(vovworld) - ວັນທີ 11/11, ຢູ່ນະຄອນຫຼວງ ປັງກິ່ງ, ປະເທດຈີນ, ກອງປະຊຸມຂັ້ນສູງເວທີປາໄສຮ່ວມມືເສດຖະກິດ ອາຊີ - ປາຊີຟິກ ຄັ້ງທີ 22 (APEC) ກ້າວເຂົ້າສູ່ມື້ເຮັດວຽກທີ່ 2.
ທີ່ວາລະປະຊຸມຄົບຄະນະຄັ້ງທີ 1, ການນຳຂອງ 21 ພື້ນຖານເສດຖະກິດສະມາຊິກ APEC ສຸມໃສ່ແລກປ່ຽນເນື້ອໃນ “ຊຸກຍູ້ການຮ່ວມສຳພັນເສດຖະກິດພາກພື້ນ”, ໜຶ່ງໃນ 3 ບຸລິມະສິດຮ່ວມມືຂອງ APEC ໃນປີ 2014. ບັນດາການນຳເຫັນດີເປັນເອກະສັນເພີ່ມທະວີຄວາມມານະພະຍາຍາມເພື່ອສືບຕໍ່ຮັກສາບົດບາດຂອງ APEC ແມ່ນເວທີປາໄສສຳຄັນອັນດັບໜຶ່ງໃນການໜູນຊ່ວຍເຕີບໂຕເສດຖະກິດແບບຍືນຍົງ, ຮັກສາຄວາມວັດທະນາຖາວອນ ແລະ ຊຸກຍູ້ສະພາບແວດລ້ອມການຄ້າ ແລະ ການລົງທຶນເປີດຢູ່ ອາຊີ - ປາຊີຟິກ. ທ່ານປະທານປະເທດ ຈີນ ສືຈີ້ນຜິງ ປະກາດ ຈີນ ໜູນຊ່ວຍຈຳນວນເງິນ 10 ລ້ານ USD ເພື່ອປະຕິບັດບັນດາໂຄງການຂອງ APEC ກ່ຽວກັບການຍົກສູງຄວາມສາມາດໃຫ້ບັນດາສະມາຊິກພວມພັດທະນາ. ເຂົ້າຮ່ວມ ແລະ ກ່າວຄຳເຫັນທີ່ວາລະປະຊຸມນີ້, ທ່ານປະທານປະເທດ ຫວຽດນາມ ເຈືອງເຕີນຊາງ ຢືນຢັນວ່າ: ຫວຽດນາມ ຕີລາຄາສູງ ແລະ ສະໜັບສະໜູນເລື່ອງຮັບຮອງເອົາບັນດາມາດຕະການຍູ້ແຮງການຜັນຂະຫຍາຍ ບ້ວງເງິນຄຳໝັ້ນສັນຍາ ບາລີ, ບັນດາມາດຕະການຫັນການຄ້າ ແລະ ການລົງທຶນເປັນສະດວກ, ເສລີ. ຊີ້ແຈ້ງບັນດາການປະກອບສ່ວນຂອງ ຫວຽດນາມ ໃນການຊຸກຍູ້ຮ່ວມມື APEC ແລະ ການຮ່ວມສຳພັນເສດຖະກິດພາກພື້ນ, ທ່ານປະທານປະເທດ ເຈືອງເຕີນຊາງ ຢັ້ງຢືນວ່າ: ຫວຽດນາມ ພວມກາຍເປັນແກ່ນສານຕັ້ງໜ້າຢູ່ ອາຊີຕາເວັນອອກສ່ຽງໃຕ້ ແລະ ແມ່ນຂົວຕໍ່ຕິດພັນບັນດາພື້ນຖານເສດຖະກິດ ອາຊຽນ. ນີ້ແມ່ນພື້ນຖານເພື່ອໃຫ້ ຫວຽດນາມ ພ້ອມກັບບັນດາປະເທດສະມາຊິກ APEC ຍົກລະດັບການຮ່ວມສຳພັນພາກພື້ນ, ຍົກສູງທີ່ຕັ້ງບົດບາດຂອງເວທີປາໄສ APEC ໃນ ອາຊີ - ປາຊີຟິກ ສັນຕິພາບ, ສະຖຽນລະພາບ, ພັດທະນາ ແລະ ວັດທະນາຖາວອນ.
ຕອນບ່າຍວັນທີ 11/11, ບັນດາການນຳ APEC ໄດ້ປຶກສາຫາລືກ່ຽວກັບຫົວຂໍ້ “ຍູ້ແຮງການເຊື່ອມໂຍງຢ່າງຮອບດ້ານ ແລະ ພັດທະນາພື້ນຖານໂຄງລ່າງ”, ໃນນັ້ນເນັ້ນໜັກເຖິງຄວາມສຳຄັນຂອງການເພີ່ມທະວີການເຊື່ອມຕໍ່ຢ່າງຮອບດ້ານສຳລັບການເຕີບໂຕເສດຖະກິດ, ຍູ້ແຮງການເຊື່ອມຕໍ່ລະຫວ່າງການເດີນທະເລ ແລະ ການບິນ, ຮ່ວມມື ແລະ ໜູນຊ່ວຍເຊິ່ງກັນແລະກັນ, ຊຸກຍູ້ຄວາມຈະເລີນຮຸ່ງເຮືອງ ແລະ ຈິດໃຈປະຊາຄົມຢູ່ອາຊີ - ປາຊີຟິກ. ທີ່ກອງປະຊຸມຄັ້ງນີ້, ທ່ານປະທານປະເທດ ເຈືອງເຕີນຊາງ ສະເໜີໃຫ້ບັນດາສະມາຊິກ ຕ້ອງເອົາໃຈໃສ່ເຖິງການຮ່ວມມື ເພື່ອຮັບມືກັບບັນດາສິ່ງທ້າທາຍໃນທົ່ວໂລກ, ໜູນຊ່ວຍ ຍົກສູງກຳລັງຄວາມສາມາດໃຫ້ບັນດາສະມາຊິກພວມພັດທະນາ, ຍູ້ແຮງການຮ່ວມມືດ້ານການສຶກສາ ແລະ ບຳລຸງສ້າງ, ເພີ່ມທະວີການຮ່ວມມືພາກລັດ - ເອກະຊົນ, ເສີມຂະຫຍາຍບົດບາດຂອງບັນດາວິສາຫະກິດ.
ຫຼັງຈາກນັ້ນ, ໃນວາລະປຶກສາຫາລືຄົບຄະນະດ້ວຍຫົວຂໍ້ວ່າ “ພັດທະນາການມີຫົວຄິດປະດິດສ້າງ, ການປະຕິຮູບ ແລະ ການເຕີບໂຕເສດຖະກິດ”, ບັນດາການນຳ APEC ຢືນຢັນການສະໜັບສະໜູນບັນດາຄວາມມານະພະຍາຍາມຊຸກຍູ້ການສ້າງໂຄງປະກອບເສດຖະກິດຄືນໃໝ່ ແລະ ຍົກສູງບັນດາຂະແໜງອາຊີບທີ່ເປັນມູນເຊື້ອ, ຂຸດຄົ້ນບັນດາຄວາມສາມາດບົ່ມຊ້ອນໃນການເຕີບໂຕເສດຖະກິດໃໝ່. ທ່ານປະທານປະເທດ ເຈືອງເຕີນຊາງ ໃຫ້ຮູ້ວ່າ, ຫວຽດນາມ ພວມຜັນຂະຫຍາຍການສ້າງໂຄງປະກອບພື້ນຖານເສດຖະກິດຄືນໃໝ່ ແລະ ຫັນປ່ຽນຮູບແບບການເຕີບໂຕຕາມທິດໝັ້ນຄົງ; ພ້ອມທັງຢືນຢັນວ່າ, ຫວຽດນາມ ຈະສືບຕໍ່ພ້ອມກັບບັນດາປະເທດສະມາຊິກ ຊຸກຍູ້ການພັດທະນາທີ່ມີຫົວຄິດປະດິດສ້າງ, ການປະຕິຮູບ ແລະ ການເຕີບໂຕເສດຖະກິດ.
ສິ້ນສຸດບັນດາວາລະປຶກສາຫາລື, ກອງປະຊຸມຂັ້ນສູງຄັ້ງທີ 22 APEC ໄດ້ຮັບຮອງເອົາຖະແຫຼງການຮ່ວມ 2 ສະບັບຂອງບັນດາການນຳ APEC ກ່ຽວກັບ “ໂຄງການດຳເນີນງານປັກກິງ ເພື່ອອາຊີ- ປາຊີຟິກ ທີ່ຕິດພັນ, ມີຫົວຄິດປະດິດສ້າງ ແລະ ເຊື່ອມຕໍ່” ແລະ “ກຳນົດອະນາຄົດຜ່ານການພົວພັນຄູ່ຮ່ວມມືອາຊີ - ປາຊີຟິກ”, ພ້ອມກັບເອກະສານອື່ນ 4 ສະບັບ.
ກອງປະຊຸມຂັ້ນສູງ APEC ຄັ້ງທີ 22 ໄດ້ສິ້ນສຸດລົງຢ່າງຈົບງາມ ດ້ວຍວາລະອັດກອງປະຊຸມໃນຕອນບ່າຍວັນທີ 11/11, ສະແດງໃຫ້ເຫັນຄວາມຕັດສິນໃຈ ແລະ ຄວາມມານະພະຍາຍາມຂອງບັນດາພື້ນຖານເສດຖະກິດສະມາຊິກ ເພື່ອອາຊີ- ປາຊີຝິກ ທີ່ຕິດພັນ, ມີຫົວຄິດປະດິດສ້າງ ແລະ ເຊື່ອມຕໍ່, ປະກອບສ່ວນຍົກສູງບົດບາດທີ່ຕັ້ງຂອງ APEC ແລະ ຮັກສາບົດບາດຂອງພາກພື້ນອາຊີ- ປາຊີຟິກ ແມ່ນກຳລັງໜູນຂອງການເຕີບໂຕເສດຖະກິດທົ່ວໂລກ.
ຕອນບ່າຍວັນທີ 11/11, ທ່ານປະທານປະເທດ ເຈືອງເຕີນຊາງ ໄດ້ເດີນທາງອອກນະຄອນຫຼວງປັກກິ່ງ ກັບເມືອປະເທດ, ສິ້ນສຸດການເຂົ້າຮ່ວມກອງປະຊຸມຂັ້ນສູງ APEC ຄັ້ງທີ 22.