(vovworld) - ຕອນບ່າຍວັນທີ 4/11, ທ່ານນາຍົດລັດຖະມົນຕີການາດາ Stephen Harpe ໄດ້ເດີນທາງໄປນະຄອນ Agra, ເລີ່ມຕົ້ນການຢ້ຽມຢາມອິນເດຍ ເປັນເວລາ 6 ວັນ ເພື່ອແນໃສ່ຊຸກຍູ້ການພົວພັນຮ່ວມມືສອງຝ່າຍໃນບັນດາຂົງເຂດເສດຖະກິດ, ການຄ້າ, ການລົງທຶນ ແລະ ນິວເຄຼຍພົນລະເມືອງ. ຄາດວ່າ, ທ່ານນາຍົກລັດຖະມົນຕີ Harpe ຈະມີການເຈລະຈາກັບຄູ່ຮ່ວມຕຳແໜ່ງອິນເດຍ Manmohan Singh, ປຶກສາຫາລືບັນດາມາດຕະການເພີ່ມທະວີການຮ່ວມມືລະຫວ່າງສອງປະເທດ, ພິເສດແມ່ນຜັນຂະຫຍາຍສັນຍານິວເຄຼຍພົນລະເມືອງ ເຊິ່ງໄດ້ລົງນາມໃນປີ 2010. ວົງການສັງເກດການໄດ້ໃຫ້ຂໍ້ສັງເກດວ່າ ການເດີນທາງຢ້ຽມຢາມ ອິນເດຍ ຄັ້ງນີ້ ຂອງທ່ານນາຍົກລັດຖະມົນຕີ Harpe ຊີ້ໃຫ້ເຫັນນະໂຍບາຍການຕ່າງປະເທດມຸ່ງໄປສູ່ອາຊີຂອງ Ottawa. ໃນບົດກ່າວປາໄສສຳຄັນມໍ່ໆມານີ້ຢູ່ກອງປະຊຸມ “ການາດາ ໃນສະຕະວັດປາຊີຟິກ”, ທ່ານລັດຖະມົນຕີກະຊວງການເງິນການາດາ Jim Flaherty ໄດ້ເນັ້ນນັກເຖິງການເປີດກວ້າງດ້ານການຄ້າກັບອາຊີ ແມ່ນບຸລິປະສິດຂອງປະເທດນີ້. ຕາມທ່ານ Flaherty ແລ້ວ, ໂລກພວມມຸ່ງໄປສູ່ອາຊີ ເພື່ອຊອກຫາກາລະໂອກາດດ້ານເສດຖະກິດ ແລະ ບັນດາວິສາຫະກິດການາດາ ບໍ່ຊັກຊ້າໃນການແຂ່ງຂັນນີ້. ພິເສດແມ່ນບັນດາຕະຫຼາດຢູ່ພາກພື້ນອາຊີ - ປາຊີຟິກ ກໍພວມພັດທະນາຢ່າງວ່ອງໄວ ແລະ ບັນດາວິສາຫະກິດການາດາ ສາມາດຊຸກຍູ້ການຄ້າກັບພາກພື້ນນີ້ ຜ່ານບັນດາສັນຍາຊຸກຍູ້ດ້ານການຄ້າ.