ທ່ານ ຫງວຽນຊວັນທັ້ງ, ຜູ້ອຳນວຍການສະຖາບັນການເມືອງແຫ່ງຊາດໂຮ່ຈີມິນ, ປະທານສະພາທິດສະດີສູນກາງ ກ່າວຄຳເຫັນທີ່ກອງປະຊຸມສຳມະນາ (ພາບ: TTXVN)

ເນື່ອງໃນໂອກາດສະເຫຼີມສະຫຼອງ 75 ປີແຫ່ງວັນປະທານ  ໂຮ່ຈີມິນ ກັບຄືນຕວຽນກວາງນຳພາທົ່ວປະເທດຕໍ່ຕ້ານ (2 ເມສາ 1947 – 2 ເມສາ 2022), ຕອນເຊົ້າວັນທີ 31 ມີນາ, ຢູ່ຕວຽນກວາງ, ສະຖາບັນການເມືອງແຫ່ງຊາດໂຮ່ຈີມິນ ໄດ້ສົມທົບກັບຄະນະພັກແຂວງ ຕວຽນກວາງຈັດຕັ້ງກອງປະຊຸມສຳມະນາວິທະຍາສາດດ້ວຍຫົວຂໍ້ “ລຸງໂຮ່ກັບຄືນຕວຽນກວາງນຳພາທົ່ວປະເທດຕໍ່ຕ້ານ”. ກອງປະຊຸມສຳມະນາໄດ້ຈັດຕັ້ງຕາມຮູບແບບໂດຍກົງສົມທົບທາງໄກ.

ກ່າວຄຳເຫັນທີ່ກອງປະຊຸມ, ທ່ານ ຫງວຽນຊວັນທັ້ງ, ຜູ້ອຳນວຍການສະຖາບັນການເມືອງແຫ່ງຊາດໂຮ່ຈີມິນ, ປະທານສະພາທິດສະດີສູນກາງ ຢັ້ງຢືນວ່າ ຫ່າງຈາກນີ້ 75 ປີ, ພາຍຫລັງເກີດເຫດການທົ່ວປະເທດຕໍ່ຕ້ານພວກລ່າເມືອງຂຶ້ນຝລັ່ງ, ປະທານໂຮ່ຈີມິນ ໄດ້ອອກຂໍ້ຕົກລົງຄັ້ງປະຫວັດສາດນັ້ນແມ່ນ ກັບຄືນ ຕວຽນກວາງ ເພື່ອນຳພາວິວັດການຕໍ່ຕ້ານ, ກໍ່ສ້າງປະເທດຊາດ.

ທີ່ກອງປະຊຸມສຳມະນາ, ບັນດາຜູ້ແທນລ້ວນແຕ່ຢັ້ງຢືນວ່າ ເລື່ອງກັບຄືນ ຕວຽນກວາງນຳພາທົ່ວປະເທດຕໍ່ຕ້ານແມ່ນການຕັດສິນໃຈທີ່ສະແດງໃຫ້ເຫັນວິໄສທັດຍຸດທະສາດຂອງ ປະທານໂຮ່ຈີມິນ. ຕາມນັກວິທະຍາສາດແລ້ວ, ສຳລັບປະທານໂຮ່ຈີມິນ, ການຄັດເລືອກສະຖານທີ່ສ້າງຕັ້ງຖານທີ່ໝັ້ນຂອງການປະຕິວັດ ຫຼື ການຕໍ່ຕ້ານລ້ວນແຕ່ຂຶ້ນກັບວິໄສທັດຍຸດທະສາດຂອງ ປະທານໂຮ່ຈີມິນ.