ກອງປະຊຸມຄັ້ງທີ 6 ຄະນະປະຈຳສະພາແຫ່ງຊາດ
(vovworld) - ວັນທີ 26/3, ໂດຍສືບຕໍ່ກອງປະຊຸມຄັ້ງທີ 6 ຄະນະປະຈຳສະພາແຫ່ງຊາດຫວຽດນາມ ໄດ້ຈັດຕັ້ງການຊັກຖາມ ແລະ ຕອບຄຳຊັກຖາມກ່ຽວກັບບັນດາຂົງເຂດທີ່ລັດຖະມົນຕີກະຊວງສາທາລະນະສຸກ, ລັດຖະມົນຕີກະຊວງພາຍໃນ ຮັບຜິດຊອບຊຶ່ງໄດ້ຮັບຄວາມສົນໃຈຈາກຜູ້ມີສິດເລືອກຕັ້ງ. ກ່າວຄຳເຫັນໄຂວາລະຊັກຖາມ, ທ່ານປະທານສະພາແຫ່ງຊາດຫວຽດນາມ Nguyen Sinh Hung ຢືນຢັນວ່າ: ການຊັກຖາມຄັ້ງນີ້ແມ່ນການເຄື່ອນໄຫວປະຊາທິປະໄຕ, ພູມປັນຍາ, ເພີ່ມທະວີຄວາມສະໜິດຕິດພັນລະຫວ່າງສະພາແຫ່ງຊາດ, ລັດຖະບານກັບຜູ້ມີສິດເລືອກຕັ້ງໃນທົ່ວປະເທດ. ທ່ານເວົ້າວ່າ:
“ມື້ນີ້, ການເຄື່ອນໄຫວຊັກຖາມດ້ວຍຮູບແບບໃໝ່ກ່ວາແມ່ນຜ່ານການຖ່າຍທອດ ສົດທາງໂທລະພາບ, ວິທະຍຸກະຈາຍສຽງໃນທົ່ວປະເທດເພື່ອໃຫ້ຜູ້ມີສິດເລືອກຕັ້ງຕິດຕາມ ກວດກາ ແລະ ເຊື່ອມຕໍກັບຄະນະສະມາຊິກສະພາແຫ່ງຊາດຢູ່ບັນດາແຂວງ, ນະຄອນໃນທົ່ວປະເທດ ເພື່ອໃຫ້ສະມາຊິກສະພາແຫ່ງຊາດຢູ່ທ້ອງຖິ່ນຕ່າງໆສາມາດຕິດຕາມ, ກວດກາ ພ້ອມກັນນັ້ນກໍຊັກຖາມບັນດາລັດຖະມົນຕີໂດຍກົງ. ປະຊາຊົນກໍສາມາດປະຕິບັດສິດຕິດຕາມກວດກາຂອງຕົນຕໍສະມາຊິກສະພາແຫ່ງ ຊາດ.”
ລັດຖະມົນຕີກະຊວງສາທາລະນະສຸກ Nguyen Thi Kim Tien
(ພາບ: vietnamnet.vn)
ໃນຕອນເຊົ້າວັນທີ 26/3, ທ່ານນາງລັດຖະມົນຕີກະຊວງສາທາລະນະສຸກ Nguyen Thi Kim Tien ຕອບຄຳຊັກຖາມກ່ຽວກັບບັນດາບັນຫາພວມໄດ້ຮັບຄວາມສົນໃຈຈາກປະຊາຊົນຄື:ປິ່ນປົວພະຍາດໃຫ້ປະຊາຊົນ, ດັບປັບຄ່າໂຮງໝໍ... ທ່ານນາງລັດຖະມົນຕີ Nguyen Thi Kim Tien ຖືວ່າ: ໃນໄລຍະຜ່ານມາ, ບັນດາໂຄງການ, ຈຸດໝາຍແຫ່ງຊາດກ່ຽວກັບການປ້ອງກັນ, ຕ້ານພະຍາດໃຫ້ປະຊາຊົນໄດ້ບັນລຸຄາດໝາຍວາງອອກໂດຍພື້ນຖານ. ເຖິງຢ່າງໃດກໍຕາມ, ຂະແໜງສາທາລະນະສຸກຍັງຂາດແຄນເງິນລົງທຶນຈາກລັດ... ກ່ຽວກັບມາດຕະການແກ້ໄຂ, ທ່ານນາງລັດຖະມົນຕີ Nguyen Thi Kim Tien ໃຫ້ຮູ້ວ່າ:
“ກະຊວງສາທາລະນະສຸກຈະສ້າງ ແລະ ຍືນສະເໜີຕໍ່ລັດຖະບານແຜນການພັດທະນາລະບົບສາທາລະນະສຸກຫວຽດນາມແຕ່ປີ 2020 ວິໄສທັດເຖິງປີ 2030, ໃນນັ້ນສຸມໃສ່ເຖິງເຄືອຂ່າຍໂຮງໝໍ, ສະຖາບັນຄົ້ນຄ້ວາ, ມະຫາວິທະຍາໄລຕິດພັນກັບເຂດຊຸມຊົນ. ທີ່ 2 ແມ່ນໃຫ້ບຸລິມະສິດແກ່ບັນດາໂຄງການຮີບດ່ວນໄດ້ສຳເລັດຢູ່ຂັ້ນເມືອງ, ຂັ້ນສູນກາງ. ທີ 3 ແມ່ນ ເພີ່ມທະວີການຫັນເປັນວຽກງານສັງຄົມກ່ຽວກັບການລົງທຶນໃຫ້ແກ່ຂົງເຂດສາທາລະນະສຸກດ້ວຍບັນດາຮູບແບບສົມທົບການລົງທຶນລະຫວ່າງພາກລັດ - ເອກະຊົນ”
ໃນຕອນບ່າຍຂອງວັນດຽວກັນ, ຄະນະປະຈຳສະພາແຫ່ງຊາດຊຸດທີ່ 13 ໄດ້ຊັກຖາມ ທ່ານ ລັດຖະມົນຕີກະຊວງພາຍໃນ Nguyen Thai Binh ກ່ຽວກັບການຄັດເລືອກ, ກໍ່ສ້າງ, ບຳລຸງພະນັກງານ, ລັດຖະກອນຂອງລັດ, ວິທີ່ການແກ້ໄຂຍົກສູງຄຸນນະພາບກົງຈັກອຳນາດການປົກຄອງຂັ້ນຮາກຖານ.
ກ່າວຄຳເຫັນສິ້ນສຸດວາລະຊັກຖາມໃນວັນທີ 26/3, ທ່ານປະທານສະພາແຫ່ງຊາດຫວຽດນາມ Nguyen Sinh Hung ຕີລາຄາວ່າ :
“ ຜ່ານການຊັກຖາມ ແລະ ຕອບຄຳຊັກຖາມ, ອາດຈະເຫັນໄດ້ວ່າພວກເຮົາສາມາດບັນລຸໄດ້ບາງຜົນງານທີ່ສຳຄັນໃນວຽກງານສຸຂາພິບານ, ຈັດຕັ້ງພະນັກ ງານ ແລະ ຄຸ້ມຄອງບໍລິຫານແຫ່ງລັດ. ແຕ່ພ້ອມກັນນັ້ນ, ກໍຍັງມີບັນຫາເຄັ່ງຮ້ອນຫຼາຍຢ່າງຕ້ອງໄດ້ຮັບການແກ້ໄຂ ”