(VOVWORLD) - ຕອນເຊົ້າວັນທີ 05 ພະຈິກ, ຢູ່ຮ່າໂນ້ຍ, ບັນດາສະມາຊິກສະພາແຫ່ງຊາດເຂົ້າຮ່ວມກອງປະຊຸມສະໄໝສາມັນເທື່ອທີ 8, ສະພາແຫ່ງຊາດ ຫວຽດນາມ ຊຸດທີ XV ໄດ້ປຶກສາຫາລືຢູ່ຫໍປະຊຸມກ່ຽວກັບສະພາບການປະຕິບັດງົບປະມານແຫ່ງລັດ ປີ 2024, ແຜນງົບປະມານແຫ່ງລັດ, ແຜນຈັດແບ່ງງົບປະມານສູນກາງປີ 2025.
 ກອງປະຊຸມສະໄໝສາມັນເທື່ອທີ 8, ສະພາແຫ່ງຊາດ ຫວຽດນາມ ຊຸດທີ XV (ພາບ: quochoi.vn) |
ການເກັບງົບປະມານແຫ່ງລັດປີ 2024 ຄາດວ່າເພີ່ມຂຶ້ນ 10,1% ເມື່ອທຽບໃສ່ແຜນງົບປະມານ; ບັນລຸອັດຕາລະດົມເຂົ້າງົບປະມານແຫ່ງລັດປະມານ 16,5% GDP. ກ່ຽວກັບລາຍຈ່າຍງົບປະມານແຫ່ງລັດ, ຄາດວ່າທັງປີເພີ່ມຂຶ້ນ 7,7% ເມື່ອທຽບໃສ່ແຜນງົບປະມານ. ເປັນອັນວ່າ, ຄາດວ່າ ລາຍຈ່າຍເກີນລາຍຮັບທັງປີ 2024 ເທົ່າກັບ 3,4% GDP, ຕ່ຳກວ່າແຜນງົບປະມານ ຍ້ອນວ່າຫຼຸດການເບີກຈ່າຍແຫຼ່ງເງິນກູ້ຂອງງົບປະມານທ້ອງຖິ່ນລົງ.
ກ່າວຄ່ຳເຫັນໃນກອງປະຊຸມ, ທ່ານຮອງປະທານສະພາແຫ່ງຊາດ ຫວຽດນາມ ຫງວຽນດຶກຫາຍ ເນັ້ນໜັກວ່າ:
“ປີ 2024, ການຄຸ້ມຄອງ, ບໍລິຫານງົບປະມານແຫ່ງລັດ ມີໝາກຜົນຕັ້ງໜ້າ, ໂດຍພື້ນຖານແລ້ວ ໄດ້ຕອບສະໜອງຄວາມຕ້ອງການຈ່າຍຮັບໃຊ້ການພັດທະນາເສດຖະກິດ - ສັງຄົມ, ການໜູນຊ່ວຍສັງຄົມ, ການປ້ອງກັນຊາດປ້ອງກັນຄວາມສະຫງົບ, ການເພີ່ມລະດັບເງິນເດືອນແຮງງານຂັ້ນຕ່ຳ, ລາຍຈ່າຍໜີ້ສາທາລະນະເກີນລາຍຮັບ ພວມຢູ່ໃນລະດັບສະພາແຫ່ງຊາດວາງອອກ. ປີ 2025, ສ້າງໂຄງປະກອບງົບປະມານຄືນໃໝ່ຕາມທິດຍືນຍົງ; ເພີ່ມທະວີການປ້ອງກັນ, ຕ້ານການສໍ້ລາດບັງຫຼວງ, ປະກົດການຫຍໍ້ທໍ້, ໃຊ້ຈ່າຍຟຸມເຟືອຍ; ຍົກສູງປະສິດທິພາບ, ປະສິດທິຜົນໃນການຄຸ້ມຄອງງົບປະມານແຫ່ງລັດ.”
ຕອນບ່າຍຂອງວັນດຽວກັນ, ສະພາແຫ່ງຊາດປຶກສາຫາລືໃນຫໍປະຊຸມກ່ຽວກັບບາງເນື້ອໃນທີ່ມີຄຳເຫັນແຕກຕ່າງກັນຂອງຮ່າງກົດໝາຍວ່າດ້ວຍທໍລະນີສາດ ແລະ ບໍ່ແຮ່.