របាំនាគនៅវិហារ Da Hoa ឃុំ Binh Minh ( Khoai Chau, Hung Yen)។ រូបថត៖ Mai Ngoan/TTXVN

ពិធីបុណ្យ Chu Dong Tu - Tien Dung គឺជាពិធីបុណ្យដ៏ធំមួយរបស់ប្រទេសជាតិទាំងមូល បង្កើតឡើងវិញនូវផ្ទាំងគំនូរខាងស្មារតីសម្បូរបែប រស់រវើក ហើយមានតម្លៃវប្បធម៌យ៉ាងជ្រាលជ្រៅរបស់ប្រជាជនវៀតណាមក្នុងការត្រួសត្រាយ បង្កើត និងអភិវឌ្ឍន៍ជីវភាពរស់នៅតាមដងទន្លេក្រហម។

ពិធីបុណ្យ គឺជាព្រឹត្តិការណ៍វប្បធម៌ដ៏សំខាន់ក្នុងកម្មវិធីបុណ្យវប្បធម៌ថ្នាក់ខេត្តរបស់ខេត្ត Hung Yen និងជួយជ្រោមជ្រែងឆ្នាំទេសចរណ៍ជាតិនៅតំបន់ដីសណ្តទន្លេក្រហម - Hai Phong ឆ្នាំ ២០២៣។ ពិធីបុណ្យនេះត្រូវបានប្រារព្ធឡើងនៅតាមមណ្ឌលកេរ្កិ៍ដំណែលចំនួន ២គឺ៖ វិហារ Da Hoa (ឃុំ Binh Minh) និងវិហារ Hoa (ឃុំ Da Trach)។

ក្នុងឆ្នាំនេះនៅវិហារ Da Hoa ពិធីបុណ្យត្រូវបានប្រារព្ធឡើងដែលមានទ្រង់ទ្រាយធំ (ប្រារព្ធរៀងរាល់ ៣ ឆ្នាំម្តង) ពោលគឺធំបំផុតតាំងពីមុនមក។ ពិធីបុណ្យទាក់ទាញបានការចូលរួមរបស់ភូមិចំនួន ៩ ចំណុះឃុំ Binh Minh (Khoai Chau) និង Me So (Van Giang)។

សកម្មភាពបើកឆាកក្នុងពិធីបុណ្យគឺជាពិធីដង្ហែអ្នកតាភូមិទៅកាន់វិហារ Da Hoa។ នៅក្បាលក្បួនដង្ហែមានរូបនាគប្រវែងជាង២០ម៉ែត្រ ដែលត្រូវបានយុវជនប្តូរវេនគ្នារាំតាមការចង្វាក់វាយស្គរ។ បន្ទាប់មកគឺក្រុមមនុស្សកាន់ទង់ ស្គរ គង ដាវដងវែង ក្រុមរាំមួក ក្រុមតន្ត្រីពិធី។

ទន្ទឹមនឹងពិធីបុណ្យដែលបានប្រព្រឹត្តិទៅនៅវិហារ Da Hoa នោះ នៅវិហារ Hoa ប្រជាជនក៏បានរៀបចំក្រុមដង្ហែរទឹកពីទន្លេក្រហម ដើម្បីថ្វាយព្រះអាទិទេព្យ ដែលជាពិធីមិនអាចខ្វះបានក្នុងពិធីបុណ្យ។ តាមទំនៀមទម្លាប់ ទឹកដែលប្រើប្រាស់ក្នុងពិធីត្រូវជាទឹកដែលយកពីកណ្ដាលទន្លេក្រហម។ ប្រជាជនក្នុងតំបន់គោរពពិធីយកទឹកណាស់ ដោយបង្ហាញពីទឹកចិត្តគោរពដឹងគុណ ព្រះអាទិទេព្យ ។ ប្រជាជនមានទស្សនទានថា ឆ្នាំណាដែលយកទឹកងាយស្រួលគឺឆ្នាំនោះគឺទទួលបានរដូវអំណោយផល ប្រជាជនក្នុងតំបន់សុខសាន្តត្រាណ រកស៊ីមានបាន។

ក្រោយពីពិធីយកទឹកថ្វាយព្រះអាទិទេព្យ ពិធីបុណ្យត្រូវបានប្រព្រឹត្តិទៅជាផ្លូវការ។តំណាងព្រឹទ្ធាចារ្យក្នុងតំបន់បានអានសេចក្ដីអំពាវនាវ រំលឹកឡើងវិញដល់គុណូបការៈរបស់ព្រះ Chu Dong Tu និងវីរបុរសជាតិដទៃទៀត៖ “បងប្អូនជនរួមជាតិ ញាតិមិត្ត ពូមីង និងភ្ញៀវទាំងអស់មកពីគ្រប់ទិសទី។ ថ្ងៃនេះ ប្រជាជនក្នុងតំបន់បានបើកពិធីបុណ្យប្រពៃណីរបស់ស្រុកកំណើតដើម្បីរំលឹកវិញ្ញាណក្ខ័ន្ធព្រះ Chu Dong Tu និងភរិយា ដែលបានធ្វើជាគំរូដ៏ភ្លឺអំពីកតញូតាធម៌ និងភក្ដីភាព ដែលបានបើកផ្លូវទំនាក់ទំនងពាណិជ្ជកម្ម ពាណិជ្ជកម្មជាមួយបរទេសសម្រាប់ប្រជាជនក្នុងតំបន់ផងដែរ”។

ពិធីបុណ្យ Chu Dong Tu-Tien Dung។ រូបថត៖ TTXVN

ក្រោយផ្នែកពិធីគឺជាផ្នែកសកម្មភាពពិធីបុណ្យដូចជា៖ របាំនាគ ការសម្តែងប្រជាប្រិយ ការលេងល្បែងប្រជាប្រិយ (អុកមនុស្ស ចាប់ទា) សិល្បៈ កីឡា ដោយទាក់ទាញការចូលរួមរបស់ប្រជាជន និងភ្ញៀវមកពីគ្រប់ទិសទី។ លោក Nguyen Nhu Dang ប្រធានគណៈកម្មាធិការប្រជាជនឃុំ Da Trach បានឲ្យដឹងថា៖ “ពិធីបុណ្យឆ្នាំនេះ មានទ្រង់ទ្រាយធំ ខ្លឹមសារសម្បូរបែប ក្បួនដង្ហែរទៅដងទន្លេ យកទឹកថ្វាយព្រះអាទិទេព្យ សកម្មភាពវប្បធម៌ និងសិល្បៈ ដែលពោរពេញទៅដោយលក្ខណៈប្រពៃណី លក្ខណៈជាតិ ហើយត្រូវបានបង្ហាញក្នុងពិធីបុណ្យរយៈពេល ៣ ថ្ងៃ ផងដែរ”។

សកម្មភាពក្នុងពិធីបុណ្យរយៈពេល ៣ ថ្ងៃបាននាំមកនូវចំណាប់អារម្មណ៍ដែលមិនអាចបំភ្លេចបានចំពោះភ្ញៀវទេសចរ៖ “ខ្ញុំបានចូលរួមពិធីបុណ្យផ្សេងៗជាច្រើន ប៉ុន្តែនៅពេលមកដល់ទីនេះខ្ញុំមានអារម្មណ៍ថាមានភ្ញៀវទេសចរណ៍មកពីគ្រប់ទិសទីច្រើនណាស់ ហើយមនុស្សគ្រប់រូបសប្បាយរីករាយអបអរសាទរពិធីបុណ្យក្លាយទៅជាបេតិកភណ្ឌវប្បធម៌អរូបីថ្នាក់ជាតិផងដែរ”។

ពរពេញទៅដោយតម្លៃវប្បធម៌ប្រពៃណី និងវិសេសវិសាលរបស់តំបន់ដីសណ្តភាគខាងជើង ពិធីបុណ្យវិហារ Da Hoa ឃុំ Binh Minh និងពិធីបុណ្យវិហារ Hoa នៅឃុំ Da Trach ត្រូវបានក្រសួងវប្បធម៌ កីឡា និងទេសចរណ៍ដាក់បញ្ចូលក្នុងបញ្ជីបេតិកភណ្ឌអរូបីជាតិឆ្នាំ ២០២៣។ ការសម្រេចចិត្តទាំងនេះ បានបង្ហាញ ពីការតបស្នងសងគុណយ៉ាងជ្រាលជ្រៅរបស់មនុស្សជំនាន់បច្ចុប្បន្នចំពោះតម្លៃបេតិកភណ្ឌប្រវត្តិសាស្ត្រ វប្បធម៌ និងស្មារតីដែលដូនតាបន្សល់ទុកមកផងដែរ៕