ໃນກອງປະຊຸມ, ບັນດາຜູ້ແທນໄດ້ແນະນຳເນື້ອໃນແກ່ນສານຂອງແນວຄິດປະທານ ໂຮ່ຈີມິນ ໂດຍໄດ້ສະແດງອອກຢ່າງມີຊີວິດຊີວາໃນນິພົນ “ໂຮ່ຈີມິນ ຄົບຊຸດ” 15 ເຫຼັ້ມ ພ້ອມກັບປຶ້ມ “ວັດຈະນານຸກົມ ໂຮ່ຈີມິນ ວິທະຍາ” 1 ເຫຼັ້ມ.
ນີ້ແມ່ນບາດກ້າວເດີນໃໝ່ໃນການຮ່ວມມືຄົ້ນຄວ້າທິດສະດີ ແລະ ການສຶກສາການເມືອງລະຫວ່າງສອງພັກ, ສອງລັດ ຫວຽດນາມ ແລະ ລາວ, ແມ່ນໂອກາດເພື່ອໃຫ້ບັນດາພະນັກງານ, ສະມາຊິກພັກ, ຜູ້ບໍລິຫານໜຸ່ມຢູ່ຫຼາຍແຂວງ, ນະຄອນຂອງລາວ ທີ່ພວມຮ່ຳຮຽນ, ຄົ້ນຄວ້າຢູ່ສະຖາບັນ ມີຄວາມເຂົ້າໃຈຢ່າງເລິກເຊິ່ງ ແລະ ຮອບດ້ານກວ່າກ່ຽວກັບຊີວິດ, ພາລະກິດການເຄື່ອນໄຫວປະຕິວັດອັນສະຫງ່າລາສີຂອງປະທານ ໂຮ່ຈີມິນ - ຜູ້ກໍ່ຕັ້ງພື້ນຖານໃຫ້ແກ່ສາຍພົວພັນມິດຕະພາບອັນຍິ່ງໃຫຍ່ ຫວຽດນາມ - ລາວ.
ທ່ານນາງ ປະທຸມພອນ ເພັດວັນຄຳ ຫົວໜ້າພະແນກຄຸ້ມຄອງການຮຽນ-ການສອນ, ພະແນກສຶກສາທິການ ແລະ ກິລາແຂວງ ອຸດົມໄຊ ແບ່ງປັນວ່າ:
"ຜ່ານກອງປະຊຸມຄັ້ງນີ້ ເຮັດໃຫ້ຂ້າພະເຈົ້າຮູ້ໄດ້ຫຼາຍຂຶ້ນກ່ຽວກັບຊີວິດ, ແບບແຜນການດຳລົງຊີວິດ, ແນວຄິດຂອງປະທານ ໂຮ່ຈີມິນ, ເຊິ່ງພວກເຮົາຈະນຳເອົາບັນດາສິ່ງເຫຼົ່ານັ້ນໄປເປັນແບບຢ່າງໃນການດຳລົງຊີວິດ ແລະ ເຮັດວຽກຂອງພວກເຮົາ, ໝູນໃຊ້ທິດສະດີຂອງປະທານ ໂຮ່ຈີມິນ ເຂົ້າໃນການປະຕິບັດໜ້າທີ່ວຽກງານຂອງຕົນ ເຮັດໃຫ້ວຽກງານຂອງເຮົາມີປະສິດທິພາບ, ປະສິດທິຜົນສູງສຸດ".
ດ້ວຍບົດບາດແມ່ນສູນກໍ່ສ້າງ, ບຳລຸງພະນັກງານ ແລະ ຄົ້ນຄວ້າວິທະຍາສາດທິດສະດີຂອງປະເທດຊາດ, ສະຖາບັນການເມືອງ ແລະ ການປົກຄອງແຫ່ງຊາດລາວ ຍາມໃດກໍໃຫ້ຄວາມເອົາໃຈໃສ່ເປັນພິເສດເຖິງການຄົ້ນຄວ້າ, ໝູນໃຊ້ແນວຄິດ ແລະ ບັນດານິພົນຂອງປະທານ ໂຮ່ຈີມິນ ເຂົ້າໃນວຽກງານການສິດສອນ.
ທ່ານ ຮສ.ປອ ດາວສະຫວັນ ເຄືອມີໄຊ ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດລາວ ໃຫ້ຮູ້ວ່າ: ຖັນແຖວຄູອາຈານຂອງສະຖານບັນ ໄດ້ສະຫຼັບບັນດາເນື້ອໃນແກ່ນສານຂອງປະມວນປຶ້ມດັ່ງກ່າວຄວບຄູ່ເຂົ້າໃນບົດສອນ ເພື່ອຖ່າຍທອດເຖິງບັນດາສຳມະນາກອນຢ່າງມີປະສິດທິຜົນ. ທາງສະຖາບັນດກໍໄດ້ຜັນຂະຫຍາຍຫຼາຍຫົວຂໍ້ຄົ້ນຄວ້າວິທະຍາສາດຕົວຈິງປິ່ນອ້ອມຄຸນຄ່າທິດສະດີຈາກບັນດານິພົນນີ້ ພ້ອມທັງຜັນຂະຫຍາຍເຜີຍແຜ່ເນື້ອໃນຂອງປະມວນປຶ້ມດັ່ງກ່າວໃນຂອບເຂດທົ່ວປະເທດ. ທ່ານຖືວ່າ:
"ຂ້າພະເຈົ້າເຊື່ອໝັ້ນວ່າ, ບົນເນື້ອໃນຈິດໃຈທີ່ພວກເຮົາເສີມຂະຫຍາຍແນວນີ້ ກໍຄືແນວຄິດປະທານ ໂຮ່ຈີມິນ ຈະຊຶມເລິກເຂົ້າໃນຖັນແຖວພະນັກງານ, ສະມາຊິກພັກ ກໍຄືປະຊາຊົນລາວບັນດາເຜົ່າ, ເຊິ່ງເປັນການປະກອບສ່ວນອັນສຳຄັນເຂົ້າໃນການເສີມສ້າງການຮ່ວມມືຮອບດ້ານ, ຫຸ້ນສ່ວນຍຸດທະສາດລະຫວ່າງສອງຊາດ ລາວ - ຫວຽດນາມ ຈະເຂົ້າສູ່ລວງເລິກໃນຕໍ່ໜ້າ. ໃນຕໍ່ໜ້າ, ໃນຖານະເປັນອາຈານຜູ້ໜຶ່ງ, ຂ້າພະເຈົ້າຈະສືບຕໍ່ຄົ້ນຄວ້າລົງເລິກແນວຄິດຂອງປະທານ ໂຮ່ຈີມິນ ຕື່ມອີກ ເພື່ອຈະໄດ້ໝູນໃຊ້ແນວຄິດປະທານ ໂຮ່ຈີມິນ ເຂົ້າໃນຊີວິດຕົວຈິງ ແລະ ການສິດສອນຂອງຂ້າພະເຈົ້າ".
ໂຄງການຄົ້ນຄວ້າ ແລະ ຮຽບຮຽງແປພາສານິພົນ “ໂຮ່ຈີມິນ ຄົບຊຸດ” ຈາກພາສາຫວຽດ ເປັນພາສາລາວ ລວມມີ 15 ເຫຼັ້ມ ໄດ້ຮັບການຜັນຂະຫຍາຍນັບແຕ່ປີ 2016 ແລະ ໄດ້ຮັບຄວາມເອົາໃຈໃສ່ ແລະ ການຊີ້ນຳຈາກການນຳສອງພັກ, ສອງລັດ. ປີ 2019, ນິພົນ “ໂຮ່ຈີມິນ ຄົບຊຸດ” 15 ເຫຼັ້ມ ພ້ອມດ້ວຍ “ວັດຈະນານຸກົມ ໂຮ່ຈີມິນ ວິທະຍາ” ກໍໄດ້ແປສຳເລັດ ແລະ ພິມຈຳໜ່າຍສະບັບພາສາລາວ. ໄລ່ຮອດປັດຈຸບັນ, ປະມວນປຶ້ມດັ່ງກ່າວໄດ້ແຈກຢາຍໃຫ້ໂຮງຮຽນການເມືອງ - ການປົກຄອງທຸກແຫ່ງ ແລະ ລະບົບໂຮງຮຽນພັກຂອງລາວ./.
ເຊີນທ່ານຮັບຊົມຄຼິບວິດີໂອສັ້ນ ກ່ຽວກັບພາບບັນຍາກາດຂອງກອງປະຊຸມສຳມະນາວິທະຍາສາດລະດັບຊາດ ສົມທົບກັບກອງປະຊຸມເຜີຍແຜ່, ເຊື່ອມຊຶມ ແລະ ການໝູນໃຊ້ນິພົນ “ໂຮ່ຈີມິນ ຄົບຊຸດ”:
