ກອງປະຊຸມລັດຖະມົນຕີການເງິນ APEC ຄັ້ງທີ 19

ວັນພະຫັດ ທີ 30 ສິງຫາ ຄ.ສ. 2012 | 17:48:40

(vovworld) - ວັນທີ 30/8 ຢູ່ ມົດສະກູ, ສະຫະພັນ ລັດເຊຍ ໄດ້ດຳເນີນກອງປະຊຸມລັດຖະມົນຕີການເງິນ APEC ຄັ້ງທີ 19 ພາຍໃຕ້ການເປັນປະທານຂອງລັດຖະມົນຕີການເງິນ ສະຫະພັນລັດເຊຍ Anton Siluanov. ນີ້ແມ່ນເຫດການສຳຄັນທີ່ສຸດໃນວິວັດການຮ່ວມມືຂອງບັນດາລັດຖະມົນຕີການເງິນ APEC ເພື່ອກະກຽມໃຫ້ແກ່ກອງປະຊຸມສຸດຍອດ APEC ຊຶ່ງຈະດຳເນີນໄປໃນຕົ້ນເດືອນ 9/2012. ຄະນະຜູ້ແທນ ຫວຽດນາມ ໂດຍທ່ານ Truong Chi Trung ລັດຖະມົນຕີຊ່ວຍວ່າການກະຊວງການເງິນ ຫວຽດນາມ ນຳຫນ້າ ໄດ້ເຂົ້າຮ່ວມກອງປະຊຸມ. ສອງບັນຫາທີ່ໄດ້ຮັບຄວາມສົນໃຈເປັນພິເສດໃນກອງປະຊຸມຄັ້ງນີ້ ນັ້ນແມ່ນບັນຫາໝັ້ນຄົງດ້ານງົບປະມານ ແລະ ຍູ້ແຮງການສຶກສາ ແລະ ການເຜີຍແຜ່ຄວາມຮູ້ດ້ານການເງິນໃຫ້ແກ່ປະຊາຊົນ. ບັນດາທ່ານລັດຖະມົນຕີ ສົ່ງເສີມເລື່ອງສ້າງຍຸດທະສາດແຫ່ງຊາດກ່ຽວກັບການສຶກສາ ແລະ ເຜີຍແຜ່ຄວາມຮູ້ດ້ານການເງິນ ແລະ ນຳການສຶກສາຄວາມຮູ້ດ້ານການເງິນເຂົ້າໃນຫລັກສູດສິດສອນຢູ່ບັນດາໂຮງຮຽນມັດທະຍົມຢູ່ ບັນດາພື້ນຖານເສດຖະກິດສະມາຊິກ APEC ໃຫ້ເໝາະສົມກັບສະພາບຕົວຈິງຂອງແຕ່ລະປະເທດ. ເມື່ອສິ້ນສຸດກອງປະຊຸມ, ບັນດາລັດຖະມົນຕີການເງິນ APEC ໄດ້ຮັບຮອງເອົາຖະແຫລງການຮ່ວມ ແລະ ເຫັນດີ ຈະຈັດກອງປະຊຸມລັດຖະມົນຕີການເງິນ APEC ຄັ້ງທີ 20 ຢູ່ ບາລີ ປະເທດ ອິນໂດເນເຊຍ ໃນເດືອນ 9/2013.