ທ່ານນາຍົກລັດຖະມົນຕີ ຫງວຽນເຕີນຢູງ ກ່າວຄຳເຫັນຊີ້ນຳກອງປະຊຸມ
( vovworld ) – ຕອນເຊົ້າວັນທີ 7/3, ຢູ່ຮ່າໂນ້ຍ, ຫ້ອງວ່າການຄະນະຊີ້ນຳສູນກາງກ່ຽວກັບການປ້ອງກັນ, ຕ້ານໄພສໍ້ລາດບັງຫຼວງ ໄດ້ຈັດກອງປະຊຸມທົ່ວປະເທດສະຫລຸບ 5 ປີແຫ່ງການປະຕິບັດມະຕິສູນກາງພັກຄັ້ງທີ 3 ຊຸດທີ 10 ກ່ຽບກັບການເພີ່ມທະວີການນຳພາຂອງພັກທີ່ມີຕໍ່ວຽກງານປ້ອງກັນ, ຕ້ານໄພສໍ້ລາດບັງຫຼວງ, ຟູມເຟືອຍ; ສະຫລຸບ 5 ປີແຫ່ງການປະຕິບັດກົດໝາຍວ່າດ້ວຍການປ້ອງກັນ, ຕ້ານໄພສໍ້ລາດບັງຫຼວງ. ທ່ານນາຍົກລັດຖະມົນຕີ ຫງວຽນເຕີນຢູງ, ຫົວໜ້າຄະນະຊີ້ນຳສູນກາງກ່ຽວກັບການປ້ອງກັນ, ຕ້ານໄພສໍ້ລາດບັງຫຼວງ, ຜູ້ປະຈຳການຄະນະເລຂາ ເລຮົ່ງແອງ, ທ່ານຮອງນາຍົກລັດຖະມົນຕີ ຫງວຽນຊວນຟຸກ, ຮອງຫົວໜ້າຄະນະຊີ້ນຳສູນກາງກ່ຽວກັບການປ້ອງກັນ, ຕ້ານໄພສໍ້ລາດບັງຫຼວງເປັນປະທານຮ່ວມກອງປະຊຸມ.
ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈ້ງວ່າ: ພາຍຫລັງ 5 ປີແຫ່ງການປະຕິບັດມະຕິສູນກາງພັກຄັ້ງທີ 3 ຊຸດທີ 10, ບັນດາອົງຄະນະພັກ, ອຳນາດການປົກຄອງໄດ້ຕັ້ງໜ້າຊີ້ນຳ ແລະ ບັນລຸໄດ້ບັນດາໝາກຜົນໃນບາງຂົງເຂດ; ໄພສໍ້ລາດບັງຫຼວງ, ຟູມເຟືອຍໄດ້ຮັບການຄວບຄຸມເທື່ອລະກ້າວ. ທ່ານນາຍົກລັດຖະມົນຕີ ຫງວຽນເຕີນຢູງ ຢືນຢັນວ່າ: ວຽກງານຄົ້ນພົບ ແລະລົງໂທດບັນດາການກະທຳສໍ້ຫຼາດບັງຫຼວງບັນລຸໄດ້ບັນດາໝາກຜົນອັນຕັ້ງໜ້າ. ທ່ານຮອງນາຍົກລັດຖະມົນຕີ ຫງວຽນຊວນຟຸກ ໃຫ້ຮູ້ວ່າ:
“ສຳລັບ 8 ຄະດີສໍ້ລາດບັງຫຼວງທີ່ຮ້າຍແຮງເກີດກ່ອນປີ 2006 ຊື່ງຄະນະຊີ້ນຳສູນກາງເລືອກເຟັ້ນເພື່ອຊີ້ນຳນັບແຕ່ໄດ້ຮັບການສ້າງຕັ້ງຂຶ້ນ ກໍລ້ວນແຕ່ໄດ້ນຳມາພິພາກສາ. ສຳລັບ 21 ຄະດີສໍ້ຫຼາດບັງຫຼວງທີ່ຮ້າຍແຮງ, ສັບສົນ ໄດ້ພິພາກສາ 5 ຄະດີແລ້ວ, ສານກຳລັງສືບສວນສອບສວນ 2 ຄະດີ, ອົງການໄອຍະການກຳລັງສືບສວນສອບສວນ 3 ຄະດີ, ໂຈະຊົ່ວຄາວ 4 ຄະດີ, ພວມສືບສວນ 7 ຄະດີ….“
ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນໜັກວ່າ ວຽກງານປ້ອງກັນ, ຕ້ານໄພສໍ້ລາດບັງຫຼວງ ແມ່ນໜ້າທີ່ຈຸດສຸມ, ຮີບດ່ວນທີ່ສຸດໃນການກໍ່ສ້າງພັກ, ສ້າງກົງຈັກລັດໃນປະຈຸບັນ, ທ່ານສະເໜີວ່າ: “ຕ້ອງຍົກສູງຄວາມຕັດສິນໃຈ, ຄວາມຮັບຜິດຊອບຂອງບັນດາອົງຄະນະພັກ, ອຳນາດການປົກຄອງຂັ້ນຕ່າງໆ, ພິເສດແມ່ນບົດບາດ, ຄວາມຮັບຜິດຊອບຂອງຜູ້ນຳ. ຕ້ອງຍົກສູງບົດບາດ, ກຳລັງຕໍ່ສູ້ຂອງອົງຄະນະພັກ, ພິເສດຢູ່ຂັ້ນຮາກຖານກ່ວາອີກ. ຕ້ອງຍົກສູງລັກສະນະນຳໜ້າ ເປັນແບບຢ່າງຂອງສະມາຊິກພັກ“