ថ្នាក់រៀនភាសា Thai នៅស្រុក Than Uyen។ (រូបថត៖ VOV)

នៅក្នុងបរិយាកាសដ៏កក់ក្ដៅនៃថ្នាក់រៀននៅក្នុងមជ្ឈមណ្ឌលបណ្ដុះបណ្ដាលវិជ្ជាជីវៈស្រុក Than Uyen ជាទៀងទាត់ ២ វគ្គក្នុងមួយថ្ងៃ ថ្នាក់រៀនភាសា Thai ដោយមានសិស្ស ៣០ នាក់ក្នុងវ័យអាយុខុសៗគ្នា ប្រព្រឹត្តទៅក្នុងបរិយាកាសដ៏ផុសផុល។ អ្នកស្រី Dieu Thi Ngan សិស្សម្នាក់ក្នុងថ្នាក់រៀនបានឲ្យដឹងថា៖

"តាំងពីមុនមក បងប្អូននិងឪពុកម្ដាយខ្ញុំចេះតែនិយាយភាសាជនជាតិ Thaiប៉ុណ្ណោះ ប៉ុន្តែមិនចេះសរសេរអក្សរទេ។ តាមរយៈថ្នាក់រៀននេះ ខ្ញុំចង់ក្រេបយកចំណេះដឹងជាច្រើន និងចេះសរសេរអក្សរដើម្បីអាចបង្រៀនទៅកូនៗរបស់ខ្ញុំនៅពេលក្រោយ”។

ដោយមានមោទនភាព និងការគោរពចំពោះអត្តសញ្ញាណវប្បធម៌ជនជាតិខ្លួន សិប្បកឆ្នើម Lo Van Soi នៅឃុំ Muong Cang ស្រុក Than Uyen គ្រូបង្រៀននៃថ្នាក់រៀន មិនថាភ្លៀងឬពន្លឺថ្ងៃទេ តែងតែមកថ្នាក់រៀនជារៀងរាល់ថ្ងៃ ដើម្បីបង្រៀនដោយអស់ពីចិត្តនូវភាសានិយាយនិងអក្សររបស់ជនជាតិខ្លួនដល់សិស្សានុសិស្ស។

“ប្រសិនបើយើងចង់ចេះនិយាយបាន យើងត្រូវតែចេះអក្សរជាមុនសិនទើបយល់ច្បាស់ពីអត្ថន័យរបស់ភាសា Thai។ ខ្ញុំព្រួយបារម្ភថា អក្សររបស់ជនជាតិខ្លួន ត្រូវបាត់បង់ទៅ ដូច្នេះខ្ញុំចង់បង្រៀនដល់ក្មេងៗជំនាន់ក្រោយ។ ខ្ញុំបានសរសេរសៀវភៅឡើងវិញ ដោយមានស្នាដៃជាង ៣០ ក្បាល ដើម្បីអភិរក្ស និងបន្សល់ទុកឲ្យកូនចៅជំនាន់ក្រោយ”។

ថ្នាក់រៀនការរចនាសំលៀកបំពាក់ជនជាតិ Kho Mu។ (រូបថត៖ VOV)

ថ្នាក់រៀនការរចនាសំលៀកបំពាក់ជនជាតិ Kho Mu ក៏ត្រូវបានបើកនៅផ្ទះវប្បធម៌ភូមិ Me ឃុំ Ta Gia ស្រុក Than Uyen ផងដែរ។ សិស្សានុសិស្សជាង ៣០ នាក់ ចាប់ពីកុមារីរហូតដល់ស្ត្រីវ័យកណ្តាល ទាំងអស់បានផ្ទៀងស្តាប់ដោយយកចិត្តទុកដាក់ និងធ្វើតាមជំហាននីមួយៗរបស់អ្នកគ្រូ។ អ្នកស្រី Phong Thi Dung សិស្សក្នុងថ្នាក់បានសម្តែងថា៖

“បន្ទាប់ពីបានចូលរួមថ្នាក់រៀននេះ សិស្សនឹងចេះដេរសម្លៀកបំពាក់ជនជាតិ Kho Mu។ អាស្រ័យហេតុនេះ រក្សាបាននូវអត្តសញ្ញាណរបស់ជនជាតិខ្លួន។នាងខ្ញុំសង្ឃឹមថា កូនចៅជំនាន់ក្រោយក៏នឹងអាចរក្សាបាននូវអត្តសញ្ញាណវប្បធម៌ជនជាតិដែរ”។

លោក Quang Van Truong អនុប្រធានគណៈកម្មាធិការប្រជាជនឃុំ Ta Hua ស្រុក Than Uyen បានឲ្យដឹងថា៖

«បច្ចុប្បន្ន សំលៀកបំពាក់សម័យដើមរបស់ជនជាតិ Kho Mu លែងមានទៀតទេ ហើយក្មេងជំនាន់ក្រោយ មិនចេះរបៀបដេរសម្លៀកបំពាក់ជនជាតិខ្លួនដែរ។ តាមរយៈការស៊ើបអង្កេតស្ថានភាពជាក់ស្តែងនៅក្នុងភូមិ អាជ្ញាធរឃុំបានស្នើទៅគណៈកម្មាធិការប្រជាជនស្រុក Than Uyen បើកថ្នាក់បង្រៀនការរចនាសំលៀកបំពាក់ជនជាតិ Kho Mu។ យើងខ្ញុំសង្ឃឹមថា លោកគ្រូអ្នកគ្រូនឹងបង្រៀនសិស្សនូវចំណេះដឹង របៀបរចនាគំរូ ហើយសិស្សនឹងចេះពីរបៀបកាត់ដេរសំលៀកបំពាក់ពេញលេញមួយសម្រាប់របស់ជនជាតិ Kho Mu”។

ចាប់ពីឆ្នាំ ២០២១ មក ទីភ្នាក់ងារជំនាញនៅស្រុក Than Uyen បានបើកថ្នាក់បណ្តុះបណ្តាល និងបំប៉នវិជ្ជាជីវៈរាប់សិបថ្នាក់ ដើម្បីបង្រៀនវប្បធម៌ប្រពៃណីដោយផ្សារភ្ជាប់នឹងសកម្មភាពទេសចរណ៍ សម្រាប់បងប្អូនជនជាតិភាគតិចក្នុងតំបន់។ ពីថ្នាក់រៀនទាំងនោះ ជនរួមជាតិបានលើកកំពស់ការយល់ដឹងអំពីការថែរក្សាអត្តសញ្ញាណវប្បធម៌ជនជាតិ។ លោកស្រី Luong Thi Ty ប្រធានការិយាល័យវប្បធម៌ និងព័ត៌មានស្រុក Than Uyen បានឲ្យដឹងថា៖

“ដើម្បីរក្សាបាននូវតម្លៃប្រពៃណីដ៏ល្អប្រសើររបស់បណ្ដាជនជាតិ ទីភ្នាក់ងារជំនាញរបស់យើងខ្ញុំសង្ឃឹមថា នឹងបន្តទទួលបានការយកចិត្តទុកដាក់ និងការណែនាំពីអាជ្ញាធរគ្រប់លំដាប់ថ្នាក់ ពីថ្នាក់មជ្ឈិមដល់មូលដ្ឋាន។ ធ្វើយ៉ាងណាដើម្បីឲ្យសិស្សអាចទទួលបានអត្ថប្រយោជន៍ និងគោលនយោបាយពេញលេញនៅពេលចូលរួមក្នុងថ្នាក់បង្រៀន? យើងខ្ញុំក៏សង្ឃឹមដែរថា ប្រជាជនស្រុក Than Uyen អាចលើកកំពស់ស្មារតីសាមគ្គីភាព ដើម្បីរួមគ្នាថែរក្សានិងពង្រីកតម្លៃប្រពៃណីដ៏ល្អប្រសើររបស់ជនជាតិខ្លួន”។

ដោយឈរលើមូលដ្ឋាននៃការស្ទាបស្ទង់ ការទទួលមរតក និងការឯកភាពរបស់ប្រជាជន ស្រុក Than Uyen បានបង្កើតសហករណ៍ត្បាញចរបាប់នៅឃុំ Muong Cang; រក្សាក្រុមសម្តែងសិល្បៈមហាជននៅតាមភូមិ និងទីប្រជុំជន; បង្កើតក្លឹបអភិរក្សវប្បធម៌សិល្បៈប្រជាប្រិយ... ការអភិរក្ស ថែរក្សា និងពង្រីកលក្ខណៈស្រស់ស្អាតនិងតម្លៃវប្បធម៌ប្រជាប្រិយជាប្រពៃណីរបស់បណ្ដាជនជាតិនៅស្រុក Than Uyen បានបំពេញតាមតម្រូវការប្រជុំជីវភាព ផ្លាស់ប្តូរវប្បធម៌ និងជីវភាពខាងវិញ្ញាណរបស់ប្រជាជន៕