ប្រសិនបើអ្នកស្វែងរកពាក្យថា៖ "រៀនភាសាថៃ" អ្នកនឹងរកឃើញឆានែល TikTok មានឈ្មោះថា Intat Vu របស់លោក Nguyen Long Vu អតីតនិស្សិតនៃមហាវិទ្យាល័យភាសាបរទេស និងជាគ្រូបង្រៀននៅវិទ្យាល័យ Nam Tu Liem ក្នុងទីក្រុងហាណូយ។ ក្រៅពីការបង្រៀនភាសា ថ្នាក់រៀនអនឡាញរបស់លោក Vu នៅលើ TikTok បានធ្វើឡើងជារៀងរាល់ថ្ងៃនៅម៉ោង ១៩៖៣០ ក៏ជាទីកន្លែងសម្រាប់ចែករំលែករឿងរ៉ាវអំពីវប្បធម៌ ទំនៀមទម្លាប់ និងជីវភាពរស់នៅរបស់ប្រជាជនថៃទៀតផង។ ដោយមានបំណងចង់នាំយកវប្បធម៌ថៃឱ្យកាន់តែខិតមកជិតប្រជាជនវៀតណាម បច្ចុប្បន្ននេះ ឆានែល Intat Vu មានអ្នកតាមដានជាង ៤០០០ នាក់៖ «ខ្ញុំបានជ្រើសរើស TikTok ពីព្រោះនេះគឺជាវេទិកាដែលងាយស្រួលចូលប្រើបំផុតសម្រាប់អ្នកចាប់ផ្តើមដំបូង។ ការសរសេរភាសាថៃគឺពិបាកណាស់ ប្រសិនបើយើងចាប់ផ្តើមជាមួយនឹងសៀវភៅសិក្សាដោយផ្ទាល់ អាចធ្វើឱ្យមនុស្សជាច្រើនមានអារម្មណ៍ធុញទ្រាន់។ ដូច្នេះហើយ TikTok គឺដូចជា ‘ចំណុចចាប់ផ្តើម’ ដ៏រីករាយ និងគ្មានសម្ពាធ ដែលជួយឲ្យអ្នកចូលមើលអាចស៊ាំនឹងភាសានៅលើទូរស័ព្ទដៃដោយផ្ទាល់ មិនចាំបាច់ព្រួយបារម្ភអំពីពេលវេលា ឬថ្លៃសិក្សា ដូចជាការរៀននៅក្នុងថ្នាក់រៀនបែបប្រពៃណីនោះទេ»។
មិនត្រឹមតែជាថ្នាក់រៀនតាមអ៊ីនធឺណិតប៉ុណ្ណោះទេ ខ្លឹមសារដែលលោកគ្រូ Vu និងអ្នកបង្កើតមាតិកាស្រដៀងគ្នាជាច្រើនកំពុងធ្វើ បានរួមចំណែកដល់ការបង្កើត “ស្ពានឌីជីថល” រវាងប្រជាជនវៀតណាម និងប្រជាជនថៃ។ តាមរយៈវីដេអូខ្លីៗអំពីភាសា ការសួរសុខទុក្ខ ម្ហូបអាហារ និងជីវភាពប្រចាំថ្ងៃ អ្នករៀនមិនត្រឹមតែរៀនបានចំណេះដឹងប៉ុណ្ណោះទេ ប៉ុន្តែថែមទាំងបានឃើញពីភាពជិតស្និទ្ធខាងវប្បធម៌រវាងប្រទេសទាំងពីរទៀតផង។ ទាំងនេះ បានរួមចំណែកដល់ការជំរុញការផ្លាស់ប្តូរ និងផ្សព្វផ្សាយរូបភាពនៃប្រទេសជាតិ និងប្រជាជនថៃ ឱ្យកាន់តែខិតជិតសាធារណជនវៀតណាម ហើយទន្ទឹមនឹងនោះ បានបើកចេញឱកាសអន្តរកម្មទ្វេភាគីផងដែរ ដោយសារតែប្រជាជនថៃក៏អាចចូលប្រើ និងឆ្លើយតបដោយផ្ទាល់ផងដែរ។
«ខ្ញុំគិតថា ការលេចចេញនូវឆានែលបង្រៀន និងឧទ្ទេសនាមភាសា និងវប្បធម៌ថៃនៅលើបណ្តាញសង្គមគឺមានប្រយោជន៍ខ្លាំងណាស់។ តាមនោះ ប្រជាជនវៀតណាមអាចរៀនភាសាថៃ និងស្វែងយល់អំពីវប្បធម៌ថៃបានយ៉ាងងាយស្រួល ជាពិសេសតាមរយៈវីដេអូក្លិបនៅលើ TikTok។ នៅពេលដែលខ្លឹមសារត្រូវបានបង្កើតឡើងយ៉ាងរស់រវើក និងគួរឲ្យទាក់ទាញ អ្នកមើលនឹងចងចាំបានយ៉ាងស្រួល និងមានចំណាប់អារម្មណ៍ក្នុងការរៀនភាសា។ ឆានែល TikTok របស់លោកគ្រូ Vu ក៏ជាឧទាហរណ៍ដ៏លេចធ្លោមួយផងដែរ មានលក្ខណៈកម្សាន្តផង និងនាំមកនូវចំណេះដឹងដ៏មានប្រយោជន៍ជាច្រើនអំពីប្រទេសថៃ ជាមួយនឹងខ្លឹមសារដ៏សម្បូរបែប និងចម្រុះផង»។
តាមរយៈបណ្តាញសង្គម ប្រជាជនវៀតណាមអាចស្វែងយល់វប្បធម៌ និងប្រជាជនថៃបានយ៉ាងងាយស្រួល។ នេះគឺជាកត្តាសំខាន់ក្នុងការលើកកម្ពស់ ការយល់ដឹង និងការតភ្ជាប់រវាងប្រទេសទាំងពីរ។ ទោះជាយ៉ាងណាក៏ដោយ ការយល់ដឹងស៊ីជម្រៅអំពីវប្បធម៌គឺជាដំណើរដ៏វែងឆ្ងាយមួយ ដែលទាមទារឱ្យមានការស្រាវជ្រាវជាប្រព័ន្ធបន្ថែមទៀត។
តាមរយៈបណ្តាញសង្គម រួមជាមួយនឹងកម្មវិធីសិក្សាជាប្រព័ន្ធ យុវជនវៀតណាមមានឱកាសស្វែងយល់កាន់តែស៊ីជម្រៅអំពីជីវភាពរស់នៅ និងប្រជាជនថៃ តាមនោះ រួមចំណែកលើកកម្ពស់ការផ្លាស់ប្តូររវាងប្រជាជន និងប្រជាជននៃប្រទេសទាំងពីរតាមរបៀបធម្មតា និងស្និទ្ធស្នាលជាងមុន។ តាមពិតទៅ យុវជនវៀតណាមជាច្រើនកំពុងប្រើប្រាស់វេទិកាឌីជីថលដើម្បីស្វែងយល់ និងចែករំលែកវប្បធម៌ថៃតាមរបៀបផ្ទាល់ខ្លួន ដូចជា Tu Anh និង Gia Huy – សិក្ខាកាមនៅក្នុងថ្នាក់រៀនរបស់លោកគ្រូ Vu ដែលកំពុងធ្វើការនៅប្រទេសថៃ៖ «នាងខ្ញុំឈ្មោះ Tu Anh មកពី Moc Chau ខេត្ត Son La។ ខ្ញុំជឿជាក់ថា បណ្តាញសង្គមជួយយើងទទួលបានប្រភពចំណេះដឹងដ៏ចម្រុះ ក្នុងតម្លៃទាប ព្រមទាំងជួយយើងឱ្យយល់ដឹងបន្ថែមអំពីវប្បធម៌ថៃ និងកែលម្អការបញ្ចេញសំឡេងតាមរយៈវីដេអូផងដែរ។ ទោះជាយ៉ាងណាក៏ដោយ ដើម្បីប្រើប្រាស់ភាសាថៃបានយ៉ាងល្អក្នុងការសិក្សានិងការងារ អ្នករៀននៅតែត្រូវការកសាងមូលដ្ឋានចំណេះដឹងឱ្យបានរឹងមាំ និងប្រើប្រាស់បច្ចេកវិទ្យាប្រកបដោយប្រសិទ្ធភាព»។
«ខ្ញុំបាទឈ្មោះ Gia Huy ជាអ្នកឯកទេសបច្ចេកវិទ្យានៅក្រុមហ៊ុនប្រឹក្សាយោបល់បច្ចេកវិទ្យា Center នៅប្រទេសថៃ។ ខ្ញុំបានរួមបញ្ចូលការរៀនវេយ្យាករណ៍ ជាមួយថ្នាក់រៀនតាមអ៊ីនធឺណិត និងការសិក្សាដោយខ្លួនឯងតាមរយៈឧបករណ៍ឌីជីថលដូចជា App, YouTube និងបណ្តាញសង្គមដើម្បីបង្កើនវាក្យសព្ទរបស់ខ្លួន។ តាមរយៈបណ្តាញសង្គម ខ្ញុំមិនត្រឹមតែរៀនវាក្យសព្ទប៉ុណ្ណោះទេ ប៉ុន្តែថែមទាំងរបៀបដែលជនជាតិថៃបញ្ចេញមតិ ប្រើពាក្យស្លោក និងក្តាប់ជាប់នូវនិន្នាការដែលកំពុងលេចធ្លោ។ ជាពិសេសនៅពេលបង្កើតមាតិកាសម្រាប់ TikTok របស់ខ្ញុំគឺ «ញាំបាយនៅថៃ» ខ្ញុំក៏បានរៀនពីរបៀបធ្វើអន្តរកម្មដោយផ្ទាល់ជាមួយទស្សនិកជនក្នុងស្រុក តាមនោះ ខ្ញុំអាចកែលម្អប្រតិកម្មនៃការប្រស្រ័យទាក់ទងគ្នាឱ្យបានរលូន»។
យើងអាចមើលឃើញថា យុគសម័យឌីជីថលមិនត្រឹមតែបើកចេញឱកាសសិក្សាប៉ុណ្ណោះទេ ថែមទាំងបង្កើត "ស្ពានទន់" ដែលតភ្ជាប់វប្បធម៌វៀតណាម និងវប្បធម៌ថៃទៀតផង។ តាមរយៈភាសា និងវេទិកាឌីជីថល ការផ្លាស់ប្តូររវាងប្រជាជននិងប្រជាជនកំពុងកើតឡើងដោយរលូន បន្តបន្ទាប់ និងកាន់តែស៊ីជម្រៅ តាមនោះ រួមចំណែកដល់ការពង្រឹងការយល់ដឹង ការតភ្ជាប់ និងការលើកកម្ពស់កិច្ចសហប្រតិបត្តិការប្រកបដោយចីរភាពរវាងប្រទេសទាំងពីរនៅក្នុងបរិបទនៃការធ្វើសមាហរណកម្មនាបច្ចុប្បន្ន៕
