ផ្សែងហុយឡើងនៅភាគខាងត្បូងប្រទេសលីបង់ បន្ទាប់ពីការវាយប្រហារតាមអាកាសរបស់អ៊ីស្រាអែលនៅថ្ងៃទី ២៣ ខែកញ្ញា។ រូបថត៖ រ៉យទ័រ

អង្គការអន្តរជាតិទេសន្តរប្រវេសន៍ (IOM) បានប៉ាន់ប្រមាណថា ការវាយប្រហារតាមផ្លូវអាកាសរបស់អ៊ីស្រាអែលចូលប្រទេសលីបង់ក្នុងប៉ុន្មានថ្ងៃថ្មីៗនេះបានបង្ខំឲ្យមនុស្សជាង ២០០.០០០ នាក់ត្រូវភៀសខ្លួនចេញពីផ្ទះសម្បែងរបស់ខ្លួន។ ក្នុងនោះមានមនុស្សជាង ៣០.០០០ នាក់បានឆ្លងព្រំដែនលីបង់ចូលប្រទេសស៊ីរីក្នុងរយៈពេល៣ថ្ងៃកន្លងមកនេះ។ អ្នកសម្របសម្រួលផ្នែកមនុស្សធម៌របស់អង្គការសហប្រជាជាតិប្រចាំប្រទេសលីបង់ លោក Imran Riza បានបញ្ជាក់ថា ការវាយប្រហារតាមជើងអាកាសរបស់អ៊ីស្រាអែលលើប្រទេសលីបង់ គឺជាគ្រោះសោកនាដកម្ម ហើយបានព្រមានថា ប្រទេសនៅមជ្ឈិមបូព៌ានេះ កំពុងឆ្លងកាត់រយៈពេលដ៏អាក្រក់បំផុតក្នុងរយៈពេលជាច្រើនឆ្នាំមក។ ជាពិសេស មន្ត្រីមនុស្សធម៌របស់អង្គការសហប្រជាជាតិ បានដកស្រង់សម្តីរបស់ប្រជាជនលីបង់ជាច្រើន ដែលសម្តែងការព្រួយបារម្ភថា នេះអាចគ្រាន់តែជាការចាប់ផ្តើមនៃគ្រោះសោកនាដកម្មប៉ុណ្ណោះ៕