ຄວາມເຄັ່ງຕຶງຢູ່ຕາເວັນອອກກາງ: ອິດສະຣາແອັນ ສືບຕໍ່ເພີ່ມກຳລັງກົດດັ່ນຕໍ່ພາກເໜືອເຂດ ກາຊາ
(VOVWORLD) - ວັນທີ 04 ພະຈິກ, ການບຸກໂຈມຕີທາງອາກາດຂອງ ອິດສະຣາແອັນ ໄດ້ເຮັດໃຫ້ຊາວ ປາແລັດສະຕິນ ຢ່າງໜ້ອຍສຸດ 10 ຄົນຢູ່ທາງພາກເໜືອເຂດ ກາຊາ ເສຍຊີວິດ ແລະ ຫຼາຍຄົນຖືກບາດເຈັບໃນການບຸກໂຈມຕີທາງອາກາດທັງ 2 ຄັ້ງ.
 ຕຶກອາຄານຢູ່ ເຂດ ກາຊາ ຖືກພັງທະລາຍຍ້ອນການບຸກໂຈມຕີທາງອາກາດຂອງ ອິດສະຣາແອັນ (ພາບ: ສຳນັກຂ່າວສານ ຊິນຮວາ) |
ກໍໃນວັນດຽວກັນ, ກອງທັບ ອິດສະຣາແອັນ ໃຫ້ຮູ້ວ່າ ສະຫາຍ Riad Rida Gahzzawi ຜູ້ບັນຊາການກົມກອງລູກສອນໄຟຕ້ານລົດຖັງ ຂຶ້ນກັບກຳລັງ ຊັ້ນຢ້ຽມ Radwan ຂອງ ເຮັກໂບລາ ໄດ້ເສຍຊີວິດ. ກ່ອນໜ້ານັ້ນ, ໃນທ້າຍເດືອນ ຕຸລາ, ອິດສະຣາແອັນ ກໍຖະແຫຼງວ່າ ໄດ້ລອບສັງຫານຮອງຫົວໜ້າຜູ້ບັນຊາການກຳລັງ Radwan ຂອງ ເຮັກໂບລາ ໃນບັ້ນບຸກໂຈມຕີທາງອາກາດຢູ່ເຂດ Nabatieh ຂອງ ລີບັງ.
ໃນການຜັນແປອື່ນ, ວັນທີ 04 ພະຈິກ, ກະຊວງການຕ່າງປະເທດ ເຢຍລະມັນ ໄດ້ຮຽກຮ້ອງ ອິດສະຣາແອັນ ສ້າງເງື່ອນໄຂສະດວກໃຫ້ແກ່ການຊ່ວຍເຫຼືອມະນຸດສະທຳໄດ້ເຂົ້າເຖິງເຂດພາກເໜືອ ກາຊາ ເພາະວ່າເຂດດັ່ງກ່າວພວມຂາດແຄນແຫຼ່ງຊ່ວຍເຫຼືອ; ປະຊາຊົນຕ້ອງດຳລົງຊີວິດໃນສະພາບ “ສິ້ນຫວັງ” ແລະ “ບໍ່ສາມາດອົດທົນໄດ້ຕື່ມອີກ”. ກ່ອນໜ້ານັ້ນ, ອາເມລິກາ ກໍໄດ້ຍົກອອກ “ຄຳຂາດ” ໃຫ້ແກ່ ອິດສະຣາແອັນ ໂດຍຮຽກຮ້ອງໃຫ້ປົວແປງສະພາບການມະນຸດສະທຳຢູ່ເຂດ ກາຊາ ໃນເດືອນນີ້ ຫຼື ຈະຕ້ອງປະເຊີນໜ້າກັບບັນດາຂໍ້ຈຳກັດອັນຊ້ອນແຝງສຳລັບການຊ່ວຍເຫຼືອດ້ານການທະຫານຈາກ ວໍຊິງຕັນ.