(vovworld)- ຕອນບ່າຍວັນທີ 23/7, ທ່ານປະທານສະພາແຫ່ງຊາດ ຫງວຽນຊິງຮູ່ງ ແລະ ຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ໄດ້ເຂົ້າຢ້ຽມຂ່ຳນັບທ່ານາງປະທານາທິບໍດີ ສເກົາຫຼີ Park Geun hye. ການນຳສອງທ່ານໃຫ້ຄຳໝັນສັນຍາຈະຊຸກຍູ້ການພົວພັນຮ່ວມມືຍຸດທະສາດລະຫວ່າງຫວຽດນາມ-ສເກົາຫຼີ ກ່ວາອີກ. ການນຳສອງທ່ານສະແດງຄວາມພາກພູມໃຈເມື່ອເຫັນວ່າ ການພົວພັນລະຫວ່າງ ຫວຽດນາມ -ສເກົາຫຼີ ໃນ 21 ປີຜ່ານມາ ໄດ້ຮັບການປັບປຸງຢ່າງບໍ່ຢຸດຢັ້ງ, ພັດທະນາຢ່າງເລິກເຊິ່ງກ້ວາງຂວາງໃນທຸກຂົງເຂດ. ສອງປະເທດກາຍເປັນຄູ່ຮ່ວມມືທີ່ເຂົ້າອົກເຂົ້າໃຈ ແລະ ເຊື່ອມໝັ້ນຊື່ງກັນ ແລະ ກັນ. ທ່ານປະທານສະພາແຫ່ງຊາດ ຫງວຽນຊິງຮູ່ງ ຢືນຢັນວ່າ: ການນຳ ແລະ ປຊຊ ຫວຽດນາມ ຍາມໃດກໍ່ຖືເປັນສຳຄັນ ແລະ ຊຸກຍູ້ການພົວພັນມິດຕະພາບ, ການຮ່ວມມື ແລະ ຄູ່ຮ່ວມມືຍຸກທະສາດກັບ ສເກົາຫຼີ. ສ່ວນທ່ານາງປະທານາທິບໍດີ ສເກົາຫຼີ Park Geun hye ກໍ່ໄດ້ເຫັນດີ ແລະ ຕີລາຄາສູງບັນດາຜົນງານພັດທະນາເສດຖະກິດ ສັງຄົມຂອງໜວຽດນາມ ໃນໄລຍະຜ່ານມາ ແລະ ພາກພູມໃຈກ່ຽວກັບການພັດທະນາການພົວພັນຮ່ວມມືລະຫວ່າງສອງປະເທດ ພິເສດແມ່ນນັບແຕ່ສອງຝ່າຍໄດ້ຍົກການພົວພັນເປັນຄູ່ຮ່ວມມືຍຸດທະສາດໃນປີ 2009. ການນຳສອງທ່ານເຫັນດີເປັນເອກະສັນຈະສືບຕໍ່ຮັກສາ ແລະ ເພີ່ມທະວີການຢ້ຽມຢາມ ແລະ ພົບປະຄັ້ງຕ່າງໆລະຫວ່າງການນຳຂັ້ນສູງ, ຂັ້ນຕ່າງໆ, ບັນດາຂະແໜງການ ແລະ ທ້ອງຖິ່ນສອງປະເທດ, ປະກອບສ່ວນປັບປຸງ ແລະ ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ; ເພີ່ມທະວີການພົວພັນດ້ານເສດຖະກິດ, ລົງທຶນ, ການຄ້າ, ຮ່ວມມືພັດທະນາ, ການອອກແຮງງານ, ການທ່ອງທ່ຽວ….
ກ່ອນໜ້ານັ້ນ, ຕອນເຊົ້າວັນທີ 23/7, ທ່ານປະທານສະພາແຫ່ງຊາດ ຫງວຽນຊິງຮູ່ງ ແລະ ຄະນະຜູ້ແທນຂັ້ນສູງ ສະພາແຫ່ງຊາດ ຫວຽດນາມ ໄດ້ໄປຢ້ຽມຢາມສຳນັກງານກຸ່ມບໍລິສັດ Kumho Asiana ແລະ ໃຫ້ການຕ້ອນຮັບການນຳກຸ່ມບໍລິສັດ Lotte. ທີ່ການຕ້ອນຮັບ, ທ່ານປະທານສະພາແຫ່ງຊາດ ຫງວຽນຊິງຮູ່ງ ຕີລາຄາສູງບົດບາດ ແລະ ການປະກອບສ່ວນອັນໃຫຍ່ຫຼວງຂອງບັນດາກຸ່ມບໍລິສັດເສດຖະກິດ ສ ເກົາຫຼີ, ໃນນັ້ນມີກຸ່ມບໍລິສັດ Kumho Asiana ແລະ ກຸ່ມບໍລິສັດ Lotte ໃນການຊຸກຍູ້ການພົວພັນຄູ່ຮ່ວມມື, ຮ່ວມມືຍຸດທະສາດລະຫວ່າງ ຫວຽດນາມ ແລະ ສ ເກົາຫຼີ. ທ່ານປະທານສະພາແຫ່ງຊາດ ຫວັງວ່າ: ກຸ່ມບໍລິສັດ Kumho Asiana ແລະ Lotte ສືບຕໍ່ເປີດກ້ວາງການລົງທຶນເຂົ້າ ຫວຽດນາມ, ພ້ອມທັງຕັ້ງໜ້າເອົາໃຈໃສ່ບຳລຸງສ້າງແຫຼ່ງຊັບພະຍາກອນມະນຸດ, ມອບໂອນເຕັກໂນໂລຢີໃຫ້ແກ່ບັນດາຄູ່ຮ່ວມມື ຫວຽດນາມ. ທ່ານປະທານສະພາແຫ່ງຊາດ ຫງວຽນຊິງຮູ່ງ ຢັ້ງຢືນວ່າ: ສະພາແຫ່ງຊາດ ຫວຽດນາມ ຈະພ້ອມກັບລັດຖະບານ ຫວຽດນາມ ສືບຕໍ່ມານະພະຍາຍາມສ້າງສະພາບແວດລ້ອມແຫ່ງການດຳເນີນທຸລະກິດສະດວກເພື່ອໃຫ້ບັນດາວິສາຫະກິດ ສ ເກົາຫຼີ ໃນນັ້ນມີ ກຸ່ມບໍລິສັດ Kumho Asiana ແລະ ກຸ່ມບໍລິສັດ Lotte ເຄື່ອນໄຫວຢູ່ ຫວຽດນາມ.
ທ່ານປະທານສະພາແຫ່ງຊາດ ຫງວຽນຊິງຮູ່ງ ແລະ ທ່ານປະທານສະພາແຫ່ງຊາດ ສ ເກົາຫຼີ Kang Chang – hee
ກ່ອນໜ້ານັ້ນ, ຕອນບ່າຍວັນທີ 22/7, ຢູ່ນະຄອນຫຼວງ ເຊີອູນ, ແຫ່ງ ສ ເກົາຫຼີ, ທ່ານປະທານສະພາແຫ່ງຊາດ ຫງວຽນຊິງຮູ່ງ ມີການເຈລະຈາກັບທ່ານປະທານສະພາແຫ່ງຊາດ ສ ເກົາຫຼີ Kang Chang – hee. 2 ຝ່າຍພ້ອມກັນຢືນຢັນຄວາມມານະພະຍາຍາມຊຸກຍູ້ການພົວພັນຮ່ວມມື, ຄູ່ຮ່ວມມືຍຸດທະສາດລະຫວ່າງ 2 ປະເທດໃຫ້ຂຶ້ນສູ່ລະດັບສູງໃໝ່, ຕອບສະໜອງການພັດທະນາ, ສັນຕິພາບ ແລະ ສະຖຽນລະພາບ, ກໍ່ຄືຜົນປະໂຫຍດຂອງປະຊາຊົນ 2 ປະເທດ. ເພື່ອປັບປຸງສາຍພົວພັນຍຸດທະສາດ ຫວຽດນາມ - ສ ເກົາຫຼີ, ທ່ານປະທານສະພາແຫ່ງຊາດ ຫງວຽນຊິງຮູ່ງ ປາດຖະໜາວ່າລັດຖະບານ, ສະພາແຫ່ງຊາດ 2 ປະເທດຈະຊຸກຍູ້ການຮ່ວມມືໃນຂົງເຂດຕ່າງໆ, ພິເສດແມ່ນການຮ່ວມມືດ້ານເສດຖະກິດ, ຄົນງານ, ການພົວພັນແລກປ່ຽນດ້ານວັດທະນະທຳ.... 2 ຝ່າຍສູ້ຊົນນຳວົງເງິນການຄ້າ 2 ສົ້ນໃຫ້ບັນລຸ 30 ຕື້ USD ໃນປີ 2015, ສ້າງເງື່ອນໄຂສະດວກໃຫ້ແກ່ວິສາຫະກິດຂອງແຕ່ລະປະເທດ. ທ່ານປະທານສະພາແຫ່ງຊາດ ຫງວຽນຊິງຮູ່ງ ຢືນຢັນວ່າ ສະພາແຫ່ງຊາດ ຫວຽດນາມ ພ້ອມແລ້ວທີ່ຈະຮ່ວມມືກັບສະພາແຫ່ງຊາດ ສ ເກົາຫຼີ ໃນການຊຸກຍູ້ ແລະ ຕິດຕາມກວດກາເລື່ອງປະຕິບັດບັນດາສັນຍາ, ຂໍ້ຕົກລົງລະຫວ່າງລັດຖະບານ 2 ປະເທດ ເພື່ອແນໃສ່ນຳມາເຊິ່ງປະສິດທິຜົນໃຫ້ທັງ 2 ຝ່າຍ. ທ່ານປະທານສະພາແຫ່ງຊາດ ຫງວຽນຊິງຮູ່ງ ສະເໜີວ່າ:
“ຂ້າພະເຈົ້າ ແລະ ທ່ານ Kang Chang – hee ຮູ້ສຶກເປັນກຽດທີ່ໄດ້ເປີດສາກໃຫ້ປີທຳອິດຂອງການຮ່ວມມືໃນໄລຍະ 20 ປີຈະມາເຖິງ. ການຮ່ວມມືລະຫວ່າງ ສ ເກົາຫຼີ ແລະ ຫວຽດນາມ ຈະນຳການພົວພັນລະຫວ່າງ 2 ປະເທດພັດທະນາຢ່າງຮອບດ້ານ, ສົມກັບລະດັບຄູ່ຮ່ວມມືຍຸດທະສາດ. ພວກຂ້າພະເຈົ້າ ກໍ່ຊຸກຍູ້ການພັດທະນາຮອບດ້ານດ້ວຍຂອບຂະໜາດໃຫຍ່ກ່ວາ, ຄຸນນະພາບດີກ່ວາ, ເລິກເຊິ່ງກ່ວາໃນໄລຍະຈະມາເຖິງ. 20 ປີຜ່ານມາ, ການຮ່ວມມື ສ ເກົາຫຼີ ແລະ ຫວຽດນາມ ໄດ້ປະກອບສ່ວນຊ່ວຍໃຫ້ພວກຂ້າພະເຈົ້າຫລຸດຜົ້ນອອກຈາກສະພາບທຸກຍາກ, 20 ປີຈະມາເຖິງຈະຊ່ວຍໃຫ້ພວກຂ້າພະເຈົ້າກໍ່ສ້າງປະເທດ ອຸດສາຫະກຳ ຫັນໄປສູ່ໄລຍະປະເທດພັດທະນາ. ຄຽງຄູ່ກັນນັ້ນ, ພວກຂ້າພະເຈົ້າກໍ່ເຫັນດີສະໜັບສະໜູນເຊິ່ງກັນ ແລະ ກັນບໍ່ພຽງແຕ່ໃນດ້ານການຄ້າ ເທົ່ານັ້ນຫາກຍັງໃນການສົນທະນາທາງດ້ານການທູດ ແລະ ໃນເວທີສາກົນອີກດ້ວຍ.”
ພາຍຫຼັງການເຈລະຈາ, ປະທານສະພາແຫ່ງຊາດ 2 ທ່ານໄດ້ເຊັນຂໍ້ຕົກລົງຮ່ວມມືລະຫວ່າງສະພາແຫ່ງຊາດ ຫວຽດນາມ ແລະ ສ ເກົາຫຼີ, ເປັນສັກຂີພິຍານພິທີເຊັນຂໍ້ຕົກລົງຮ່ວມມືລະຫວ່າງຫ້ອງວ່າການສະພາແຫ່ງຊາດ ຫວຽດນາມ ແລະ ຄະນະເລຂາ ສະພາແຫ່ງຊາດ ສ ເກົາຫຼີ. ຂໍ້ຕົກລົງນີ້ແມ່ນພື້ນຖານດ້ານນິຕິກຳສຳຄັນເພື່ອຊຸກຍູ້ການພົວພັນຮ່ວມມືລະຫວ່າງອົງການນິຕິບັນຍັດ 2 ປະເທດ.