ខ្សែរថភ្លើងឡាវ-វៀតណាម ចាប់ផ្តើមនៅទីក្រុងវៀងចន្ទន៍(ឡាវ) និងបញ្ចប់នៅកំពង់ផែ វូងអាង (វៀតណាម) ដោយមានប្រវែង ៥៦២ គីឡូម៉ែត្រ។ ក្នុងនោះ កំណាត់ពីទីរួមស្រុក ថាខេក ក្នុងខេត្ត ខាមួន ភាគកណ្តាលប្រទេសឡាវ ដល់ មូយ៉ា (ខេត្តក្វាងប៊ិញ) នៅព្រំដែនវៀតណាម-ឡាវ មានប្រវែង ១៤៧ គីឡូម៉ែត្រ។ នេះគឺជាគម្រោងថ្នាក់ជាតិដែលជួយប្រទេសឡាវឱ្យសម្រេចបាននូវសេចក្តីសម្រេចចិត្តលេខ ០៤ របស់គណៈកម្មាធិការមជ្ឈិមបក្សប្រជាជនបដិវត្តន៍ឡាវ ស្តីពីការកសាងខឿនសេដ្ឋកិច្ចឯករាជ្យ ខ្លួនទីពឹងខ្លួន និងជាពិសេសគឺគោលដៅធ្វើសមាហរណកម្ម និងតភ្ជាប់ប្រទេសឡាវជាមួយតំបន់ និងពិភពលោក ដោយបង្កើតលក្ខខណ្ឌអំណោយផលសម្រាប់ផលិតកម្ម សេវាកម្ម ពាណិជ្ជកម្ម និងការវិនិយោគ។ គម្រោងផ្លូវរថភ្លើងឡាវ-វៀតណាមនឹងជួយប្រទេសឡាវផ្លាស់ប្តូរពីប្រទេសដែល«គ្មានសមុទ្រ» ក្លាយទៅជាប្រទេសធ្វើសមាហរណកម្ម និងតភ្ជាប់ ដោយឆ្ពោះទៅសមុទ្រតាមរយៈកំពង់ផែ វូងអាង (វៀតណាម)។ លោក សាឡឹមសៃ កុម៉ាស៊ីត ឧបនាយករដ្ឋមន្ត្រី និងជាប្រធានគណៈកម្មាធិការជាតិដឹកនាំគម្រោងសាងសង់ផ្លូវដែកឡាវ-វៀតណាម បានឲ្យដឹងថា៖
«គម្រោងផ្លូវរថភ្លើងឡាវ-វៀតណាម គឺជាគម្រោងដ៏សំខាន់មួយក្នុងការធ្វើសមាហរណកម្មរបស់ប្រទេសជាតិ ដែលរួមបញ្ចូលនៅក្នុងផែនការអភិវឌ្ឍន៍សេដ្ឋកិច្ច-សង្គមជាតិរយៈពេល ៥ ឆ្នាំលើកទី១០។ នេះគឺជាគម្រោងដែលរដ្ឋាភិបាលឡាវ និងវៀតណាមគាំទ្រ និងផ្តល់អាទិភាពនៅក្នុងកិច្ចប្រជុំគណៈកម្មាធិការអន្តររដ្ឋាភិបាលឡាវ-វៀតណាម ក្នុងឆ្នាំ២០២១។ លើសពីនេះ គម្រោងក៏សមស្របនឹងច្រករបៀងសេដ្ឋកិច្ចខាងកើត-ខាងលិច តាមគោលការណ៍របស់ឡាវ ក្នុងការផ្លាស់ប្តូរពីប្រទេសដែលគ្មានឆ្នេរសមុទ្រ ទៅជាប្រទេសធ្វើសមាហរណកម្មជាមួយតំបន់ និងអន្តរជាតិ»។
ខ្សែរថភ្លើងនេះ ត្រូវបានរចនាតាមស្តង់ដារ ១,៤៣៥ ម៉ែត្រ ដែលបំពេញតាមស្តង់ដារអន្តរជាតិ និងជួយសម្រួលដល់ការតភ្ជាប់ក្នុងតំបន់។ រថភ្លើងដឹកអ្នកដំណើរត្រូវបានរំពឹងថា នឹងដំណើរការក្នុងល្បឿនជាអតិបរមា ១៥០ km/h ខណៈដែលរថភ្លើងដឹកទំនិញនឹងមានល្បឿន ៨០ km/h។ ជាមួយនឹងការវិនិយោគសរុបប្រមាណ ៦,៦ ពាន់លានដុល្លារអាមេរិក គម្រោងនេះត្រូវបានរំពឹងថា នឹងចាប់ផ្តើមការសាងសង់នៅឆ្នាំ ២០២៦ និងបើកដំណើរការចាប់ពីឆ្នាំ ២០៣០។ ខ្សែរថភ្លើងវៀងចន្ទន៍-វុងអាង ត្រូវបានរំពឹងថានឹងរួមចំណែកកាត់បន្ថយថ្លៃដឹកជញ្ជូន ជំរុញពាណិជ្ជកម្ម និងបង្កើនការធ្វើសមាហរណកម្មរបស់ឡាវទៅក្នុងទីផ្សារតំបន់ និងពិភពលោក។
មុននោះ សម័យប្រជុំលើកទីមួយនៃរដ្ឋសភាឡាវ នីតិកាលទី ១០ បានអនុម័តជាគោលការណ៍លើការវិនិយោគ និងសាងសង់ខ្សែរថភ្លើងឡាវ-វៀតណាម។ អញ្ជើញថ្លែងនៅក្នុងសម័យប្រជុំនេះ លោក វីឡៃវង្ស ប៊ូដាខាំ អនុប្រធានរដ្ឋសភាឡាវ បានសង្កត់ធ្ងន់ថា៖
«ចំពោះការអភិវឌ្ឍខ្សែផ្លូវរថភ្លើងឡាវ-វៀតណាម ចាប់ពីទីរួមស្រុក ថាខេក ខេត្ត ខាមួន (ឡាវ) ដល់ច្រកទ្វារព្រំដែន មូយ៉ា (វៀតណាម) គឺអនុវត្តដោយបណ្ដាក្រុមហ៊ុនរបស់ឡាវ តាមទម្រង់ BOT។ ការសាងសង់គម្រោងនេះ គឺសំដៅតភ្ជាប់ជាមួយវៀតណាម ដែលជាមិត្តយុទ្ធសាស្ត្រ ដើម្បីបង្កើនទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរ ជួយសម្រួល ដល់ការដឹកជញ្ជូន និងជួយឱ្យឡាវមានខ្សែផ្លូវឆ្ពោះទៅកាន់សមុទ្រដ៏ជិតបំផុត តាមរយៈកំពង់ផែ វូងអាង ដើម្បីបើកផ្លូវសម្រាប់នាំទំនិញរបស់ឡាវចេញទៅកាន់ពិភពលោក។ ខ្សែផ្លូវរថភ្លើងឡាវ-វៀតណាម មិនត្រឹមតែជាខ្សែផ្លូវសម្រាប់ធ្វើដំណើរប៉ុណ្ណោះទេ ប៉ុន្តែក៏ជាសរសៃឈាមសេដ្ឋកិច្ចដ៏សំខាន់ ដែលជួយលើកកម្ពស់ឋានៈរបស់ឡាវនៅលើឆាកអន្តរជាតិទៀតផង»។
ខ្សែរថភ្លើងតភ្ជាប់វៀតណាម-ឡាវ ពីវូងអាង-មូយ៉ា-ថាខេក-វៀងចន្ទន៍ ត្រូវបានកំណត់ជាគម្រោងហេដ្ឋារចនាសម្ព័ន្ធសំខាន់មួយក្នុងកិច្ចសហប្រតិបត្តិការវៀតណាម-ឡាវ ដែលរួមចំណែកដល់ការបង្កើតច្រករបៀងដឹកជញ្ជូនប្រកបដោយប្រសិទ្ធភាព តភ្ជាប់ប្រទេសឡាវជាមួយសមុទ្រខាងកើតដោយផ្ទាល់ តាមរយៈប្រព័ន្ធកំពង់ផែនៅភាគកណ្តាលវៀតណាម។ នេះក៏ជាលទ្ធផលនៃទំនាក់ទំនងសហប្រតិបត្តិការយ៉ាងជ្រាលជ្រៅ ជានិមិត្តរូបនៃចំណងមិត្តភាពដ៏មហិមា សាមគ្គីភាពពិសេស កិច្ចសហប្រតិបត្តិការគ្រប់ជ្រុងជ្រោយ និងការតភ្ជាប់ជាយុទ្ធសាស្ត្ររវាងបក្សទាំងពីរ រដ្ឋទាំងពីរ និងប្រជាជនវៀតណាម-ឡាវ និងឡាវ-វៀតណាម ដែលកាន់តែជិតស្និទ្ធ និងអភិវឌ្ឍកាន់តែស៊ីជម្រៅលើគ្រប់វិស័យ៕
