(vovworld) – ດ້ວຍຫົວຂໍ້ວ່າ “ການຮ່ວມມືລົງທຶນ ແລະ ພັດທະນາອະນຸພາກພື້ນແມ່ນ້ຳຂອງ ຢ່າງໝັ້ນຄົງ”, ເວທີປາໄສຊັບພະຍາກອນ ແມ່ນ້ຳຂອງ ຄັ້ງທີ 2 ຖືກຈັດຂຶ້ນໃນຕອນເຊົ້າວັນທີ 10/5, ຢູ່ເທດສະບານເມືອງ ຕາມດາວ, ແຂວງ ຫວີງຟຸກ, ໂດຍມີການເຂົ້າຮ່ວມຂອງຜູ້ແທນ 100 ຄົນທີ່ຕາງໜ້າໃຫ້ບັນດາອົງການຄຸ້ມຄອງແຫ່ງລັດ, ບັນດາອົງການສັງຄົມຂອງ ຫວຽດນາມ, ລາວ, ກຳປູເຈຍ ແລະ ມຽນມາ ເຊິ່ງແມ່ນບັນດາປະເທດຂຶ້ນກັບເຂດອະນຸພາກພື້ນແມ່ນ້ຳຂອງ. ຕາມການຕີລາຄາຂອງບັນດານັກຊ່ຽວຊານເສດຖະກິດແລ້ວ, ຫວຽດນາມ ແລະ ບັນດາປະເທດອະນຸພາກພື້ນແມ່ນ້ຳຂອງ ແມ່ນສະຖານທີ່ລົງທຶນທີ່ດູດດືມໃຫ້ແກ່ບັນດາວິສາຫະກິດໃນໂລກ. ທ່ານ Christoph Schill, ຊ່ຽວຊານຂອງຫ້ອງການການຄ້າເອີລົບ ປະຈຳ ຫວຽດນາມ, ຖືວ່າ:
“ບັນດານັກລົງທຶນຂອງ ເອີລົບເຫັນໄດ້ຄວາມສາມາດບົ່ມຊ້ອນດ້ານຕະຫຼາດຂອງ ຫວຽດນາມ, ເຊິ່ງແມ່ນຕະຫຼາດກ່ຽວກັບການສົ່ງອອກ, ບໍລິໂພກອຸປະໂພກ ແລະ ເຂົາເຈົ້າເຫັນໄດ້ຄວາມສາມາດບົ່ມຊ້ອນສົ່ງອອກສິນຄ້າຂອງ ຫວຽດນາມເຂົ້າຕະຫຼາດອີຢູ. ນອກຈາກນັ້ນ, ຫວຽດນາມ ພວມມີຄວາມຕ້ອງການພັດທະນາພະລັງງານໄຟຟ້ານຳ້ຕົກ, ແຮງລົມ... ບັນດານັກລົງທຶນ ອີຢູ ພ້ອມແລ້ວທີ່ຈະຕອບສະໜອງຄວາມຕ້ອງການນີ້. ແຫຼ່ງເງິນລົງທຶນໂດຍກົງຈາກຕ່າງປະເທດເຂົ້າ ຫວຽດນາມ ອາດຈະເພີ່ມຂຶ້ນຖ້າຫາກ ຫວຽດນາມ ສ້າງເງື່ອນໄຂໃຫ້ບັນດານັກລົງທຶນ, ປັບປຸງສະພາບແວດລ້ອມແຫ່ງການລົງທຶນ, ປັບປຸງສະພາບແວດລ້ອມດ້ານກົດໝາຍ ແລະ ບັນດາວິສາຫະກິດ ຫວຽດນາມ ຮັກສາຄຳໝັ້ນສັນຍາຂອງຕົນທີ່ມີຕໍ່ຄູ່ຮ່ວມມື. ນອກຈາກນັ້ນ, ຫວຽດນາມ ກໍ່ຄວນຍົກສູງຄຸນນະພາບແຫຼ່ງຊັບພະຍາກອນມະນຸດ ແລະ ການບໍລິການຕ່າງໆ”
ໃນຊຸມປີຜ່ານມາ, ຫວຽດນາມ ໄດ້ລົງທຶນ 335 ໂຄງການ, ມີມູນຄ່າກ່ວາ 7 ຕື້ USA ຢູ່ບັນດາປະເທດອະນຸພາກພື້ນແມ່ນ້ຳຂອງ. ຫວຽດນາມ ມີຄວາມເອົາໃຈໃສ່ເປັນພິເສດ ແລະ ຖືການຮ່ວມມືພັດທະນາເສດຖະກິດກັບບັນຫາປະເທດອະນຸພາກພື້ນແມ່ນ້ຳຂອງ ເປັນສຳຄັນ ແລະ ລັດຖະບານ ຫວຽດນາມ ມີນະໂຍບາຍສົ່ງເສີມ, ບຸລິມະສິດ ແລະ ໜູນຊ່ວຍບັນດາວິສາຫະກິດລົງທຶນຢູ່ ລາວ, ກຳປູເຈຍ ແລະ ໄລຍະຈະມາເຖິງແມ່ນ ມຽນມາ.