យោងតាមលោក ក្វាន់ មិញគឿង លេខាគណៈកម្មាធិការបក្សខេត្តក្វាងនិញ ការកែសម្រួលផែនការមេរបស់ខេត្ត ដំណាក់កាល ២០២១-២០៣០ ចក្ខុវិស័យដល់ឆ្នាំ ២០៥០ មានគោលបំណងធានាភាពស៊ីសង្វាក់គ្នាជាមួយនឹងផែនការមេថ្នាក់ជាតិ ផែនការមេតំថ្នាក់បន់ និងផែនការមេរបស់វិស័យ; បំពេញតម្រូវការអភិវឌ្ឍសេដ្ឋកិច្ចសង្គមក្នុងដំណាក់កាលថ្មី ដោយបង្កើនសក្តានុពល គុណសម្បត្តិ តួនាទី និងឋានៈរបស់ខេត្តក្វាងនិញនៅក្នុងតំបន់ដីសណ្តទន្លេក្រហម និងប្រទេសទាំងមូល។ ក្នុងនោះ រួមទាំងគោលការណ៍របស់ការិយាល័យនយោបាយស្តីពីការបង្កើតទីក្រុងចំណុះមជ្ឈិមផងដែរ។
សេចក្តីសម្រេចចិត្តរបស់ក្រុមប្រឹក្សាប្រជាជនខេត្តក្វាងនិញ នៅក្នុងសម័យប្រជុំលើកទី ៤ កាលពីថ្ងៃទី ១៦ ខែមិថុនា ក៏បានបញ្ជាក់យ៉ាងច្បាស់ថា ខេត្តក្វាងនិញបានបង្កើនគោលដៅកំណើន GRDP សម្រាប់ដំណាក់កាល ២០២៦-២០៣០ ពីកម្រិត ១០% ឡើងដល់ ១២% ក្នុងមួយឆ្នាំ; ខិតខំសម្រេចបាន GRDP ជាមធ្យមសម្រាប់មនុស្សម្នាក់ៗ ប្រហែល ២០.០០០ ដុល្លារអាមេរិកនៅឆ្នាំ២០៣០; សេដ្ឋកិច្ចឌីជីថលក្លាយជាទិសដៅទៀតទាត់ ដែលផ្សារភ្ជាប់នឹងហេដ្ឋារចនាសម្ព័ន្ធឌីជីថល ទិន្នន័យឌីជីថល និងរដ្ឋបាលឌីជីថល។ លោក វូ វ៉ាន់ឌៀន អនុប្រធានអចិន្ត្រៃយ៍នៃគណៈកម្មាធិការប្រជាជនខេត្តក្វាងនិញបានសង្កត់ធ្ងន់ថា ផែនការកែសម្រួលនេះនឹងបើកចេញឱកាសថ្មីៗដូចជា៖ អ័ក្សឆ្នេរសមុទ្រភាគខាងកើតជួយកាត់បន្ថយចម្ងាយពី Van Don ទៅស្ពានបាក់លួនទី៣; ខ្សែផ្លូវភាគខាងលិចដែលតភ្ជាប់អាកាសយានដ្ឋានយ៉ាប៊ិញ (បាក់និញ) និងច្រកទ្វារព្រំដែនតាន់ថាញ់ (ឡាងសឺន)៖ «ការបង្កើតផ្លូវល្បឿនលឿនថ្មីមួយដោយផ្អែកលើមូលដ្ឋាននៃខ្សែផ្លូវតាមដងទន្លេ ដែលតភ្ជាប់ទៅកាន់ផ្លូវល្បឿនលឿនហាយហ្វុង - យ៉ាប៊ិញ និងស្ថានីយ Ninh Xa នឹងជួយតភ្ជាប់បរិយាកាសបេតិកភណ្ឌវប្បធម៌អៀនទឺ។ តំបន់ស្រុក Ba Che ជាប់ជាមួយខេត្តឡាងសឺន នៅពេលត្រូវបានអនុវត្តជាជំហានៗតាមផែនការមេ នោះការធ្វើដំណើរពីទីនោះទៅកាន់ស្ថានីយហាឡុង នឹងចំណាយពេលមិនលើសពី ៣០ នាទីនោះទេ ដោយបង្កើតបានជាតំបន់ដីជាង ២.៨០០ ហិកតា ដែលអាចធ្វើអាជីវកម្មភ្លាមៗ។ ចាប់តាំងពីពេលទើបពិភាក្សាលើផែនការមេនេះ ខេត្តក្វាងនិញក៏ទទួលបានកាតយកចិត្តទុកដាក់ពីវិនិយោគិនយុទ្ធសាស្ត្រជាច្រើនហើយ»។
គោលដៅនៃផែនការមេ គឺកសាងខេត្តក្វាងនិញឱ្យក្លាយជាច្រកទ្វារតភ្ជាប់អន្តរជាតិ មជ្ឈមណ្ឌលសេវាកម្ម និងទេសចរណ៍អន្តរជាតិ មជ្ឈមណ្ឌលសេដ្ឋកិច្ចសមុទ្រថ្នាក់ជាតិ; អភិវឌ្ឍន៍ទីក្រុងឆ្នេរសមុទ្រប្រកបដោយភាពស៊ីវិល័យ ទំនើប បៃតង ចីរភាព មានគុណភាពជីវភាពរស់នៅខ្ពស់ ស្របតាមស្តង់ដារអន្តរជាតិ និងដើរជួរមុខនវានុវត្តន៍។ នេះគឺជាផែនការមេដែលមានអត្ថន័យសំខាន់ជាពិសេស ដោយបង្កើតជាមូលដ្ឋានគ្រឹះសម្រាប់ការអភិវឌ្ឍរយៈពេលវែងរបស់ខេត្តក្នុងប៉ុន្មានទសវត្សរ៍ខាងមុខ។ ហេតុដូច្នេះ ភារកិច្ច និងដំណោះស្រាយនានាដើម្បីសម្រេចបានផែនការមេនេះ ត្រូវតែអនុវត្តចាប់ពីពេលនេះតទៅជាមួយនឹងការប្តេជ្ញាចិត្តនយោបាយខ្ពស់ និងការចូលរួមពីប្រព័ន្ធនយោបាយទាំងមូល។
នៅក្នុងសម័យប្រជុំលើកទី៤ នៃក្រុមប្រឹក្សាប្រជាជនខេត្តក្វាងនិញ ប្រតិភូបានស្នើឱ្យពន្លឿនការអនុវត្តកម្មវិធី និងគោលដៅនៃផែនការមេ... លោក Hoang Ba Nam ប្រធានក្រុមប្រឹក្សាប្រជាជនសង្កាត់ ហាឡុង បានស្នើរថា រួមជាមួយនឹងគោលដៅនៃកំណើនសេដ្ឋកិច្ច ការអនុវត្តផែនការមេត្រូវតែផ្សារភ្ជាប់ទៅនឹងការអភិរក្ស និងលើកកម្ពស់តម្លៃវប្បធម៌ប្រពៃណី ការការពារបរិស្ថាន ការអភិវឌ្ឍបៃតង និងប្រកបដោយចីរភាព។ ខេត្តក្វាងនិញក៏ត្រូវផ្តល់អាទិភាពដល់ការវិនិយោគក្នុងការអភិវឌ្ឍវិស័យសុខាភិបាល ការអប់រំ លើកកម្ពស់គុណភាពជីវភាពរស់នៅ និងធានាថា ប្រជាជនទទួលបានអត្ថប្រយោជន៍ពិតប្រាកដពីសមិទ្ធផលនៃដំណើរការអភិវឌ្ឍន៍។
«ការកែសម្រួលគួរតែធានាបាននូវនិរន្តរភាព ជៀសវាងការរំខាន និងបង្កើតអារម្មណ៍នឹងនរចិត្តសម្រាប់វិនិយោគិន។ គួរតែផ្តល់អាទិភាពបែងចែកធនធានលើភារកិច្ចមួយចំនួន ការបែងចែកដីធ្លីសម្រាប់ការអភិវឌ្ឍលំនៅដ្ឋានសង្គម និងលំនៅដ្ឋានជួល; វិនិយោគលើការប្រព្រឹត្តិកម្មទឹកសំណល់នៅតំបន់ទីក្រុង ដោយផ្សារភ្ជាប់នឹងការការពារបេតិកភណ្ឌធម្មជាតិពិភពលោកឈូងសមុទ្រហាឡុង»។
យោងតាមលោកស្រី ទ្រីញ ធី មិញថាញ់ ប្រធានក្រុមប្រឹក្សាប្រជាជនខេត្តក្វាងនិញបានឱ្យដឹងថា ខេត្តនឹងបន្តកែលម្អក្បាល់ម៉ាស៊ីន និងកសាងជួរកម្មាភិបាលដែលបំពេញតម្រូវការអភិវឌ្ឍន៍ក្នុងដំណាក់កាលថ្មី។ ទន្ទឹមនឹងនោះ ផ្តោតលើការទាញយកសក្តានុពលកំណើនប្រកបដោយប្រសិទ្ធភាព នៅក្នុងឧស្សាហកម្មវប្បធម៌ និងទេសចរណ៍; ជំរុញការអភិវឌ្ឍកសិកម្ម សេដ្ឋកិច្ចសមុទ្រនិងជលផល ការឆ្លៀតយកអត្ថប្រយោជន៍នៃទីតាំងភូមិសាស្ត្រនិងហេដ្ឋារចនាសម្ព័ន្ធ ដើម្បីអភិវឌ្ឍសេវាកម្មដឹកជញ្ជូន សកម្មភាពនាំចូល-នាំចេញ និងឧស្សាហកម្មផ្សេងៗទៀត។ តាមនោះ បង្កើតមូលដ្ឋានច្បាប់និងកម្លាំងចលករថ្មីសម្រាប់ការអភិវឌ្ឍខេត្តក្នុងដំណាក់កាលខាងមុខ។
«អនុវត្តន៍ផែនការមេរបស់ខេត្ត ឱ្យក្លាយទៅជាកម្មវិធី និងគម្រោងសំខាន់ៗជាបន្ទាន់។ ទន្ទឹមនឹងនោះ ចាំបាច់ត្រូវផ្កាស់ប្តូរ្ថមីការត្រិះរិះ កៀងគរ និងប្រើប្រាស់ធនធានតាមទិសដៅប្រកបដោយប្រសិទ្ធភាពនិងចីរភាព លើកកម្ពស់តួនាទីនាំមុខគេនៃការវិនិយោគសាធារណៈ ដោះសោធនធានសង្គម បង្កើតសន្ទុះកំណើនថ្មី និងសម្រេចគោលដៅអភិវឌ្ឍន៍ដែលត្រូវបានកំណត់នៅក្នុងផែនការកែសម្រួល»។
ដោយបានតម្រងទិសអភិវឌ្ឍន៍តាមគំរូនៃខ្សែសង្វាក់ទីក្រុងពហុប៉ូល និងពហុមជ្ឈមណ្ឌល ខេត្តក្វាងនិញកំពុងផ្លាស់ប្តូរពីការអភិវឌ្ឍដោយផ្អែកលើព្រំប្រទល់រដ្ឋបាលទៅជាការអភិវឌ្ឍដោយផ្អែកលើបរិយាកាសមុខងារ។ ការកែសម្រួលផែនការមេខេត្តក្វាងនិញ មិនត្រឹមតែបង្កើតកម្លាំងចលករថ្មីសម្រាប់កំណើនប៉ុណ្ណោះទេ ថែមទាំងជាមូលដ្ឋានច្បាប់ដ៏សំខាន់ ដើម្បីសម្រេចគោលដៅនៃការកសាងខេត្តក្វាងនិញ ទៅជាទីក្រុងចំណុះមជ្ឈិម ដោយមានចក្ខុវិស័យនៃការក្លាយជាទីក្រុងឆ្នេរសមុទ្រ និងបេតិកភណ្ឌដ៏ល្បីនៅលើពិភពលោក អភិវឌ្ឍន៍បៃតង ឆ្លាតវៃ និងប្រកបដោយចីរភាព៕
