លោក Thomas Gass ឯកអគ្គរដ្ឋទូតស្វីសប្រចាំនៅវៀតណាម និងលោកស្រី Mariam J. Sherman នាយកធនាគារពិភពលោកប្រចាំប្រទេសវៀតណាម កម្ពុជា និងឡាវ ក្នុងពិធីចុះហត្ថលេខាលើកិច្ចព្រមព្រៀងជំរុញកំណើនបៃតង និងសម្របខ្លួនទៅនឹងការប្រែប្រួលអាកាសធាតុនៅទីក្រុងធំៗនៃប្រទេសវៀតណាម (រូបថត៖ Vietnam+)

នាថ្ងៃទី ៤ ខែវិច្ឆិកានេះ នៅទីក្រុងហាណូយ ឯកអគ្គរដ្ឋទូតស្វីសប្រចាំនៅវៀតណាម លោក Thomas Gass និងនាយកធនាគារពិភពលោក (WB) ប្រចាំប្រទេសវៀតណាម កម្ពុជានិងឡាវ លោកស្រី Mariam J. Sherman បានចុះហត្ថលេខាលើកិច្ចព្រមព្រៀងជំរុញកំណើនបៃតង និងសម្របខ្លួនទៅនឹងការប្រែប្រួលអាកាសធាតុនៅទីក្រុងធំៗ ក្នុងប្រទេស វៀតណាម។ មូលនិធិទុកចិត្តនេះមានតម្លៃ ៥ លានដុល្លារអាមេរិក ឧបត្ថម្ភដោយ ការិយាល័យកិច្ចការសេដ្ឋកិច្ចសហព័ន្ធស្វីស (SECO)។

លោកស្រី Mariam J. Sherman បានឲ្យដឹងថា ជំនួយនេះអនុញ្ញាតឱ្យធនាគារពិភពលោកបន្តកិច្ចសហប្រតិបត្តិការជាមួយអាជ្ញាធរនៃតំបន់ទីក្រុងធំៗក្នុងប្រទេសវៀតណាម ដូចជាទីក្រុងហូជីមិញ ទីក្រុង Da Nang និងទីក្រុង Can Tho ដើម្បីប្រមូលផ្តុំនូវដំណោះស្រាយប្រកបដោយនិរន្តរភាពក្នុងការរៀបចំផែនការទីក្រុង និងគោលនយោបាយសេដ្ឋកិច្ច ដែលមានគោលបំណងបង្កើតគំរូការអភិវឌ្ឍកាបូនទាប និងសម្របខ្លួនទៅនឹងការប្រែប្រួលអាកាសធាតុ។

ក្នុងក្របខ័ណ្ឌនៃកម្មវិធីអភិវឌ្ឍន៍ទីក្រុងនៅវៀតណាម ធនាគារពិភព លោកនឹងកសាងមូលដ្ឋានចំណេះដឹងដែលសំយោគការអនុវត្តល្អបំផុតផ្នែកបច្ចេកទេស និងប្រតិបត្តិការ ដោយគូរលើជំនាញអន្តរជាតិពាក់ព័ន្ធនឹងលក្ខខណ្ឌជាក់ស្តែងក្នុងប្រទេស ដើម្បីស្នើដំណោះស្រាយជាយុទ្ធសាស្ត្រសម្រាប់ដោះស្រាយបញ្ហាប្រឈមក្នុងទីក្រុង។ កម្មវិធីនេះក៏នឹងពង្រឹងសមត្ថភាពបង្កើតគោលនយោបាយ និងឧបត្ថម្ភទីក្រុង និងភ្នាក់ងារមជ្ឈឹមក្នុងការប្រមូលផ្តុំ និងធ្វើពិពិធកម្មប្រភពទុនវិនិយោគ ទន្ទឹមនឹងការលើកកម្ពស់កិច្ចសហប្រតិបត្តិការ និងការចែករំលែកចំណេះដឹង៕