WHO៖ ជារៀងរាល់ខែ ពិភពលោកនៅតែកត់ត្រាអ្នកស្លាប់ ១០.០០០នាក់ ដោយសារ COVID-១៩
(VOVWORLD) - ហានិភ័យសុខភាពសាធារណៈពីជំងឺកូវីដ-១៩ នៅតែមានកម្រិតខ្ពស់នៅទូទាំងពិភពលោក ដោយសារតែវីរុសបង្កជំងឺនិងវ៉ារ្យ៉ង់របស់វា នៅតែបន្តរីករាលដាលនៅក្នុងប្រទេសទាំងអស់។ នេះបើតាមការព្រមានរបស់លោកស្រី Maria van Kerkhove នាយិកាស្ដីទីរបស់អង្គការសុខភាពពិភពលោក ទទួលបន្ទុកការត្រៀមបង្ការ ទប់ស្កាត់ជំងឺរាតត្បាត។
ថ្លែងកាលពីថ្ងៃទី១២ ខែមករា ក្នុងសន្និសីទសារព័ត៌មានពិសេសនៅទីក្រុងហ្សឺណែវ (ស្វីស) អ្នកជំនាញជាន់ខ្ពស់របស់អង្គការសុខភាពពិភពលោក WHO បានឲ្យដឹងថា តាមការប៉ាន់ប្រមាណដោយផ្អែកលើការវិភាគទឹកសំណល់ ចំនួនករណីឆ្លងជំងឺ COVID-១៩ នាបច្ចុប្បន្នគឺខ្ពស់ជាងពី ២ ទៅ ១៩ដង បើធៀបនឹងចំនួនករណីដែលបានរាយការណ៍។
 ការបញ្ជូនអ្នកជំងឺ COVID-១៩ ទៅមន្ទីរពេទ្យក្នុងទីក្រុងញូវយ៉ក សហរដ្ឋអាមេរិក។ រូបថត៖ THX/TTXVN |
លោកស្រីក៏បានសម្តែងការព្រួយបារម្ភអំពីស្ថានភាពក្រោយជំងឺកូវីដ ដែលប៉ះពាល់ដល់ផ្នែកជាច្រើនក្នុងរាងកាយមនុស្ស។ ទោះបីជាចំនួនអ្នកស្លាប់ដោយ COVID-១៩ មានការថយចុះគួរឱ្យកត់សម្គាល់បើប្រៀបធៀបទៅនឹងរយៈពេលកំពូលក៏ដោយ ក៏នៅតែមានអ្នកស្លាប់ប្រហែល ១០ ០០០ នាក់ជារៀងរាល់ខែដោយសារជំងឺនេះនៅក្នុងប្រទេសចំនួន ៥០ ជុំវិញពិភពលោក។ លោកស្រីបានសម្តែងការព្រួយបារម្ភអំពីការវិវត្តន៍នៃមេរោគនេះ ដោយវ៉ារ្យ៉ង់ JN.1 នៃ COVID-១៩ ស្រូបយកប្រហែល ៥៧% នៃបរិមាណសំណាកដែលត្រូវបានវិភាគដោយ WHO ។
គិតត្រឹមចុងខែធ្នូ ឆ្នាំ ២០២៣ ទិន្នន័យរបស់អង្គការសុខភាពពិភពលោកបានកត់ត្រាថាមនុស្សជាង ៧ លាននាក់បានស្លាប់ដោយសារ COVID-១៩៕