ຕອນຄ່ຳວັນທີ 8/12 ຕາມເວລາຫວຽດນາມ, ໃນມື້ເຮັດວຽກທຳອິດໃນການຢ້ຽມຢາມສັນຖະວະໄມຕີລາດຊະອານາຈັກ ອັງກິດ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ມີການພົບປະກັບທ່ານຮອງນາຍົກລັດຖະມົນຕີ ອັງກິດ Nick Cleeg. ທີ່ການພົບປະ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໃຫ້ຮູ້ວ່າ: ຈຸດປະສົງຂອງການຢ້ຽມຢາມລາດຊະອານາຈັກອັງກິດເປັນຄັ້ງທຳອິດ ໃນຖານະເປັນປະທານສະພາແຫ່ງຊາດ ແມ່ນເພື່ອແນໃສ່ເພິ່ມທະວີ, ປັບປຸງສາຍພົວພັນຄູ່ຮ່ວມມືຍຸດທະສາດລະຫວ່າງ 2
ປະເທດເຊິ່ງໄດ້ຖືກສ້າງຕັ້ງມາແຕ່ປີ 2010 ໃຫ້ດີຍິງຂຶ້ນອີກ, ຢັ້ງຢືນນະໂຍບາຍການຕ່າງປະເທດຂອງຫວຽດນາມ ໂດຍສືບຕໍ່ຖືເປັນສຳຄັນ ການພັດທະນາການພົວພັນຮ່ວມມືກັບບັນດາປະເທດ ອີຢູ, ໃນນັ້ນມີລາດຊະອານາຈັກ ອັງກິດ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ຢັ້ງຢືນວ່າ: ສະພາແຫ່ງຊາດ ແລະ ລັດຖະບານຫວຽດນາມ ຍາມໃດກໍ່ສ້າງເງື່ອນໄຂອຳນວຍຄວາມສະດວກເພື່ອໃຫ້ວິສາຫະກິດ 2
ປະເທດ ເພິ່ມທະວີການຮ່ວມມື, ດຳເນີນທຸລະກິດຢ່າງມີປະສິດທິຜົນ, ຍາວນານ ແລະ ເປັນປົກກະຕິ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ຫວັງວ່າ ລັດຖະບານ, ສະພາແຫ່ງຊາດອັງກິດສືບຕໍ່ສະໜັບສະໜູນຫວຽດນາມ ເພິ່ມທະວີການຮ່ວມມືກັບ ສະຫະພາບເອີລົບ (ຫຼື ອີຢູ) ແລະ ໜູນຊ່ວຍຫວຽດນາມໃນການເຈລະຈາສັນຍາການຄ້າເສລີ ກັບ ອີຢູ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ຢືນຢັນຈະເພິ່ມທະວີການແລກປ່ຽນ, ສົມທົບກັບ ອັງກິດ ໃນການແກ້ໄຂບັນດາບັນຫາສາກົນ, ພາກພື້ນເຊິ່ງຕ່າງຝ່າຍຕ່າງມີຄວາມສົນໃຈ.
ສ່ວນທ່ານຮອງນາຍົກລັດຖະມົນຕີ ອັງກິດ Nick Cleeg ຢືນຢັນນະໂຍບາຍຮ່ວມມືຂອງ
ລາດຊະອານາຈັກ ອັງກິດ ທີ່ມີຕໍ່ຫວຽດນາມ, ໃນນັ້ນມີການໜູນຊ່ວຍ ທຶນ ODA ໃຫ້ແກ່ຫວຽດນາມຮອດປີ 2016 ດ້ວຍຍອດມູນຄ່າແມ່ນ 70 ລ້ານປອນ. ທ່ານຮອງນາຍົກລັດຖະມົນຕີ ອັງກິດ ໃຫ້ຮູ້ວ່າ:
ລາດຊະອານາຈັກ ອັງກິດຈະສືບຕໍ່ເພິ່ມທະວີຊຸກຍູ້ການພົວພັນຮ່ວມມືຫຼາຍດ້ານກັບຫວຽດນາມ ເພື່ອໃຫ້ 2 ປະເທດ ນັບມື້ນັບພັດທະນາກ່ວາອີກໃນຊຸມປີທີ່ຈະມາເຖິງ.