ក្រោមបាតដៃដ៏ប៉ិនប្រសប់របស់សិប្បករភូមិ Cat Dang ផលិតផលជាច្រើននៃភូមិសិប្បកម្មនេះ បានក្លាយជានិមិត្តរូបក្នុងពិធីវប្បធម៌ប្រពៃណីរបស់ប្រជាជនវៀតណាម។ សព្វថ្ងៃនេះ ផលិតផលម្រ័ក្សណ៍ខ្មុក Cat Dang មិនត្រឹមតែត្រូវបានប្រើប្រាស់យ៉ាងទូលំទូលាយនៅក្នុងស្រុកប៉ុណ្ណោះទេ ថែមទាំងបានក្លាយជាទំនិញនាំចេញដ៏ពេញនិយមទៅកាន់ប្រទេសជាច្រើននៅលើពិភពលោកទៀងផង។
ភូមិម្រ័ក្សណ៍ខ្មុក Cat Dang ត្រូវបានបង្កើតឡើង និងអភិវឌ្ឍន៍អស់រយៈពេលជាង ៦០០ ឆ្នាំមកហើយ។ ផលិតផលរបស់ភូមិមានវត្តមាននៅក្នុងសាលាភូមិ វត្តអារាម និងវិហារ ជាមួយនឹងផលិតផលម្រ័ក្សណ៍ខ្មុកស្រោបមាសដូចជា រូបសំណាក បល្ល័ង្ក អាសនៈ ទ្វារ និងបន្ទះក្ដារឆ្លាក់អក្សរផ្ចង់។ ពីមុន ផលិតផលម្រ័ក្សណ៍ខ្មុក ច្រើនតែត្រូវបានធ្វើឡើងលើផ្ទៃឈើ ប៉ុន្តែឥឡូវនេះ សិប្បករនៅភូមិ Cat Dang បានច្នៃប្រឌិតផលិតផលពីឫស្សី ឫស្សីថ្ង សម្រាប់ធ្វើជាវត្ថុអនុស្សាវរីយ៍ និងគ្រឿងតុបតែងនៅក្នុងផ្ទះ និងការិយាល័យ ដែលសមស្របនឹងជីវភាពសម័យទំនើប។
លោក Dang Thanh Cong ម្ចាស់សិប្បកម្មម្រ័ក្សណ៍ខ្មុកមួយកន្លែងនៅក្នុងឃុំ Van Thang ខេត្តនិញប៊ិញ បានឲ្យដឹងថា៖
“ពីមុន យើងធ្វើដោយដៃ ប៉ុន្តែក្នុងរយៈពេលប៉ុន្មានឆ្នាំកន្លងមកនេះ យើងបានប្រើប្រាស់គ្រឿងម៉ាស៊ីនដើម្បីជួយបង្កើនទិន្នផល។ ក្នុងប៉ុន្មានឆ្នាំថ្មីៗនេះ ចំនួនផលិតផលឫស្សីផ្សំម្រ័ក្សណ៍ខ្មុក កាន់តែកើនឡើង។ ហើយជំនាញរបស់សិប្បករបានប្រសើរឡើងដោយសារតែតម្រូវការកាន់តែតឹងរ៉ឹងរបស់អតិថិជន។ បរិមាណផលិតផលនាំចេញរបស់យើងមានចាប់ពី ៥០០ រហូតដល់រាប់លានផលិតផល”។
ឫស្សីត្រូវបានត្រាំរយៈពេលជាច្រើនខែ បន្ទាប់មកហាលឲ្យស្ងួតប្រហែលមួយសប្តាហ៍មុនពេលកែច្នៃ។ ដោយមានបទពិសោធន៍ ២០ ឆ្នាំក្នុងការផលិតផលិតផលឫស្សីផ្សំម្រ័ក្សណ៍ខ្មុក អ្នកស្រី Bui Thi Thu បានចែករំលែកថា៖
“ចាប់ពីការជ្រើសរើសឫស្សីថ្ង សិប្បករត្រូវតែជ្រើសរើសដើមឫស្សីថ្ងដោយប្រុងប្រយ័ត្នដែលមិនខ្ញីពេកឬចាស់ពេក។ នៅពេលយកមកផ្ទះវិញ ឫស្សីត្រូវត្រាំក្នុងទឹកយ៉ាងហោចណាស់ប្រាំមួយខែ ដើម្បីការពារកណ្ដើរខ្មូត និងធានាភាពប្រើប្រាស់បានយូររបស់ផលិតផល។ បន្ទាប់មក បិត ខាត់ និងលាបជ័រមួយស្រទាប់ ដើម្បីបិទចន្លោះរវាងរង្វង់ឫស្សី។ ជាចុងក្រោយ ផលិតផលត្រូវបានសំលៀងរហូតដល់រលោង និងមានកម្រាស់ដែលចង់បាន”។
បន្ទាប់ពីការកែច្នៃបឋម ផលិតផលម្រ័ក្សណ៍ខ្មុកនីមួយៗ បានឆ្លងកាត់ដំណាក់កាលស្មុគស្មាញជាច្រើន ដូចជា៖ ការលាបថ្នាំបឋម ការលាបថ្នាំលើផ្ទៃ ការសំលៀងការដាំគុជខ្យង ការស្រោបមាស... ជាចុងក្រោយ សិប្បករនឹងតុបតែងផលិតផលជាមួយនឹងក្បូរក្បាច់រចនាផ្សេងៗគ្នា។ លោក Trinh Ngoc Thuy នាយករងក្រុមហ៊ុន Nam Hai ឃុំ Van Thang ខេត្ត Ninh Binh បានឲ្យដឹងថា៖
“ចំពោះផលិតផលសិប្បកម្មម្រ័ក្សណ៍ខ្មុក ជំហាននីមួយៗសុទ្ធតែមានសារៈសំខាន់។ ដោយសារតែនេះជាផលិតផលដែលមិនប៉ះពាល់ដល់បរិស្ថាន ជារបស់របរប្រើប្រាស់ក្នុងផ្ទះ សម្ភារៈផ្ទះបាយ របស់របរ ដាក់អាហារ ដូច្នេះជំហានទាំងអស់ត្រូវតែគ្រប់គ្រងយ៉ាងតឹងរ៉ឹងដើម្បីធានាបាននូវស្តង់ដារនាំចេញ និងអនាម័យអាហារ។ ជំហានត្រួតពិនិត្យដែលតម្រូវដោយអតិថិជន ត្រូវបានផ្តល់អាជ្ញាប័ណ្ណ និងស្របច្បាប់លើទូទាំងពិភពលោក”។
បច្ចុប្បន្ននេះ ផលិតផលម្រ័ក្សណ៍ខ្មុក Cat Dang មានភាពសម្បូរបែប ដែលភាគច្រើនគឺរបស់របរប្រើប្រាស់ក្នុងផ្ទះ គ្រឿងតុបតែងខាងក្នុង ដូចជា៖ ថូ ពាង គំនូរ និងរូបចម្លាក់លៀន។ ដោយប្រើប្រាស់បច្ចេកវិទ្យាថ្មី ផលិតផលមិនត្រឹមតែបំពេញតម្រូវការទីផ្សារក្នុងស្រុកប៉ុណ្ណោះទេ ប៉ុន្តែថែមទាំងនាំចេញទៅកាន់ទីផ្សារជាច្រើនដូចជា សហរដ្ឋអាមេរិក សហភាពអឺរ៉ុប (EU) ជប៉ុន និងរុស្ស៊ី ជាដើម។ លោក Pham Tien Dien អនុប្រធានគណៈកម្មាធិការប្រជាជនឃុំ Van Thang ខេត្ត និញប៊ិញ បានឲ្យដឹងថា៖
“ពីមុន សិប្បកម្មម្រ័ក្សណ៍ខ្មុកនៅក្នុងឃុំ ត្រូវបានបណ្ដាគ្រួសារធ្វើដោយខ្លួនឯង ដើម្បីផ្គត់ផ្គង់ទំនិញទៅកាន់ឃុំជិតខាងក្នុងខេត្ត និងក្នុងប្រទេស។ រហូតដល់ពេលថ្មីៗនេះ សិប្បកម្មម្រ័ក្សណ៍ខ្មុកមានការរីកចម្រើន ដោយត្រូវបាននាំចេញទៅកាន់បណ្តាប្រទេសនៅអឺរ៉ុប និងអាមេរិកផងដែរ។ បច្ចុប្បន្ន អាជីវកម្មនៅក្នុងឃុំ Van Thang កំពុងកសាងប្រតិបត្តិការទ្រង់ទ្រាយធំ និងដំណើរការផលិតកម្ម
យ៉ាងតឹងរ៉ឹង ដើម្បីធានាបាននូវស្តង់ដារនាំចេញ។ នាពេលអនាគត យោងតាមផែនការអភិវឌ្ឍន៍សេដ្ឋកិច្ច ឃុំនឹងផ្តោតលើការអភិវឌ្ឍរបរសិប្បកម្ម ដើម្បីរក្សាអត្តសញ្ញាណ និងប្រពៃណីរបស់ខ្លួន ហើយបង្កើតលក្ខខណ្ឌអំណោយផលសម្រាប់អាជីវកម្មឱ្យអភិវឌ្ឍន៍កាន់តែខ្លាំងក្លាថែមទៀត”។
ឃុំ Van Thang ខេត្តនិញប៊ិញ បច្ចុប្បន្នមានពលករជាង ៣០០០ នាក់ដែលកំពុងប្រកបរបរម្រ័ក្សណ៍ខ្មុក។ ដើម្បីធានាបាននូវការអភិវឌ្ឍប្រកបដោយចីរភាព អាជ្ញាធរមូលដ្ឋានបានជួយឧបត្ថម្ភអាជីវកម្មក្នុងការកែលម្អឧបករណ៍ ចូលរួមក្នុងពិព័រណ៍ផ្សព្វផ្សាយពាណិជ្ជកម្ម និងកសាងម៉ាកយីហោសម្រាប់ផលិតផលឫស្សីផ្សំម្រ័ក្សណ៍ខ្មុកនៃភូមិ Cat Dang។ ជាមួយគ្នានេះ វិស័យទេសចរណ៍ក៏កំពុងនាំ Cat Dang ឲ្យក្លាយទៅជាគោលដៅទេសចរណ៍ភូមិសិប្បកម្ម រួមផ្សំជាមួយនឹងដំណើរទេសចរណ៍វប្បធម៌ និងអេកូឡូស៊ីនៃខេត្តនិញប៊ិញផងដែរ៕
