ກ່ຽວກັບການຮ່ວມມືດ້ານການເມືອງ - ການພົວພັນຕ່າງປະເທດ, ຕອນເຊົ້າວັນທີ 8 ພຶດສະພາ ຢູ່ Cebu, ຟີລິບປິນ, ໃນຂອບເຂດກອງປະຊຸມສຸດຍອດ ອາຊຽນ ຄັ້ງທີ 48, ທ່ານ ເລມິງຮຶງ ນາຍົກລັດຖະມົນຕີ ຫວຽດນາມ ໄດ້ພົບປະ ແລະ ເຮັດວຽກກັບ ທ່ານ ສອນໄຊ ສີພັນດອນ ນາຍົກລັດຖະມົນຕີ ລາວ ແລະ ທ່ານ Hun Manet ນາຍົກລັດຖະມົນຕີ ກຳປູເຈຍ. ໃນການພົບປະ, ການນຳສາມປະເທດໄດ້ຢັ້ງຢືນຄວາມຕັດສິນໃຈສືບຕໍ່ຮັກສາການແລກປ່ຽນຄະນະຜູ້ແທນຂັ້ນສູງ, ເພີ່ມທະວີການປະສານສົມທົບໃນການຄຸ້ມຄອງ ແລະ ປົກປັກຮັກສາເຂດຊາຍແດນ, ການປ້ອງກັນ, ຕ້ານອາດຊະຍາກຳຂ້າມຊາດ, ຊຸກຍູ້ການຄ້າ, ການລົງທຶນ ແລະ ການເຊື່ອມຕໍ່ພື້ນຖານໂຄງລ່າງໃນພາກພື້ນ. ບັນດາຝ່າຍກໍແລກປ່ຽນກ່ຽວກັບຫຼາຍມາດຕະການ ແນໃສ່ສ້າງບາດກ້າວບຸກທະລຸໃນການຮ່ວມສຳພັນເສດຖະກິດ, logistics, ຄົມມະນາຄົມ ແລະ ພະລັງງານລະຫວ່າງສາມປະເທດ ອິນດູຈີນ.
ວັນທີ 12 ພຶດສະພາ, ຢູ່ສຳນັກງານຄະນະພັກນະຄອນ ຮ່າໂນ້ຍ, ທ່ານ ເຈິ່ນດຶກຖັງ, ເລຂາຄະນະພັກນະຄອນ, ຫົວໜ້າຄະນະສະມາຊິກສະພາແຫ່ງຊາດນະຄອນ ຮ່າໂນ້ຍ ແລະ ທ່ານ ອາດສະພັງທອງ ສີພັນດອນ ເລຂາຄະນະພັກ, ປະທານສະພາປະຊາຊົນ ນະຄອນຫຼວງ ວຽງຈັນ ໄດ້ເປັນປະທານຮ່ວມການພົບປະສອງຝ່າຍລະຫວ່າງຄະນະຜູ້ແທນຂັ້ນສູງນະຄອນຫຼວງ ຮ່າໂນ້ຍ ແລະ ຄະນະຜູ້ແທນຂັ້ນສູງນະຄອນຫຼວງ ວຽງຈັນ, ລາວ. ໃນຂອບເຂດການພົບປະສອງຝ່າຍ, ບັນດາຜູ້ແທນໄດ້ແລກປ່ຽນກ່ຽວກັບຫຼາຍກຳນົດທິດການຮ່ວມມືໃຫຍ່ລະຫວ່າງສອງນະຄອນຫຼວງໃນໄລຍະ 2026 – 2030. ພິເສດ, ສອງຝ່າຍໄດ້ດຳເນີນການລົງນາມໃນບົດບັນທຶກຄວາມເຂົ້າໃຈວ່າດ້ວຍການຮ່ວມມື 7 ສະບັບ, ໃນບັນດາຂົງເຂດຄື: ໂຄສະນາສຶກສາ - ຂົນຂວາຍປະຊາຊົນ, ວຽກງານແມ່ຍິງ, ວຽກງານຊາວໜຸ່ມ, ຂົງເຂດການຕ່າງປະເທດ, ອຸດສາຫະກຳ ແລະ ການຄ້າ, ການສຶກສາ ແລະ ສາທາລະນະສຸກ. ນອກຈາກນັ້ນແລ້ວ, ທ່ານ ອາດສະພັງທອງ ສີພັນດອນ ເລຂາຄະນະພັກ, ປະທານສະພາປະຊາຊົນນະຄອນຫຼວງ ວຽງຈັນ ຍັງເຂົ້າພົບປະການນຳຂັ້ນສູງພັກ, ລັດ ຫວຽດນາມ ອີກດ້ວຍ.
ໃນຂົງເຂດການປ້ອງກັນຊາດ - ປ້ອງກັນຄວາມສະຫງົບ, ແຕ່ວັນທີ 12 – 15 ພຶດສະພາ, ຢູ່ຮ່າໂນ້ຍ, ຄະນະຜູ້ແທນກະຊວງຕຳຫຼວດ ຫວຽດນາມ ແລະ ກະຊວງປ້ອງກັນຄວາມສະຫງົບລາວ ໄດ້ດຳເນີນຫຼາຍວາລະເຮັດວຽກ ແນໃສ່ເພີ່ມທະວີການຮ່ວມມືຄົ້ນຄວ້າຍຸດທະສາດ, ຄົ້ນຄວ້າປະຫວັດສາດ ແລະ ບຳລຸງສ້າງພະນັກງານ. ສອງຝ່າຍໄດ້ເຫັນດີເປັນເອກະພາບຜັນຂະຫຍາຍກິດຈະກຳຄົ້ນຄວ້າລວມ ກ່ຽວກັບບັນດາສິ່ງທ້າທາຍດ້ານຄວາມໝັ້ນຄົງແບບເກົ່າ ແລະ ແບບໃໝ່ ທີ່ສົ່ງຜົນກະທົບຕໍ່ຄວາມໝັ້ນຄົງແຫ່ງຊາດຂອງສອງປະເທດ, ຜ່ານນັ້ນ ກໍສືບຕໍ່ປັບປຸງການພົວພັນຫຸ້ນສ່ວນຍຸດທະສາດລະຫວ່າງກຳລັງຕຳຫຼວດ ຫວຽດນາມ ແລະ ລາວ.
ໃນຂົງເຂດການເງິນ, ຕອນບ່າຍວັນທີ 13 ພຶດສະພາ ຢູ່ ວຽງຈັນ, ທ່ານ ສັນຕິພາບ ພົມວິຫານ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນລາວ ໄດ້ໃຫ້ການຕ້ອນຮັບທ່ານ ເຈິ່ນກວັກເຟືອງ ຮອງລັດຖະມົນຕີກະຊວງການເງິນ ຫວຽດນາມ, ຮອງປະທານຄະນະກຳມະການຮ່ວມມື ຫວຽດນາມ - ລາວ. ນະທີ່ນີ້, ການນຳສອງທ່ານໄດ້ແລກປ່ຽນກ່ຽວກັບບັນດາເນື້ອໃນ ແນໃສ່ເພີ່ມທະວີການຮ່ວມມືດ້ານການເງິນ, ການລົງທຶນ ແລະ ຜັນຂະຫຍາຍບັນດາໂຄງການຮ່ວມມືສອງຝ່າຍໃນໄລຍະຈະມາເຖິງໃຫ້ມີປະສິດທິຜົນ.
ການຮ່ວມມືໃນຂົງເຂດວັດທະນະທຳ - ສັງຄົມ ສືບຕໍ່ແມ່ນຈຸດເດັ່ນໃນສາຍພົວພັນສອງຝ່າຍ. ໂດຍໄດ້ຮັບຄຳເຊື້ອເຊີນຈາກ ທ່ານ ນາງ ສວນສະຫວັນ ວິຍາເກດ, ລັດຖະມົນຕີກະຊວງວັດທະນະທຳ ແລະ ການທ່ອງທ່ຽວລາວ, ວັນທີ 12 ພຶດສະພາ, ທ່ານນາງ ເລິມທິເຟືອງແທັງ ລັດຖະມົນຕີກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ລາວ. ສອງຝ່າຍໄດ້ລົງນາມໃນໂຄງການຮ່ວມມືທາງດ້ານວັດທະນະທຳ ແລະ ທ່ອງທ່ຽວ ຫວຽດນາມ - ລາວ ໄລຍະ 2026 – 2030, ຕົກລົງເປັນເອກະພາບສືບຕໍ່ຍູ້ແຮງການພົວພັນແລກປ່ຽນປະຊາຊົນ, ໂຄສະນາກ່ຽວກັບການທ່ອງທ່ຽວ ແລະ ອະນຸລັກຮັກສາບັນດາຄຸນຄ່າວັດທະນະທຳທີ່ເປັນມູນເຊື້ອລະຫວ່າງສອງຊາດ; ກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ແລະ ຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ກໍໄດ້ລົງນາມໃນບົດບັນທຶກຄວາມເຂົ້າໃຈວ່າດ້ວຍການຮ່ວມມືໃນຂົງເຂດຂໍ້ມູນການສື່ສານໄລຍະ 2026 – 2030, ແນໃສ່ຊຸກຍູ້ເພີ່ມທະວີການຮ່ວມມືລະຫວ່າງສອງຝ່າຍໃນຂົງເຂດການສື່ສານເວົ້າລວມ ແລະ ສື່ມວນຊົນເວົ້າສະເພາະ. ໃນຂອບເຂດຂອງການຢ້ຽມຢາມ, “ສັບປະດາວັດທະນະທຳ ຫວຽດນາມ ຢູ່ລາວ ປີ 2026” ຖືກໄຂຂຶ້ນຢ່າງສົມກຽດຢູ່ນະຄອນຫຼວງວຽງຈັນ ໃນຕອນຄ່ຳວັນທີ 12 ພຶດສະພາ ປະກອບສ່ວນເພີ່ມທະວີຄວາມເຂົ້າໃຈເຊິ່ງກັນແລະ ກັນ ແລະ ການຜູກພັນລະຫວ່າງປະຊາຊົນສອງປະເທດ.
ບັນດາການເຄື່ອນໄຫວສະເຫຼີມສະຫຼອງວັນເກີດຂອງ ປະທານ ໂຮ່ຈີມິນ ຄົບຮອບ 136 ປີ ກໍໄດ້ດໍາເນີນຢູ່ລາວຢ່າງສົມກຽດ ແລະ ມີຄວາມໝາຍ. ຕອນເຊົ້າວັນທີ 19 ພຶດສະພາ ຢູ່ນະຄອນຫຼວງ ວຽງຈັນ, ສະຖານທູດ ຫວຽດນາມ ປະຈຳ ລາວ ໄດ້ຈັດພິທີວາງພວງມາລາ, ງານວາງສະແດງປຶ້ມອ່ານ, ງານວາງສະແດງດີຈີຕອນ ແລະ ຫຼາຍກິດຈະກຳແລກປ່ຽນວັດທະນະທຳ ດ້ວຍການເຂົ້າຮ່ວມຂອງຜູ້ແທນ ຫວຽດນາມ ແລະ ລາວ ກວ່າ 300 ທ່ານ. ລາຍການ ບໍ່ພຽງແຕ່ປະກອບສ່ວນເຜີຍແຜ່ແນວຄິດ, ຄຸນສົມບັດ, ແບບແຜນການດຳລົງຊີວິດຂອງ ປະທານ ໂຮ່ຈີມິນ ເທົ່ານັ້ນ ຫາກຍັງສືບຕໍ່ເພີ່ມພູນຄູນສ້າງຄວາມສາມັກຄີແບບພິເສດ ຫວຽດນາມ - ລາວ ອີກດ້ວຍ.
- - ພິເສດ, ວັນທີ 23 ພຶດສະພາ ຢູ່ແຂວງ ກວາງຈິ ໄດ້ດຳເນີນພິທີໄຫວ້ອາໄລ ແລະ ປົງອັດຖິ 28 ອັດຖິຂອງທະຫານອາສາສະໝັກ ແລະ ນັກຊ່ຽວຊານ ຫວຽດນາມ ທີ່ເສຍສະຫຼະຊີວິດຢູ່ ລາວ. ພິທີດັ່ງກ່າວມີການເຂົ້າຮ່ວມຂອງ ທ່ານ ເລມິງຮຶງ ນາຍົກລັດຖະມົນຕີ ຫວຽດນາມ ພ້ອມດ້ວຍການນຳແຂວງ ກວາງຈິ ແລະ ຜູ້ຕາງໜ້າການນຳແຂວງ ສະຫວັນນະເຂດ ພ້ອມດ້ວຍແຂວງ ຄຳມ່ວນ. ນີ້ແມ່ນການເຄື່ອນໄຫວທີ່ສະແດງໃຫ້ເຫັນມູນເຊື້ອ “ກິນເຂົ້າຄິດຮອດຄຸນນາ, ກິນປາຄິດຮອດຄຸນນ້ຳ”, ພ້ອມທັງຢັ້ງຢືນຄວາມສາມັກຄີຮ່ວມສໍາພັນສູ້ຮົບລະຫວ່າງປະຊາຊົນສອງປະເທດ ຫວຽດນາມ - ລາວ ໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄືໃນພາລະກິດສ້າງສາ ແລະ ພັດທະນາໃນວັນນີ້.
ອາດຢັ້ງຢືນໄດ້ວ່າ ໃນເດືອນພຶດສະພາ 2026, ການພົວພັນ ຫວຽດນາມ - ລາວ ສືບຕໍ່ໄດ້ຮັບການພັດທະນາຢ່າງແຮງ, ຮອບດ້ານ ແລະ ແທ້ຈິງໃນທຸກຂົງເຂດ./.
