ជប៉ុននិងចិនបានឯកភាព ពិគ្រោះយោបល់ថ្នាក់អ្នកជំនាញ លើការបង្ហូរទឹកសំណល់ពីរោងចក្រ Fukushima ចូលទៅក្នុងសមុទ្រ
(VOVWORLD) - រដ្ឋាភិបាលជប៉ុនកាលពីថ្ងៃទី ២៦ ខែធ្នូ បានឲ្យដឹងថា ប្រទេសនេះ និងប្រទេសចិនបានឯកភាពគ្នាធ្វើការពិគ្រោះយោបល់ថ្នាក់អ្នកជំនាញលើការបង្ហូរទឹកសំណល់ដែលត្រូវបានព្យាបាលបន្សុតពីរោងចក្រថាមពលនុយក្លេអ៊ែរ Fukushima លេខ ១ ចូលទៅក្នុងសមុទ្រ។
តាមការគ្រោងទុក ការពិគ្រោះយោបល់នឹងប្រព្រឹត្តទៅនៅដើមឆ្នាំ ២០២៤ ដោយមានការចូលរួមពីមន្ត្រីមកពីស្ថាប័នរដ្ឋាភិបាលនានាទាក់ទងនឹងបញ្ហានេះ។ ចំណុចស្នូលនៃសម័យពិគ្រោះយោបាល់គឺ "បង្រួញគម្លាត" ខាងទស្សនៈទាក់ទងនឹងសុវត្ថិភាពនៃការបង្ហូរទឹកសំណល់ដែលបានបន្សុតទៅក្នុងសមុទ្រ និងធ្វើការឆ្ពោះទៅរកដំណោះស្រាយសម្រាប់ប្រទេសចិនបន្តការនាំចូលជលផលរបស់ជប៉ុន។
 ធុងទឹកសំណល់ដែលបានបន្សុតនៅរោងចក្រថាមពលនុយក្លេអ៊ែរ Fukushima នៅទីក្រុង Okuma ខេត្ត Fukushima ប្រទេសជប៉ុន នៅថ្ងៃទី ២៤ ខែសីហា ឆ្នាំ ២០២៣។ រូបថត៖ AFP/TTXVN |
នៅក្នុងកិច្ចប្រជុំកំពូលជប៉ុន-ចិន កាលពីខែវិច្ឆិកាកន្លងទៅ នាយករដ្ឋមន្ត្រីជប៉ុន លោក Fumio Kishida និងប្រធានរដ្ឋចិន លោក Xi Jinping បានទទួលស្គាល់ថា ភាគីទាំងពីរមានភាពខុសគ្នានៅក្នុងទស្សនៈស្តីពីការបង្ហូរទឹកសំណល់ទៅក្នុងលំហសមុទ្រ ប៉ុន្តែមេដឹកនាំទាំងពីរបានឯកភាពគ្នា ក្នុងការដោះស្រាយបញ្ហានេះ តាមរយៈការពិគ្រោះយោបល់ និងកិច្ចពិភាក្សាក្នុងស្មារតីស្ថាបនា៕