លោក Daniel Nguyen Hoai Tien។ (រូបថត៖ baoquocte.vn)

ក្រោយពីដំណើរត្រឡប់មកប្រទេសវៀតណាមវិញជាលើកដំបូងកាលពីឆ្នាំ ២០០៨ ជាមួយនឹងអារម្មណ៍ជាច្រើន លោក Daniel Nguyen ដែលមានឈ្មោះវៀតណាមថា Hoai Tien យុវជនម្នាក់មានសញ្ជាតិអាមេរិក មានបំណងចង់លះបង់ច្រើនថែមទៀតសម្រាប់ប្រទេសនេះ។ យុវជនអាយុ ២០ ឆ្នាំរូបនេះ បានឆ្លងកាត់ដំណើររាប់ពាន់គីឡូម៉ែត្រតាមតំបន់ព្រៃភ្នំភាគពាយ័ព្យ ដើម្បីស្វែងរកវិធីជួយជនរួមជាតិជាជនជាតិភាគតិចនៅទីនេះមានជីវភាពរស់នៅប្រកបដោយនិរន្តរភាពជាងមុន៖

“ពេលខ្ញុំស្វែងយល់អំពីជំនឿ របៀបរស់នៅ និងវប្បធម៌របស់សហគមន៍ជនជាតិភាគតិច ទើបយល់ឃើញថា កសិកម្មគឺជាសសៃឈាមរបស់ពួកគេ។ ដូច្នេះហើយ ខ្ញុំបានជ្រើសរើសការស្តារពូជដំណាំប្រចាំមូលដ្ឋាន ជាពិសេសពូជពោត និងធញ្ញជាតិ ដើម្បីបង្កើតធាតុចេញប្រកបដោយនិរន្តរភាពសម្រាប់កសិផលរបស់ប្រជាជន។ សំខាន់ជាងនេះទៅទៀត គឺការកសាងម៉ាកយីហោ និងរឿងមួយដើម្បីឧទ្ទេសនាមផលិតផលរបស់ប្រជាជនទៅកាន់បរទេស។ ផលិតផលដំបូងរបស់យើងខ្ញុំគឺស្រា Gin Song Cai”។

ស្រា Gin វៀតណាមផលិតពីពោត របស់ក្រុមហ៊ុន Song Cai Distillery បង្កើតឡើងដោយបុរសអាមេរិកដើមកំណើតវៀតណាម Daniel Nguyen ឬឈ្មោះវៀតណាមសាមញ្ញថា Hoai Tien ត្រូវបានលក់នៅទីផ្សារជាច្រើនដូចជាសិង្ហបុរី ហុងកុង (ចិន) អូស្ត្រាលី នូវែលសេឡង់។ ផលិតផលស្រាជាមួយនឹងវត្ថុធាតុដើមវៀតណាមសុទ្ធសាធនេះ ទទួលបានពានរង្វាន់ប្រាក់អន្តរជាតិផ្នែកភេសជ្ជៈ ហើយថ្មីៗនេះត្រូវបានទស្សនាវដ្តីសេដ្ឋកិច្ចដ៏ល្បីល្បាញ Bloomberg វាយតម្លៃថាជាស្រាមួយក្នុងចំណោមស្រាឆ្ងាញ់បំផុតទាំង ១៦ នៅលើពិភពលោកក្នុងឆ្នាំ ២០២១។

“ខ្ញុំដាក់ឈ្មោះ Song Cai ព្រោះ Song Cai មានន័យថា ទន្លេមេ។ ខ្ញុំឃើញថា មិនថាជនជាតិ Kinh ឬជនជាតិភាគតិចទេ ប្រជាជនវៀតណាមគោរពមាតាធម្មជាតិច្រើនណាស់។ តាមរយៈម៉ាកយីហោ ខ្ញុំមិនត្រឹមតែចង់លើកតម្កើងសហគមន៍មួយប៉ុណ្ណោះទេ ថែមទាំងផ្លាស់ប្តូរគំនិតរបស់មនុស្សទាំងក្នុង និងក្រៅប្រទេសអំពីរឿងរ៉ាវមួយរបស់ជនវៀតណាមផងដែរ”។

អ្នកស្រី Thao Griffiths ជួបជាមួយអតីតប្រធានាធិបតីអាមេរិក លោក Bill Clinton នៅទីក្រុងហាណូយ ក្នុងឱកាសរំលឹកខួបរយៈពេល ២០ ឆ្នាំនៃទំនាក់ទំនងវៀតណាម-អាមេរិក។

ដូចលោក Daniel Nguyen អ្នកស្រី Thao Griffiths ជនវៀតណាមម្នាក់នៅប្រទេសសិង្ហបុរី ក៏ចង់នាំយកឈ្មោះវៀតណាមមកដាក់នៅលើផែនទីពិភពលោកដែរ។ Thao Griffiths គឺជាឈ្មោះមួយដែលមិនប្លែកចំពោះសហគមន៍ធុរកិច្ចវៀតណាមនិងសហរដ្ឋអាមេរិកទេ។ នាងធ្លាប់ធ្វើការក្នុងរយៈពេលដ៏វែងមួយនៅសមាគមអតីតទាហានអាមេរិកនៅវៀតណាម។ Thao គឺជាអ្នកដែលបានដាក់គ្រឹះដំបូងសម្រាប់សកម្មភាពមនុស្សធម៌របស់សហរដ្ឋអាមេរិកនៅវៀតណាមក្រោយសង្គ្រាម ចាប់ពីការបោសសម្អាតគ្រាប់បែកមីន រហូតដល់ការដោះស្រាយបញ្ហាជនរងគ្រោះដោយជាតិគីមីពុលពណ៌លឿងទុំ/ឌីអុកស៊ីតផងដែរ។ បច្ចុប្បន្ននេះ ក្នុងតួនាទីនាយិកាប្រចាំតំបន់នៃសម្ព័ន្ធក្រុមហ៊ុនបច្ចេកវិទ្យា Meta របស់សហរដ្ឋអាមេរិក អ្នកស្រី Thao Griffiths បន្តបេសកកម្មរបស់ខ្លួនក្នុងការតភ្ជាប់ត្រីកោណសិង្ហបុរី-វៀតណាម-សហរដ្ឋអាមេរិក ក្នុងវិស័យផ្លាស់ប្ដូរឌីជីថល។

“ទំនួលខុសត្រូវរបស់ខ្ញុំគឺតភ្ជាប់សិង្ហបុរី - សហរដ្ឋអាមេរិក ដែលជាមជ្ឈមណ្ឌលចំនួនពីរនៃការផ្លាស់ប្តូរឌីជីថលជាមួយវៀតណាម ក្នុងវិស័យនវានុវត្តន៍។ យើងខ្ញុំកំពុងសហការជាមួយក្រសួងផែនការ និងវិនិយោគវៀតណាម ជាពិសេសមជ្ឈមណ្ឌលនវានុវត្តន៍ជាតិ ដើម្បីកសាងកម្មវិធីសាកល្បងនវានុវត្តន៍វៀតណាម។ នេះគឺជាកម្មវិធីរវាងក្រុមហ៊ុន Meta និងមជ្ឈមណ្ឌលផ្លាស់ប្ដូរឌីជីថលជាតិ ដែលចាប់ផ្តើមនៅឆ្នាំ ២០២២ ដើម្បីអំពាវនាវឱ្យមានដំណោះស្រាយប្រកបដោយភាពច្នៃប្រឌិត សំដៅដោះស្រាយបញ្ហាសង្គម ឬគោលនយោបាយនៅក្នុងប្រទេសវៀតណាម”។

នៅចំពោះមុខនិន្នាការដែលការផ្លាស់ប្តូរឌីជីថលលើពិភពលោកកាន់តែខ្លាំងក្លាជាងពេលណាៗទាំងអស់ ការទាក់ទាញការវិនិយោគពីក្រុមហ៊ុនបច្ចេកវិទ្យាមកពីប្រទេសអភិវឌ្ឍន៍នឹងបង្កើតកម្លាំងចលករសម្រាប់សេដ្ឋកិច្ចឌីជីថលរបស់វៀតណាម។ នោះក៏ជាវិធីដែលអ្នកស្រី Thao Griffiths កំពុងធ្វើដើម្បីធ្វើឲ្យតម្លៃរបស់វៀតណាមកាន់តែឈានទៅឆ្ងាយៗ៖

“តើយើងធ្វើយ៉ាងណាដើម្បីតភ្ជាប់ជាមួយក្រុមហ៊ុនបច្ចេកវិទ្យាអន្តរជាតិដើម្បីនាំយកបច្ចេក
វិទ្យាឌីជីថល និងការអភិវឌ្ឍចូលមកប្រទេសវៀតណាម ហើយដាក់ទីស្នាក់ការរបស់គេនៅ
វៀតណាម ដូច្នេះអត្រានៃជាតិពណ៌ប្រផេះនៅក្នុងខឿនសេដ្ឋកិច្ចវៀតណាមក៏ដូចជាការរួមចំណែករបស់ខ្លួនសម្រាប់សេដ្ឋកិច្ចពិភពលោកនឹងកើនឡើង ហើយធ្វើឱ្យតម្លៃវៀតណាមកើនឡើងផងដែរ”។

ដំណើររបស់មនុស្សដូចជា លោក Daniel Nguyen Hoai Tien ឬអ្នកស្រី Thao Griffiths មិនត្រឹមតែជាការវិលត្រឡប់ទៅរកប្រភពដើមរបស់មនុស្សម្នាក់ប៉ុណ្ណោះទេ។ វាពិតជាដំណើរនៃការបំផុសគំនិតអំពីបំណងប្រាថ្នាចង់លះបង់ដើម្បីកសាងប្រទេសវៀតណាមឱ្យកាន់តែអភិវឌ្ឍន៍ប្រកបដោយនិរន្តរភាព និងវិបុលភាព របស់កុលបុត្រកុលធីតាវៀតណាមនៅទូទាំងពិភពលោកទៀតផង៕