ក្នុងនាមជាសហគ្រាសមួយរបស់ថៃដែលបានចូលមកវៀតណាមដំបូងគេ ក្នុងរយៈពេល ៣០ ឆ្នាំកន្លងមកនេះ សាជីវកម្ម SCG (SCG Corporate) មានក្រុមហ៊ុនចំនួន ២៣ នៅវៀតណាម ជាមួយនឹងបុគ្គលិកវៀតណាមជាង ១៥ពាន់នាក់។ ក្នុងអំឡុងច្រើនឆ្នាំមកនេះ SCG បានបង្ហាញពីការយកចិត្តទុកដាក់និងការខិតខំប្រឹងប្រែងរបស់ខ្លួនដល់សកម្មភាពសង្គម ដោយពង្រឹងការសន្យារបស់សម្ព័ន្ធក្រុមហ៊ុនក្នុងការលើកកម្ពស់សុខុមាលភាពសម្រាប់ប្រជាជនវៀតណាមតាមរយៈកម្មវិធីជាច្រើន។ ចាប់តាំងពីឆ្នាំ ២០០៧ មក កម្មវិធីអាហារូបករណ៍ ក្ដីសុបិនរួមគ្នា របស់ SCG បានផ្តល់អាហារូបករណ៍ចំនួន ៤០០ កញ្ចប់ដល់សិស្សវៀតណាមជារៀងរាល់ឆ្នាំ។

ក្រុមហ៊ុន PRIME រួមវិភាគទានទឹកប្រាក់ចំនួន ៥០០ លានដុងដល់មូលនិធិបង្ការប្រឆាំងជំងឺកូវីដ-១៩ ខេត្ត Vinh Phuc។

នៅភាគខាងជើង ក្រុមហ៊ុនឥដ្ឋការ៉ូ PRIME ដែលជាក្រុមហ៊ុនបុត្រសម្ព័ន្ធរបស់ SCG ក៏មានគម្រោងទំនួលខុសត្រូវសង្គមជាច្រើន ជាពិសេសគម្រោង "ចែករំលែកភាពរុងរឿងជាមួយ PRIME" ដើម្បីរួមដៃជាមួយសហគមន៍ក្នុងការប្រយុទ្ធប្រឆាំងនឹងជំងឺកូវីដ-១៩។ ចាប់ផ្តើមនៅដើមឆ្នាំ ២០២១ កម្មវិធីនេះបានរួមវិភាគទានទឹកប្រាក់ចំនួន ៥០០ លានដុងដល់មូលនិធិបង្ការប្រឆាំងជំងឺកូវីដ-១៩ ខេត្ត Vinh Phuc និង ១០០ លានដុងដល់ខេត្ត Quang Nam។ លោក Chaiyaporn Supanya នាយកផ្នែកធនធានមនុស្សនិងទំនាក់ទំនងបរទេស របស់ PRIME Group និងជាអនុប្រធានសមាគមធុរកិច្ចថៃនៅវៀតណាមបានឲ្យដឹងថា៖ PRIME ក៏ផ្ដល់ជំនួយជាឥដ្ឋការ៉ូរាប់ពាន់ម៉ែត្រការ៉េសម្រាប់គ្រួសារក្រីក្រផងដែរ៖

“ជារៀងរាល់ខែ PRIME Group សហការជាមួយសមាគមកាកបាទក្រហម និងគណៈកម្មាធិការប្រជាជននៅមូលដ្ឋាន ផ្តល់ឥដ្ឋការ៉ូដើម្បីសាងសង់ឬជួសជុលផ្ទះសម្រាប់គ្រួសារក្រីក្រ ជួសជុលនិងកែលម្អទីស្នាក់ការស្ថាប័នរដ្ឋនិងសំណង់សាធារណៈ។ អាចចាត់ទុកនេះជាគោលនយោបាយសំខាន់មួយរបស់ថ្នាក់ដឹកនាំសហគ្រាសថៃ និងសមាគមធុរកិច្ចថៃនៅវៀតណាម។ យើងខ្ញុំធ្វើអាជីវកម្មនៅប្រទេសវៀតណាម ទទួលបានផលប្រយោជន៍ និងកិច្ចសហប្រតិបត្តិការជាមួយទាំងរដ្ឋាភិបាលនិងប្រជាជនវៀតណាម។ ដូច្នេះ យើងខ្ញុំប្រៀបប្រដូចជាសមាជិកក្នុងមហាគ្រួសារវៀតណាមដែរ”។

ថ្វីត្បិតតែមកវៀតណាមក្រោយ SCG ជិត ១០ ឆ្នាំក៏ដោយ ប៉ុន្តែ Central Retail បានបង្កើតឡើងតម្លៃរបស់ខ្លួន ដោយជាប់ចំណាត់ថ្នាក់លេខ ១ នៅក្នុងចំណោមក្រុមហ៊ុនលក់រាយដែលមានកិត្យានុភាពបំផុតទាំង១០ ឆ្នាំ ២០២១ ដែលត្រូវបានបោះឆ្នោតជ្រើសរើសដោយ Vietnam Report ហើយត្រូវបានលើកតម្កើងជា "សហគ្រាសដើម្បីសហគមន៍" ឆ្នាំ២០២១ផងដែរ។ លោក Chalermchai Pornsiripiyakool នាយកផ្នែកទំនាក់ទំនងអន្តរជាតិនៃក្រុមហ៊ុន Central Retail Vietnam បានឲ្យដឹងថា ក្រុមហ៊ុនមានគោលនយោបាយអនុវត្តកម្មវិធីទំនួលខុសត្រូវសង្គមទន្ទឹមជាមួយនឹងការអភិវឌ្ឍអាជីវកម្ម៖

“យើងខ្ញុំមានគម្រោង “មជ្ឈមណ្ឌលពាណិជ្ជកម្ម១ សាលារៀន១” ពោលគឺកសាងសាលារៀនមួយឬច្រើនកន្លែងនៅតំបន់ដែលមានមជ្ឈមណ្ឌលពាណិជ្ជកម្ម។ យើងខ្ញុំកសាងថ្មីឬជួយជួសជុលសាលារៀន ជួយឧបត្ថម្ភនូវឧបករណ៍សិក្សា ដូចជាកុំព្យូទ័រ។ លើសពីនេះទៅទៀត យើងខ្ញុំក៏មានគម្រោងជួយគាំទ្រកសិផលវៀតណាម ណែនាំកសិករធ្វើវប្បកម្មតាមបែបវិទ្យាសាស្ត្រ ជួយឧបត្ថម្ភការលក់កសិផល ហើយផ្សព្វផ្សាយផលិតផល OCOP ជាដើម។ នាពេលថ្មីៗនេះ យើងខ្ញុំបានជួយឧទ្ទេសនាមនិងផ្សព្វផ្សាយផលិតផល OCOP របស់ខេត្តចំនួន ១៣ នៅតំបន់ដីសណ្ដទន្លេ Cuu Long នៅ Can Tho និងបណ្ដាខេត្តភាគខាងជើងនៅ Quang Ninh”។

សម្ព័ន្ធក្រុមហ៊ុន CP ប្រគល់អាហារូបករណ៍ជូនសិស្សានុសិស្សខេត្ត Ben Tre ក្នុងតម្លៃសរុប ៥០០ លានដុង។

ក្នុងចំណោមសកម្មភាពសហគមន៍លេចធ្លោរបស់សហគ្រាសថៃ ត្រូវ និយាយដល់សម្ព័ន្ធក្រុមហ៊ុន CP ដែលជាគំរូឆ្នើមក្នុងការផ្សាភ្ជាប់និងអភិវឌ្ឍន៍ជាមួយប្រជាជនវៀតណាម។ មូលនិធិជំនួយសប្បុរសធម៌ C.P វៀតណាម ក្នុងរយៈពេលច្រើនឆ្នាំមកនេះ តែងតែរៀបចំ ហើយរួមដំណើរជាមួយកម្មវិធីសង្គមដ៏មានអត្ថន័យជាច្រើន ហើយនាពេលថ្មីៗនេះ បានជួយឧបត្ថម្ភមន្ទីរពេទ្យឈាម វិទ្យានិងបញ្ចូលឈាមមជ្ឈិម រៀបចំកន្លែងបរិច្ចាគឈាមអចិន្ត្រៃយ៍ចំនួនពីរកន្លែងបន្ថែមទៀត នៅមន្ទីរពេទ្យពហុព្យាបាលកសិកម្ម និងនៅខ័ណ្ឌ Ba Dinh។ លោក Sookpakij Chearavanont ប្រធាន C.P. Group បានចែករំលែកថា៖

"ក្នុងរយៈពេល ១០ ឆ្នាំកន្លងមក C.P. វៀតណាមបានរួមដំណើរជាមួយកម្មវិធីចលនាការបរិច្ចាគឈាមស្ម័គ្រចិត្តថ្នាក់ជាតិដូចជា ដំណើរក្រហម និងកម្មវិធីជាច្រើនទៀត។ យើងខ្ញុំមានបំណងចង់រួមដំណើរជាមួយកម្មវិធីបែបនេះជាប្រចាំ។ ខ្ញុំសូមថ្លែងអំណរគុណដល់អាជ្ញាធរ និងអង្គការនានាដែលបានផ្តល់ឱកាសដល់ C.P. អនុវត្តន៍កម្មវិធីដ៏មានអត្ថន័យដើម្បីសហគមន៍។ ខ្ញុំត្រៀមខ្លួនជាស្រេចជានិច្ចចូលរួមបរិច្ចាគឈាមដើម្បីសុខភាពនិងសុវត្ថិភាពរបស់ប្រជាជនវៀតណាម”។

នាពេលខាងមុខនេះ ស្ថានទូតថៃប្រចាំវៀតណាមនឹងរៀបចំសកម្មភាពបរិច្ចាគឈាមដោយស្ម័គ្រចិត្ដ ដាំដើមឈើបៃតង និងការពារបរិស្ថាន... សកម្មភាពទាំងនេះជានិច្ចកាលមានការចូលរួម និងការគាំទ្រយ៉ាងពេញទំហឹងរបស់សហគមន៍ប្រជាជនថៃនិងធុរកិច្ចថៃនៅវៀតណាម៕