត់ទាំងអស់ប្រើប្រាស់បរិយាកាសឌីជីថលសម្រាប់ការប្រជុំ និងការផ្លាស់ប្តូរការងារ; ប្រជាជន រួមទាំងមនុស្សចាស់ ក៏អាចធ្វើការទូទាត់ដោយមិនប្រើសាច់ប្រាក់ ទទួលប្រាក់ខែ ផ្ទេរប្រាក់ និងប្រតិបត្តិការជាច្រើននៅក្នុងបរិយាកាសឌីជីថល»។
តថភាពជាក់ស្តែងបានបង្ហាញថា ការផ្លាស់ប្តូរឌីជីថលនឹងមានប្រសិទ្ធភាពពិតប្រាកដ លុះត្រាតែប្រជាជនមានជំនាញគ្រប់គ្រាន់ដើម្បីទទួលបាននិងប្រើប្រាស់សេវាសាធារណៈតាមអ៊ីនធឺណិត។ ដូច្នេះ រួមជាមួយនឹងការវិនិយោគលើហេដ្ឋារចនាសម្ព័ន្ធឌីជីថល មូលដ្ឋាននានាក្នុងខេត្តក្វាងនិញ កំពុងផ្តោតលើការកែលម្អសមត្ថភាពឌីជីថលរបស់សហគមន៍។ នៅក្នុងសង្កាត់អៀនទឺ បច្ចេកវិទ្យាឌីជីថលកំពុងត្រូវបានអនុវត្តយ៉ាងខ្លាំងក្នុងការផ្សព្វផ្សាយទេសចរណ៍ ការគ្រប់គ្រងកែរ៍ដំណែល និងការផ្តល់សេវាសម្រាប់អ្នកទេសចរ។ លោក Bui Hoang Giang លេខាគណៈកម្មាធិការបក្ស និងជាប្រធានក្រុមប្រឹក្សាប្រជាជនសង្កាត់ អៀនទឺ បានឱ្យដឹងថា៖ «ទាក់ទងនឹងវិស័យដូចជាទេសចរណ៍និងសេវាកម្ម យើងមានកម្មវិធីនិងកាមេរ៉ា AI ៣៦០ដឺក្រេ ដើម្បីឱ្យប្រជាជននិងអ្នកទេសចរអាចចូលប្រើប្រាស់ពីចម្ងាយ។ យើងក៏កំពុងស្ថិតក្នុងដំណើរការរចនាកម្មវិធីទូរស័ព្ទ ដើម្បីឱ្យប្រជាជនអាចចូលប្រើសេវាសាធារណៈ ក៏ដូចជាស្វែងរកទីតាំងសេវាកម្ម និងគោលដៅទេសចរណ៍ផងដែរ។ ក្នុងការកែទម្រង់រដ្ឋបាល អត្រានៃការដោះស្រាយនីតិវិធីតាមអ៊ីនធឺណិតសម្រេចបានប្រហែល ៩៨% ហើយការប្រើប្រាស់ ហត្ថលេខីឌីជីថលសម្រេចបានស្ទើរតែ ១០០% សម្រាប់ឯកសារទាំងអស់»។
ពីគំរូជាក់លាក់ទាំងនេះនៅកម្រិតមូលដ្ឋាន បានបង្ហាញថា ការផ្លាស់ប្តូរឌីជីថលមិនគ្រាន់តែជាការអនុវត្តបច្ចេកវិទ្យានោះទេ ប៉ុន្តែកំពុងផ្លាស់ប្តូរជាបណ្ដើរៗនូវរបៀបបម្រើប្រជាជន និងអាជីវកម្ម។ ដើម្បីដាក់គ្រឹះសម្រាប់ដំណើរការនេះ ខេត្ត ក្វាងនិញ បានអនុវត្តន៍សេចក្តីសម្រេចចិត្តលេខ ៥៧ តាមរយៈកម្មវិធី និងផែនការសកម្មភាពជាមួយនឹងគោលដៅ និងធនធានច្បាស់លាស់។ លោក Nguyen Trung Tien អនុប្រធានមន្ទីរវិទ្យាសាស្ត្រនិងបច្ចេកវិទ្យាខេត្តក្វាងនិញ បានមានប្រសាសន៍ថា៖ «ខេត្ត ក្វាងនិញ មិនឈប់នៅត្រឹមការជ្រួតជ្រាបសេចក្តីសម្រេចចិត្តប៉ុណ្ណោះទេ ប៉ុន្តែបានអនុវត្តន៍ជាក់ស្តែងជាមួយនឹងភារកិច្ចចំនួន ៦៨ ដែលបានចាត់តាំងទៅឱ្យមន្ទីរ និងភ្នាក់ងារនានា។ ក្នុងនោះ មានភារកិច្ចជាប្រចាំចំនួន ៣២ និងភារកិច្ចកំណត់ពេលវេលាចំនួន ៣៦ ដើម្បបង្កើតរបក់គំហើញ។ នៅឆ្នាំ ២០២៦ ខេត្តនឹងបែងចែកថវិកាជាង ១.០០០ ពាន់លានដុងសម្រាប់វិទ្យាសាស្ត្រនិងបច្ចេកវិទ្យា នវានុវត្តន៍ និងការផ្លាស់ប្តូរឌីជីថល។ ទាក់ទងនឹងហេដ្ឋារចនាសម្ព័ន្ធឌីជីថលជាយុទ្ធសាស្ត្រ ខេត្តកំពុងផ្តោតលើការអនុវត្តគម្រោងយុទ្ធសាស្ត្រសំខាន់ៗចំនួន ៤»។
ចាប់ពីការណែនាំដ៏ម៉ឺងម៉ាត់របស់ថ្នាក់ដឹកនាំខេត្តក្វាងនិញ រហូតដល់ការផ្លាស់ប្តូររបៀបបម្រើប្រជាជនរបស់អាជ្ញាធរមូលដ្ឋាន និងការចូលរួមយ៉ាងសកម្មរបស់ប្រជាជន អាចមើលឃើញថា ប្រព័ន្ធរដ្ឋបាលទំនើបមួយដែលផ្សារភ្ជាប់ទៅនឹងការផ្លាស់ប្តូរឌីជីថលកំពុងលេចចេញជារូបរាងជាបណ្ដើរៗ។ នៅពេលដែលនីតិវិធីនីមួយៗត្រូវបានដំណើរការលឿនជាងមុន មតិនីមួយៗរបស់ប្រជាជនត្រូវបានទទួលយកកាន់តែងាយស្រួល ហើយប្រជាពលរដ្ឋគ្រប់រូបអាចទទួលបានសេវាសាធារណៈនៅក្នុងបរិយាកាសឌីជីថល នោះជាពេលដែលការផ្លាស់ប្តូរឌីជីថលបង្ហាញពីតម្លៃពិតរបស់ខ្លួនក្នុងការបម្រើប្រជាជន និងអាជីវកម្មឱ្យកាន់តែប្រសើរឡើង៕
