ស្ពាននៃទំនុកចិត្តជាយុទ្ធសាស្ត្រ
ក្នុងសប្តាហ៍ដំបូងនៃឆ្នាំថ្មី បន្ទាប់ពីពិធីបុណ្យចូលឆ្នាំថ្មីប្រពៃណីខ្មែរ នៅស្ថានទូតវៀតណាមប្រចាំនៅកម្ពុជា បានប្រព្រឹត្តទៅ "កិច្ចសន្ទនាធុរកិច្ចវៀតណាម-កម្ពុជាឆ្នាំ២០២៦"។ ព្រឹត្តិការណ៍នេះត្រូវបានធ្វើឡើងបន្ទាប់ពីដំណើរទស្សនកិច្ចផ្លូវរដ្ឋនៅកម្ពុជារបស់លោកអគ្គលេខាបក្ស តូ ឡឹម ក្នុងខែកុម្ភៈ ឆ្នាំ២០២៦ ដោយបើកចេញជំពូកថ្មីមួយសម្រាប់ «យន្តការសេដ្ឋកិច្ចថ្មី» ដោយផ្អែកលើផែនការមេសម្រាប់ការតភ្ជាប់សេដ្ឋកិច្ចរវាងប្រទេសទាំងពីរ រហូតដល់ឆ្នាំ២០៣០។
ថ្លែងនៅក្នុងព្រឹត្តិការណ៍នេះ លោក ហូ ស៊ីវយ៉ុង អគ្គនាយកនៃអគ្គនាយកដ្ឋានសេវាពាណិជ្ជកម្មកម្ពុជា បានសង្កត់ធ្ងន់ថា៖ ក្នុងបរិបទដែលពាណិជ្ជកម្មពិភពលោកមានការប្រែប្រួលជាច្រើន ដោយសារតែភាពតានតឹងភូមិសាស្ត្រនយោបាយ អតិផរណា និងតម្លៃប្រេងឥន្ធនៈកើនឡើងខ្ពស់ ការពង្រឹងកិច្ចសហប្រតិបត្តិការ និងការតភ្ជាប់ខ្សែសង្វាក់ផ្គត់ផ្គង់រវាងប្រទេសទាំងពីរគឺមានសារៈសំខាន់ជាងពេលណាៗទាំងអស់។ លោកបានបញ្ជាក់ថា៖ នាពេលកន្លងមក ទំនាក់ទំនងពាណិជ្ជកម្មរវាងកម្ពុជា និងវៀតណាមបានកត់ត្រាកំណើនគួរឱ្យកត់សម្គាល់។ នេះគឺជាសក្ខីភាពច្បាស់លាស់នៃការប្តេជ្ញាចិត្តយ៉ាងមុតមាំពីថ្នាក់ដឹកនាំជាន់ខ្ពស់នៃប្រទេសទាំងពីរ ក្នុងការពង្រឹងសាមគ្គីភាព និងកិច្ចសហប្រតិបត្តិការគ្រប់ជ្រុងជ្រោយ។
សហគ្រាស - កម្លាំងចលករសម្រាប់អន្តរកម្ម និងការតភ្ជាប់រវាងប្រជាជននៃប្រទេសទាំងពីរ
សញ្ញាសម្គាល់នៃសហគ្រាសវៀតណាមនៅកម្ពុជា មិនត្រឹមតែស្ថិតក្នុងដើមទុនវិនិយោគប៉ុណ្ណោះទេ ប៉ុន្តែថែមទាំងស្ថិតនៅក្នុងការទទួលខុសត្រូវសង្គម និងការចូលរួមក្នុងជីវភាពប្រចាំថ្ងៃរបស់ប្រជាជនទៀតផង។ ឧកញ៉ា ឡេង រិទ្ធី ប្រធានសមាគមធុរកិច្ចវៀតណាម-កម្ពុជា (VCBA) បានចែករំលែកថា សហគ្រាសវៀតណាមបាននិងកំពុងផ្លាស់ប្តូរយ៉ាងខ្លាំង ពីសកម្មភាពពាណិជ្ជកម្មសុទ្ធសាធទៅជាកិច្ចសហប្រតិបត្តិការយ៉ាងទូលំទូលាយក្នុងវិស័យបច្ចេកវិទ្យា កសិកម្មប្រកបដោយចីរភាព និងថាមពលបៃតង។ សាជីវកម្មធំៗរបស់វៀតណាម ឬអង្គភាពវេជ្ជសាស្ត្រដូចជាមន្ទីរពេទ្យ MED១១៥ និងមន្ទីរពេទ្យជោរៃ-ភ្នំពេញ បានក្លាយជាកែរ៍ឈ្មោះធ្លាប់ស្គាល់សម្រាប់ប្រជាជនកម្ពុជា ដោយរួមចំណែកយ៉ាងសំខាន់ដល់សុខុមាលភាពសង្គម បង្កើតការងារធ្វើ និងជំរុញការអភិវឌ្ឍសេដ្ឋកិច្ចមូលដ្ឋាន។ ឧកញ៉ា ឡេង រិទ្ធី ប្រធានសមាគមធុរកិច្ចវៀតណាម-កម្ពុជា (VCBA) បាននិយាយថា៖ «អស់រយៈពេលជាច្រើនឆ្នាំមកហើយវៀតណាមតែងតែរក្សាតួនាទីជាដៃគូពាណិជ្ជកម្ម និងវិនិយោគឈានមុខគេនៅកម្ពុជា។ វត្តមានរបស់សាជីវកម្មធំៗដូចជាសារជីវកម្មឧស្សាហកម្មកៅស៊ូវៀតណាម សារជីវកម្ម Thaco សារជីវកម្ម Viettel Group (មិត្តហ្វូន) និងធនាគារធំៗរបស់វៀតណាមដូចជា BIDC ... បានបង្កើតការងារធ្វើដោយផ្ទាល់ និងដោយប្រយោលជាច្រើនសម្រាប់ប្រជាជនកម្ពុជា ដែលរួមចំណែកដល់ចំណងមិត្តភាពដ៏រឹងមាំរវាងប្រជាជននិងប្រជាជន រួមចំណែកដល់ថវិការដ្ឋ និងលើកកម្ពស់ការអភិវឌ្ឍសេដ្ឋកិច្ចរវាងវៀតណាម និងកម្ពុជា»។
តួរលេខ «គួរឱ្យចាប់អារម្មណ៍» និងយថាទស្សន៍ចំនួន ២០ ពាន់លានដុល្លារ
ដោយក្រឡេកមើលលើផ្ទាំងគំនូរសេដ្ឋកិច្ច បច្ចុប្បន្ននេះ វៀតណាមគឺជាដៃគូពាណិជ្ជកម្មឈានមុខគេរបស់កម្ពុជាទាំងនៅក្នុងអាស៊ាន និងទូទាំងពិភពលោក ដោយពាណិជ្ជកម្មទ្វេភាគីបានឈានដល់កម្រិតខ្ពស់បំផុតគឺ ១១,៣៣ ពាន់លានដុល្លារអាមេរិកនៅឆ្នាំ ២០២៥ ទោះបីជាមានការប្រែប្រួលយ៉ាងឆាប់រហ័ស ស្មុគស្មាញ និងមិនអាចទាយទុកជាមុនបាននៃសេដ្ឋកិច្ចពិភពលោកក៏ដោយ។
សន្ទុះកំណើនត្រូវបានបញ្ជាក់បន្ថែមទៀតនៅក្នុងត្រីមាសទីមួយឆ្នាំ ២០២៦ ដោយទំហំពាណិជ្ជកម្មសរុបសម្រេចបាន ៣,៤៤ ពាន់លានដុល្លារ កើនឡើង ៤,៣% បើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ វៀតណាមបាននាំចេញ ១,៤៦ ពាន់លានដុល្លារអាមេរិកទៅកាន់កម្ពុជា (កើនឡើង ៧,៤%) និងនាំចូល ១,៩៨ ពាន់លានដុល្លារ (កើនឡើង ២,១%)។ តួលេខទាំងនេះមិនត្រឹមតែជាលទ្ធផលនៃកិច្ចព្រមព្រៀងពាណិជ្ជកម្មប៉ុណ្ណោះទេ ប៉ុន្តែក៏បង្ហាញពីការបំពេញបន្ថែមឲ្យគ្នាទៅវិញទៅមក ដែលវត្ថុធាតុដើមរបស់កម្ពុជារួមផ្សំជាមួយសមត្ថភាពផលិតកម្មរបស់វៀតណាម ដើម្បីបង្កើតខ្សែសង្វាក់ផ្គត់ផ្គង់ប្រកបដោយចីរភាពទៀតផង។
ថ្នាក់ដឹកនាំជាន់ខ្ពស់នៃប្រទេសទាំងពីរបានកំណត់គោលដៅដ៏មហិច្ឆតា៖ បង្កើនទំហំពាណិជ្ជកម្មទ្វេភាគីដល់ ២០ ពាន់លានដុល្លារអាមេរិកក្នុងពេលឆាប់ៗនេះ។ ដើម្បីសម្រេចបានចក្ខុវិស័យនេះ ឧកញ៉ា គិត ម៉េង ប្រធានសភាពាណិជ្ជកម្មកម្ពុជា ជឿជាក់ថា គោលដៅ ២០ ពាន់លានដុល្លារអាមេរិក គឺអាចសម្រេចបានទាំងស្រុង។ លោកបានលើកទឹកចិត្តដល់សហគ្រាសវៀតណាមឱ្យផ្តោតការវិនិយោគលើវិស័យសំខាន់ៗចំនួន៤ រួមមាន៖ ការផ្លាស់ប្តូរឌីជីថល ថាមពលកកើតឡើងវិញ កសិកម្មបច្ចេកវិទ្យាខ្ពស់តាមរយៈការកែច្នៃស៊ីជម្រៅនៅថ្នាក់មូលដ្ឋាន ជំនួសឱ្យការនាំចេញវត្ថុធាតុដើម និងវិស័យសេវាកម្ម (ហិរញ្ញវត្ថុ ទូរគមនាគមន៍ ទេសចរណ៍)។ ជាពិសេស ឧកញ៉ា គិត ម៉េង បានធ្វើការប្តេជ្ញាចិត្តយ៉ាងមុតមាំថា៖ «ច្រកទ្វាររបស់កម្ពុជាមិនត្រឹមតែកំពុងបើកចំហរប៉ុណ្ណោះទេ ប៉ុន្តែយើងក៏ប្តេជ្ញាធានាភាពជោគជ័យ និងផលចំណេញរបស់សហគ្រាសវៀតណាមទៀតផង។ នៅពេលវិនិយោគនៅកម្ពុជា សហគ្រាសមិនត្រឹមតែចូលទៅកាន់ទីផ្សារដែលមានមនុស្ស ១៧ លាននាក់ប៉ុណ្ណោះទេ ប៉ុន្តែថែមទាំងឈរនៅ ‘ច្រកទ្វារ’ ទៅកាន់សេដ្ឋកិច្ចពិភពលោកតាមរយៈបណ្តាញដ៏ទូលំទូលាយនៃកិច្ចព្រមព្រៀងពាណិជ្ជកម្មសេរី (FTA) ដែលយើងបានចុះហត្ថលេខាទៀតផង»។
ភាពស៊ីសង្វាក់គ្នារវាងយន្តការគាំទ្ររបស់រដ្ឋាភិបាល និងស្មារតីម្ចាស់ការ របស់សហគមន៍ធុរកិច្ចគឺជាកម្លាំងចលករក្នុងការលើកកម្ពស់ទំនាក់ទំនងសេដ្ឋកិច្ចរវាងប្រទេសទាំងពីរដល់កម្រិតថ្មីមួយ។ ដោយមានការរួមដំណើររបស់រដ្ឋាភិបាល និងការគាំទ្រពីប្រជាជននៃប្រទេសទាំងពីរ សញ្ញាសម្គាល់នៃសហគ្រាសវៀតណាមនៅកម្ពុជានឹងបន្តត្រូវបានបញ្ជាក់ ដោយពង្រឹងបន្ថែមទៀតនូវទំនាក់ទំនងភាពជាអ្នកជិតខាងល្អ មិត្តភាពប្រពៃណី កិច្ចសហប្រតិបត្តិការលើគ្រប់ជ្រុងជ្រោយ និងនិរន្តរភាពយូរអង្វែងរវាងប្រទេសទាំងពីរ៕
