ពិធីប្រគល់មេដាយជូនមិត្តអាមេរិក  (រូបថត៖ VOV)

នាថ្ងៃទី ១៧ មិថុនា នៅទីក្រុងវ៉ាស៊ីនតោន សហរដ្ឋអាមេរិក លោក Phan Anh Son អនុប្រធានអគ្គលេខានៃសម្ព័ន្ធអង្គការមិត្តភាពវៀតណាម និងឯកអគ្គរដ្ឋទូត វៀតណាមប្រចាំនៅសហរដ្ឋអាមេរិក លោក Nguyen Quoc Dung បានអញ្ជើញប្រគល់ដោយក្តីគោរពបំផុតជូនមេដាយកិត្តិយស ដើម្បីសន្តិភាពនិងមិត្តភាពរវាងប្រជាជាតិជូនចំពោះមិត្តអាមេរិកទាំងបីនាក់ ដែលបានរួមចំណែកជាច្រើនក្នុងការរាំងស្កាត់សង្គ្រាម និងជំរុញទំនាក់ទំនងរវាងប្រជាជន និងប្រជាជន វៀតណាម-អាមេរិក។ នេះគឺជាពានរង្វាន់ដ៏ខ្ពង់ខ្ពស់បំផុតរបស់សហភាពអង្គការមិត្តភាពវៀតណាម ក្នុងការទទួលស្គាល់ ការរួមវិភាគទានសំខាន់ៗរបស់បុគ្គល សម្រាប់សន្តិភាព សាមគ្គីភាព មិត្តភាព និងកិច្ចសហប្រតិបត្តិការរវាងប្រជាជនវៀតណាម និងប្រជាជននៃប្រទេសនានា។

នោះគឺលោក Ron Carver សកម្មជនដើម្បីសន្តិភាព ជាអ្នកប្រាជ្ញ ដែលបានចូលរួមក្នុងបាតុកម្មទាមទារឱ្យបញ្ចប់សង្គ្រាមអាមេរិកនៅវៀតណាម; លោក Ronald Haeberle អ្នកយកព័ត៌មានអំពីសង្គ្រាម និងលោក Daniel Ellsberg អ្នកជំនាញនយោបាយ និងយោធា ដែលបានចូលរួមចំណែកជួយប្រជាជនអាមេរិក និងប្រជាជនពិភពលោក ឱ្យយល់កាន់តែច្បាស់អំពីភាពសាហាវឃោរឃៅនៃសង្រ្គាមនៅវៀតណាម។ មិនត្រឹមតែប្រឆាំងសង្គ្រាមប៉ុណ្ណោះទេ ប៉ុន្មានឆ្នាំមកនេះ មិត្តអាមេរិកបីនាក់ និងជនជាតិអាមេរិកជាច្រើនទៀតបានអនុវត្តគម្រោងមនុស្សធម៌ជាច្រើននៅវៀតណាម ដើម្បីជួយជំនះផលវិបាកសង្គ្រាម ឧបត្ថម្ភការស្ដារឡើងវិញនូវគ្រោះមហន្តរាយ និងសកម្មភាពជាច្រើនទៀត។ សកម្មភាពស្ងៀមស្ងាត់ទាំងនេះ បានរួមចំណែកយ៉ាងសំខាន់ក្នុងការបង្កើនការយល់ដឹងរវាងប្រជាជននៃប្រទេសទាំងពីរ និងពង្រឹងទំនាក់ទំនងមិត្តភាពវៀតណាម-អាមេរិក។ ថ្លែងក្នុងពិធីទទួលមេដាយ លោក Ron Carver បានសំណេះសំណាលថា៖ “ខ្ញុំពិតជារំភើបចិត្តពេលទទួលបានមេដាយ។ រួមជាមួយនឹងមិត្តរបស់ខ្ញុំ សកម្មភាពប្រឆាំងនឹងសង្រ្គាមកាលពី ៥០ ឆ្នាំមុន ក៏ដូចជាសកម្មភាពផ្សះផ្សាស្លាកស្នាមសង្រ្គាមក្នុងរយៈពេល ៦ ឆ្នាំកន្លងមក ជាមួយនឹងដំណើរទស្សនកិច្ចចំនួន ៨ លើកមកកាន់ប្រទេស វៀតណាម ដើម្បីជួយដោះមីន ស្ដារដីផលិតកម្ម ជួយប្រជាជនរងគ្រោះដោយជាតិគីមីពុលពណ៌លឿងទុំគឺមានសារសំខាន់ ដែលភ្ជាប់នឹងជីវិតខ្ញុំតាំងពីក្មេងរហូតដល់បច្ចុប្បន្ន។ នេះពិតជាពេលវេលាដ៏មានកិត្តិយសក្នុងជីវិតរបស់ខ្ញុំ”។

ប្រគល់មេដាយជូនលោក Ron Carver (រូបថត៖ VOV)

ក្នុងនាមជាអ្នកយកព័ត៌មានតាមសមរភូមិ ម្ចាស់រូបថតជាង ៦០ សន្លឹកស្តីពីការសម្លាប់រង្គាលបង្ហូរឈាមនៅ My Lai (Son My, Quang Ngai) នៅថ្ងៃទី ១៦ ខែមីនា ឆ្នាំ ១៩៦៨លោក Ronald Haeberle មានវត្តមាននៅក្នុងពិធីនៅថ្ងៃទី ១៧ ខែមិថុនានៅទីក្រុងវ៉ាស៊ីនតោន ក៏មិនអាចលាក់បាំងការរំភើបរបស់ខ្លួនបានទេ។ រូបថតរបស់លោកដែលបានថតនៅពេលនោះ បានចូលរួមចំណែកយ៉ាងសំខាន់ក្នុងការនាំយកសំណុំរឿងនេះ ទៅរកពន្លឺយុត្តិធម៌ជូនសាធារណៈពិភពលោក ដោយបង្កើតបុព្វបទសម្រាប់ចលនាជាបន្តបន្ទាប់ប្រឆាំងនឹងសង្រ្គាមអាមេរិកនៅវៀត ណាម។ ចលនាប្រឆាំងសង្រ្គាមនៅវៀតណាមបានសាយភាយពាសពេញពិភពលោក ហើយនេះគឺជាកត្តាស្មារតីសំខាន់ណាស់ សម្រាប់វៀតណាមឱ្យកាន់តែមានភាពធន់ទាំងផ្នែកយោធា និងការទូត នោះគឺការចរចានៅទីក្រុងប៉ារីសប្រទេសបារាំង។ ជ័យជំនះនៅតុចរចាទីក្រុងប៉ារីសបាននាំទៅដល់ការលុបបំបាត់ការបែងចែកទឹកដីរបស់វៀតណាម ហើយបានបង្ខំឱ្យរដ្ឋាភិបាលអាមេរិកដកទ័ពចេញ ដោយនាំឱ្យវៀតណាមទទួលបានជ័យជំនះពេញលេញ និងការបង្រួបបង្រួមប្រទេសជាតិឡើងវិញ។ ជ័យជម្នះនេះគឺមានការរួមចំណែកដ៏ស្ងៀមស្ងាត់ ប្រកបដោយប្រសិទ្ធភាព និងមានតម្លៃមនុស្សសាស្ត្ររបស់មិត្តអាមេរិក ដូចជាលោក Ronald Haeberle ផងដែរ។

បន្ទាប់ពីសន្តិភាពត្រូវបានបង្កើតឡើងវិញ លោក Ronald Haeberle បានវិល ត្រឡប់ទៅភូមិ Son My ជាច្រើនដង ដើម្បីធ្វើសកម្មភាពមនុស្សធម៌ ដូចជាការអប់រំការបង្ការគ្រោះគ្រាប់បែកមីន និងឧបត្ថម្ភធនដល់ជនរងគ្រោះ/ជនពិការ។ ក្នុងឱកាសឧបត្ថម្ភដល់ប្រជាជនខេត្ត Quang Ngai និង Quang Tri ដើម្បីជំនះផលវិបាកនៃព្យុះ និងទឹកជំនន់ ដែលបានកើតឡើងនៅចុងឆ្នាំ ២០២០ លោក Ronald Haeberle បានអំពាវនាវ និងបរិច្ចាគថវិកាជាង ២៨.០០០ ដុល្លារអាមេរិក ដើម្បីផ្គត់ផ្គង់ដល់ប្រជាពលរដ្ឋរងគ្រោះដោយទឹកជំនន់នៅតំបន់ន់រងគ្រោះទាំងពីរនេះ។  លោក Ronald Haeberle បានអះអាងថា លោកនឹងបន្តជួយឧបត្ថម្ភប្រជាជន វៀតណាមនៅកន្លែងដែលត្រូវការជំនួយមនុស្សធម៌ ហើយតែងតែជឿជាក់ថា ទំនាក់ទំនងវៀតណាម-អាមេរិកនឹងកាន់តែស្អិតរមួតពីមួយថ្ងៃទៅមួយថ្ងៃ៖

ប្រគល់មេដាយជូនលោក Ronald Haeberle (រូបថត៖ VOV)

“ខ្ញុំគិតថា ទំនាក់ទំនងរវាងវៀតណាម និងអាមេរិកក្នុងប៉ុន្មានឆ្នាំខាងមុខនឹងកាន់តែជិតស្និទ្ធ និងស្អិតរមួត ឆ្ពោះទៅរកកិច្ចសហប្រតិបត្តិការឈ្នះ-ឈ្នះ ជាមួយ នឹងកិច្ចព្រមព្រៀងសមស្រប។ ខ្ញុំប្រាកដថា ទំនាក់ទំនងរវាងប្រទេសទាំងពីរនឹងកាន់តែជិតស្និទ្ធជាងមុន ហើយប្រការនេះគឺអស្ចារ្យណាស់”។

ក្នុងពេលជាមួយគ្នានោះ លោក Daniel Ellsberg សកម្មជននយោបាយអាមេរិក ដែលត្រូវបានគេហៅថាជា វីរជនអាមេរិក បន្ទាប់ពីបានលាតត្រដាងឯកសាររបស់មន្ទីរបញ្ចកោណ អំពីសង្រ្គាមនៅវៀតណាមនោះ លោកមិនអាចចូលរួមក្នុងពិធីរំលឹកបានទេ ដោយសារហេតុផលសុខភាព ហើយរូបភាពអំពីអំណោយតបស្នងសង់គុណរបស់វៀតណាម ត្រូវបានប្រគល់ជូនលោកមួយថ្ងៃមុនគាត់លាចាកលោក។

ឆ្នាំនេះ វៀតណាម និងអាមេរិកប្រារព្ធខួបលើកទី ៥០ នៃកិច្ចព្រមព្រៀងទីក្រុងប៉ារីស បញ្ចប់សង្គ្រាមនៅវៀតណាម (១៩៧៣-២០២៣) និងខួបលើកទី ១០ នៃទំនាក់ទំនងភាពជាដៃគូលើគ្រប់ជ្រុងជ្រោយរវាងប្រទេសទាំងពីរ (២០១៣-២០២៣)។ ពិធីលើកតម្កើងមិត្តរបស់វៀតណាម គឺជាសកម្មភាពដ៏មានអត្ថន័យ រួមចំណែកបង្កើនការយល់ដឹងគ្នាទៅវិញទៅមក និងរឹតចំណងមិត្តភាពរវាងប្រជាជននៃប្រទេសទាំងពីរ៕